Report sang mga Manugbantala sang Ginharian

Ang Ngalan sang Dios Ginhilway sa Kahuy-anan

ANG Pulong sang Dios, ang Biblia, nagasiling: “Hupti ang inyo maayong pagginawi sa tunga sang mga pungsod, agod paagi sa butang nga ginahambal nila batok sa inyo subong mga malauton, sila subong resulta sang inyo maayong binuhatan nga ila nasaksihan magahimaya sa Dios sa adlaw sang iya pag-usisa.” (1 Pedro 2:12) Busa, ang matuod nga mga Cristiano nagapanikasog nga maghupot sing maayong pagginawi agod malikawan nga mahuy-an ang ngalan ni Jehova.

Sa isa ka nabaw-ing nga duog sa Zambia nga ginatawag nga Senanga, ginkawatan sing radyo ang manunudlo sa iya balay. Bangod ang mga Saksi ni Jehova nagabantala sa sini nga duog, nagsumbong ang tawo nga nangawat sila. Ginreport niya ini sa pulis, nga nagasiling nga ginkawat sang mga Saksi ang iya radyo. Agod pamatud-an nga nagkadto ang mga Saksi sa iya balay, ginpakita niya ang isa ka tract nga nakita niya sa salog. Apang, ang pulis wala magpati sa iya. Ginlaygayan nila sia nga usisaon pa gid ini sing tul-id.

Ang mga Saksi nga nagbantala sa palibot sang manunudlo sadto nga adlaw ginpalig-on sang hubon sang mga gulang nga magkadto agod makighambal sa manunudlo tuhoy sa sini nga bagay. Ang pila ka utod nagkadto kag nagpakighambal sa iya, nga nagapaathag nga luyag nila hilwayon ang ngalan ni Jehova sa kahuy-anan. Sa ila paghambalanay, ginsugiran nila sia nga nakapakighambal sila sa isa ka pamatan-on sa iya balay kag ginhatagan sia sing isa ka tract. Suno sa ila paglaragway, nakilala sang manunudlo ang tawo. Sa kamatuoran, isa lang sila ka relihion. Nagpakighambal ang manunudlo sa pamatan-on nga lalaki, apang ginhimutig niya ang panumbungon batok sa iya. Nian, ginpaathag sang manunudlo ini nga butang sa mga ginikanan sang pamatan-on kag nagpauli sia. Wala gani maisahan ka oras, gin-uli sang iloy sang pamatan-on ang ginkawat nga radyo.

Napahulag sang paghinulsol, ginpalapitan sang manunudlo ang hubon sang mga gulang kag nagpangabay nga patawaron sia bangod sang butig nga panumbungon. Ginbaton sang mga gulang ang iya pagpangayo sing pasaylo apang nangabay sila nga ipahibalo sa publiko ang resulta sang imbestigasyon agod mahibaluan sang tanan nga ang mga Saksi wala sing sala. Ginhimo ang pahibalo sa buluthuan, sa amo nahilway ang ngalan ni Jehova sa kahuy-anan. Ang mga Saksi ni Jehova padayon karon nga nagabantala sing hilway sa sadto nga duog.

[Mga mapa/Retrato sa pahina 19]

(Para sa aktual nga pormat, tan-awa ang publikasyon)

AFRICA

Zambia

[Credit Line]

Mountain High Maps® Copyright © 1997 Digital Wisdom, Inc.