Buligi ang Iban nga Maglakat sing Takus kay Jehova

“Wala kami mag-untat sa pagpangamuyo tungod sa inyo kag sa pagpangabay nga kamo . . . maglakat sing takus kay Jehova sa tuyo nga pahamut-an sia sing bug-os samtang padayon kamo nga nagapamunga sa tagsa ka maayong buhat.”—COLOSAS 1:9, 10.

1, 2. Ano ilabi na ang mahimo mangin tuburan sang kalipay kag kaayawan?

NAGAPUYO kami sa isa ka trailer sa uma. Paagi sa pagpasimple sang amon kabuhi, mas madamo ang amon tion agod mapalab-utan ang mga tawo sing maayong balita. Ginpakamaayo kami sing bugana bangod sang pribilehiyo nga mabuligan ang madamo nga magdedikar sang ila kabuhi kay Jehova.”—Isa ka mag-asawa, nga bug-os tion nga mga ministro sa Bagatnan nga Aprika.

² Wala ka bala nagaugyon nga ang pagbulig sa iban nagahatag sing kalipay? Ang iban tayuyon nga nagatinguha nga buligan ang mga nagamasakit, nawad-an, ukon nasubuan—nga nagakalipay sa paghimo sini. Napat-od sang matuod nga mga Cristiano nga ang ila pagpaambit sa iban sing ihibalo tuhoy kay Jehova nga Dios kag kay Jesucristo amo ang pinakadaku nga bulig nga mahatag nila. Ini lamang ang makabulig sa iban nga batunon ang gawad ni Jesus, palambuon ang maayo nga ­kaangtanan sa Dios, kag nian batunon ang kabuhi nga walay katapusan.—Binuhatan 3:19-21; 13:48.

3. Ano nga sahi sang bulig ang takus sang aton igtalupangod?

³ Apang, kamusta naman ang pagbulig sa mga tawo nga nagaalagad na sa Dios, nga nagasunod sa “Dalan”? (Binuhatan 19:9) Walay duhaduha nga interesado gid ikaw pirme sa ila, apang mahimo nga indi mo mahibaluan kon ano pa ang sarang mo himuon ukon kon paano ka makabulig sing padayon. Ukon mahimo nga daw ginalatiran ka sang imo kahimtangan sa pagbulig sa ila, sa amo nagalatid sang kalipay nga matigayon mo. (Binuhatan 20:35) May kaangtanan sini, makatuon kita gikan sa tulun-an sang Colosas.

4. (a) Ano ang mga kahimtangan sang nagsulat si Pablo sa mga taga-Colosas? (b) Paano nadalahig si Epafras?

⁴ Sang ginsulatan ni apostol Pablo ang mga Cristiano sa Colosas, bilanggo sia sa isa ka balay sa Roma, bisan pa mahimo sia makabaton sing bisita. Subong sang mapaabot mo, gingamit ni Pablo ang iya limitado nga kahilwayan sa pagbantala tuhoy sa Ginharian sang Dios. (Binuhatan 28:16-31) Mahimo maduaw sang mga masigka-Cristiano si Pablo, ayhan ang iban ginhunong pa gani upod sa iya kon kaisa. (Colosas 1:7, 8; 4:10) Ang isa amo ang makugi nga ebanghelisador nga si Epafras gikan sa siudad sang Colosas sa Frigia, sa patag nga rehiyon sa sidlangan sang Efeso sa Asia Minor (modernong-adlaw nga Turkey). Si Epafras nangin instrumento sa pagporma sing kongregasyon sa Colosas, kag nangabudlay sia para sa mga kongregasyon sa malapit nga Laodicea kag Hierapolis. (Colosas 4:12, 13) Ngaa naglakbay si Epafras agod makigkita kay Pablo sa Roma, kag ano ang matun-an naton gikan sa sabat ni Pablo?

