Ang Matuod nga Cristianismo Nagalandas!

“Sa gamhanan nga paagi ang pulong ni Jehova padayon nga nagatubo kag nagalandas.”​—⁠BINUHATAN 19:⁠20.

1. Ilaragway ang pagtubo sang Cristianismo sang unang siglo.

GINPAPAGSIK bangod sa gahom sang balaan nga espiritu, ang unang mga Cristiano mainit nga nagwali sang pulong sang Dios nga indi mahimo paluyahon. Ang isa ka istoryador nagsulat: “Ang Cristianismo naglapnag sa talalupangdon gid nga kadasigon sa kalibutan sang Roma. Sang tuig 100 ayhan ang tagsa ka probinsia nga nagadulunan sa Mediteraneo may isa ka Cristianong komunidad sa sini.”

2. Paano gintinguhaan ni Satanas nga sumpakilon ang maayong balita, kag paano ini gintagna?

² Indi mapahipos ni Satanas nga Yawa ang unang mga Cristiano. Sa baylo, ginsumpakil niya ang epekto sang maayong balita sa isa pa ka paagi​—⁠apostasya. Gintagna ni Jesus ini nga hitabo sa iya parabola tuhoy sa trigo kag gamhon. (Mateo 13:​24-30, 36-43) Nagpaandam man si apostol Pedro nga magautwas ang butig nga mga manunudlo sa sulod sang kongregasyon, nga nagapasulod sing malaglagon nga mga sekta. (2 Pedro 2:​1-3) Sing kaanggid, si apostol Pablo espesipiko nga nagpaandam nga magauna ang apostasya sa adlaw ni Jehova.​—⁠2 Tesalonica 2:​1-3.

3. Ano ang natabo sang napatay ang mga apostoles?

³ Sang napatay ang mga apostoles, ang maayong balita gintabunan sang paganong mga panudlo kag mga pilosopiya. Subong sang gintagna, ginpatiko kag ginsimpunan sang butig nga mga manunudlo ang putli nga mensahe sang kamatuoran. Sing amat-amat, ang matuod nga Cristianismo gintabunan sang isa ka huwad nga gintawag Cristiandad. Nag-utwas ang isa ka klero nga klase nga nagtinguha nga indi makalab-ot ang Biblia sa mga timawa. Bisan pa nagdamo ang nagatawag sang ila kaugalingon nga mga Cristiano, ang ila pagsimba indi putli. Ang Cristiandad naglapnag kag nangin gamhanan nga institusyon kag daku nga impluwensia sa Nakatundan nga kultura, apang wala ini ginapakamaayo sang Dios ni may espiritu niya.

4. Ngaa ang padugi ni Satanas nga pamatukan ang katuyuan sang Dios nalugaw-an?

⁴ Apang, ang padugi ni Satanas nga pamatukan ang katuyuan ni Jehova gintalana nga malugaw-an. Bisan sa pinakamadulom nga mga adlaw sang apostasya, ang matuod nga Cristianismo buhi gihapon sa tunga nila. Ang mga lalaki nga nagkopya sang Biblia mahalungon nga naghimo sini sing sibu. Sa amo, ang Biblia mismo nagpabilin nga walay simpon, bisan pa nga ang mensahe sini ginpatiko sang madamo nga nagapangangkon nga may awtoridad sa pagtudlo sini. Sa sulod sang mga siglo ang mga iskolar subong nanday Jerome kag Tyndale maisog nga nagbadbad kag nagpanagtag  sang Pulong sang Dios. Minilyon ka tawo ang nadayag sa Biblia kag sa isa ka porma sang Cristianismo, bisan pa nga ini huwad anay.

