“Nag-abot Na ang Takna!”

“Nag-abot na ang iya takna nga magtaliwan sa sining kalibutan pakadto sa Amay.”—JUAN 13:1.

1. Samtang nagahinampot ang Paskwa sang 33 C.E., ang Jerusalem madamo sing anong huringhuring, kag ngaa?

SA BAWTISMO niya sang 29 C.E., ginsugdan ni Jesus ang dalanon nga magadul-ong sa “takna” sang iya kamatayon, pagkabanhaw, kag paghimaya. Tigragas na karon sang 33 C.E. Pila ka semana pa lamang ang nagligad sugod sang gintinguhaan sang Judiyong mataas nga hukmanan, ang Sanhedrin, nga patyon si Jesus. Sang mahibaluan ang ila buko, ayhan paagi kay Nicodemo, nga isa ka katapo sang Sanhedrin nga nangin mainabyanon sa iya, si Jesus nagbiya sa Jerusalem kag nagkadto sa kaumhan sa tabok sang Suba Jordan. Samtang nagahinampot ang Piesta sang Paskwa, madamo nga tawo halin sa uma ang nagkadto sa Jerusalem, kag madamo sing hinuringhuring tuhoy kay Jesus sa siudad. “Ano ang opinyon ninyo?” pamangkutanay sang mga tawo. “Nga indi na gid sia magaabot sa piesta?” Ang puno nga mga saserdote kag ang mga Fariseo nagdugang sa kagahod paagi sa paghatag sing sugo nga dapat ireport sa ila sang bisan ­sin-o nga nakakita kay Jesus ang nahamtangan niya.—Juan 11:47-57.

2. Ano nga buhat ni Maria ang nagpautwas sing binais, kag ano ang ginapakita sang sabat ni Jesus sa pagpangapin sa iya tuhoy sa pagkahibalo niya sang “iya takna”?

 ² Sang Nisan 8, anom ka adlaw antes sang Paskwa, si Jesus nagbalik malapit sa Jerusalem. Nagkadto sia sa Betania—ang banwa sang iya hinigugma nga mga abyan nga sanday Marta, Maria, kag Lazaro—isa ka lugar nga tatlo ka kilometro ang kalayuon sa guwa sang Jerusalem. Biernes sang ­gab-i, kag ginhinguyang didto ni Jesus ang Adlaw nga Inugpahuway. Sang madason nga ­gab-i sang nag-alagad si Maria sa iya nga nagagamit sing malahalon nga pahumot, ang mga disipulo nagpamatok. Si Jesus nagsiling: “Pa­bay-i ninyo sia, agod matuman niya ini may kaangtanan sa adlaw sang akon lubong. Kay ang mga kubos kaupod ninyo pirme, apang ako indi ninyo pirme kaupod.” (Juan 12:1-8; Mateo 26:6-13) Nakahibalo si Jesus nga “nag-abot na ang iya takna nga magtaliwan sa sining kalibutan pakadto sa Amay.” (Juan 13:1) Lima ka adlaw na lamang kag ‘ihatag niya ang iya kabuhi nga gawad sa baylo sang madamo.’ (Marcos 10:45) Sugod sadto, ang pagbatyag sing pagkahilingagawon nakaapektar sang tanan nga ginahimo kag ginatudlo ni Jesus. Daw ano ka dalayawon nga halimbawa ang ginahatag sini sa aton samtang malangkagon nga ginahulat naton ang katapusan sining sistema sang mga butang! Binagbinaga ang natabo sa kaso ni Jesus sang masunod gid nga adlaw.

Ang Adlaw Sang Madinalag-on nga Pagsulod ni Jesus

3. (a) Paano si Jesus nagsulod sa Jerusalem sang Domingo, Nisan 9, kag ano ang reaksion sang kalabanan nga mga tawo sa palibot niya? (b) Ano ang ginsabat ni Jesus sa mga Fariseo nga nagareklamo tuhoy sa kadam-an?

