Magkalipay Upod sa Malipayon nga Dios

“Sa katapusan, mga kauturan, magpadayon kamo nga magkasadya, . . . kag ang Dios sang gugma kag paghidait mangin sa inyo.”​—⁠2 CORINTO 13:11.

1, 2. (a) Ngaa madamo ang wala sing kalipay sa kabuhi? (b) Ano ang kalipay, kag paano naton ini mapalambo?

SA SINING masubo nga mga adlaw, diutay lamang nga rason sa pagkasadya ang nakita sang madamo nga tawo. Kon may mahanabo nga trahedya sa ila ukon sa isa nga ila ginahigugma, mahimo sila magbatyag kaangay ni Job sang una, nga nagsiling: “Ang tawo, nga natawo sa babayi, malip-ot sing kabuhi kag puno sing kagamo.” (Job 14:⁠1) Ang mga Cristiano apektado sang mga kahuol kag mga kalisang sining “makahalanguyos nga mga tion nga mabudlay pakigbagayan,” kag indi makapakibot nga, kon kaisa, ang matutom nga mga alagad ni Jehova ginaluyahan sing buot.​—⁠2 Timoteo 3:1.

² Walay sapayan sini, ang mga Cristiano mahimo mangin malipayon, bisan sa idalom sang pagtilaw. (Binuhatan 5:​40, 41) Agod mahangpan kon paano ini mahanabo, binagbinaga anay kon ano ang kalipay. Ang kalipay ginalaragway subong “ang balatyagon nga napukaw sang pagtigayon ukon pagpaabot sing maayo nga butang.”⁠ * Gani, kon maghinguyang kita sing tion agod isipon ang aton karon mga pagpakamaayo samtang ginapamalandungan ang mga kalipay nga nagahulat sa aton sa bag-ong kalibutan sang Dios, mahimo kita mangin malipayon.

3. Sa anong kahulugan masiling nga ang tagsatagsa may pila ka rason agod magkasadya?

³ Ang tagsatagsa may pila ka pagpakamaayo nga dapat pasalamatan. Ang isa ka ulo sang pamilya mahimo madulaan sang trabaho. Natural lamang nga mabalaka sia. Luyag niya buhion ang iya mga hinigugma. Walay sapayan sina, kon sia mabakod kag mapagros sing lawas, mahimo sia magpasalamat tungod sini. Kon makakita sia sing trabaho, makapangabudlay sia sing lakas. Sa pihak nga bahin, ang isa ka Cristianong babayi mahimo mangluya bangod sang hinali nga pagmasakit. Apang, mahimo sia magpasalamat tungod sa suporta sang mahigugmaon nga mga abyan kag mga katapo sang pamilya nga nagabulig sa iya nga atubangon ang iya balatian sing matawhay kag maisugon. Kag ang tanan nga matuod nga mga Cristiano, ano man ang ila kahimtangan, magakasadya sa pribilehiyo nga makilala si Jehova, ang “malipayon nga Dios,” kag si Jesucristo, ang “malipayon kag lamang nga Manuggahom.” (1 Timoteo 1:​11; 6:15) Huo, si Jehova nga Dios kag si Jesucristo malipayon gid kaayo. Nahuptan nila ang ila kalipay walay sapayan sang katunayan nga ang mga kahimtangan sa duta tuhay sa kon ano anay ang gintuyo  ni Jehova sa umpisa. Ang ila halimbawa makatudlo sa aton sing daku kon paano huptan ang aton kalipay.

Wala Gid Nila Madula ang Ila Kalipay

4, 5. (a) Ano ang reaksion ni Jehova sang nagrebelde ang una nga mga tawo? (b) Sa anong paagi si Jehova nagahupot sing positibo nga panimuot sa katawhan?

