Nagakabuhi Ka Bala Nahisuno sa Imo Dedikasyon?

“Bisan ano ang inyo himuon, himua ninyo ini sing bug-os kalag subong nga kay Jehova, kag indi nga sa mga tawo.”​—⁠COLOSAS 3:⁠23.

1. Sa sekular nga konteksto, ano ang ginapahangop sang tinaga nga “dedikasyon”?

PAANO malab-ot sang mga atleta ang ila pinakamaayo gid nga hinimuan? Sa tennis, soccer, basketball, baseball, palumba dalagan, golf, ukon bisan ano pa nga hampang, nalab-ot sang pinakamaayo nga mga atleta ang putukputukan paagi lamang sa malig-on nga dedikasyon. Ang pagkondisyon sang lawas kag hunahuna amo ang mga prioridad. Nahisanto gid ini sa isa sang mga kahulugan sang tinaga nga “dedikado,” nga amo, “desidido sing bug-os sa isa ka partikular nga hunahuna ukon buhat.”

2. Ano ang kahulugan sang “dedikasyon” sa Biblia? Iilustrar.

² Apang, ano ang kahulugan sang “dedikasyon” sa Biblia? Ang “pagdedikar” nagabadbad sang Hebreong tinaga nga may kahulugan nga “padayon nga napain; magpain; nahamulag.”⁠ * Sa dumaan nga Israel, ang Mataas nga Saserdote nga si Aaron nagsuksok sa iya turbante sang “balaan nga tanda sang dedikasyon,” nga isa ka nagabadlak nga plaka nga puro bulawan nga may natigib nga Hebreong mga tinaga nga “Pagkabalaan iya ni Jehova.” Magapahanumdom ini sa mataas nga saserdote nga dapat niya likawan ang bisan ano man nga butang nga nagapasipala sa santuaryo “bangod ang tanda sang dedikasyon, ang inughaplas nga lana sang iya Dios, yara sa iya.”​—⁠Exodo 29:​6; 39:​30; Levitico 21:⁠12.

3. Paano ang dedikasyon dapat makaapektar sa aton paggawi?

³ Makita naton sa sining konteksto nga ang dedikasyon isa ka serioso nga butang. Nagapahangop ini sing boluntaryo nga pagpakilala subong alagad sang Dios, kag nagakinahanglan ini sang matinlo nga paggawi. Busa, mahangpan naton kon ngaa ginbalikwat ni apostol Pedro si Jehova subong nagasiling: “Magpakabalaan kamo, kay balaan ako.” (1 Pedro 1:​15, 16) Subong dedikado nga mga Cristiano, may mabug-at nga katungdanan kita nga magkabuhi suno sa aton dedikasyon, nga magmatutom tubtob sa katapusan. Apang ano ang ginalakip sa Cristianong dedikasyon?​—⁠Levitico 19:⁠2; Mateo 24:⁠13.

4. Paano naton malab-ot ang pagdedikar, kag sa ano ini mapaanggid?

⁴ Sa tapos matigayon naton ang sibu nga ihibalo kay Jehova nga Dios kag sa iya mga katuyuan kag kay Jesucristo kag sa iya papel sa sining mga katuyuan, namat-od kita sing personal nga alagaron ang Dios upod ang aton bug-os nga tagipusuon, hunahuna, kalag, kag kusog. (Marcos 8:​34; 12:​30; Juan 17:⁠3) Mahimo gani ini tamdon subong personal nga sumpa, bug-os nga dedikasyon sa Dios. Ang aton dedikasyon wala ginahimo subong resulta sang nagabag-obag-o nga balatyagon. Ginbinagbinag ini sing maayo kag sing mapangamuyuon, nga nagagamit sang ikasarang sa pagpangatarungan. Busa, indi ini isa ka temporaryo nga desisyon. Indi mahimo nga mangin kaangay kita sang isa ka tawo nga nagaarado sang isa ka uma kag dayon nagauntat sang ulihi bangod trabahuso gali ini ukon bangod madugay pa ukon indi gid gali sigurado ang ani. Binagbinaga ang mga halimbawa sang pila nga “nagakapot sa arado” sang teokratikong responsabilidad bisan ano man ang matabo.​—⁠Lucas 9:​62; Roma 12:​1, 2.