³ Sang Domingo, Nisan 9, si Jesus nagsulod sa Jerusalem sing madinalag-on. Samtang nagahinampot sia sa siudad—sakay sa polyino sang isa ka asno bilang katumanan sang Zacarias 9:9—ang kalabanan sang mga tawo nga nagtipon sa palibot niya naghumlad sang ila naguwa nga mga panapton sa dalan, samtang ang iban naman nag-utod sang mga sanga sang kahoy kag ginladlad ini. “Ginpakamaayo ang Isa nga nagakari subong Hari sa ngalan ni Jehova!” singgit nila. Luyag sang pila ka Fariseo sa kadam-an nga sawayon ni Jesus ang iya mga disipulo. Apang, si Jesus nagsabat: “Nagasiling ako sa inyo, Kon maghipos ini sila, ang mga bato magasinggit.”—Lucas 19:38-40; Mateo 21:6-9.

4. Ngaa nagkinagual ang Jerusalem sang nagsulod si Jesus sa siudad?

⁴ Mga pila ka semana lamang antes, madamo sang yara sa kadam-an ang nakakita sang pagbanhaw ni Jesus kay Lazaro. Ginsugiran na nila ang iban tuhoy sadto nga milagro. Gani samtang nagapasulod si Jesus sa Jerusalem, ang bug-os nga siudad nagkinagual. ­“Sin-o bala ini?” pamangkot sang mga tawo. Kag ang kadam-an padayon nga nagasiling: “Ini amo ang manalagna nga si Jesus, gikan sa Nazaret sang Galilea!” Sang nakita ang nagakatabo, ang mga Fariseo nanalambiton: “Ang kalibutan nagasunod na sa iya.”—Mateo 21:10, 11; Juan 12:17-19.

5. Ano ang natabo sang nagkadto si Jesus sa templo?

⁵ Suno sa iya kinabatasan kon nagaduaw sa Jerusalem, si Jesus, ang Dakung Manunudlo, nagasulod sa templo sa pagpanudlo. Didto nagpalapit sa iya ang mga bulag kag mga piang, kag gin-ayo niya sila. Sang makita ini sang puno nga mga saserdote kag sang mga escriba kag mabatian nila ang mga bata nga lalaki sa templo nga nagasinggit, “Ginapangamuyo namon, luwasa ang Anak ni David!” naakig sila. “Nabatian mo bala ang ginasiling nila?” protesta nila. “Huo,” sabat ni Jesus. “Wala gid bala ninyo ini mabasa, ‘Sa baba sang mga lapsag kag mga  nagasuso nag-aman ka sing pagdayaw’?” Samtang nagapadayon si Jesus sa pagpanudlo, nagpanghulunghulong sia sa kon ano ang nagakatabo sa templo.—Mateo 21:15, 16; Marcos 11:11.

6. Paano ang paagi ni Jesus karon tuhay sangsa nagligad, kag ngaa?

⁶ Ang paagi karon ni Jesus tuhay gid sang nagligad nga anom ka bulan! Nagkadto sia anay sa Jerusalem para sa Piesta sang mga Tabernakulo “indi sa dayag kundi sa tago.” (Juan 7:10) Kag pirme sia naghimo sing mga paagi agod makalikaw nga indi mahalitan kon ang iya kabuhi mabutang sa katalagman. Karon dayag sia nga nagsulod sa siudad diin ginhatag ang mga sugo nga dakpon sia! Indi man batasan ni Jesus nga ipahibalo ang iya kaugalingon subong ang Mesias. (Isaias 42:2; Marcos 1:40-44) Indi niya luyag nga ipamaba ang magahod nga pag-anunsio ukon tiko nga mga report tuhoy sa iya. Karon ang mga kadam-an hayag nga nagatawag sa iya nga Hari kag Manluluwas—ang Mesias—kag wala niya pagsapaka ang mga pangabay sang relihiosong mga lider nga pahipuson sila! Ngaa may pagbalhin? Bangod “nag-abot na ang takna nga ang Anak sang tawo paghimayaon,” subong sang ginpahibalo ni Jesus sang madason gid nga adlaw.—Juan 12:23.

