Mga Pamangkot Gikan sa mga Bumalasa

Ang Isaias kapitulo 53 nagaunod sang bantog nga tagna tuhoy sa Mesias. Ang bersikulo 10 nagasiling: “Nalipay mismo si Jehova sa pagdugmok sa iya; ginpamasakit niya sia.” Ano ang buot silingon sini?

Mahapos mahangpan kon ngaa mahimo mag-utwas ang pamangkot tuhoy sa Isaias 53:10. Ang matuod nga mga Cristiano wala nagahunahuna nga ang aton mainawaon kag mapinalanggaon nga Dios magakalipay sa pagdugmok ukon sa pagpamasakit kay bisan ­sin-o. Ang Biblia nagahatag sa aton sing basihan agod magsalig nga wala nalipay ang Dios sa pagpaantos sa inosente. (Deuteronomio 32:4; Jeremias 7:30, 31) Sa sulod sang mga siglo mahimo ginpahanugutan ni Jehova sa pila ka hitabo ang pag-antos tungod sa mga rason nga nahisuno sa iya kaalam kag gugma. Apang pat-od nga wala niya ginpahanabo nga mag-antos ang iya pinalangga nga Anak, si Jesus. Busa, ano gid ang buot silingon sini nga dinalan?

Ti, mabuligan kita nga mahangpan ang buot silingon sini kon binagbinagon naton sing bug-os ang bersikulo, nagatalupangod sang duha ka paglutaw sang tinaga nga “kalipay.” Ang Isaias 53:10 mabasa: “Nalipay mismo si Jehova sa pagdugmok sa iya; ginpamasakit niya sia. Kon himuon mo ang iya kalag subong halad-tungod-sa-paglapas, makita niya ang iya kaliwat, palawigon niya ang iya adlaw, kag sa iya kamot magamadinalag-on kon ano ang kalipay ni Jehova.”

Ang kabug-usan nga mensahe sang Biblia nagapakita nga “ang kalipay ni Jehova,” nga ginsambit sa katapusan sang bersikulo, nasentro sa paghimo sang iya katuyuan paagi sa Ginharian. Ang paghimo sini ni Jehova magabindikar sang iya soberanya kag magapaposible nga madula ang napanubli nga sala sang matinumanon nga mga tawo—ang aton mga sala. (1 Cronica 29:11; Salmo 83:18; Binuhatan 4:24; Hebreo 2:14, 15; 1 Juan 3:8) Ang paagi sini tanan amo nga ang Anak sang Dios dapat mangin tawo kag mag-aman sing nagagawad nga halad. Subong sang aton nahibaluan, nag-antos si Jesus subong resulta. Ginasugiran kita sang Biblia nga sia “nakatuon sing pagkamatinumanon gikan sa mga butang nga iya gin-antos.” Busa nakapanginpulos si Jesus sa sadto nga pag-antos.—Hebreo 5:7-9.

Nahibaluan sing abanse ni Jesus nga yadtong dungganon nga dalanon nga iya laktan magalakip sing pila ka pag-antos. Maathag ini sa iya mga pinamulong nga ginrekord sa Juan 12:23, 24, diin aton mabasa: “Ang takna nag-abot para sa Anak sang tawo nga himayaon. Sa pagkamatuod nagasiling ako sa imo, Tubtob ang uyas sang trigo indi mahulog sa duta kag mapatay, magapabilin ini nga uyas; apang kon ini mapatay, magapamunga ini sing madamo.” Huo, nahibaluan ni Jesus nga dapat huptan niya ang iya integridad tubtob kamatayon. Ang kasaysayan nagpadayon: “‘Natublag karon ang akon kalag, kag ano ang akon isiling? Amay, luwasa ako sini nga tion. Walay sapayan sini, amo ini kon ngaa nagkari ako sa sini nga takna. Amay, himayaa ang imo ngalan.’ Busa ang isa ka tingog gikan sa langit nagsiling: ‘Ginhimaya ko na ini kag himayaon ko ini liwat.’”—Juan 12:27, 28; Mateo 26:38, 39.

Sa amo sini nga konteksto nga mahangpan naton ang Isaias 53:10. Nahibaluan gid ni Jehova nga ang eksperiensia sang iya Anak nagalakip sang pagdugmok sa isa ka kahulugan. Apang sa paghunahuna sang mahimayaon kag daku nga kaayuhan nga magaresulta, nalipay si Jehova sa kon ano ang maeksperiensiahan ni Jesus. Sa sina nga kahulugan nga si Jehova “nalipay sa pagdugmok,” ukon sa pagkadugmok, sang Mesias. Kag nalipay man si Jesus sa kon ano ang iya mahimo kag nahimo. Sa pagkamatuod, subong sang ginhinakop sang Isaias 53:10, ‘sa iya kamot nagmadinalag-on kon ano ang kalipay ni Jehova.’