Epektibo nga Bulig Para sa mga Taga-Colosas

5. Ngaa nagsulat si Pablo sa mga taga-Colosas?

⁵ Agod makapangayo sing laygay kay Pablo tuhoy sa mga kahimtangan sang kongregasyon sa Colosas, si Epafras naglakbay sing mabudlay padulong sa Roma. Ginbalita niya ang pagtuo, gugma, kag mga panikasog sa pag-ebanghelyo sadtong mga Cristiano. (Colosas 1:4-8) Apang, mahimo nga ginpaambit man niya ang iya kabalaka tuhoy sa malain nga mga impluwensia nga nagbutang sa katalagman sang espirituwalidad sang mga taga-Colosas. Si Pablo nagsabat paagi sa isa ka inspirado nga sulat nga nagpamatok sa pila ka pagtamod nga ginapalapnag sang butig nga mga manunudlo. Ilabi na nga ginpatalupangod niya ang panguna nga papel nga dapat tungdan ni Jesucristo. * Ang iya bala bulig limitado lamang sa  pagpadaku sing panguna nga mga kamatuoran sang Biblia? Paano pa niya mabuligan ang mga taga-Colosas, kag ano nga mga leksion ang matun-an naton tuhoy sa pagbulig sa iban?

6. Ano ang ginpadaku ni Pablo sa iya sulat sa mga taga-Colosas?

⁶ Sa nauna nga bahin sang iya sulat, ginpahangop ni Pablo ang isa ka porma sang bulig nga mahimo mapasapayanan naton. Isa yadto ka paagi sang pagbulig nga epektibo gikan sa malayo, kay si Pablo kag si Epafras malayo sa Colosas. Si Pablo nagsiling: “Nagapasalamat kami pirme sa Dios nga Amay sang aton Ginuong Jesucristo kon nagapangamuyo [foot­note, “pirme nagapangamuyo”] kami tungod sa inyo.” Huo, espesipiko ini nga mga pangamuyo para sa mga Cristiano sa Colosas. Si Pablo nagsiling pa: “Amo man ina kon ngaa, kutob sang adlaw nga nabatian namon ini, wala kami mag-untat sa pagpangamuyo tungod sa inyo kag sa pagpangabay nga mapun-an kamo sang sibu nga ihibalo sang iya kabubut-on nga may bug-os nga kaalam kag espirituwal nga paghangop.”—Colosas 1:3, 9.

7, 8. Ano nga butang ang masunson nga ginalakip sa aton personal kag pangkongregasyon nga mga pangamuyo?

⁷ Nahibaluan naton nga si Jehova amo ang “Manugpamati sang pangamuyo,” gani masaligan naton ang iya kahanda sa pagpamati sa aton mga pangamuyo nga gindulot suno sa iya kabubut-on. (Salmo 65:2; 86:6; Hulubaton 15:8, 29; 1 Juan 5:14) Apang, kon nagapangamuyo kita tungod sa iban, ano ang aton mga ginapangamuyo?

⁸ Mahimo ginahunahuna kag ginapangamuyo naton sing masunson ang tuhoy sa ‘aton bug-os nga paghiliutod sa kalibutan.’ (1 Pedro 5:9) Ukon mahimo kita magdangop kay Jehova tuhoy sa mga Cristiano kag sa iban pa sa isa ka rehiyon nga ginhalitan sang kalamidad ukon trahedya. Sang nabatian sang unang-siglo nga mga disipulo sa iban nga duog ang gutom sa Judea, mahimo nga nagdulot sila sing madamo nga pangamuyo tungod sa ila mga kauturan antes pa sila nagpadala sing mga bulig. (Binuhatan 11:27-30) Sa aton adlaw, ang mga pangamuyo tuhoy sa aton bug-os nga paghiliutod ukon tuhoy sa isa ka daku nga grupo sang mga kauturan masunson mabatian sa Cristianong mga miting, diin madamo ang kinahanglan nga makahangop kag makasiling sing “Amen.”—1 Corinto 14:16.

Mangin Espesipiko sa Pangamuyo

9, 10. (a). Anong mga halimbawa ang nagapakita nga ang pagpangamuyo tuhoy sa espesipiko nga mga indibiduwal nagakaigo? (b) Paano si Pablo espesipiko nga ginpangamuyo?

⁹ Apang, ang Biblia nagahatag sa aton sing mga halimbawa sang mga pangamuyo tungod sa iban nga mas espesipiko, kag mas partikular. Pamalandungi ang komento ni Jesus nga narekord sa Lucas 22:31, 32. Napalibutan sia sang 11 ka matutom nga apostoles. Tanan sila nagkinahanglan sang pagsakdag sang Dios sa mabudlay nga mga tion sa unahan, kag si Jesus nangamuyo tungod sa ila. (Juan 17:9-14) Apang, ginhatagan sing igtalupangod ni Jesus si Pedro, espesipiko nga nagpangamuyo tungod sa sinang disipulo. Iban pa nga mga halimbawa: Nagpangamuyo si Eliseo nga buligan sang Dios ang isa ka espesipiko nga tawo, ang iya alagad. (2 Hari 6:15-17) Si apostol Juan nangamuyo nga si Gayo magpadayon nga magmapagros sa pisikal kag sa espirituwal. (3 Juan 1, 2) Kag ang iban pa nga mga pangamuyo nagpatalupangod sa espesipiko nga mga grupo.—Job 42:7, 8; Lucas 6:28; Binuhatan 7:60; 1 Timoteo 2:1, 2.

