Bug-os Kalibutan nga Paghiliupod nga Nagaulikid sa Isa kag Isa

TUBTOB sa makita sang mata mo, may yara mga tawo. Madamo ang tigulang na, ang pila inutil kaayo nga haluson makatuknol sa paglakat. May nagamabdos nga mga babayi kag batan-on nga mga magtiayon nga may magagmay nga mga kabataan. Sila tanan mga refugee​​—⁠mga lalaki, mga babayi, kag mga kabataan⁠​—⁠​nga bangod sang inaway sibil, kinaugali nga mga kalamidad, ukon iban pa nga mga kahimtangan napilitan sa pagbiya sa ila mga puluy-an agod magdangop sa kaingod nga pungsod. Ang iban makapila na nga napilitan sa pagbiya sa ila mga puluy-an. Sa una nga patimaan sang sibil nga kinagubot ukon sang isa ka kinaugali nga kalamidad, ila ginabulakwit ang pila ka kagamitan sa balay, ginatipon ang ila mga kabataan, kag nagakadto sa isa ka maayo nga palalipdan. Nian, kon ang mga kahimtangan mag-ayo na, madamo nga refugee ang nagabalalik agod patindugon liwat ang ila mga kabalayan kag mangabuhi liwat.

Pagligad sang mga tinuig, ang Central African Republic nagbukas sing kahigayunan sa mga refugee gikan sa pila ka pungsod. Sa sining karon lang, linibo ka tawo ang naobligar sa pagpalagyo gikan sa duog nga may inaway sa Democratic Republic of Congo padulong sa malinonglinong nga duog sang Central African Republic, lakip sa ila ang madamo nga Saksi ni Jehova.

Ang mga Kauturan Nag-abot sa Pagtabang

Ginkabig sang mga Saksi sa Central African Republic nga isa ka pribilehiyo ang pag-organisar sing buhat sang kaluoy. Ang mga dalayunan ginhanda para sa nag-abot nga Cristianong mga kauturan. Sang primero, may mga hulot nga ginhanda sa pribado nga mga puluy-an, apang samtang ang kadamuon sang mga refugee nagadugang, nagakinahanglan ini sang dugang pa nga mga kahimusan. Ang pila ka Kingdom Hall ginhimo nga mga dormitoryo. Ang lokal nga mga Saksi kinabubut-on nga nag-instalar sing dugang pa nga mga suga, nagbutang sing mga tubo sang tubig, kag nagsemento sing mga salog para sa kasulhayan sang mga magadayon didto. Ang mga refugee nagbulig sa lokal nga mga kauturan sa pagtukod sining temporaryo nga mga dormitoryo. Ang bug-os nga programa sang Cristianong mga miting ginhimos sa Lingala nga hambal agod ang mga nagaabot mahatagan sing nagasakdag-sing-kabuhi nga espirituwal nga pagkaon. Ginpakita sang suod nga pagbuligay sa tunga sang lokal nga mga Saksi kag sang ila mga bisita nga ang isa ka internasyonal nga paghiliutod matuod gid.

Ang mga pamilya sang refugee wala pirme nagaabot sing dungan. Kon kaisa, ang nagbinulagay nga mga katapo sang pamilya nagkitaay liwat sa ila destinasyon. Ang tagsa ka Kingdom Hall may  listahan sang mga nag-abot nga luwas sa kapahamakan. Ang mga kahimusan ginhimo agod pangitaon ang mga wala nakaabot. Ang sanga talatapan nga nagatatap sang hilikuton sang mga Saksi ni Jehova sa pungsod nagpadala sing tatlo ka salakyan kada adlaw agod buligan ang mga Saksi nga manugpakadto pa kag agod pangitaon ang sin-o man nga mahimo nagtalang. Ang mga salakyan makilal-an paagi sa isa ka daku nga tanda, nga mabasa “WATCH TOWER​​—⁠Jehovah’s Witnesses.”

Hunahunaa ang kalipay nga naeksperiensiahan sang nakita sang isa ka grupo sang pito ka refugee nga kabataan nga nahamulag sa ila mga ginikanan ang isa ka van nga ginapanag-iyahan sang mga Saksi ni Jehova. Nagturipad sila gilayon padulong sa salakyan kag ginpakilala ang ila kaugalingon bilang mga Saksi. Ginpasakay sila sang mga kauturan sa van kag gindala sila sa isa ka Kingdom Hall, diin nagkinitaay sila liwat sang ila mga pamilya.

Ano ang nakabulig sa sining sinsero nga mga Cristiano nga masarangan ining mga kahimtangan, indi lamang sing makaisa, kundi sing sulitsulit pa? Kumbinsido gid sila nga nagakabuhi na kita sa sining katapusan nga mga adlaw nga gintagna sang Balaan nga Kasulatan.​​—⁠2 Timoteo 3:​1-5; Bugna 6:​3-8.

Gani, nahibaluan nila nga sa dili madugay tapuson ni Jehova nga Dios ang mga inaway, dumot, kasingki, kag pinuyas. Ang problema tuhoy sa mga refugee mangin isa ka butang sang nagligad. Samtang wala pa ina, nahisanto sa laygay ni apostol Pablo sa 1 Corinto 12:14-​26, ang mga Saksi ni Jehova nagaulikid sa isa kag isa. Bisan pa ginaseparar sang mga suba, mga dulunan, mga hambal, kag distansia, nagaulikid sila sa isa kag isa, gani maabtik sila sa pagbulig kon ang iban nagakinahanglan sini.​​—⁠Santiago 1:​22-​27.

[Mapa sa pahina 30]

(Para sa aktual nga pormat, tan-awa ang publikasyon)

APRIKA

Central African Republic

Democratic Republic of Congo

[Credit Line]

Mountain High Maps® Copyright © 1997 Digital Wisdom, Inc.

[Mga retrato sa pahina 30]

Tatlo ka Kingdom Hall ang gingamit subong sentro nga balatunan

[Retrato sa pahina 31]

Ang mga kusina gilayon nga gin-instalar

[Retrato sa pahina 31]

Madamo pa gid ang nag-abot

[Mga retrato sa pahina 31]

Ang mga bag-o lang matawo apang mga refugee na