Masidla nga Buhat—Nian Nagaluwas-Kabuhi nga mga Panudlo

7, 8. Paano ginapakita sang ginhimo ni Jesus sa Nisan 10, 33 C.E., ang ginhimo niya sa templo sa Paskwa sang 30 C.E.?

⁷ Sa pag-abot sa templo sang Lunes, Nisan 10, si Jesus nagpanghikot sa nakita niya sang nagligad nga hapon. ‘Ginpanabog niya ang mga nagapamaligya kag mga nagapamakal sa sulod sang templo, kag ginpamaliskad niya ang mga lamesa sang mga manugbaylo sang kuwarta kag ang mga pulungkuan sang mga nagapamaligya sing mga salampati; kag wala niya gintugutan ang bisan ­sin-o nga magdala sing gamit sa templo.’ Nagpakamalaut sa mga nakasala, nagsiling sia: “Wala bala masulat, ‘Ang akon balay tawgon nga balay nga palangamuyuan sa tanan nga kapungsuran’? Apang ginhimo ninyo ini nga lungib sang mga makawat.”—Marcos 11:15-17.

⁸ Ang mga binuhatan ni Jesus nagapakita kon ano ang ginhimo niya tatlo ka tuig antes sang nagkadto sia sa templo sang Paskwa sang 30 C.E. Apang, ang pagpakamalaut mas matigdas sini nga tion. Ang mga negosyante sa templo ginapatuhuyan karon subong “mga makawat.” (Lucas 19:45, 46; Juan 2:13-16) Amo sila sini bangod ginapamahalan nila yadtong nagakinahanglan nga makabakal sing mga sapat para sa halad. Ang puno nga mga saserdote, mga escriba, kag mga pangulo sang mga tawo nakabati sang ginhimo ni Jesus kag sa liwat nagpangita sing mga paagi sa pagpatay sa iya. Apang, indi nila mahibaluan kon paano patyon si Jesus, kay ang tanan nga tawo, bangod natingala sa iya panudlo, pirme nagasunodsunod sa iya sa pagpamati sa iya.—Marcos 11:18; Lucas 19:47, 48.

9. Ano nga leksion ang gintudlo ni Jesus, kag ano ang imbitasyon niya sa iya mga tagpalamati sa templo?

⁹ Samtang si Jesus padayon nga nagapanudlo sa templo, nagsiling sia: “Nag-abot na ang oras nga  ang Anak sang tawo paghimayaon.” Huo, nahibaluan niya nga pila ka adlaw na lamang ang nabilin sa iya kabuhi subong tawo. Sa tapos masaysay kon paano ang binato sang trigo dapat anay mapatay agod makapamunga—katumbas sa iya mismo kamatayon kag mangin paagi nga mahatagan sing kabuhi nga walay katapusan ang iban—gin-agda ni Jesus ang iya mga tagpalamati, sa pagsiling: “Kon ang bisan ­sin-o nga tawo mag-alagad sa akon, magsunod sia sa akon, kag kon diin ako didto man ang akon alagad. Kon ang bisan sin-o nga tawo mag-alagad sa akon, padunggan sia sang Amay.”—Juan 12:23-26.