⁴ Sa hardin sang Eden, sanday Adan kag Eva mapagros sing lawas kag himpit sing hunahuna. May mabungahon nga hilikuton sila nga dapat himuon kag maayo nga mga palibot nga pangabudlayan. Labaw sa tanan, may pribilehiyo sila nga makapakigkomunikar sing tayuyon kay Jehova. Katuyuan sang Dios nga matigayon nila ang malipayon nga palaabuton. Apang ang aton unang mga ginikanan indi kontento sa sining tanan nga maayo nga dulot; ginkawat nila ang ginadumilian nga bunga gikan sa “kahoy sa pagkilala sang maayo kag malain.” Ining paglapas nangin kabangdanan sang tanan nga kasubo nga ginaagom naton karon nga mga kaliwat nila.​—⁠Genesis 2:15-17; 3:⁠6; Roma 5:12.

⁵ Apang, wala ginpahanugutan ni Jehova nga madula ang iya kalipay bangod sang walay kabalaslan nga panimuot nanday Adan kag Eva. Nagasalig sia nga ang tagipusuon sang pila sang ila mga kaanakan mapahulag agod alagaron sia. Sa katunayan, bisan pa antes ginpanganak nanday Adan kag Eva ang ila panganay, nagasalig gid sia amo nga ginpahibalo niya ang iya katuyuan nga gawaron ang ila matinumanon nga mga kaliwatan! (Genesis 1:31; 3:15) Sa mga siglo nga nagsunod, ang kalabanan nga katawhan naglakat sa tikang nanday Adan kag Eva, apang wala gintalikdan ni Jehova ang tawhanon nga pamilya bangod sining lapnag nga paglapas. Sa baylo, gintuon niya ang iya igtalupangod sa mga lalaki kag mga babayi nga ‘nagpahalipay sang iya tagipusuon,’ sa mga tawo nga nagpanikasog sing lakas nga pahamut-an sia bangod ginahigugma nila sia.​—⁠Hulubaton 27:11; Hebreo 6:10.

6, 7. Ano ang mga rason nga nagbulig kay Jesus agod magpabilin nga malipayon?

⁶ Kamusta naman si Jesus​—⁠paano niya nahuptan ang iya kalipay? Subong isa ka gamhanan nga espiritu nga tinuga sa langit, si Jesus may tanan nga kahigayunan agod makita ang ginahimo sang mga lalaki kag mga babayi sa duta. Ang ila mga di-kahimpitan madali makita, apang ginahigugma sila ni Jesus. (Hulubaton 8:31) Sang ulihi, sang nagkari sia sa duta kag aktuwal nga “nagpuyo sa tunga” sang mga tawo, ang pagtamod niya sa katawhan wala magbag-o. (Juan 1:14) Ano ang nakabulig agod mahuptan sang himpit nga Anak sang Dios ining positibo nga pagtamod sa makasasala nga tawhanon nga pamilya?

⁷ Una sa tanan, si Jesus makatarunganon sa iya mga ginapaabot sa iya kaugalingon kag sa iban. Nakahibalo sia nga indi niya makumbertir ang kalibutan. (Mateo 10:32-39) Gani nagkasadya sia sang nagpamati bisan ang isa ka sinsero nga tawo sa mensahe sang Ginharian. Bisan pa ang paggawi kag panimuot sang iya mga disipulo indi makalilipay kon kaisa, nakahibalo si Jesus nga luyag gid nila himuon ang kabubut-on sang Dios, kag ginhigugma niya sila tungod sina. (Lucas 9:46; 22:​24, 28-32, 60-62) Gani, sa pangamuyo sa iya langitnon nga Amay, ginsumaryo ni Jesus ang maayo nga hinimuan sang iya disipulo tubtob sadto nga punto: “Gintuman nila ang imo pulong.”​—⁠Juan 17:6.