5. Ano ang gintagna ni manalagna Daniel tuhoy sa “matuod nga ihibalo”?

⁵ Sang ulihi, subong sang gintagna sang tulun-an ni Daniel, ‘ang matuod nga ihibalo nagbugana.’ Natabo ini sa “tion sang katapusan”​—⁠sa tion nga nagakabuhi kita karon. (Daniel 12:⁠4) Gintuytuyan sang balaan nga espiritu ang mga mahigugmaon sang kamatuoran sa bug-os nga kalibutan sa sibu nga ihibalo sang matuod nga Dios kag sang iya katuyuan. Bisan pa sa tapos sang mga siglo sang apostata nga pagpanudlo, ang pulong sang Dios nagalandas! Sa karon, ang maayong balita ginawali bisan diin, nga nagatudlo sa mga tawo sa paglaum nga isa ka makalilipay nga bag-ong kalibutan. (Salmo 37:11) Usisaon naton karon ining modernong-adlaw nga pagtubo sang pulong sang Dios.

Pagtubo Sang Pulong Karon

6. Ano nga mga kamatuoran ang nahangpan sang mga Estudyante sang Biblia sang tuig 1914?

⁶ Sang talipuspusan sang ika-19 nga siglo, ginpabaskog sang kamatuoran sang Biblia ang isa ka diutay nga grupo sang mga Estudyante sang Biblia, nga kilala karon subong mga Saksi ni Jehova. Sang 1914 ang Biblia nangin buhi sa ila. Nahangpan nila ang dalayawon nga mga kamatuoran tuhoy sa katuyuan sang Dios. Natandog gid sila sang gugma ni Jehova sa pagpadala sang iya Anak sa duta, sa amo nagbukas sang dalan padulong sa kabuhi nga walay katapusan. Nakilala man nila kag naapresyar ang ngalan kag personalidad sang Dios. Dugang pa, nahisayran nila nga ang “panahon sang mga Gentil” natapos na, nga nagapatimaan nga ang tion malapit na agod ihatag sang gobierno sang Ginharian sang Dios ang mga pagpakamaayo sa katawhan. (Lucas 21:​24, King James Version) Daw ano gid ka makalilipay nga maayong balita! Ining dinamiko nga mga kamatuoran dapat mahibaluan sang tanan, bisan diin. Ang mga kabuhi nataya!

7. Paano naglandas ang kamatuoran sang Biblia sa moderno nga mga tion?

⁷ Ginpakamaayo ni Jehova yadtong diutay nga grupo sang ginhaplas-sang-espiritu nga mga Cristiano. Sa karon, ang kadamuon sang nagbaton sang matuod nga Cristianismo naglampas na sa anom ka milyon. Ang pulong sang Dios naglapnag man sa madamo nga pungsod, kay ang mga Saksi ni Jehova makita na sa 235 ka kadutaan. Dugang pa, ang kamatuoran sang Biblia naghatag sing gahom, naglandas sang tanan nga balagbag, sa relihion man kag sa iban pa. Ining hilikuton nga pagbantala sa bug-os nga kalibutan nagahatag sing  di-mabais nga pamatuod nga si Jesus nagagahom na sa Ginharian.​—⁠Mateo 24:​3, 14.

8. Ano ang ginsiling sang iban tuhoy sa pagtubo sang mga Saksi ni Jehova?

⁸ Subong nga ang mga istoryador nagkomento anay sa madasig nga pagtubo sang Cristianismo sang unang siglo, madamong iskolar ang nagkomento man tuhoy sa pagtubo sang katawhan ni Jehova sa modernong mga tion. Sa Estados Unidos, ang duha ka iskolar magkaupod nga nagsulat: “Sang nagligad nga 75 ka tuig ang mga Saksi ni Jehova nakaagom sing tumalagsahon nga kadasigon sang pagtubo . . . kag nahimo ini sa bug-os kalibutan nga kasangkaron.” Ang isa ka balasahon sa Sidlangan nga Aprika nagapatuhoy sa mga Saksi subong “isa sang labing madasig magdamo kag respetado kaayo nga relihion sa kalibutan nga nakilal-an sing internasyonal tungod sa bug-os nga pagsunod sini sa mga panudlo sang Biblia.” Kag ang balasahon sang konserbatibo nga Katoliko, nga ginbalhag sa Europa, nagapatuhoy sa “tumalagsahon nga pagtubo sang mga Saksi ni Jehova.” Ano ang nakaamot sa sining pagtubo?

