Report sang mga Manugbantala sang Ginharian

Pagbunyag sa mga Binhi sang Kamatuoran sa Chile

SA DESYERTO sa naaminhan nga Chile, tinuig ang mahimo nga magligad antes mag-ulan. Apang kon mag-ulan gid man, ang kigas kag batuhon nga duta nangin isa ka alpombra sang lainlain sing duag nga kabulakan. Ginaganyat sining matahom nga talan-awon ang mga turista halin sa lainlain nga mga duog sa pungsod.

Apang, kapin pa ka makawiwili nga hitabo ang nagakatabo sa mga tawo sa Chile. Nagailig ang tubig sang kamatuoran gikan sa Biblia sa tagsa ka pamusod sang pungsod, kag madamong sinsero nga tawo ang “nagapamukadkad” nga mangin mga disipulo ni Jesucristo. Ang isa ka paagi nga gin­ga­mit sa pagpalapnag sining tubig sang kamatuoran amo ang telepono. Ginailustrar sang masunod nga mga eksperiensia ang maayo nga mga resulta nga natigayon sa sini nga paagi sang pagpanaksi.

• Ginpangabay ang isa ka bug-os tion nga ebanghelisador nga si Karina nga ipasundayag sa isa ka programa sa sirkito nga asambleya kon paano magpanaksi paagi sa telepono. Apang, wala pa gid makapakigbahin si Karina sa sina nga sahi sang pagpanaksi. Agod mapalig-on sia nga makigbahin sa programa sang asambleya, ginrepaso sang isa ka gulang kag sang iya asawa kay Karina ang pila ka punto kon paano magpanaksi paagi sa telepono. Ginpalig-on man nila sia nga ipangamuyo ang pagtuytoy ni Jehova sa sini nga butang. Ginhimo niya ini kag sang ulihi namat-od sia nga tilawan nga manawag.

Nagpili si Karina sing numero sang telepono gikan sa kaiping nga minuro. Nagsabat ang opera­tor sang telepono, kag ginpaathag ni Karina ang katuyuan sang iya pagpanawag. Maayo ang reaksion sang opera­tor, kag ginhimo ang mga kahimusan nga tawgan sia liwat pagligad sang tatlo ka adlaw. Ang pagbalik-duaw paagi sa telepono nagresulta sa isa ka pagtuon sa Biblia, nga nagagamit sang brosyur nga Ano ang Ginapatuman sang Dios sa Aton? Sugod sadto, naghiwat sila sing makawiwili kag masadya nga mga pagtuon, kag nagpadala si Karina sing mga literatura agod masabat ang mga pamangkot sang babayi.

• Ginpanaksihan ni Bernarda ang lalaki nga nagsala sa pag­dial sang numero sang iya telepono. Sa baylo nga maakig, nagpakilala si Bernarda subong isa ka Saksi ni Jehova kag nagtanyag sing bulig. Nagpadayon ang paghambalanay, kag namati ang lalaki samtang ginapaathag niya kon paano dulaon sang Ginharian sang Dios ang inhustisya sa dili madugay. Ginhatag sang lalaki ang numero sang iya telepono kay Bernarda, kag nagduaw liwat si Bernarda paagi sa telepono. Sa isa sang ila mga paghambalanay, ginbasa niya sa lalaki ang isa ka bahin sang libro nga Ang Ihibalo nga Nagadul-ong sa Kabuhi nga Walay Katapusan. Namangkot ang lalaki kon paano sia makatigayon sing kopya, kag ginpadalhan sia sini ni Bernarda upod ang isa ka Biblia. Ginhimo ang mga kahimusan agod maduaw sia sang isa ka utod nga lalaki sa amo nga lugar, nga padayon karon nga “nagabunyag” sa sining nagatubo nga “tanom.”

Huo, sa kigas nga espirituwal nga duta sini nga kalibutan, handa na nga magpanugdo ang natago nga mga binhi kon mapalab-utan sang nagahatag-kabuhi nga tubig sang kamatuoran. Linibo ka nauhaw ang padayon nga “nagatubo” kag “nagapamukadkad” nga mangin matutom nga mga alagad ni Jehova nga Dios.—Isaias 44:3, 4.