8. Hingadli ang pila ka paagi nga mailog naton si Jehova kag si Jesus may kaangtanan sa paghupot sang aton kalipay.

⁸ Sa walay duhaduha, kita tanan magabenepisyo kon pamalandungan naton ang halimbawa nga ginpahamtang ni Jehova nga Dios kag ni Cristo Jesus may kaangtanan sini. Mailog bala naton sing bug-os pa si Jehova ayhan paagi sa indi pagkabalaka sing tuman kon ang mga butang indi mahanabo subong sa ginalauman naton? Masunod bala naton sing maayo pa ang mga tikang ni Jesus paagi sa paghupot sing isa ka positibo nga pagtamod sa aton karon nga mga kahimtangan, subong man paagi sa pagkamangin makatarunganon sa kon ano ang aton ginapaabot sa aton kaugalingon kag sa iban? Tan-awon naton kon paano ang pila sining mga prinsipio mahimo maaplikar sa praktikal nga paagi sa isa ka bahin nga hamili sa tagipusuon sang makugi nga mga Cristiano bisan diin​—⁠ang ministeryo sa latagon.

Hupti ang Positibo nga Pagtamod sa Ministeryo

9. Paano napasag-uli ang kalipay ni Jeremias, kag paano kita mabuligan sang iya halimbawa?

⁹ Luyag ni Jehova nga mangin malipayon kita sa pag-alagad sa iya. Ang aton kalipay indi dapat nasandig sa mga resulta nga matigayon naton. (Lucas 10:​17, 20) Si manalagna Jeremias nagbantala sing tinuig sa di-mabungahon nga teritoryo. Sang ginpadaku  niya ang negatibo nga reaksion sang mga tawo, nadula niya ang iya kalipay. (Jeremias 20:⁠8) Apang sang ginpamalandungan niya ang katahom sang mensahe mismo, ang iya kalipay napasag-uli. Si Jeremias nagsiling kay Jehova: “Ang imo mga pulong nakit-an, kag ginkaon ko ini; kag ang imo mga pulong nangin kalipay sa akon kag kasadya sang akon tagipusuon; kay ang imo ngalan ginatawag sa akon, O Jehova.” (Jeremias 15:16) Huo, si Jeremias nagkasadya sa pribilehiyo niya nga ibantala ang pulong sang Dios. Kita man mahimo magkasadya sa sini.

10. Paano naton mahuptan ang aton kalipay sa ministeryo bisan pa nga ang aton teritoryo indi mabungahon sa karon?

¹⁰ Bisan pa ang kalabanan wala nagapamati sa maayong balita, may rason gid kita nga mangin malipayon samtang nagaalagad sa latagon. Dumduma nga si Jehova nagasalig gid nga ang pila ka tawo mapahulag nga alagaron sia. Kaangay ni Jehova, indi gid naton dapat pagdulaon ang paglaum nga sa ulihi mahibaluan sang iban ang hulusayon kag batunon ang mensahe sang Ginharian. Indi naton pagkalimtan nga ang mga sirkunstansia sang mga tawo nagabag-o. Kon ginaatubang sang pila ka wala ginapaabot nga kadulaan ukon krisis, bisan ang pinakakontento nga indibiduwal mahimo magasugod sa paghunahuna sing serioso tuhoy sa kahulugan sang kabuhi. Yara ka bala agod magbulig kon ini nga tawo mangin ‘mahunahunaon sa iya espirituwal nga kinahanglanon’? (Mateo 5:⁠3) Ti, basi may isa sa inyo teritoryo nga handa sa pagpamati sa maayong balita sa imo masunod gid nga pagduaw!

11, 12. Ano ang natabo sa isa ka banwa, kag ano ang matun-an naton gikan sa sini?

¹¹ Ang kahimtangan sang aton teritoryo nagabag-o man. Binagbinaga ang isa ka halimbawa. Sa isa ka diutay nga banwa, may nagapuyo nga isa ka suod kaayo nga grupo sang lamharon nga mga mag-asawa nga may mga kabataan. Sang nagduaw ang mga Saksi ni Jehova, nasumalang nila ang palareho nga sabat sa tanan nga ganhaan, “Indi kami interesado!” Kon may isa gid man nga magpakita sing interes sa mensahe sang Ginharian, ang mga kaingod gilayon nga nagapalas-ay sa iya sa pagpakig-angot sing dugang pa sa mga Saksi. Maathag gid nga isa ka hangkat ang magbantala didto. Walay sapayan sina, ang mga Saksi wala magdulog; padayon sila nga nagbantala. Kag ano ang resulta?

