Magtindog sing Bug-os kag Magtuo sing Malig-on

Ang Maisog nga mga Manughupot sing Integridad Nagmadinalag-on sa Paghingabot sang mga Nazi

“MAGMAALAM ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.” (Hulubaton 27:11) Ining mainit nga pangabay nagapakita nga ang intelihente nga mga tinuga sang Dios sarang makapahalipay sang tagipusuon ni Jehova bangod matutom kag mainunungon sila sa iya. (Sofonias 3:17) Apang, si Satanas, nga manugyaguta, determinado sa pagbugto sa integridad sang mga nagaalagad kay Jehova.​—⁠Job 1:​10, 11.

Ilabi na sugod sang maaga nga bahin sang ika-20 nga siglo sang gintagbong sia gikan sa langit pakadto sa duta, si Satanas naakig sing daku sa katawhan ni Jehova. (Bugna 12:​10, 12) Walay sapayan sina, ang matuod nga mga Cristiano nagtindog ‘sing bug-os kag nagtuo sing malig-on’ kag naghupot sang ila integridad sa Dios. (Colosas 4:12) Binagbinagon naton sing malip-ot ang isa ka tumalagsahon nga halimbawa sining paghupot sing integridad​—⁠ang iya sang mga Saksi ni Jehova sa Alemanya antes kag sa tion sang Bug-os Kalibutan nga Inaway II.

Ang Makugi nga Hilikuton Nagadul-ong sa mga Pagtilaw Sang Integridad

Sang katuigan 1920 kag sang maaga nga bahin sang katuigan 1930, ang Bibelforscher, ang tawag anay sa mga Saksi ni Jehova sa Alemanya, nagpanagtag sing madamo nga literatura sa Biblia. Sa ulot sang 1919 kag 1933, nakapahamtang sila sang promedyo nga walo ka libro, mga polyeto, ukon mga magasin sa tagsa ka pamilya sa Alemanya.

Sadto nga tion, ang Alemanya may isa sang pinakadaku nga grupo sang hinaplas nga mga sumulunod ni Cristo. Sa katunayan, sa 83,941 ka tawo sa bug-os kalibutan nga nakigbahin sa Panihapon sang Ginuo sang 1933, halos 30 porsiento ang nagapuyo sa Alemanya. Wala magdugay, ining Aleman nga mga Saksi nakaeksperiensia sing masakit nga mga pagtilaw sang integridad. (Bugna 12:​17; 14:12) Ang mga pagpahalin sa mga trabaho, pagsalakay sa mga puluy-an, kag pagsuspende sa mga eskwelahan madasig nga nagdul-ong sa mga pagbakol, pagdakop, kag pagbilanggo. (Retrato 1) Gani, sang mga tinuig nga nagdul-ong sa Bug-os Kalibutan nga Inaway II, ang mga Saksi ni Jehova nagahuman sa 5 tubtob 10 porsiento sang kabug-usan nga nabilanggo sa mga kampo konsentrasyon.

Kon Ngaa Ginhingabot Sang mga Nazi ang mga Saksi

Apang, ngaa naakig ang rehimen sang mga Nazi sa mga Saksi ni Jehova? Sa iya libro nga Hitler​—⁠1889-1936: Hubris, ang propesor sang maragtas nga si Ian Kershaw nagsiling nga ang mga Saksi nangin puntariya sang paghingabot bangod nagdumili sila “sa pagsunod sa bug-os nga ginapatuman sang estado sang mga Nazi.”

Ang libro nga Betrayal​​—⁠German Churches and the Holocaust, nga gin-edit sang propesor sang maragtas nga si Robert P. Ericksen kag sang propesor sang pagtuon sa mga Judiyo nga si Susannah Heschel, nagpaathag nga ang mga Saksi “nangindi sa pagpakigbahin sa kasingki ukon sa paggamit  sang puwersa militar. . . . Ang mga Saksi nagapati sa neutralidad sa politika, nga nagakahulugan nga indi sila mahimo makaboto kay Hitler ukon makasaludo kay Hitler.” Ini, dugang pa sini man nga tiliman-an, nagpaakig sa mga Nazi kag nagbutang sa mga Saksi sa kahalitan bangod “ang National Socialism indi magpasugot sa sini nga pagpangindi.”