 Wala Nila Ginsikway ang Ila Dedikasyon

5. Paano si Jeremias isa ka talalupangdon nga halimbawa sang isa ka dedikado nga alagad sang Dios?

⁵ Ang matagnaon nga ministeryo ni Jeremias sa Jerusalem naglawig sing kapin sa 40 ka tuig (647-607 B.⁠C.⁠E.), kag indi ini mahapos nga hilikuton. Nakahibalo gid sia sang iya mga limitasyon. (Jeremias 1:​2-⁠6) Kinahanglan niya ang kaisog kag pagbatas agod atubangon ang batinggilan nga mga taga-Juda sa adlaw-adlaw. (Jeremias 18:​18; 38:​4-⁠6) Apang, si Jeremias nagsalig kay Jehova nga Dios, nga nagpabakod sa iya agod mangin isa gid ka dedikado nga alagad sang Dios.​—⁠Jeremias 1:​18, 19.

6. Ano nga halimbawa ang ginpahamtang ni apostol Juan para sa aton?

⁶ Kamusta naman ang matutom nga si apostol Juan, nga gintapok anay sa di-maabiabihon nga pulo sang Patmos sa iya katigulangon bangod sang “paghambal nahanungod sa Dios kag sa pagpamatuod kay Jesus”? (Bugna 1:⁠9) Nagbatas sia kag nagkabuhi nahisuno sa iya dedikasyon subong isa ka Cristiano sa mga 60 ka tuig. Nagkabuhi sia lampas pa sa paglaglag sang Romanong mga hangaway sa Jerusalem. May pribilehiyo sia sa pagsulat sang Ebanghelyo, sang tatlo ka inspirado nga sulat, kag sang tulun-an sang Bugna, diin napanan-aw niya ang inaway sang Armagedon. Nag-untat bala sia sang nahibaluan niya nga indi gali magaabot ang Armagedon sa panahon nga nagakabuhi sia? Nagpatumbaya bala sia? Wala, si Juan nagpabilin nga matutom tubtob sa iya kamatayon, nakahibalo nga bisan pa ang ‘gintalana nga tion malapit na,’ ang katumanan sang iya mga palanan-awon yara pa sa palaabuton.​—⁠Bugna 1:⁠3; Daniel 12:⁠4.

Modernong mga Halimbawa Sang Dedikasyon

7. Paano ang isa ka utod nga lalaki isa ka maayo nga halimbawa sang Cristianong dedikasyon?

⁷ Sa modernong panahon, linibo ka matutom nga Cristiano ang makugi nga nagpabilin sa ila dedikasyon walay sapayan nga wala na nila masaksihan ang Armagedon. Ang isa sini nga indibiduwal amo si Ernest E. Beavor sang Inglaterra. Nangin Saksi sia sang 1939 sang nagsugod ang Bug-os Kalibutan nga Inaway II, kag gintalikdan niya ang mauswagon nga negosyo sa potograpiya sa imprintahan agod mangin bug-os tion nga ministro. Bangod sang paghupot sang iya Cristianong neutralidad, nabilanggo sia sing duha ka tuig. Mainunungon nga ginsuportahan sia sang iya pamilya, kag sang 1950 ang iya tatlo ka anak nag-eskwela sa Watchtower Bible School of Gilead para sa paghanas sa pagmisyonero, sa New York. Si Utod Beavor makugi katama sa iya pagbantala nga hilikuton amo nga gintawag sia sang iya mga abyan nga si Armagedon Ernie. Mainunungon sia nga nagkabuhi suno sa iya dedikasyon, kag tubtob sang napatay sia sang 1986, ginbantala niya nga malapit na ang inaway sang Dios nga Armagedon. Wala niya ginkabig ang iya dedikasyon subong isa ka kontrata sa Dios sa sulod sang limitado lamang nga tion!⁠ *​—⁠1 Corinto 15:⁠58.