10. Ano ang balatyagon ni Jesus tuhoy sa masakit nga kamatayon nga nagahulat sa iya?

¹⁰ Ginahunahuna ang iya masakit nga kamatayon nga apat ka adlaw na lamang ang nabilin, si Jesus nagpadayon: “Karon nalisang ang akon kalag, kag ano bala ang isiling ko? Amay, luwasa ako sa sining takna.” Apang indi gid malikawan ang nagahulat kay Jesus. “Walay sapayan sini,” siling niya, “amo ini kon ngaa nag-abot ako sa sining takna.” Sa pagkamatuod, si Jesus nagaugyon sa bug-os nga kahimusan sang Dios. Determinado sia nga magpatuytoy sa kabubut-on sang Dios sa iya mga binuhatan tubtob sa iya mahalaron nga kamatayon. (Juan 12:27) Daw ano gid nga halimbawa ang ginpahamtang niya sa aton—isa nga nagapasakop sing bug-os sa kabubut-on sang Dios!

11. Ano nga mga panudlo ang ginhatag ni Jesus sa kadam-an nga bag-o lang makabati sing tingog gikan sa langit?

¹¹ Nabalaka gid kon paano maapektuhan sang iya kamatayon ang reputasyon sang iya Amay, si Jesus nangamuyo: “Amay, himayaa ang imo ngalan.” Sa katingala sang kadam-an nga nagtipon sa templo, isa ka mabaskog nga tingog ang nag-abot gikan sa langit, nga nagasiling: “Ginhimaya ko na kag himayaon ko ini liwat.” Gingamit sang Dakung Manunudlo ini nga kahigayunan agod sugiran ang kadam-an kon ngaa nabatian ang tingog, kon ano ang mangin mga resulta sang iya kamatayon, kag kon ngaa dapat sila magtuo. (Juan 12:28-36) Ang katapusan nga duha ka adlaw nangin puno gid sing hilikuton para kay Jesus. Apang isa ka importante gid nga adlaw ang yara pa sa unahan.

Ang Adlaw Sang mga Pagpakamalaut

12. Sang Martes, Nisan 11, paano gintinguhaan sang relihiosong mga lider nga tiplangon si Jesus, kag ano ang resulta?

¹² Sang Martes, Nisan 11, si Jesus nagkadto liwat sa templo sa pagpanudlo. Isa ka akig nga tumalambong ang yadto didto. Nagapatalupangod sang mga ginhimo ni Jesus sang nagligad nga adlaw, ang puno nga mga saserdote kag ang mga tigulang sang katawhan nagpamangkot sa iya: “Sa kay ­sin-o awtoridad ginahimo mo ini nga mga butang? Kag ­sin-o bala ang naghatag sa imo sini nga awtoridad?” Gin­gumon sila sang Batid nga Manunudlo paagi sa iya sabat, kag nagsaysay sia sing tatlo ka maathag nga ilustrasyon—duha sini tuhoy sa ulubasan kag isa tuhoy sa punsion sa kasal—nga nagbuyagyag kon daw ano kalaut ang mga nagapamatok sa iya. Naakig sa ila nabatian, luyag sang relihiosong mga lider nga dakpon sia. Apang nahadlok sila sa mga kadam-an, nga nagkabig kay Jesus subong isa ka manalagna. Gani gintinguhaan nila nga tiplangon sia sa pagsiling sing isa ka butang nga mahimo nila sia ipadakop. Ang mga sabat ni Jesus nagpahipos sa ila.—Mateo 21:23–22:46.

13. Ano ang ginlaygay ni Jesus sa iya mga tagpalamati may kaangtanan sa mga escriba kag mga Fariseo?

 ¹³ Sanglit ang mga escriba kag mga Fariseo nagapangangkon nga nagatudlo sang Kasuguan sang Dios, si Jesus nagpalig-on karon sa mga tagpalamati niya: “Ang tanan nga butang nga ginasiling nila sa inyo, himua kag sunda, apang indi ninyo paghimua ang suno sa mga buhat nila, kay nagasiling sila apang wala ginahimo.” (Mateo 23:1-3) Isa gid ka matigdas kag dayag nga pagpakamalaut! Apang wala pa makatapos si Jesus sa iya pagpakamalaut. Amo ini ang iya katapusan nga adlaw sa templo, kag maisugon sia nga naghatag sing isa ka serye sang mga pagbuyagyag—sing sunodsunod subong sang nagalanog nga daguob.

