Pagbulig sa mga Balo sa Ila mga Pagtilaw

ANG isa sa labing bantog nga mga istorya tuhoy sa mga balo amo ang kasaysayan sa Biblia ni Rut kag sang iya ugangan nga babayi nga si Noemi. Balo sila nga duha. Indi lamang ang bana ni Noemi ang napatay kundi pati man ang iya duha ka anak nga lalaki, kag ang isa sa ila bana anay ni Rut. Bangod nagapuyo sila sa isa ka katilingban nga ang palangabuhian panguma kag nagadepende lamang sila sa mga lalaki sa ila palibot, makapasubo gid matuod ang ila kahimtangan.​​—⁠Rut 1:​1-5, 20, 21.

Apang, si Noemi may isa ka tumalagsahon nga abyan kag manuglugpay nga umagad, si Rut, nga nangindi sa pagbiya sa iya. Sang ulihi, para kay Noemi, si Rut nangin ‘mas maayo sangsa pito ka anak nga lalaki’​​—⁠indi lamang bangod sang iya tudok nga gugma kay Noemi kundi bangod sang iya gugma sa Dios. (Rut 4:15) Sang ginsugo ni Noemi si Rut nga magbalik sa iya Moabnon nga pamilya kag mga abyan, nagsabat si Rut paagi sa isa sang labing makatalandog nga pagpabutyag sang pagkamainunungon nga narekord: “Bisan diin ka makadto magakadto ako, kag bisan diin ka magapaligad sang gab-i didto ako magapaligad sang gab⁠-⁠i.  Ang imo katawhan mangin akon katawhan, kag ang imo Dios akon Dios. Kon diin ka mapatay didto ako mapatay, kag didto ako ilubong. Kabay nga himuon ni Jehova sa akon ang amo kag dugangan pa ini kon may yara bisan ano man nga butang luwas sa kamatayon nga magbulag sa akon kag sa imo.”​​—⁠Rut 1:​16, 17.

Ang panimuot ni Rut natalupangdan gid ni Jehova nga Dios. Ginpakamaayo niya ang diutay nga panimalay ni Noemi kag ni Rut kag napamana sang ulihi ni Rut si Boaz nga isa ka Israelinhon. Ang ila bata gin-atipan ni Noemi nga daw subong bala nga iya gid kag sang ulihi nangin katigulangan pa ni Jesucristo. Ini nga maragtas isa ka halimbawa sang kon paano ginapalangga ni Jehova ang mga balo nga nagapalapit sa iya sing suod kag nagasalig sa iya. Dugang pa, ang Biblia nagasugid sa aton nga ginapabaloran niya yadtong mahigugmaon nga nagabulig sa mga balo sa ila mga pagtilaw. Gani paano kita karon makabulig sa mga balo nga yara sa tunga naton?​​—⁠Rut 4:​13, 16-22; Salmo 68:5.

Espesipiko Apang Indi Dominante

Kon magtanyag sing bulig sa isa ka balo, maayo gid nga maathag ini kag espesipiko apang indi dominante. Likawi ang indi mahangpan nga mga komento subong sang: “Pahibalua lang ako kon may kinahanglan ka.” Daw kaangay ini sa pagsiling, “Magpainit-init kag magpakabusog” sa isa nga ginatugnawan kag ginagutom apang wala sing ginahatag nga bulig. (Santiago 2:16) Madamo nga tawo ang wala nagapangayo sing bulig kon may kinahanglan sila; sa baylo, nagaantos sila sing hipos. Ang pagbulig sa ila nagakinahanglan sing paghantop, nga ginahaumhaum kon ano ang ila ginakinahanglan. Sa pihak nga bahin, ang sobra nga pag-unauna​​—⁠nga daw ginakontrol mo ang kabuhi sang balo​​—⁠mahimo nga magresulta sa paglain sang buot ukon ginamo. Gani, ginapadaku sang Biblia nga kinahanglan ang pagkabalanse sa aton mga pagpakig-angot sa iban. Samtang ginapalig-on kita nga magpakita sing di-makagod nga personal nga interes sa mga tawo, ginapahanumdom kita sini nga indi mangin mahilabtanon sa iban.​​—⁠Filipos 2:⁠4; 1 Pedro 4:⁠15.