8, 9. (a) Ano nga halimbawa ang ginpahamtang sang madamong pamatan-on nga lalaki sa Espanya sang panahon sang rehimen ni Franco? (b) Anong mga pamangkot ang nagakaigo?

 ⁸ Ang isa pa ka halimbawa sang wala nagaugdaw nga kakugi naggikan sa Espanya. Sang panahon anay sang rehimen ni Franco (1939-75), ginatos ka dedikado nga Saksi nga mga pamatan-on ang nanindugan subong Cristianong mga neutral. Madamo sa ila ang ginhunong sa mga bilangguan sang militar sa sulod sang napulo ukon kapin pa ka tuig. Kon tingubon ang mga pamatbat, ang isa ka Saksi, si Jesús Martín, nabilanggo sing 22 ka tuig. Ginbakol sia sing todo samtang bilanggo sa isa ka bilangguan sang militar sa Aminhan nga Aprika. Ang tanan mabudlay, apang wala sia magkompromiso.

⁹ Sa masami, ining mga pamatan-on wala sing ideya kon san-o sila buy-an, kon matabo gid man, kay napaidalom sila sa madamo, nagaalagisod nga pamatbat. Apang, ginhuptan nila ang ila integridad kag kakugi sa ministeryo samtang nabilanggo. Sang nag-ayo sang ulihi ang kahimtangan sang 1973, madamo sining mga Saksi, sini nga tion mga 30 anyos na ang edad, ang ginbuy-an sa bilangguan kag nagsulod sa bug-os tion nga ministeryo sa gilayon, ang iban nangin mga espesyal payunir kag nagalakbay nga mga manugtatap. Nagkabuhi sila nahisuno sa ila dedikasyon sa bilangguan, kag ang kalabanan nagpadayon sa paghimo sini sugod sang ginbuy-an sila.⁠ * Kamusta naman kita karon? Matutom bala kita sa aton dedikasyon kaangay sining mga mainunungon?​—⁠Hebreo 10:​32-34; 13:⁠3.

Nagakaigo nga Pagtamod sa Aton Dedikasyon

10. (a) Paano naton dapat tamdon ang aton dedikasyon? (b) Paano ginatamod ni Jehova ang aton pag-alagad sa iya?

¹⁰ Paano naton ginatamod ang aton dedikasyon sa Dios nga himuon ang iya kabubut-on? Amo bala ini ang nahauna nga butang sa aton kabuhi? Ano man ang aton kahimtangan, bata man ukon tigulang, minyo man ukon di-minyo, mapagros man ukon masakiton, dapat kita manikasog nga magkabuhi nahisuno sa aton dedikasyon, suno sa aton kahimtangan. Ang kahimtangan sang isa ka tawo mahimo magtugot sa iya nga mag-alagad sa bug-os tion nga ministeryo subong payunir, subong boluntaryo sa sanga talatapan sang Watch Tower Society, subong misyonero, ukon subong nagalakbay nga ministro. Ang pila ka ginikanan, sa pihak nga bahin, mahimo nga masako katama sa pag-atipan sa pisikal kag espirituwal nga mga kinahanglanon sang pamilya. Ang ila diutay lamang nga oras nga ginahinguyang sa ministeryo kada bulan kubos bala ang kabilihanan sa mga mata ni Jehova sangsa madamo nga inoras nga ginahinguyang sang isa ka bug-os tion nga alagad? Indi. Ang Dios wala gid nagapaabot sa aton sang kon ano ang wala sa aton. Si apostol Pablo naghatag sini nga prinsipio: “Kon ang pagkahanda yara na nga daan, labi ini nga kalahamut-an suno sa yara sa isa ka tawo, indi suno sa wala sa iya.”​—⁠2 Corinto 8:⁠12.