¹² Sang ulihi, madamo sang mga kabataan sa sina nga banwa ang nagdinalagku, nagminyo, kag didto na nagpuyo. Sa paghisayod nga ang ila dalanon sang kabuhi wala magresulta sa matuod nga kalipay, madamo sa sining lamharon nga mga adulto ang nagsugod sa pagpangita sa kamatuoran. Nakita nila ini sang namati sila sa maayong balita nga ginbantala sang mga Saksi. Gani pagligad sang madamong tinuig, ang diutay nga kongregasyon nag-uswag. Handurawa lamang ang kalipay sang mga manugbantala sang Ginharian nga wala magdulog! Kabay nga ang pagpadayon sa pagpaambit sa makalilipay nga mensahe sang Ginharian magapahalipay man sa aton!

Ang mga Masigkatumuluo Magasakdag sa Imo

13. Kay sin-o kita makadangop kon ginaluyahan kita sing buot?

¹³ Kon ang mga pag-ipit magadugang ukon kon ang kalamidad mahanabo, diin ka makadangop agod malugpayan? Minilyon ka dedikado nga alagad ni Jehova ang nagadangop una kay Jehova sa pangamuyo, nian sa ila Cristianong mga kauturan. Samtang sa duta, ginpabaloran mismo ni Jesus  ang pagsakdag sang iya mga disipulo. Sang bisperas sang iya kamatayon, ginpatuhuyan niya sila subong “ang nagpabilin nga kaupod ko sa akon mga pagtilaw.” (Lucas 22:28) Sa pagkamatuod, yadto nga mga disipulo mga di-himpit, apang ang ila pagkamainunungon isa ka lugpay sa Anak sang Dios. Makakuha man kita sing kusog gikan sa mga masigkasumilimba.

14, 15. Ano ang nakabulig sa isa ka mag-asawa nga maatubang ang pagkapatay sang ila anak nga lalaki, kag ano ang matun-an mo gikan sa ila eksperiensia?

¹⁴ Nahisayran sang Cristianong mag-asawa nga sanday Michel kag Diane kon daw ano ka mapuslanon ang pagsakdag sang ila mga kauturan. Ang ila 20-anyos nga anak, si Jonathan, nga isa ka mapagsik kag may masanag sing palaabuton nga Cristiano, nasayasat nga may tumor sa utok. Maisugon nga gintinguhaan sang mga doktor nga luwason sia, apang ang pisikal nga kahimtangan ni Jonathan naglubha tubtob nga sang isa ka kahapunanon, nagtulog sia sa kamatayon. Daku gid ang kalisod nanday Michel kag Diane. Nahibaluan nila nga ang Miting sa Serbisyo, nga ginhiwat sadto nga gab-i, halos matapos na. Walay sapayan sina, bangod nagakinahanglan gid sing lugpay, nagpaupod sila sa isa ka gulang sa Kingdom Hall. Nag-abot sila sa tion mismo nga ginapahibalo sa kongregasyon ang tuhoy sa pagkapatay ni Jonathan. Pagkatapos sang miting, ang nagahibi nga mga ginikanan ginpalibutan sang ila mga kauturan, nga naghakos sa ila kag nagbungat sing makalulugpay nga mga pulong. Hinumdom ni Diane: “Daku gid ang amon kalisod sang pag-abot namon sa tilipunan, apang daku gid nga lugpay ang nabaton namon gikan sa mga kauturan​—⁠ginpalig-on gid nila kami! Bisan pa indi nila madula ang amon kasakit, ginbuligan nila kami nga mabatas ang kalisod!”​—⁠Roma 1:​11, 12; 1 Corinto 12:21-26.