Ang Balaan nga Espiritu Nagapanghikot Karon

9. (a) Ano ang panguna nga rason kon ngaa nagalandas karon ang pulong sang Dios? (b) Paano ginabuyok ni Jehova ang mga tawo sa iya?

⁹ Ang nahauna nga rason nga ang pulong sang Dios nagalandas karon amo nga ang espiritu ni Jehova nagapanghikot sing gamhanan, subong anay sang unang siglo. Si Jesus nagsiling: “Wala sing tawo nga makakari sa akon luwas kon buyukon sia sang Amay, nga nagpadala sa akon.” (Juan 6:44) Ining mga pulong nagapahangop nga mainayuhon nga ginaganyat sang Dios ang mga husto nga napahamtang, nga nagaganyat sa mga tagipusuon. Paagi sa hilikuton nga pagbantala sang iya mga Saksi, ginabuyok ni Jehova sa pagsimba sa iya ang “kalahamut-an nga mga butang sang tanan nga pungsod”​—⁠ang mahagop, tulad-karnero nga mga tawo sang duta.​—⁠Hageo 2:​6, 7.

10. Ano nga sahi sang mga tawo ang nagpamati sa pulong sang Dios?

¹⁰ Wala lamang ginasakdag sang balaan nga espiritu ang katawhan sang Dios sa pagdala sang pulong sang Dios sa pinakaukbong nga bahin sang duta; ginapahulag sini ang tanan nga sahi sang tawo sa pagpamati sa maayong balita. Sa pagkamatuod, yadtong nagbaton sang pulong sang Dios naghalin “sa tagsa ka tribo kag hambal kag katawhan kag pungsod.” (Bugna 5:9; 7:​9, 10) Makita sila sa tunga sang mga manggaranon kag mga imol, sa  mga mataas sing tinun-an kag sa mga wala sing tinun-an. Ang iban nagbaton sang pulong sa mga kahimtangan nga may inaway kag mapintas nga paghingabot, samtang ang iban naman nagbaton sini sa tion nga may kalinong kag kabuganaan. Sa idalom sang tanan nga sahi sang gobierno, sa tanan nga kultura, halin sa mga kampo konsentrasyon tubtob sa mga palasyo, ang mga lalaki kag mga babayi nagpamati sa maayong balita.

11. Paano nagapanghikot ang balaan nga espiritu sa kabuhi sang katawhan sang Dios, kag ano nga kinatuhayan ang maathag gid?

¹¹ Walay sapayan sang makahayanghag nga pagkananuhaytuhay sang katawhan sang Dios, nagapuyo sila nga may paghiusa sa isa kag isa. (Salmo 133:​1-3) Nagahatag ini sing dugang nga pamatuod nga ang balaan nga espiritu nagapanghikot sa kabuhi sang mga nagaalagad sa Dios. Ang iya espiritu isa ka gamhanan nga kusog para sa ikaayo nga nagabulig sa iya mga alagad agod ipakita ang gugma, kalipay, paghidait, pagkaayo, kag iban pa maayo nga mga kinaiya. (Galacia 5:​22, 23) Sa karon, nahantop naton sing maathag ang gintagna ni manalagna Malaquias madugay na ang nakaligad: “Makita ninyo ang kinatuhayan sa ulot sang isa nga matarong kag sang isa nga malauton, sa ulot sang isa nga nagaalagad sa Dios kag sang isa nga wala nagaalagad sa iya.”​—⁠Malaquias 3:⁠18.

Ang Pulong Sang Dios Nagalandas sa Makugi nga mga Manugpangabudlay

12. Ano ang balatyagon sang mga Saksi ni Jehova sa hilikuton nga pag-ebanghelyo, kag ano nga reaksion sa ila pagbantala nga hilikuton ang ginapaabot nila?