11. Sa ano nagadepende ang aton kaluwasan?

¹¹ Sa ano man nga kahimtangan, ang aton kaluwasan nagadepende, indi sa butang nga mahimo naton himuon, kundi sa di-bagay nga kaayo ni Jehova paagi kay Cristo Jesus, ang aton Ginuo. Si Pablo nagpaathag: “Ang tanan nagpakasala  kag nakulangan sing himaya sang Dios, kag subong walay bayad nga dulot nga ginpahayag sila nga matarong sang iya di-bagay nga kaayo paagi sa paghilway bangod sa pagtubos nga ginbayad ni Cristo Jesus.” Apang, ang aton mga binuhatan pamatuod sang aton aktibo nga pagtuo sa mga saad sang Dios.​—⁠Roma 3:​23, 24; Santiago 2:​17, 18, 24.

12. Ngaa indi kita dapat maghimo sing mga pagpaanggid?

¹² Indi kinahanglan nga maghimo kita sing mga pagpaanggid sa iban may kaangtanan sa kon daw ano kadamo nga tion ang ginahinguyang naton sa pag-alagad sa Dios, kon daw ano kadamo nga literatura sa Biblia ang napahamtang naton, ukon daw ano kadamo nga pagtuon sa Biblia ang ginadumalahan naton. (Galacia 6:​3, 4) Walay sapayan sang aton ginahimo sa Cristianong ministeryo, dapat naton tanan dumdumon ang mapainubuson nga mga pulong ni Jesus: “Gani kamo man, kon nahimo na ninyo ang tanan nga butang nga ginsugo sa inyo, magsiling kamo, ‘Mga ulipon kami nga walay pulos. Ginhimo lamang namon ang dapat namon himuon.’ ” (Lucas 17:10) Daw ano kasunson gid naton masiling nga ginhimo naton “ang tanan nga butang nga ginsugo” sa aton? Gani ang pamangkot amo, Ano dapat ang kalidad sang aton pag-alagad sa Dios?​—⁠2 Corinto 10:​17, 18.

Paghimo Sang Tagsa ka Adlaw nga Importante

13. Ano nga panimuot ang kinahanglan naton samtang ginatuman naton ang aton dedikasyon?

¹³ Sa tapos laygayan ang mga asawa, mga bana, mga kabataan, mga ginikanan, kag mga ulipon, si Pablo nagsulat: “Bisan ano ang inyo himuon, himua ninyo ini sing bug-os kalag subong nga kay Jehova, kag indi nga sa mga tawo, kay nakahibalo kamo nga makabaton kamo gikan kay Jehova sang nagakaigo nga padya sang palanublion. Magpaulipon kamo sa Agalon, kay Cristo.” (Colosas 3:​23, 24) Wala kita nagaalagad agod magdayaw ang mga tawo sa ginahimo naton sa pag-alagad kay Jehova. Ginahimulatan naton nga alagaron ang Dios paagi sa pagsunod sa halimbawa ni Jesucristo. Ginhimo niya ang iya malip-ot lamang nga ministeryo nga may pagkahilingagawon.​—⁠1 Pedro 2:⁠21.

14. Anong paandam ang ginhatag ni Pedro tuhoy sa katapusan nga mga adlaw?

 ¹⁴ Ginpakita man ni apostol Pedro ang balatyagon sang pagkahilingagawon. Sa iya ikaduha nga sulat, nagpaandam sia nga sa katapusan nga mga adlaw, may mga mayubiton​—⁠mga apostata kag mga maduhaduhaon⁠​—⁠​nga, suno sa ila kaugalingon nga mga luyag, magaduhaduha sa presensia ni Cristo. Apang, si Pedro nagsiling: “Si Jehova indi mahinay may kaangtanan sa iya saad, subong sang ginakabig sang iban nga kahinayon, kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol. Apang ang adlaw ni Jehova magaabot subong sang makawat.” Huo, ang adlaw ni Jehova pat-od nga magaabot. Busa, dapat naton kabalak-an sa adlaw-adlaw kon daw ano gid kapat-od kag kalig-on ang aton pagtuo sa saad sang Dios.​—⁠2 Pedro 3:​3, 4, 9, 10.