¹⁰ Ang mga sulat ni Pablo nagapadaku sa espesipiko gid nga mga pangamuyo. Nagpangabay sia nga idulot ang pangamuyo tungod sa iya ukon tungod sa ila sang iya mga kaupod. Ang Colosas 4:2, 3 mabasa: “Magpadayon kamo sa pagpangamuyo, nga nagapabilin nga nagamata sa sini nga may pagpasalamat, sa amo man nga tion nagapangamuyo man tungod sa amon, nga buksan sa amon sang Dios ang ganhaan sang pulong, sa pagpamulong sang sagrado nga tinago nahanungod kay Cristo, nga bangod sini, sa pagkamatuod, yara ako sa mga gapos sang bilangguan.” Binagbinaga man, ining iban pa nga mga halimbawa: Roma 15:30; 1 Tesalonica 5:25; 2 Tesalonica 3:1; Hebreo 13:18.

11. Sang didto sa Roma, tungod kay sin-o nangamuyo si Epafras?

¹¹ Matuod man ini sa kaupod ni Pablo sa Roma. “Si Epafras, nga gikan sa inyo, . . . nagapadala sa inyo sang iya mga panamyaw, nga pirme nagapanikasog tungod sa inyo sa iya mga pangamuyo.” (Colosas 4:12) Ang tinaga nga ginbadbad “nagapanikasog” mahimo magpahangop sing “nagahimakas,” subong sang isa ka gym­nast sa dumaan nga mga hampang. Hanuot nga nagpangamuyo lamang  bala si Epafras tuhoy sa bug-os kalibutan nga hubon sang mga tumuluo ukon tuhoy pa gani sa matuod nga mga sumilimba sa bug-os nga Asia Minor? Ginpakita ni Pablo nga si Epafras espesipiko nga nagpangamuyo tungod sa mga taga-Colosas. Nahibal-an ni Epafras ang ila kahimtangan. Wala naton sila tanan makilala sa ngalan, ni mahibaluan ang mga problema nga gin-atubang nila, apang handurawa ang pila ka posibilidad. Ayhan ang pamatan-on nga si Lino nakigsumpong sa impluwensia sang kinaandan nga mga pilosopiya, kag si Rufo mahimo nagkinahanglan sing kusog agod pamatukan ang ganyat sang iya anay mga ginabuhat sa Judaismo. Bangod may di-tumuluo nga bana, kinahanglan bala ni Persis ang pagbatas kag kaalam sa pagpadaku sa iya kabataan sa Ginuo, kag kinahanglan bala ni Asincrito, nga may makamamatay nga balatian, ang dugang pa nga lugpay? Huo, kilala ni Epafras ang mga kauturan sa iya tumandok nga kongregasyon, kag hanuot sia nga nangamuyo tuhoy sa ila bangod luyag nila ni Pablo nga ining mga debotado maglakat sing takus kay Jehova.

12. Paano kita mangin espesipiko pa sa aton personal nga mga pangamuyo?

¹² Nakita bala ninyo ang sulundan para sa aton—isa ka paagi agod mabuligan naton ang iban? Subong sang ginpatalupangod, ang publiko nga mga pangamuyo sa Cristianong mga miting masunson nga indi espesipiko, bangod sang nanuhaytuhay nga mga tumalambong. Apang ang aton personal ukon pangpamilya nga mga pangamuyo mahimo mangin espesipiko gid. Bisan pa kon kaisa mahimo kita magpangabay sa Dios nga ubayan kag pakamaayuhon ang tanan nga nagalakbay nga manugtatap ukon espirituwal nga manugbantay, indi bala kita mahimo mangin espesipiko kon kaisa? Halimbawa, ngaa indi sambiton sa pangamuyo ang ngalan sang manugtatap sang sirkito nga nagaduaw sa inyo kongregasyon ukon sang konduktor sang inyo Pagtinuon Sang Kongregasyon sa Libro? Ginapakita sang Filipos 2:25-28 kag 1 Timoteo 5:23 ang espesipiko nga pagkabalaka ni Pablo sa kapagros ni Timoteo kag ni Epafrodito. Mapakita man bala naton ini nga interes sa mga nagamasakit nga kilala naton sa ngalan?

