Kon Paano ang Nagadumala nga Hubon Tuhay sa Legal nga Korporasyon

ANG tuigan nga mga miting sang Watch Tower Bible and Tract Society of Pennsylvania ginahiwat sugod pa sang Enero 1885. Sang ang pagtipon sa hinaplas nga mga Cristiano ginhimo sa katapusan nga bahin sang ika-19 nga siglo, ang mga direktor kag mga opisyales sini nga korporasyon may langitnon nga paglaum. Sa katunayan, halos amo sini pirme ang kahimtangan.

Isa ka kahimtangan ang wala malakip. Sang 1940, si Hayden C. Covington​—⁠ang abogado sadto sang Sosiedad kag isa sang “iban nga mga karnero,” nga may dutan-on nga paglaum​—⁠ginpili nga isa ka direktor sang Sosiedad. (Juan 10:16) Nangin bise presidente sia sang Sosiedad kutob sang 1942 tubtob 1945. Sadto nga tion, naghalin si Utod Covington subong direktor sa pagsunod sa daw amo anay ang kabubut-on ni Jehova​—⁠nga ang tanan nga direktor sang korporasyon sa Pennsylvania dapat hinaplas nga mga Cristiano. Ginbuslan ni Lyman A. Swingle si Hayden C. Covington sa talapuanan sang mga direktor, kag ginpili si Frederick W. Franz subong bise presidente.

Ngaa ang mga alagad ni Jehova nagpati anay nga ang tanan nga direktor kag opisyales sang Watch Tower Bible and Tract Society of Pennsylvania dapat hinaplas nga mga Cristiano? Bangod sadto nga tion, ang talapuanan sang mga direktor kag mga opisyales sang korporasyon sa Pennsylvania suod nga naangot sa Nagadumala nga Hubon sang mga Saksi ni Jehova, nga ang tanan nga katapo pirme hinaplas-sang-espiritu nga mga lalaki.

Isa ka Maragtason nga Tuigan nga Miting

Sa tuigan nga miting nga ginhiwat sang Oktubre 2, 1944, sa Pittsburgh, pormal nga gin-ugyunan sang mga katapo sang korporasyon sa Pennsylvania ang anom ka resolusyon nga nagaligwat sang karta sini. Ang karta nagapatuman nga ang kadamuon sang boto dapat nga katumbas sa kantidad sang kuwarta nga ginaamot sa hilikuton sang Sosiedad, apang gindula sang ikatlo nga pagligwat ina nga kondisyon. Ang isa ka report sa sina nga tuigan nga miting nagsiling: “Ang katapo sang Sosiedad limitehan lamang sa indi magkapin sa 500 . . . Ang kada isa nga ginpili dapat isa ka bug-os tion nga alagad sang Sosiedad ukon isa ka part-time nga alagad sang kompanya [kongregasyon] sang mga saksi ni Jehova kag dapat magpakita sang espiritu sang Ginuo.”

Pagkatapos sina, ang mga direktor sang Sosiedad ginaboto sa palangakuan sang mga indibiduwal nga debotado sing bug-os kay Jehova, bisan pila man ang gin-amot nila nga kuwarta sa pagpauswag sang hilikuton sang Ginharian. Nahisuno ini sa amat-amat nga pagputli nga gintagna sa Isaias 60:​17, diin mabasa naton: “Sa baylo sang saway magadala ako sing bulawan, kag sa baylo sang salsalon magadala ako sing pilak, kag sa baylo sang kahoy, saway, kag sa baylo sang mga bato, salsalon; kag itangdo ko ang paghidait subong imo mga manugdumala kag ang pagkamatarong subong imo mga manughatag sing buluhaton.” Sa pagpatuhoy sa “mga manugdumala” kag “manughatag sing buluhaton,” ginapatalupangod sini nga tagna ang mga pag-uswag sa mga pamaagi sang organisasyon sa tunga sang katawhan ni Jehova.

Ining importante nga tikang sa pagpahisuno sang organisasyon sa teokratiko nga kahimusan natabo sa katapusan sang “duha ka libo kag tatlo ka gatos ka gab-i kag aga,” nga ginsambit sa Daniel 8:⁠14. Sadto anay, “ang balaan nga duog” ‘gindala sa husto nga kahimtangan sini.’