14, 15. Anong matigdas nga mga pagpakamalaut ang ginhatag ni Jesus batok sa mga escriba kag mga Fariseo?

¹⁴ “Kailo kamo, mga escriba kag mga Fariseo, mga salimpapaw!” siling ni Jesus sing anom ka beses. Amo sila sini bangod, subong sang ginapaathag niya, ginatakpan nila ang Ginharian sang mga langit sa mga tawo, nga wala nagatugot nga makasulod ang buot na sa pagsulod. Ining mga salimpapaw nagatabok sang dagat kag mamala nga duta sa paghimo sing isa ka proselita, agod himuon lang gali sia nga sakop sang dayon nga kalaglagan. Samtang ginapatumbayaan ang “mas importante nga mga butang sang Kasuguan, nga amo ang, katarungan kag kaluoy kag katutom,” ginahatagan nila sing daku nga igtalupangod ang pagbayad sing ikapulo. Sa katunayan, ginatinluan nila ang “guwa sang tagayan kag sang pinggan, apang sa sulod puno sila sang panglugos kag patuyang” bangod ang ila nasulod nga pagkadunot nalipdan sang naguwa nga pagpakitakita sing pagkadiosnon. Dugang pa, handa sila sa paghimo sing mga lulubngan para sa mga manalagna kag punihan ini nga magapatalupangod sang ila kaugalingon nga mga buhat sang kaluoy, bisan pa nga sila “mga anak sang mga nagpamatay sang mga manalagna.”—Mateo 23:13-15, 23-31.

¹⁵ Nagapakamalaut sang kakulang sing espirituwal nga mga prinsipio sa moral sa bahin sang iya mga kaaway, si Jesus nagsiling: “Kailo sa inyo, mga tuytoy nga bulag.” Bulag sila sa moral bangod mas ginapadaku nila ang bulawan sang templo sangsa espirituwal nga kabilihanan sinang duog sang pagsimba. Sa pagpadayon, ginbungat ni Jesus ang iya pinakamatigdas nga mga pulong sang pagpakamalaut. “Mga man-ug, kaliwat sang mga man-ug,” siling niya, “paano bala ang paglikaw ninyo sa katagudilian sang Gehena?” Huo, si Jesus nagasiling sa ila nga bangod sang pagpadayon nila sang ila malaut nga dalanon, magaagom sila sing walay katapusan nga kalaglagan. (Mateo 23:16-22, 33) Kabay nga magpakita man kita sing kaisog sa pagbantala sing mensahe sang Ginharian, bisan pa nga nagalakip ini sang pagbuyagyag sa butig nga relihion.

16. Samtang nagalingkod sa Bukid sang Olivo, anong importante nga tagna ang ginhatag ni Jesus sa iya mga disipulo?

¹⁶ Nagbiya karon si Jesus sa templo. Sa kahapunanon, sia kag ang iya mga apostoles nagtaklad sa Bukid sang Olivo. Samtang nagalingkod didto, si Jesus nagtagna nahanungod sa kalaglagan sang templo kag sa tanda sang iya presensia kag sang katapusan sang sistema sang mga butang. Ining matagnaon nga mga pulong may kahulugan tubtob sa tion naton. Sadto nga ­gab-i, nagsiling man si Jesus sa iya mga disipulo: “Nakahibalo kamo nga duha ka adlaw kutob karon mahanabo ang paskwa, kag ang Anak sang tawo itugyan agod ilansang.”—Mateo 24:1-14; 26:1, 2.

Si Jesus ‘Naghigugma Sang Iya Tubtob sa Katapusan’

17. (a) Sang Paskwa sang Nisan 14, ano nga leksion ang gintudlo ni Jesus sa 12? (b) Ano nga handumanan ang ginsugdan ni Jesus sang makalakat na si Judas Iscariote?