13. Ano nga sahi sang mga kahimtangan ang nagakaigo nga ilakip naton sa personal nga mga pangamuyo?

¹³ Ibutang ta, dapat naton likawan ang pagpasilabot sa personal nga mga butang sang iban, apang nagakaigo nga makita sa aton mga pangamuyo ang matuod nga interes sa mga tawo nga kilala kag ginaulikdan naton. (1 Timoteo 5:13; 1 Pedro 4:15) Mahimo nga nadulaan sing trabaho ang isa ka utod nga lalaki, kag indi naton sia mahatagan sing lain nga trabaho. Apang, mahimo naton masambit ang iya ngalan kag hatagan sing igtalupangod ang iya kabudlayan sa aton personal nga mga pangamuyo. (Salmo 37:25; Hulubaton 10:3) May kilala bala kita nga isa ka laon nga utod nga babayi nga nagtigulang nga wala sing bana kag kabataan bangod determinado sia nga magpamana “lamang sa Ginuo”? (1 Corinto 7:39) Sa imo personal nga mga pangamuyo, ngaa indi magpangabay kay Jehova nga pakamaayuhon sia kag buligan sia nga magpadayon nga matutom sa iya pag-alagad? Subong isa pa ka halimbawa, mahimo ginlaygayan sang duha ka gulang ang isa ka utod nga lalaki nga nakasala. Ngaa indi pagsambiton sang tagsa sa ila ang iya ngalan sa ila personal nga mga pangamuyo sa pulupanag-on?

14. Paano ang espesipiko nga mga pangamuyo may kaangtanan sa pagbulig sa iban?

¹⁴ Madamo sing kahigayunan nga malakip mo sa imo personal nga mga pangamuyo ang mga indibiduwal nga nahibaluan mo nga nagakinahanglan sing pagsakdag, paglugpay, kaalam, kag balaan nga espiritu ni Jehova, ukon sing bisan ano nga mga bunga sini. Bangod sang kalayuon ukon sang iban pa nga mga sirkunstansia, mahimo nabatyagan mo nga limitado lamang ang materyal ukon direkta nga bulig nga mahatag mo. Apang indi pagkalimti nga ipangamuyo ang imo mga kauturan. Nahibaluan mo nga luyag nila maglakat sing takus kay Jehova, apang mahimo kinahanglan gid nila ang bulig agod mahimo ini sing dalayon. Ang isa ka yabi sa pagbulig amo ang imo mga pangamuyo.—Salmo 18:2; 20:1, 2; 34:15; 46:1; 121:1-3.

 Mangabudlay sa Pagpabakod sa Iban

15. Ngaa dapat kita mangin interesado sa hingapusan nga bahin sang Colosas?

¹⁵ Sa pagkamatuod, ang hanuot, espesipiko nga pangamuyo indi ang lamang nga paagi agod mabuligan ang iban, ilabi na ang mga suod sa imo kag ginapalangga mo. Ginapaathag ina sang tulun-an sang Colosas. Madamo nga iskolar ang nagpati nga pagkatapos ginhatag ni Pablo ang panuytoy paagi sa doktrina kag praktikal nga laygay, nagdugang sia sing personal nga mga panamyaw. (Colosas 4:7-18) Sa kabaliskaran, nahibaluan na naton nga ining hingapusan nga bahin sang tulun-an may yara talalupangdon nga laygay, kag madamo pa ang dapat mahibaluan gikan sa sining bahin.

16, 17. Ano ang masiling naton tuhoy sa mga kauturan nga ginsambit sa Colosas 4:10, 11?

¹⁶ Si Pablo nagsulat: “Si Aristarco nga akon masigkabinilanggo nagapadala sa inyo sang iya mga panamyaw, kag amo man si Marcos nga pakaisa ni Bernabe, (nga may kaangtanan sa iya nakabaton kamo sing mga sugo nga abiabihon sia kon mag-abot sia sa inyo,) kag si Jesus nga ginatawag Justo, ini sila sa mga sirkunsidado. Sila lamang ang akon mga masigkamanugpangabudlay para sa ginharian sang Dios, kag ini sila nangin nagapabakod nga bulig sa akon.”—Colosas 4:10, 11.