¹⁵ Bangod sang kalisod, nangin suod sing labi pa sanday Michel kag Diane sa ila mga kauturan. Nangin suod man sila sing labi pa sa isa kag isa. Si Michel nagsiling: “Natun-an ko nga pakabahandion sing labi pa ang akon pinalangga nga asawa. Sa mga tion nga naluyahan sing buot, ginahambalan namon ang tuhoy sa kamatuoran sang Biblia kag kon paano kami ginasakdag ni Jehova.” Si Diane nagsugpon: “Ang paglaum sa Ginharian nangin mas daku pa ang kahulugan karon sa amon.”

16. Ngaa importante nga maghimo sing tikang agod mahibaluan sang aton mga kauturan ang aton mga kinahanglanon?

¹⁶ Huo, ang aton Cristianong mga kauturan mahimo mangin “nagapabakod nga bulig” sa aton sa tion sang mabudlay nga mga tion sa kabuhi kag sa amo nagabulig sa aton nga mahuptan ang aton kalipay. (Colosas 4:11) Sa pagkamatuod, indi nila mabasa ang aton hunahuna. Busa, kon nagakinahanglan kita sing pagsakdag, maayo nga pahibaluon naton sila. Nian mapabutyag naton ang aton matuod nga pagpasalamat sa ano man nga lugpay nga mahatag sang aton mga kauturan, ginatamod ini subong nga gikan kay Jehova.​—⁠Hulubaton 12:25; 17:17.

Tan-awa ang Imo Kongregasyon

17. Ano nga mga hangkat ang ginaatubang sang isa ka nagasolo nga ginikanan, kag paano naton ginatamod ang mga tawo kaangay niya?

¹⁷ Kon ginatan-aw mo sing maayo pa ang mga masigkatumuluo, labi pa nga matun-an mo nga apresyahon sila kag magkalipay sa ila pagpakig-upod. Tan-awa ang imo kongregasyon. Ano ang imo nakita? May nagasolo bala nga ginikanan nga nagahimakas sa pagpadaku sa iya mga kabataan sa dalanon sang kamatuoran? Nahunahuna mo bala ang maayo nga halimbawa nga ginapahamtang niya? Tilawi nga handurawon ang pila sang mga problema nga ginaatubang niya. Ang isa ka nagasolo nga iloy nga si Jeanine nagasambit sang pila sini: kasubo, paghingalit sang mga lalaki sa trabaho, limitado kaayo nga badyet. Apang ang pinakadaku nga problema sa tanan, siling niya, amo ang pag-atipan sa emosyonal nga mga kinahanglanon sang iya mga kabataan, kay ang tagsa ka bata pinasahi. Ginsambit ni Jeanine ang isa pa ka problema: “Isa gid ka daku nga hangkat nga likawan ang huyog nga himuon ang imo anak nga lalaki nga mangin ulo sang panimalay bilang tal-us sa pagkadula sang bana. May anak ako nga babayi, kag mabudlay dumdumon nga indi sia pagpabug-atan sang akon mga problema.” Kaangay sang linibo ka mahinadlukon-sa-Dios nga nagasolo nga mga ginikanan, si Jeanine nagatrabaho sing bug-os tion kag nagaatipan sang iya panimalay. Nagatuon man sia sa Biblia upod sa iya mga kabataan, nagahanas sa ila sa ministeryo, kag nagaupod sa ila sa mga miting sa kongregasyon. (Efeso 6:⁠4) Daw ano gid ang kalipay ni Jehova samtang ginatan-aw niya adlaw-adlaw ang mga panikasog sining pamilya agod huptan ang integridad! Wala bala kita nalipay nga may mga subong  sini sa ila sa tunga naton? Huo, sa pagkamatuod.

18, 19. Iilustrar kon paano naton mapatudok ang aton apresasyon sa mga katapo sang kongregasyon.