15. Paano naton dapat tamdon ang tagsa ka adlaw sa aton kabuhi?

¹⁵ Agod magkabuhi nahisuno sa aton dedikasyon sing nagakaigo, dapat naton gamiton ang tagsa ka adlaw sa kadayawan ni Jehova. Pagkatapos sang tagsa ka adlaw, mabalikid bala naton ini kag makita kon paano kita nakaamot sa pila ka paagi sa pagpakabalaan sa ngalan sang Dios kag sa pagbantala sing maayong balita sang Ginharian? Ayhan paagi ini sa aton matinlo nga paggawi, sa aton makapalig-on nga paghambalanay, ukon sa aton mahigugmaon nga pag-ulikid sa pamilya kag mga abyan. Gingamit bala naton ang mga kahigayunan agod ipaambit ang aton Cristianong paglaum sa iban? May nabuligan bala kita nga hunahunaon sing serioso ang mga saad sang Dios? Magtipon kita sing positibo nga butang sa espirituwal nga kahulugan kada adlaw, nagasupot, kon sa aton pa, sing daku, espirituwal nga kuwenta sa banko.​—⁠Mateo 6:​20; 1 Pedro 2:​12; 3:​15; Santiago 3:⁠13.

Patin-awa ang Imo Panan-aw

16. Sa anong mga paagi ginatinguhaan ni Satanas nga paluyahon ang aton dedikasyon sa Dios?

¹⁶ Nagakabuhi kita sa panahon nga labi pa nga  nagapabudlay sa mga Cristiano. Ginatinguhaan ni Satanas kag sang iya mga ahente nga paburunon ang pagkilala sa maayo kag malain, matinlo kag di-matinlo, moral kag imoral, kalahamut-an kag di-kalahamut-an. (Roma 1:​24-28; 16:​17-19) Labi pa nga ginapahapos niya nga dagtaan naton ang aton tagipusuon kag hunahuna paagi sa remote control sang TV ukon sa keyboard sang kompyuter. Ang aton espirituwal nga panan-aw mahimo magburon, ukon indi mapokus, agod indi naton mahantop ang iya malimbungon nga mga buhat. Ang aton pamat-od nga magkabuhi nahisuno sa aton dedikasyon mahimo magluya kag ang aton pagkapot sa “arado” mahimo maglugak kon ikompromiso naton ang aton espirituwal nga mga prinsipio.​—⁠Lucas 9:​62; Filipos 4:⁠8.

17. Paano ang laygay ni Pablo makabulig sa aton agod mahuptan ang aton kaangtanan sa Dios?

¹⁷ Busa ang mga pulong ni Pablo sa kongregasyon sa Tesalonica suno gid sa tion: “Amo ini ang kabubut-on sang Dios, ang pagpakabalaan sa inyo, agod nga maglihi kamo sa pagpakighilawas; agod nga ang tagsa sa inyo makahibalo kon paano panag-iyahan ang iya kaugalingon nga suludlan sa pagkabalaan kag sa kadungganan, indi sa mahamkunon nga seksuwal nga kailigbon subong man sang yara sa mga pungsod nga wala makakilala sa Dios.” (1 Tesalonica 4:​3-⁠5) Ang imoralidad nagdul-ong sa pag-disfellowship sa iban gikan sa Cristianong kongregasyon​—⁠sa mga nagpatumbaya sang ila dedikasyon sa Dios. Gintugutan nila ang ila kaangtanan sa Dios nga magluya, amo nga indi na sia importante sa ila kabuhi. Apang, si Pablo nagsiling: “Gintawag kita sang Dios, indi tungod sa pagkadi-matinlo, kundi may kaangtanan sa pagpakabalaan. Busa, nian ang tawo nga nagapakita sing indi pagsapak wala nagasapak, indi sa tawo, kundi sa Dios, nga nagabutang sang iya balaan nga espiritu sa inyo.”​—⁠1 Tesalonica 4:​7, 8.