¹² Ang mga Saksi ni Jehova aktibo karon nga mga sumilimba. Nagapakigbahin sila sing aktibo sa hilikuton nga pag-ebanghelyo. Kaangay sang unang mga Cristiano, ginapresentar nila sing kinabubut-on ang ila kaugalingon sa paghimo sang kabubut-on sang Dios, nga nagabulig sa iban nga makatuon tuhoy sa mga saad sang Ginharian ni Jehova. Mga masigkamanugpangabudlay sila sang Dios nga, nahisanto sa iya balaan nga espiritu, nagatipon sang iban sa pag-alagad kay Jehova. Sa paghimo sini, ginapabanaag nila ang kaluoy kag gugma ni Jehova sa di-matinuuhon nga katawhan. Kag ginahimo nila ini walay sapayan nga nagasumalang sing di-pagsapak, pag-uligyat, kag paghingabot. Ginhanda ni Jesus ang iya mga sumulunod para sa nagkalainlain nga mga reaksion sa maayong balita. Nagsiling sia: “Ang ulipon indi daku pa sa iya agalon. Kon ginhingabot nila ako, hingabuton man nila kamo; kon gintuman nila ang akon pulong, tumanon nila ang inyo man.”​—⁠Juan 15:⁠20.

13. Anong mga kinaiya ang wala sa Cristiandad nga bugana naman sa tunga sang mga Saksi ni Jehova?

 ¹³ Indi mahimo nga indi kita magadayaw sa pagkaanggid sang mga Saksi ni Jehova karon kag sang mga nagbaton sang matuod nga Cristianismo sang unang siglo. Talalupangdon man ang kinatuhayan sa ulot sang mga Saksi ni Jehova kag sang Cristiandad karon. Sa tapos nga nagsulat tuhoy sa kakugi sa pag-ebanghelyo sang unang mga Cristiano, ang isa ka iskolar nagpanalambiton: “Kon wala sing pagbag-o sa karon nga palakat sang simbahan agod nga sa liwat ang hilikuton sa pag-ebanghelyo mangin isa ka butang nga ginahangop subong obligado sa tagsa ka bawtismado nga Cristiano, kag ginapamatud-an sang isa ka kinaiya sang pagkabuhi nga nagalabaw sangsa ginapatubas sang mga walay pagtuo, indi mahimo nga magauswag kita.” Ang mga kinaiya mismo nga wala sa Cristiandad bugana sa mga Saksi ni Jehova! Ang ila pagtuo buhi, isa ka matuod nga pagtuo, kag pagtuo nga pasad sa kamatuoran sang Biblia nga ginabatyag nila nga dapat ipaambit sa tanan nga magapamati.​—⁠1 Timoteo 2:​3, 4.

14. Ano ang pagtamod ni Jesus sa iya ministeryo, kag ano nga panimuot ang ginapakita sang iya mga disipulo karon?

¹⁴ Ginhimo ni Jesus ang iya ministeryo sing serioso gid, nga amo ang una nga ginkabalak-an niya. Nagsiling sia kay Pilato: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” (Juan 18:37) Ang katawhan sang Dios may balatyagon nga pareho kay Jesus. Bangod ang kamatuoran sang Biblia yara sa ila tagipusuon, nagapanikasog sila nga makakita sing mga pamaagi agod mapaambit ini sa madamo kon mahimo pa. Ang pila sining mga pamaagi nagapakita sing tumalagsahon nga pagkamapahituon.