¹⁷ Ginpakilala ni Pablo didto ang pila ka utod nga takus sang pinasahi nga igtalupangod. Nagsiling sia nga lakip sila sa mga sirkunsidado, nga may Judiyong ginhalinan. Madamo sing sirkunsidado nga Judiyo sa Roma, kag ang iban mga Cristiano na. Apang, ang mga ginsambit ni Pablo nagbulig sa iya. Mahimo nga wala sila magpangalag-ag sa pagpakig-upod sa mga Cristiano nga may Gentil nga ginhalinan, kag mahimo nga malipayon sila nga nakig-upod kay Pablo sa pagbantala sa mga Gentil.—Roma 11:13; Galacia 1:16; 2:11-14.

18. Paano gindayaw ni Pablo ang pila nga kaupod niya?

¹⁸ Talupangda ang ginsiling ni Pablo: “Ini sila nangin nagapabakod nga bulig sa akon.” Gingamit niya ang Griegong tinaga nga mabasa lamang sing makaisa sa Biblia. Ginabadbad ini sang madamo nga manugbadbad nga “lugpay.” Apang, may isa pa ka Griegong tinaga (pa·ra·ka·le’o) nga mas kinaandan nga  ginbadbad nga “lugpay.” Gingamit ini ni Pablo sa iban nga bahin sini mismo nga sulat apang indi sa Colosas 4:11.—Mateo 5:4; Binuhatan 4:36; 9:31; 2 Corinto 1:4; Colosas 2:2; 4:8.

19, 20. (a) Ano ang kahulugan sang ekspresyon nga gin-aplikar ni Pablo sa mga kauturan nga nagbulig sa iya sa Roma? (b) Sa anong mga paagi mahimo nabuligan sadtong mga kauturan si Pablo?

¹⁹ Yadtong ginhingadlan ni Pablo mahimo nga wala lamang naghatag sing paglugpay paagi sa pulong. Ang Griegong termino nga ginbadbad “nagapabakod nga bulig” sa Colosas 4:11 gingamit kon kaisa sa sekular nga mga teksto para sa isa ka bulong nga nagapakanay sa kasakit. Ang New Life Version mabasa: “Daw ano gid sila nga bulig sa akon!” Gingamit sang Today’s English Version ang prase: “Nangin daku gid nga bulig sila sa akon.” Ano ayhan ang ginhimo sang Cristianong mga kauturan nga nagapuyo malapit kay Pablo agod buligan sia?

²⁰ Mahimo makabaton sing mga bisita si Pablo, apang madamo nga butang ang indi niya mahimo, subong sang pagbakal sang iya pangunang mga kinahanglanon—pagkaon kag panapton para sa tigtulugnaw. Paano sia makatigayon sing linukot para sa pagtuon ukon makabakal sing mga kinahanglanon niya sa pagsulat? (2 Timoteo 4:13) Indi mo bala mahanduraw ang mga kauturan nga nagbulig kay Pablo sa iya mga kinahanglanon, naghimo sang panguna nga mga butang subong sang pagpamalaklon ukon pagboluntaryo nga sugusuguon niya? Ayhan luyag niya hibaluon ang kahimtangan kag palig-unon ang isa ka kongregasyon. Bangod bilanggo, indi niya ini mahimo, gani yadtong mga kauturan mahimo nagduaw kay Pablo, nga nagdala sing mga mensahe, kag nagadala balik sing mga report. Makapabakod gid ini!

21, 22. (a) Ngaa interesado kita sa mga pulong sa Colosas 4:11? (b) Ano ang pila ka paagi nga maaplikar naton ang halimbawa sadtong mga kaupod ni Pablo?

²¹ Ang ginsulat ni Pablo subong “nagapabakod nga bulig” nagahatag sing paghantop kon paano naton mahimo buligan ang iban. Mahimo nagalakat sila sing takus kay Jehova kon tuhoy sa iya mga talaksan sa moral, nagatambong sa mga Cristianong mga miting, kag nagapakigbahin sa pagbantala nga hilikuton. Tungod sina takus sila sang aton pag-apresyar. Apang, kita bala makahimo sing kapin pa subong mga “nagapabakod nga bulig” kaangay sadtong mga kaupod ni Pablo?