¹⁸ Tan-awa liwat ang imo kongregasyon. Mahimo makita mo ang matutom nga mga balo nga “wala gid nagapalya” sa mga miting. (Lucas 2:37) Ginasubuan bala sila kon kaisa? Siempre. Nahidlaw gid sila sa ila mga tiayon! Apang nagapabilin sila nga masako sa pag-alagad kay Jehova kag nagapakita sing interes sa iban. Ang ila malig-on kag positibo nga panimuot nagapahalipay sing labi pa sa kongregasyon! Ang isa ka Cristianong babayi nga nag-alagad sing kapin na sa 30 ka tuig sa bug-os tion nga ministeryo nagkomento: “Ang isa sang akon pinakadaku nga kalipay amo ang makita ang tigulang nga mga kauturan nga nakaeksperiensia sing madamong pagtilaw nga nagaalagad gihapon kay Jehova sing matutom!” Huo, ang tigulang nga mga Cristiano sa tunga naton isa gid ka daku nga pagpalig-on sa mga batan-on.

¹⁹ Kamusta naman ang mga bag-uhan nga kasan-o lang nakig-upod sa kongregasyon? Wala bala kita ginapapagsik kon magpabutyag sila sang ila pagtuo sa mga miting? Hunahunaa ang pag-uswag nga nahimo nila kutob sang nagtuon sila sa Biblia. Mahimo gid nga nalipay si Jehova sa ila. Nalipay bala kita? Ginapabutyag bala naton ang aton kahamuot, nagahatag sa ila sing komendasyon tungod sa ila mga panikasog?

20. Ngaa masiling nga ang tagsa ka katapo sang kongregasyon may importante nga papel sa kongregasyon?

²⁰ Ikaw bala minyo, di-minyo, ukon nagasolo  nga ginikanan? Ikaw bala isa ka ilo sa amay (ukon ilo sa iloy) nga bata nga lalaki ukon babayi, ukon isa ka balo? Ikaw bala isa nga madamong tinuig na nga nagapakig-upod sa kongregasyon ukon isa nga kasan-o lang nakig-upod? Makasalig ka nga ang imo matutom nga halimbawa makapalig-on sa amon tanan. Kag kon magbuylog ka sa pag-amba sing isa ka ambahanon sa Ginharian, kon magkomento ka ukon maghatag sang asaynment subong isa ka estudyante sa Teokratikong Eskwelahan sa Pagministro, ang imo ginahimo nagadugang sa amon kalipay. Sing mas importante pa, nagapahalipay ini sa tagipusuon ni Jehova.

21. May madamo nga rason kita agod himuon ang ano, apang ano ang mga pamangkot nga nagautwas?

²¹ Huo, bisan sa sining magamo nga mga tion, mahimo kita mangin malipayon sa pagsimba sa aton malipayon nga Dios. May madamo nga rason kita agod maghulag sa pagpalig-on ni Pablo: “Magpadayon kamo nga magkasadya, . . . kag ang Dios sang gugma kag paghidait mangin sa inyo.” (2 Corinto 13:11) Apang, kamusta naman kon makaeksperiensia kita sing kinaugali nga kalamidad, paghingabot, ukon daku nga kapurauton? Posible bala nga mahuptan ang aton kalipay bisan sa sini nga mga kahimtangan? Maghinakop ka samtang ginabinagbinag mo ang masunod nga artikulo.

[Nota]

Masabat Mo Bala?

• Paano ginalaragway ang kalipay?

• Paano ang paghupot sing positibo nga panimuot makabulig sa aton nga magpabilin nga malipayon?

• Ano ang makabulig sa aton nga matigayon ang positibo nga pagtamod sa teritoryo sang aton kongregasyon?

• Sa anong mga paagi ginaapresyar mo ang mga kauturan sa imo kongregasyon?

[Mga Pamangkot sa Pagtinuon]

[Mga retrato sa pahina 10]

Ang mga tawo sa aton teritoryo mahimo magbag-o

[Retrato sa pahina 12]

Ano nga mga hangkat ang ginaatubang sang mga kauturan sa imo kongregasyon?