Isa ka Bug-os Kalibutan nga Protesta kag Lakas nga Pagsalakay

Paagi sa isa ka pinasahi nga mensahero, sang Pebrero 9, 1934, si Joseph F. Rutherford, nga amo sadto ang nagapanguna sa hilikuton, nagpadala kay Hitler sing isa ka sulat sang protesta bilang sabat sa pagkapanatiko sang mga Nazi. (Retrato 2) Sang Oktubre 7, 1934, ang sulat ni Rutherford ginsundan sang mga 20,000 ka sulat kag telegrama sang protesta nga ginpadala kay Hitler sang mga Saksi ni Jehova sa 50 ka pungsod, pati na sa Alemanya.

Ang mga Nazi nagbalos paagi sa pagpabaskog pa sang ila paghingabot. Sang Abril 1, 1935, ang mga Saksi gindumilian sa bug-os nga pungsod. Kag sang Agosto 28, 1936, ang Gestapo naglansar sing lakas nga pagsalakay batok sa ila. Apang, ang mga Saksi “padayon nga nagpanagtag sing mga pampleta kag naghupot man sang ila pagtuo,” siling sang Betrayal​​—⁠German Churches and the Holocaust.

Bisan pa ginabantayan sing maayo sang Gestapo, halimbawa, sang Disiembre 12, 1936, mga 3,500 ka Saksi ang nagpanagtag sing linibo ka kopya sang isa ka naimprinta nga resolusyon may kaangtanan sa pagmaltrato nga ginaantos nila. Nahanungod sini nga kampanya, Ang Lalantawan nagreport: “Isa yadto ka daku nga kadalag-an kag matalom nga pagbuno sa kaaway, nga sa di-malaragway nga kalipay sang matutom nga mga manugpangabudlay.”​—⁠Roma 9:⁠17.

Ang Paghingabot Napaslawan!

Ang pagpangita sang mga Nazi sa mga Saksi ni Jehova nagpadayon. Sang 1939, anom ka libo sa ila ang ginbilanggo, kag linibo ang ginpadala sa mga kampo konsentrasyon. (Retrato 3) Ano anay ang kahimtangan sang natapos ang Bug-os Kalibutan nga Inaway II? Mga 2,000 ka nabilanggo nga Saksi ang napatay, ang kapin sa 250 paagi sa pagpatay. Walay sapayan sini, sulat nanday Propesor Ericksen kag Heschel, “ang mga Saksi ni Jehova sa kabilugan nanguyapot sa ila pagtuo walay sapayan sang problema.” Subong resulta, sang ang rehimen ni Hitler napukan, kapin sa isa ka libo ka Saksi ang nagguwa nga madinalag-on gikan sa mga kampo.​—⁠Retrato 4; Binuhatan 5:​38, 39; Roma 8:​35-37.

Ano ang naghatag sa katawhan ni Jehova sing kusog agod mabatas ang paghingabot? Ang nakalampuwas sa kampo konsentrasyon nga si Adolphe Arnold, nagpaathag: “Bisan pa ginaluyahan gid ikaw, si Jehova nakakita sa imo, nakahibalo sang imo ginabatas, kag ihatag niya sa imo ang kinahanglanon nga kusog agod malandas ang kahimtangan kag magpabilin nga matutom. Ang iya kamot indi tuman kalip-ot.”

Ang mga pulong ni manalagna Sofonias nagakaigo gid nga naaplikar sa sadtong matutom nga mga Cristiano! Sia nagsiling: “Si Jehova nga imo Dios yara sa tunga nimo. Subong Isa nga gamhanan, sia magaluwas. Magahugyaw sia sa imo nga may kasadya.” (Sofonias 3:17) Kabay nga ang tanan nga sumilimba sang matuod nga Dios karon magailog sang pagtuo sadtong matutom nga mga Saksi nga naghupot sang integridad walay sapayan sang paghingabot sang mga Nazi kag nagpahalipay man sang tagipusuon ni Jehova.​—⁠Filipos 1:​12-14.

[Picture Credit Line sa pahina 8]

Państwowe Muzeum Oświęcim-Brzezinka, courtesy of the USHMM Photo Archives