Apang, pagkatapos sang maragtason nga tuigan nga miting sang 1944, isa ka importante nga pamangkot ang nagpabilin. Sanglit ang Nagadumala nga Hubon suod nga naangot anay sa pito-sing-katapo nga talapuanan sang mga direktor sang korporasyon sa Pennsylvania, nagakahulugan bala ini nga ang mga katapo sang Nagadumala nga Hubon indi gid mahimo magsobra sa pito ka hinaplas nga Cristiano? Dugang pa, sanglit ang mga direktor ginapili sang mga katapo sang korporasyon, ang mga katapo sang korporasyon bala ang nagapili sang mga katapo sang Nagadumala nga Hubon sa tuigan  nga miting kada tuig? Ang mga direktor kag mga opisyales sang Watch Tower Bible and Tract Society of Pennsylvania kag ang mga katapo sang Nagadumala nga Hubon amo bala gihapon, ukon magkatuhay bala sila?

Isa Pa ka Indi Malipatan nga Tuigan nga Miting

Ini nga mga pamangkot ginsabat sa tuigan nga miting nga ginhiwat sang Oktubre 1, 1971. Sa amo nga okasyon, ginpatalupangod sang isa sang mga humalambal nga ang nagadumala nga hubon sang “matutom kag mainandamon nga ulipon” nauna sing ginatos ka tuig sa Watch Tower Bible and Tract Society of Pennsylvania. (Mateo 24:​45-47) Isa ka nagadumala nga hubon ang ginporma sang Pentecostes sang 33 C.⁠E., kapin sa 18 ka siglo antes nagluntad ang korporasyon sang Pennsylvania. Sang primero, ang nagadumala nga hubon ginatapuan, indi sang 7 ka tawo, kundi sang 12 ka apostoles. Maathag nga ang kadamuon sini gindugangan sang ulihi, kay ‘ang mga apostoles kag ang gulang nga mga lalaki sa Jerusalem’ nagapanguna.​—⁠Binuhatan 15:⁠2.

Sang 1971 ginpaathag sang amo gihapon nga humalambal nga indi mahimo botohon sang mga katapo sang Watch Tower Society ang mga katapo sang hinaplas nga Nagadumala nga Hubon. Ngaa? “Bangod,” siling niya, “ang nagadumala nga hubon sang ‘ulipon nga klase wala gintangdo sang bisan sin-o man nga tawo. Gintangdo ini ni . . . Jesucristo, ang Ulo sang matuod nga Cristianong kongregasyon kag ang Ginuo kag Agalon sang ‘matutom kag mainandamon nga ulipon’ nga klase.” Nian, maathag nga ang mga katapo sang Nagadumala nga Hubon indi mahimo botohon sa palangakuan sang mga katapo sang bisan ano nga legal nga korporasyon.

Sa pagpadayon, ginsiling sang humalambal ining importante nga pahayag: “Ang nagadumala nga hubon wala sing mga opisyales subong sang Board of Directors sang Sosiedad, nga may presidente, bise presidente, sekretaryo-tesurero kag kabulig nga sekretaryo-tesurero. May yara lamang ini isa ka tsirman.” Sa sulod sang madamo nga tinuig, ang presidente sang korporasyon sang Pennsylvania amo man ang nagapanguna nga katapo sang Nagadumala nga Hubon. Indi na subong sini karon. Bisan pa indi tupong sa eksperiensia ukon ikasarang, ang mga katapo sang Nagadumala nga Hubon mangin alalangay sa responsabilidad. Ang humalambal nagsiling pa: “Ang bisan sin-o nga katapo sang nagadumala nga hubon mahimo mangin tsirman bisan pa indi sia ang presidente sang . . . Sosiedad . . . Nagadepende ini sa sistema sang pagbinuslanay sa pagkatsirman sa nagadumala nga hubon.”

Sa sadtong di-malipatan nga tuigan nga miting sang 1971, ginpaathag sing maayo ang kinatuhayan sang hinaplas-sang-espiritu nga mga katapo sang Nagadumala nga Hubon kag sang mga direktor sang korporasyon sang Pennsylvania. Sa gihapon, ang mga katapo sang Nagadumala nga Hubon padayon nga nagaalagad subong mga direktor kag mga opisyales sang Sosiedad. Apang, nag-utwas karon ang mga pamangkot: May Makasulatanhon bala nga rason kon ngaa ang mga direktor sang Watch Tower Bible and Tract Society of Pennsylvania dapat man nga mangin mga katapo sang Nagadumala nga Hubon?