Nagpakita si Rut sining balanse nga panimuot kay Noemi. Bisan pa gin-unungan ni Rut ang iya ugangan, wala niya ginpilit ukon gindominahan sia. Kinabubut-on nga naghimo sia sing makatarunganon nga mga butang, subong sang pagpangita sing pagkaon para sa ila ni Noemi, apang ginsunod man niya ang mga instruksion ni Noemi.​​—⁠Rut 2:​2, 22, 23; 3:​1-6.

Siempre, lainlain ang ginakinahanglan sang kada isa. Si Sandra nga ginhinambitan kaina, nagsiling: “Yara gid sa akon ang akon kinahanglanon sang nalisdan ako​​—⁠ang mapinalanggaon kag mahigugmaon nga mga abyan nga nagpalibot sa akon.” Sa pihak nga bahin, si Elaine nga ginhinambit kaina, luyag mag-isahanon. Busa, ang pagkamabinuligon nagakahulugan sing pagkamahinantupon kag pagkabalanse sa ulot sang pagtahod sa iya pribado nga kabuhi kag paghatag sing bulig kon kinahanglanon niya.

Bulig Gikan sa Pamilya

Ang mainabyanon kag mahigugmaon nga pamilya, kon may yara gid man, makapasalig sa balo nga malandas niya ang problema. Bisan pa mas daku ang mabulig sang pila ka katapo sang pamilya, ang tanan makabulig. “Kon ang isa ka balo may kabataan ukon mga apo, tuguti sila anay nga magtuon sang diosnon nga debosyon sa ila kaugalingon nga panimalay kag magbalos sa ila mga ginikanan kag mga lolo kag lola, kay ini kalahamut-an sa panulok sang Dios.”​​—⁠1 Timoteo 5:4.

Sa madamo nga kaso, ang pinansial nga bulig ukon ‘pagbalos’ mahimo nga indi na kinahanglanon. Ang iban nga mga balo may supisyente nga mga pundo para sa ila mga kinahanglanon, kag ang iban naman kalipikado nga makabaton sing pension halin sa gobierno, nga matigayon sa pila ka kadutaan. Apang kon ang mga balo nagakinahanglan sing bulig, dapat magbulig ang  mga katapo sang pamilya. Kon ang balo wala gid sing suod nga mga paryente nga makabulig ukon ang iya mga paryente indi makasarang sa pagbulig, ang Kasulatan nagapalig-on sa mga masigkatumuluo nga buligan sia: “Ang porma sang pagsimba nga matinlo kag walay dagta gikan sa pagtamod sang aton Dios kag Amay amo ini: ang pag-atipan sa mga ilo kag sa balo nga mga babayi sa ila kapipit-an.”​​—⁠Santiago 1:⁠27.

Ang mga nagatuman sini nga mga prinsipio sang Biblia matuod gid nga ‘nagapadungog sa mga balo.’ (1 Timoteo 5:3) Ang pagpadungog sa isa ka tawo mahimo magkahulugan sing pagtahod sa iya. Ang mga tawo nga ginapadunggan nagabatyag nga ginapabaloran, ginapalangga, kag may dignidad. Wala sila nagabatyag nga ang iban nagabulig bangod lamang katungdanan nila ini. Bisan pa si Rut isa ka balo sa sulod sang pila ka tion, ginpadunggan gid niya si Noemi paagi sa pag-atipan sing kinabubut-on kag mapinalanggaon sang iya pisikal kag emosyonal nga mga kinahanglanon. Sa katunayan, bangod sang panimuot ni Rut nakilala gilayon ang iya maayo nga reputasyon, amo kon ngaa ang iya napamana sang ulihi nagsiling sa iya: “Ang tanan nga yara sa siudad sang akon katawhan nakahibalo nga ikaw isa ka maayo gid nga babayi.” (Rut 3:​11, footnote) Sa amo man nga tion, walay duhaduha nga nalipay gid si Rut sa pagbulig kay Noemi bangod sang gugma ni Noemi sa Dios, sang iya indi palareklamo nga kinaiya, kag sang iya tudok nga pag-apresyar sa mga panikasog ni Rut. Daw ano ka maayo nga halimbawa si Noemi sa mga balo karon!