Ano ang Imo Determinasyon?

18. Ano ang dapat nga determinasyon naton?

¹⁸ Kon nahangpan naton ang pagkaserioso sang aton dedikasyon kay Jehova nga Dios, ano dapat ang determinado nga himuon naton? Ang aton malig-on nga determinasyon dapat amo ang paghupot sing matinlo nga konsiensia may kaangtanan sa aton paggawi kag sa aton ministeryo. Si Pedro naglaygay: “Maghupot kamo sing matinlo nga konsiensia, agod sa butang nga ginapakalain kamo mahuy-an sila nga nagatamay sang inyo maayo nga paggawi may kaangtanan kay Cristo.” (1 Pedro 3:16) Mahimo nga kinahanglan kita mag-antos kag mag-atubang sing pag-abuso bangod sang aton Cristianong paggawi, apang amo man anay ang natabo kay Cristo bangod sang iya pagtuo kag pagkamainunungon sa Dios. “Busa,” si Pedro nagsiling, “sanglit si Cristo nag-antos sa unod, magsangkap man kamo sa inyo kaugalingon sing amo man nga disposisyon sa hunahuna; bangod ang tawo nga nag-antos sa unod nag-untat na gikan sa mga sala.”​—⁠1 Pedro 4:⁠1.

19. Ano ang luyag naton nga masiling tuhoy sa aton?

¹⁹ Sa pagkamatuod, ang aton malig-on nga determinasyon nga magkabuhi nahisuno sa aton dedikasyon magaamlig sa aton gikan sa mga siod sang kalibutan ni Satanas nga nagamasakit sa espirituwal, moral, kag pisikal. Apang indi lang ina, matigayon naton ang pagsalig nga nahamuot ang Dios sa aton, nga mas maayo sangsa bisan ano nga butang nga mahatag ni Satanas kag sang iya mga ahente. Sa amo, indi gid pagtuguti nga masiling nga ginbiyaan naton ang aton gugma sang una naton nahibaluan ang kamatuoran. Sa baylo, tuguti nga masiling sa aton ang ginsiling anay sa unang-siglo nga kongregasyon sa Tiatira: “Nahibaluan ko ang imo mga buhat, kag ang imo gugma kag pagtuo kag pag-alagad kag pagbatas, kag ang imo katapusan nga mga buhat labi pa sa mga nahauna.” (Bugna 2:​4, 18, 19) Huo, indi kita mag-alabaab tuhoy sa aton dedikasyon, kundi “magmainit [kita] sa espiritu,” makugi tubtob sa katapusan​—⁠kag ang katapusan malapit na.​—⁠Roma 12:​11; Bugna 3:​15, 16.

[Mga nota]

Madumduman Mo Bala?

• Ano ang nadalahig sa dedikasyon?

• Anong dumaan kag modernong mga halimbawa sang dedikado nga mga alagad sang Dios ang takus nga ilugon naton?

• Paano naton dapat tamdon ang aton pag-alagad sa Dios?

• Ano ang dapat nga determinasyon naton tuhoy sa aton dedikasyon sa Dios?

[Mga Pamangkot sa Pagtinuon]

[Retrato sa pahina 15]

Si Jeremias nagpabilin nga matutom walay sapayan sang makasiligni nga pagtratar

[Retrato sa pahina 16]

Si Ernest Beavor nagpahamtang sing halimbawa para sa iya mga kabataan subong isa ka makugi nga Cristiano

[Retrato sa pahina 17]

Ginatos sang mga pamatan-on nga Saksi sa mga bilangguan sa Espanya ang naghupot sang ila integridad

[Mga retrato sa pahina 18]

Magtipon kita sing positibo nga butang sa espirituwal nga kahulugan kada adlaw