Ang Pagpakig-away Batok sa Kaimulon—Isa Bala ka Di-madaug nga Inaway?

MAKITA sang mga turista nga nagaduaw sa Nasyones Unidas sa New York City ang Economic and Social Council Chamber, nga kitaon ang mga tubo kag linya sang mga koryente sini sa kisame sang publiko nga galerya. Ang nagagiya sa pagpamasyar nagapaathag: “Ang ‘wala-mahuman’ nga kisame kinaandan na nga ginatamod subong isa ka simbuliko nga pahanumdom nga ang hilikuton sang Nasyones Unidas sa ekonomiya kag katilingban wala gid nagakatapos; may yara pirme dugang pa nga mahimo himuon agod pauswagon ang kahimtangan sang pagkabuhi sang katawhan sa kalibutan.”

Bisan pa obligado ang Konseho nga tumanon ang maayo nga katuyuan sang pagpalig-on sang mataas nga talaksan sang pagkabuhi para sa tanan, ang hilikuton daw wala sing katapusan. Sing makawiwili, sa tion sang ministeryo ni Jesucristo sa duta sang una nga siglo C.⁠E., sia nagsiling: “Ang espiritu ni Jehova yari sa akon, bangod nga ginhaplas niya ako sa pagwali sing maayong balita sa mga imol.” (Lucas 4:18) Ano ang “maayong balita” nga iya ginbantala? Ini amo ang mensahe nahanungod sa Ginharian nga tukuron ni Jehova nga Dios, nga nangin ‘pamakod sang imol . . . nga nasit-an,’ paagi kay Jesucristo subong Hari. Ano ang himuon sinang Ginharian? Si Isaias nagtagna: “Si Jehova sang mga kasuldadusan magahimo sa tanan nga katawhan . . . sing isa ka piesta sang matambok nga mga pagkaon, sang piesta sang alak nga ginpalugdang, sang matambok nga mga kalan-on nga puno sing utok sa tul-an, sang mga alak nga ginpalugdang, nga sinala. Lamunon niya ang kamatayon sing dayon, kag pat-od nga pahiran sang Soberanong Ginuong Jehova ang mga luha gikan sa tanan nga nawong.”​​—⁠Isaias 25:​4-6, 8.

Luyag mo bala matun-an sing dugang pa kon paano ‘pauswagon [sang Ginharian sang Dios] ang kahimtangan sang pagkabuhi sang katawhan sa kalibutan,’ agod nga wala na sing kaimulon? Tan-awa sa ubos agod mahisayran kon paano ka maduaw sang isa ka kalipikado nga manunudlo agod ipakita sa imo sing dugang pa ang ginasiling sang Biblia tuhoy sining mga butang.