²² Kon may kilala ka nga isa ka utod nga babayi nga maalamon nga nagsunod sang 1 Corinto 7:37 apang wala na karon sing pamilya nga malapit sa iya, sarang mo bala sia malakip sa pila ka hilikuton sang pamilya, ayhan agdahon sia nga magkaon upod sa  inyo ukon magtambong sa isa ka diutay nga pagtilipon sang mga abyan ukon mga himata? Ano abi kon agdahon ninyo sia nga maglakbay upod sa inyo pamilya pakadto sa isa ka kombension ukon magbakasyon? Ukon pangabaya sia nga mag-upod sa imo sa kombeniente nga tion kon magpamalaklon ka sing kalan-on. Mahimo man naton ini sa mga balo, ukon ayhan sa mga indi na makamaneho sing salakyan. Masapwan mo nga makalilipay ang pagpamati sa ila mga eksperiensia ukon ang paghisayod sang ila nahibaluan sa mga butang subong sang kinaandan nga pagpili sing prutas ukon pagpili sing mga panapton sang mga bata. (Levitico 19:32; Hulubaton 16:31) Kinaugali nga magaresulta ini sa dugang pa nga pagkasuod. Sa amo mangin mas hilway sila sa pagpangabay sang imo bulig kon nagakinahanglan sila sing pila ka bulong gikan sa botika, ukon sing mga butang kaangay sini. Ang mga kauturan nga kaupod ni Pablo sa Roma mahimo nga naghatag sing praktikal, nagapabakod nga bulig, subong sang mahimo mo. Sa pulupanag-on ang dugang nga pagpakamaayo amo nga ang mga higot sang gugma nagabakod, kag nagapamat-od kita sing malig-on nga mag-alagad sing matutom kay Jehova sing magkaupod.

23. Mangin maayo para sa tagsatagsa sa aton nga maghinguyang sing tion sa paghimo sing ano?

²³ Ang tagsatagsa sa aton makapamalandong sa mga kahimtangan nga ginsambit sa sining artikulo. Mga halimbawa lamang ini, apang makapahanumdom ini sa aton sang matuod nga mga kahimtangan diin kita mangin labi pa nga “nagapabakod nga bulig” sa aton mga kauturan. Ang punto indi nga ilugon naton ang panimuot sang mabinuligon nga mga tawo. Indi subong sina ang tulumuron sang mga kauturan nga ginsambit sa Colosas 4:10, 11. “Mga masigkamanugpangabudlay [sila] para sa ginharian sang Dios.” Ang nagapabakod nga epekto may direkta nga kaangtanan sa sina. Kabay nga mangin subong man ini sa aton.

24. Ano ang panguna nga rason sang aton pagpangamuyo tungod sa iban kag pagtinguha nga pabakuron sila?

²⁴ Ginasambit naton ang iban sa ngalan sa aton personal nga mga pangamuyo kag nagapanikasog nga pabakuron sila bangod sini: Nagapati kita nga ang aton mga kauturan luyag “maglakat sing takus kay Jehova sa tuyo nga pahamut-an sia sing bug-os.” (Colosas 1:10) Ina nga katunayan may kaangtanan sa isa pa ka butang nga ginsambit ni Pablo sang nagsulat sia tuhoy sa mga pangamuyo ni Epafras nahanungod sa mga taga-Colosas, nga sila mahimo “magtindog sing bug-os kag may malig-on nga pagtuo sa tanan nga kabubut-on sang Dios.” (Colosas 4:12) ­Paano naton mahimo ini sing personal? Tan-awon naton.

[Nota]

Natalupangdan Mo Bala?

• Paano kita mangin labi pa ka mabuligon sa aton personal nga mga pangamuyo?

• Sa anong kahulugan nga ang pila ka Cristiano ‘nagapabakod nga mga bulig’ kay Pablo?

• Sa ano nga sahi sang mga kahimtangan mahimo kita mangin ‘nagapabakod nga mga bulig’?

• Ano ang tulumuron sang aton pagpangamuyo tungod sa aton mga kauturan kag pagtinguha nga pabakuron sila?

[Mga Pamangkot sa Pagtinuon]

[Retrato sa pahina 18]

Mahimo mo bala malakip ang isa ka Cristiano sa paglingawlingaw sang imo pamilya?

[Credit Line]

Courtesy of Green Chimnery’s Farm