Ang sabat wala. Ang korporasyon sang Pennsylvania indi ang lamang nga legal nga korporasyon nga ginagamit sang mga Saksi ni Jehova. May iban pa. Ang isa amo ang Watchtower Bible and Tract Society of New York, Incorporated. Ginatatap sini ang aton hilikuton sa Estados Unidos. Maathag nga ginapakamaayo ni Jehova ini nga korporasyon, bisan pa nga ang mga direktor kag opisyales sini “iban nga mga karnero” ang kalabanan. Ginagamit sa Britanya ang International Bible Students Association. Ginagamit ang iban pa nga legal nga mga korporasyon sa pagpauswag sang intereses sang Ginharian sa iban nga mga pungsod. Tanan sila nagabuligay sing hilisugot kag nagatungod sing papel agod ang maayong balita mabantala sa bug-os nga duta. Bisan diin man sila ukon sin-o man ang nagaalagad subong mga direktor ukon mga opisyales, ini nga mga korporasyon ginatuytuyan sing teokratiko kag ginagamit sang Nagadumala nga Hubon. Busa, ining mga korporasyon nagatangdo sing mga hilikuton nga dapat himuon sa pagpasangkad sa intereses sang Ginharian.

Mapuslanon para sa aton nga may legal nga mga korporasyon. Sa amo, ginasunod naton ang lokal kag pungsudnon nga mga kasuguan, subong sang ginasugo sang Pulong sang Dios. (Jeremias 32:​11; Roma 13:1) Ginapahapos sang legal nga mga korporasyon ang aton hilikuton sa pagpalapnag sang mensahe sang Ginharian paagi sa pag-imprinta  sing mga Biblia, libro, magasin, brosyur, kag iban pa nga materyal. Ini nga mga korporasyon nangin legal man nga mga instrumento sa pagtatap sa mga butang may kaangtanan sa pagpanag-iya sing propriedad, mga panikasog sa pagbulig, mga kontrata sa paggamit sa mga pasilidad sang kombension, kag iban pa. Nagapasalamat gid kita sa mga serbisyo sining legal nga mga korporasyon.

Ang Ngalan ni Jehova Ginpabantog

Sang 1944, ang Artikulo II sang karta sang Watch Tower Bible and Tract Society of Pennsylvania ginligwat agod ipadaku ang mga tulumuron sini nga korporasyon. Suno sa karta, ang mga katuyuan sang Sosiedad nagalakip sining panguna nga katuyuan: “Agod ibantala ang ebanghelyo sang Ginharian sang Dios sa idalom ni Cristo Jesus sa tanan nga pungsod subong panaksi sa ngalan, pulong kag pagkasupremo sang Labing Gamhanan nga Dios nga si JEHOVA.”

Kutob sang 1926, ginpabantog sang ‘matutom nga ulipon’ ang ngalan ni Jehova. Ang labi gid ka talalupangdon amo sang 1931 sang pormal nga ginbaton sang mga Estudyante sang Biblia ang ngalan nga Mga Saksi ni Jehova. (Isaias 43:​10-12) Ang mga publikasyon sang Sosiedad nga nagpadaku sang ngalan sang Dios naglakip sa libro nga Jehovah (1934), “Let Your Name Be Sanctified” (1961), kag “The Nations Shall Know That I Am Jehovah”​​—⁠How? (1971).

Dapat hinambitan sing pinasahi ang New World Translation of the Holy Scriptures, nga ginbalhag sing bug-os sa Ingles sang 1960. Mabasa sa sini ang ngalan ni Jehova sa tagsa ka bahin diin makita ang Tetragrammaton sa Hebreong Kasulatan. Ini nga badbad nagalakip man sang ngalan sang Dios sa 237 ka nahamtangan sini sa Cristianong Griegong Kasulatan diin ang mahalungon nga pag-usisa nagapakita nga nagakaigo ini. Nagapasalamat gid kita nga, sa madamo nga paagi, gintugutan ni Jehova ang “ulipon” kag ang Nagadumala nga Hubon sini nga gamiton ang ila manggad kag legal nga mga korporasyon sa pagpakilala sang iya ngalan sa bug-os nga duta!