¹⁷ Sang nagsunod nga duha ka adlaw—Nisan 12 kag 13—si Jesus wala magpakita sing hayag sa templo. Ang relihiosong mga lider nagatinguha sa pagpatay sa iya, kag indi niya luyag nga may magaupang sa pagsaulog niya sang Paskwa upod sa iya mga apostoles. Ang paghinunod sang adlaw sang Huebes nagsugod sang Nisan 14—ang katapusan nga adlaw sang pagkabuhi ni Jesus sa duta subong tawo. Sadto nga ­gab-i, si Jesus kag ang iya mga apostoles magkaupod sa isa ka balay sa Jerusalem diin ginhimo ang paghanda sa pagsaulog nila sang Paskwa. Samtang ginasaulog nila ang Paskwa, gintudluan niya ang 12 sing isa ka matahom nga leksion sang pagkamapainubuson paagi sa paghugas sang ila mga tiil. Sang makalakat na si Judas Iscariote, nga nagpasugot nga luiban ang iya Agalon sa 30 ka bilog nga pilak—ang bili sang isa lamang ka ulipon suno sa Mosaikong Kasuguan—ginsugdan ni Jesus ang Memoryal sang iya kamatayon.—Exodo 21:32; Mateo 26:14, 15, 26-29; Juan 13:2-30.

18. Ano pa nga mga panudlo ang mahigugmaon nga ginhatag ni Jesus sa iya 11 ka matutom nga apostoles, kag paano niya sila ginhanda para sa iya malapit na nga pagtaliwan?

¹⁸ Sa tapos masugdan ang Memoryal, ang  apostoles mainit nga nagbaisay kon ­sin-o ang labing daku sa ila. Sa baylo nga akigan sila, si Jesus mapailubon nga nagtudlo sa ila sang kabilihanan sang pag-alagad sa iban. Nagaapresyar nga nag-unong sila sa iya sa tion sang mga pagtilaw sa iya, personal sia nga nakigkatipan sa ila para sa isa ka ginharian. (Lucas 22:24-30) Si Jesus nagsugo man sa ila nga maghigugmaanay sila subong sang paghigugma niya sa ila. (Juan 13:34) Samtang nagapabilin sia sa sadto nga hulot, mahigugmaon sila nga ginhanda ni Jesus para sa iya malapit na nga pagtaliwan. Ginpasalig niya sa ila ang iya pagpakig-abyan, ginpalig-on sila nga magtuo, kag ginsaaran sila sang bulig sang balaan nga espiritu. (Juan 14:1-17; 15:15) Antes magbiya sa balay, si Jesus nakitluoy sa iya Amay: “Nag-abot na ang takna; himayaa ang imo anak, agod nga himayaon ka sang imo anak.” Sa pagkamatuod, ginhanda ni Jesus ang mga apostoles para sa pagtaliwan niya, kag pat-od gid nga ‘ginhigugma niya ang iya tubtob sa katapusan.’—Juan 13:1; 17:1.

19. Ngaa nalisang si Jesus sa katamnan sang Getsemane?

¹⁹ Mahimo nga pasado na sa tungang-gab-i sang nakalab-ot si Jesus kag ang iya 11 ka matutom nga apostoles sa katamnan sang Getsemane. Masunson sia didto nagakadto upod sa iya mga apostoles. (Juan 18:1, 2) Sa sulod lamang sang pila ka oras, si Jesus mapatay subong daw isa sia ka talamayon nga kriminal. Ang kasakit sining ginapaabot nga eksperiensia kag kon paano ini magpasipala sa iya Amay mabug-at gid amo nga samtang nagapangamuyo si Jesus, ang iya balhas nangin mga tinulo sang dugo nga nagatupa sa duta. (Lucas 22:41-44) “Nag-abot na ang takna!” siling ni Jesus sa mga apostoles. “Yari karon! Ang nagaluib sa akon malapit na.” Samtang nagahambal pa sia, nagpalapit si Judas Iscariote, kaupod ang isa ka daku nga kadam-an nga nagadala sing mga sulo kag mga suga kag mga armas. Nagkari sila sa pagdakop kay Jesus. Wala sia manginpadlos. “Sa sina nga kahimtangan,” paathag niya, “paano matuman ang Kasulatan nga dapat ini mahanabo sa sining paagi?”—Marcos 14:41-43; Mateo 26:48-54.

