‘Bulong sa Imo Pusod’

ANG mga kahuol sa emosyon subong sang kahadlok, kasubo, kahisa, kaakig, dumot, kag pagbatyag nga nakasala amo kuno ang kabangdanan sang madamo nga balatian sang katawhan. Bangod sini, daw ano ka makalipay ang ginasiling sang Biblia nga ang ‘kahadlok kay Jehova bulong sa imo pusod kag paumpaw sa imo mga tul-an’!​​—⁠Hulubaton 3:​7, 8.

Ang mga tul-an amo ang nagasuportar nga balayan sang lawas. Gani, ang Biblia nagagamit sang tinaga nga mga “tul-an” sing malaragwayon, sa pagrepresentar sa pagkatawo sang isa​​—⁠ilabi na subong nga apektado sang tudok nga mga balatyagon kag mga emosyon. Apang paano ang kahadlok kay Jehova ‘bulong sa imo pusod’?

Tuhay ang mga opinyon sang mga iskolar sang Biblia may kaangtanan sa pagsambit sang “pusod” sa sining dinalan. Ang isa ka komentarista nagsiling nga bangod yari ini sa “sentro nga bahin sang lawas,” ang “pusod” mahimo magrepresentar sa tanan nga importante nga mga organo. Ang isa pa ka iskolar nagsiling nga ang tinaga nga “pusod” (navel sa Ingles) mahimo man magkahulugan sa umbilical cord (pusod), subong sang paggamit sa sini sa Ezequiel 16:⁠4. Kon amo sini, ang Hulubaton 3:8 mahimo nagapadaku sang aton kinahanglanon nga magsandig sing bug-os sa Dios​​—⁠subong nga ang isa ka walay mahimo nga kiring (fetus) bug-os nga nagasandig sa iya iloy agod mabuhi. Ang isa pa ka ideya amo nga ang “pusod” mahimo nagapatuhoy diri sa mga kaunuran kag mga lanitlanit sang lawas. Sa konteksto sini nga bersikulo, ini nga mga bahin mahimo ginapatuhay sa mga “tul-an”​—⁠ang mas matig-a nga mga bahin sang lawas.

Ano man ang espesipiko nga kahulugan sini, isa ka butang ang pat-od: Ang pagpakita sing matinahuron nga kahadlok kay Jehova isa ka dalanon sang kaalam. Ang pagpahisuno sa mga talaksan sang Dios makaamot sa aton pisikal nga kaayuhan karon. Labaw pa sa sina, matigayon naton ang kahamuot ni Jehova, nga magadul-ong sa walay katapusan nga kabuhi nga may himpit nga kapagros​―sa pisikal kag sa emosyon​―sa iya nagapakari nga bag-ong kalibutan.​―Isaias 33:​24; Bugna 21:​4; 22:⁠2.

[Picture Credit Line sa pahina 32]

Dr. G. Moscoso/SPL/Photo Researchers