Ang Pagpanagtag sa Pulong Sang Dios Ginpasangkad

Ang katawhan ni Jehova padayon nga nagapanaksi sa iya ngalan kag nagabayaw sang iya Pulong paagi sa pagbalhag kag pagpanagtag sing minilyon sang pasad-sa-Biblia nga mga publikasyon subong man sing Biblia mismo. Sang maaga nga bahin sang katuigan 1900, natigayon sang Watch Tower Society ang legal nga kinamatarong sa pagbalhag sang The Emphatic Diaglott, ang Griego-Ingles nga interlinear nga edisyon sang Cristianong Griegong Kasulatan ni Benjamin Wilson. Ginbalhag sang Sosiedad ang edisyon sang Mga Estudyante sang Biblia nga King James Version, nga may 500-pahina nga apendise. Sang 1942 ginbalhag sini ang King James Version nga may mga reperensia sa marhin. Nian sang 1944 ginsugdan sang Sosiedad ang pag-imprinta sa American Standard Version sang 1901, nga nagagamit sang ngalan sang Dios. Ang ngalan ni Jehova mabasa man sa The Bible in Living English, ni Stephen T. Byington, nga ginbalhag sang Sosiedad sang 1972.

Ang legal nga mga korporasyon nga gingamit sang mga Saksi ni Jehova nakabulig sa pag-imprinta kag pagpanagtag sining tanan nga badbad sang Biblia. Apang, ang labi ka talalupangdon amo ang suod nga pagbuligay sang Watch Tower Society kag sang grupo sang hinaplas nga mga Saksi ni Jehova nga nagahuman sang New World Bible Translation Committee. Nagakalipay kami nga, sa kabug-usan ukon sa bahin, sa karon may kapin na sa 106,400,000 ka kopya sining badbad ang naimprinta sa 38 ka lenguahe. Ang Watch Tower Bible and Tract Society of Pennsylvania isa gid ka sosiedad sang Biblia!

‘Ang matutom nga ulipon’ ‘gintugyanan sang tanan nga pagkabutang sang iya agalon.’ Nagalakip ini sa mga pasilidad sa ulong-talatapan sa New York State, E.⁠U.⁠A., kag sa 110 ka sanga karon nga nagapanghikot sa bug-os kalibutan. Nahibaluan sang mga katapo sang ulipon nga klase nga sila ang manabat sa kon paano nila ginagamit ang gintugyan  sa ila. (Mateo 25:​14-​30) Apang, wala ini magpugong sa ‘ulipon’ agod tugutan ang kalipikado nga mga manugtatap gikan sa “iban nga mga karnero” sa pag-atipan sa legal kag administratibo nga mga responsabilidad. Sa katunayan, nagatugot ini sa Nagadumala nga Hubon nga maghugod sing mas madamo nga tion “sa pangamuyo kag sa ministeryo sang pulong.”​—⁠Binuhatan 6:⁠4.

Tubtob ginatugot sang mga kahimtangan sining kalibutan, ang Nagadumala nga Hubon, nga nagarepresentar sa “matutom kag mainandamon nga ulipon,” magagamit sang legal nga mga korporasyon. Nagapahapos ini, apang indi ini kinahanglanon gid. Kon ang legal nga korporasyon dulaon paagi sa mando sang panguluhan, ang pagbantala nga hilikuton magapadayon gihapon. Bisan karon, sa mga duog diin may mga pagdumili kag wala sing ginagamit nga legal nga korporasyon, ang mensahe sang Ginharian ginabantala, ang mga disipulo ginahimo, kag ang pag-uswag sang teokrasya nagapadayon. Nagakatabo ina bangod ang mga Saksi ni Jehova nagatanom kag nagabunyag, kag ‘ang Dios nagapatubo sini.’​—⁠1 Corinto 3:​6, 7.

Samtang nagatulok kita sa palaabuton, nagasalig kita nga si Jehova magaatipan sang espirituwal kag materyal nga mga kinahanglanon sang iya katawhan. Sia kag ang iya Anak, si Jesucristo, padayon nga magahatag sing langitnon nga panuytoy kag pagsakdag nga kinahanglanon agod matapos ang pagbantala sing Ginharian nga hilikuton. Sa pagkamatuod, ang ano man nga aton nahimo subong mga alagad sang Dios ginahimo ‘indi paagi sa kusog militar, ukon sa gahom, kundi paagi sa espiritu ni Jehova.’ (Zacarias 4:6) Busa nagapangamuyo kita sing bulig sang Dios, nakahibalo nga paagi sa kusog nga ginahatag ni Jehova, matapos naton ang hilikuton nga ginhatag niya sa aton nga himuon sa sining tion sang katapusan!