15. Paano ang iban nagpakita sing pagkamapahituon sa pagbantala sing maayong balita?

¹⁵ Sa isa ka pungsod sa Bagatnan nga Amerika, ang mga Saksi naglakbay nga nagapangalihid sa Amazon River agod mapalab-utan sing kamatuoran ang mga tawo. Apang, sang nag-utwas sing hinali ang pinuyas sang 1995, ang pag-agi sang mga sibilyan sa suba gindumilian. Bangod determinado ang mga Saksi nga padayon nga suplayan ang mga interesado sing mga publikasyon sa Biblia, namat-od sila nga ipaanod sa suba ang mensahe. Naghimo sila sing mga sulat kag ginsulod ini upod sa mga kopya sang mga magasin nga Ang Lalantawan kag Magmata! sa wala unod nga plastik nga mga botelya. Nian ginpaanod nila ang mga botelya sa suba. Ginhimo nila ini sa sulod sang apat ka tuig kag tunga tubtob nga ginbuksan liwat ang suba sa mga sibilyan. Sa bug-os nga higad sang suba, ginpasalamatan sang mga tawo ang mga Saksi tungod sa literatura. Isa ka babayi nga madugay na nga isa ka estudyante sang Biblia ang naghakos sa ila nga may mga luha sa iya mga mata kag nagsiling: “Abi ko indi ko na kamo liwat makita. Apang, sang nabaton ko ang mga literatura sa mga botelya, nahibaluan ko nga wala ninyo ako ginkalimtan!” Ang iban pa nga mga nagapuyo sa tupad sang suba nagsiling nga pirme nila nabasa ang mga magasin. Madamo nga minuro ang may “talatapan sang koreo”​—⁠isa ka alimpulos sa tubig diin nagasupot sing umalagi ang nagalutaw nga mga butang. Didto ginatan-aw sing masunson sang mga interesado kon may “sulat” halin sa ilaya.

16. Ngaa ang pagpabilin nga handa nagabukas kon kaisa sang dalan sa paghimo sing disipulo?

¹⁶ Ang pagbantala sing maayong balita ginatuytuyan kag ginasakdag ni Jehova nga Dios kag sang iya gamhanan nga mga anghel. (Bugna 14:⁠6) Paagi sa pagpabilin naton nga handa, ang wala ginapaabot nga mga kahigayunan sa paghimo sing mga disipulo nagautwas kon kaisa. Sa Nairobi Kenya, natapos sang duha ka Cristianong babayi nga nagaalagad sa latagon nga duawon ang mga kabalayan nga gintangdo sa ila. Hingalagan lamang, isa ka lamharon nga babayi ang nagpalapit  sa ila kag malangkagon nga nagsiling: “Madugay na ako nagapangamuyo nga masugilanon ang katulad ninyo.” Nakitluoy sia sa mga Saksi nga magduaw gilayon sa iya puluy-an para sa isa ka paghambalanay, kag isa ka pagtuon sa Biblia ang nasugdan sa iya sadto mismo nga adlaw. Ngaa nagpalapit ang babayi sa duha ka Cristiano sing hilingagawon gid? Sang nagligad nga duha ka semana, napatay ang iya lapsag nga babayi. Gani sang nakita niya ang isa ka bata nga lalaki nga nagauyat sing tract nga “Ano ang Paglaum sang Napatay nga mga Hinigugma?” naluyagan gid niya ini kag ginpangayo ini sa bata. Wala niya ini ginhatag, apang gintudlo niya ang mga Saksi nga naghatag sa iya sing tract. Wala madugay ang babayi nag-uswag sing maayo sa espirituwal kag mas nasarangan na niya nga atubangon ang masakit nga pagkapatay sang iya anak.

Ang Gugma Sang Dios Dapat Mangibabaw

17-19. Ano nga gugma ang ginpakita ni Jehova sa katawhan paagi sa gawad?

¹⁷ Ang pagtubo sang pulong sang Dios sa bug-os nga duta naangot sing suod sa halad nga gawad ni Cristo Jesus. Kaangay sang gawad, ang pagbantala nga hilikuton isa ka pagpabutyag sang gugma ni Jehova para sa mga tawo bisan diin. Si apostol Juan gin-inspirar sa pagsulat: “Ginhigugma gid sang Dios ang kalibutan [sang katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.”​—⁠Juan 3:⁠16.

¹⁸ Hunahunaa ang gugma nga ginpakita ni Jehova sa pag-aman sing gawad. Sa sulod sang malawig nga tion, ang Dios may malapit nga kaangtanan sa iya pinalangga, bugtong nga Anak, “ang pamuno sang pagpanuga sang Dios.” (Bugna 3:14) Ginahigugma sing tudok ni Jesus ang iya Amay, kag ginahigugma ni Jehova ang iya Anak “sa wala pa mapasad ang kalibutan.” (Juan 14:31; 17:24) Gintugutan ni Jehova ining hinigugma nga Anak nga mapatay agod ang katawhan makabaton sing kabuhi nga walay katapusan. Daw ano ka makapulunaw nga pagpakita sing gugma para sa katawhan!