Ang Anak Sang Tawo Ginhimaya!

20. (a) Anong mga kapintas ang naagom ni Jesus sang madakpan na sia? (b) Mga pila ka tion lamang antes sia mapatay, ngaa nagsinggit si Jesus: “Natuman na”?

²⁰ Sang madakop na sia, si Jesus ginsumbong sang butig nga mga saksi, ginpamatbatan sang di-makatarunganon nga mga hukom, ginsentensiahan ni Poncio Pilato, ginyaguta sang mga saserdote kag mga guban, kag gintamay kag ginsakit sang mga soldado. (Marcos 14:53-65; 15:1, 15; Juan 19:1-3) Sang Biernes sang hapon, si Jesus ginlansang sa usok sang pag-antos kag nag-antos sing daku gid nga kasakit samtang ang kabug-aton sang iya lawas nagriri sang pilas nga ginlansangan sang iya mga kamot kag mga tiil. (Juan 19:17, 18) Sang mga alas tres sang hapon, si Jesus nagsinggit: “Natuman na!” Huo, natuman niya ang tanan nga dapat niya himuon sa duta. Nagtugyan sang iya espiritu sa Dios, ginduko niya ang iya ulo kag napatay. (Juan 19:28, 30; Mateo 27:45, 46; Lucas 23:46) Sang ikatlo nga adlaw pagkatapos sadto, ginbanhaw ni Jehova ang iya Anak. (Marcos 16:1-6) Kap-atan ka adlaw sa tapos sia mabanhaw, si Jesus nagkayab sa mga langit kag ginhimaya.—Juan 17:5; Binuhatan 1:3, 9-12; Filipos 2:8-11.

21. Paano naton mailog si Jesus?

²¹ Paano naton ‘masunod sing maayo ang mga tikang ni Jesus’? (1 Pedro 2:21) Kaangay niya, manikasog kita sing lakas sa hilikuton nga pagbantala sing Ginharian kag paghimo sing disipulo kag mangin masidla kag maisog sa pagpamulong sang pulong sang Dios. (Mateo 24:14; 28:19, 20; Binuhatan 4:29-31; Filipos 1:14) Indi gid naton dapat pagkalimtan kon diin na kita sa lakat sang tion ukon pagpasapayanan ang pagpukaw sa isa kag isa sa gugma kag sa maayong mga buhat. (Marcos 13:28-33; Hebreo 10:24, 25) Kabay nga patuytuyan naton ang aton bug-os nga pagkabuhi sang kabubut-on ni Jehova nga Dios kag sang ihibalo nga nagakabuhi na kita sa “tion sang katapusan.”—Daniel 12:4.

Paano Mo Sabton?

• Ano ang epekto sang pagkahibalo ni Jesus nga malapit na ang iya kamatayon sa iya katapusan nga ministeryo sa templo sa Jerusalem?

• Ano ang nagapakita nga ‘ginhigugma ni Jesus ang iya tubtob sa katapusan’?

• Ano ang ginapakita sang mga hitabo sang katapusan nga pila ka oras sang kabuhi ni Jesus tuhoy sa iya?

• Paano naton mailog si Cristo Jesus sa aton ministeryo?

[Mga Pamangkot sa Pagtinuon]

[Retrato sa pahina 18]

Si Jesus “naghigugma sa ila tubtob sa katapusan”