¹⁹ Ang Juan 3:17 nagasiling: “Ginpadala sang Dios ang iya Anak sa kalibutan, indi agod hukman niya ang kalibutan, kundi agod ang kalibutan maluwas paagi sa iya.” Sa amo, ginpadala ni Jehova ang iya Anak sa isa ka mahigugmaon nga misyon sang pagluwas, indi sa paghukom ukon pagtagudili. Nahisanto ini sa pinamulong ni Pedro: “Indi [ni Jehova] luyag nga ang bisan sin-o malaglag kundi luyag niya nga ang tanan makadangat sa paghinulsol.”​—⁠2 Pedro 3:⁠9.

20. Sa anong paagi ang kaluwasan may kaangtanan sa pagbantala sing maayong balita?

²⁰ Bangod sang pag-aman sing legal nga sadsaran para sa kaluwasan nga may daku nga bili sa iya kaugalingon, luyag ni Jehova nga himuslan ini sang madamo kon mahimo. Si apostol Pablo nagsulat: “ ‘Ang tagsatagsa nga nagatawag sa ngalan ni Jehova maluwas.’ Apang, paano sila magatawag sa iya nga wala nila ginatuuhan? Paano naman sila magatuo sa iya nga wala nila mabatian? Paano naman sila makabati kon wala sing magbantala?”​—⁠Roma 10:​13, 14.

21. Ano dapat ang balatyagon naton tuhoy sa kahigayunan nga makigbahin sa pagbantala nga hilikuton?

²¹ Daw ano ka dalayawon nga pribilehiyo nga makigbahin sa bug-os kalibutan nga pagbantala kag pagpanudlo nga hilikuton! Indi ini mahapos nga hilikuton, apang daw ano gid kasadya si Jehova kon makita niya ang iya katawhan nga nagakabuhi sing matutom sa kamatuoran kag nagabantala sing maayong balita sa iban! Gani ano man ang imo kahimtangan, tuguti ang espiritu sang Dios kag ang gugma sa imo tagipusuon nga magpahulag sa imo nga makigbahin sa sining hilikuton. Kag dumduma nga ang nakita naton nga ginahimo sa bug-os nga kalibutan nagahatag sing makakumbinsi nga pamatuod nga sa dili madugay tumanon ni Jehova nga Dios ang iya saad nga paluntaron ang mahimayaon nga “bag-ong langit kag bag-ong duta” nga sa sini “magapuyo ang pagkamatarong.”​—⁠2 Pedro 3:⁠13.

Madumduman Mo Bala?

• Ngaa indi mapahipos sang apostasya ang mga manugbantala sang maayong balita?

• Paano ang pulong sang Dios naglandas sa panahon naton?

• Sa anong mga paagi ang espiritu sang Dios nagapanghikot karon?

• Paano ang gawad naangot sa pagbantala sing maayong balita?

[Mga Pamangkot sa Pagtinuon]

[Graph/​Retrato sa pahina 16]

(Para sa aktual nga pormat, tan-awa ang publikasyon)

Pagdamo sang mga manugwali sang Ginharian sang ika-20 nga siglo

Promedyo nga Manugbantala (sing minilyon)

6.0

5.5

5.0

4.5

4.0

3.5

3.0

2.5

2.0

1.5

1.0

0.5

1900 1910 1920 1930 1940 1950 1960 1970 1980 1990 2000

[Mga retrato sa pahina 15]

SI JEROME

SI TYNDALE

SI GUTENBERG

SI HUS

[Credit Line]

Si Gutenburg kag si Hus: Gikan sa libro nga The Story of Liberty, 1878

[Retrato sa pahina 15]

Ang mga Estudyante sang Biblia nga nagawali sing maayong balita sang katuigan 1920

[Mga retrato sa pahina 17]

Sa bug-os nga kalibutan ang mga tawo nagapamati sa maayong balita

[Retrato sa pahina 18]

Kaangay sa halad nga gawad ni Jesucristo, ginapadaku sang pagbantala nga hilikuton ang gugma sang Dios