Magpalapit sa Dios

Ang mga katapo sang pamilya kag mga abyan, siempre, indi gid makatal-us sa kakulang nga ginbilin sang napatay nga tiayon. Bangod sining rason importante sa isa nga namatyan nga magpalapit ilabi na sa ‘Amay sang mapinalanggaon nga mga kaluoy kag Dios sang bug-os nga paglipay, nga nagalugpay sa aton sa tanan naton nga kapipit-an.’ (2 Corinto 1:​3, 4) Binagbinaga ang halimbawa ni Ana, isa ka makugi nga balo nga nagapangidaron sing 84 anyos sang ginbun-ag si Jesus.

Sang mapatay ang bana ni Ana pagkatapos sang pito lamang ka tuig sang ila pag-asawahay, nagdangop sia kay Jehova agod malugpayan. “Wala gid [sia] nagapalya sa templo, nga nagahimo sing sagrado nga pag-alagad adlaw kag gab-i nga may mga pagpuasa kag mga pangamuyo.” (Lucas 2:​36, 37) Ginbalusan bala ni Jehova ang pagpakita ni Ana sing diosnon nga debosyon? Huo! Ginpakita ni Jehova ang iya gugma kay Ana sa isa gid ka pinasahi nga paagi. Ginpahanugutan sia nga makita ang isa ka lapsag nga sa ulihi mangin Manluluwas sang kalibutan. Daw ano ini ka makakulunyag kag makalulugpay para kay Ana! Maathag nga naeksperiensiahan niya kon daw ano ka matuod ang Salmo 37:4: “Magkalipay ka sing daku kay Jehova, kag ihatag niya sa imo ang mga ginapangabay sang imo tagipusuon.”

Ang Dios Nagapanghikot Paagi sa mga Masigka-Cristiano

Si Elaine nagsiling: “Sa madugay nga tion sa tapos napatay si David, nagapalanakit ang lawas ko, subong nga daw ginabuno sang sundang ang akon gusok. Abi ko anay kon wala lang ako matunawan. Sang isa ka adlaw naglain na gid ang akon pamatyag nga luyag ko na magpadoktor. Ang isa ka mahinantupon nga utod nga babayi sa espirituwal kag abyan nagsiling nga ang akon pagpangasubo mahimo nga amo ang kabangdanan kag ginpalig-on niya ako nga magpangayo sing bulig kag lugpay kay Jehova. Ginsunod ko dayon ang iya laygay kag nagpangamuyo ako sing hipos apang sing tinagipusuon, nga ginapangabay si Jehova nga sakdagon niya ako sa akon kasubo. Kag amo gid ang iya ginhimo!” Nabatyagan ni Elaine nga nag-ayo ang iya pamatyag kag sang ulihi bisan ang pagpalanakit sang iya lawas nadula man.

Ang mga gulang sa kongregasyon labi na nga makapakig-abyan sa mga nagapangasubo nga balo sa isa ka maluluy-on nga paagi. Ang mga gulang makabulig sa ila nga magpabilin nga suod kay Jehova walay sapayan sang ila mga pagtilaw paagi sa pag-aman sing espirituwal nga bulig kag lugpay sa isa ka mataktikanhon kag mahinantupon nga paagi. Kon kinahanglanon, ang mga gulang makahimo man sing kahimusan para sa materyal nga bulig. Ang subong sina ka maluluy-on, mahinantupon nga mga gulang matuod gid nga mangin isa ka “palalipdan sa hangin.”​​—⁠Isaias 32:⁠2; Binuhatan 6:​1-3.

Isa ka Permanente nga Lugpay Gikan sa Bag-ong Hari Sang Duta

Ang isa nga nagpasadya kay Ana sang makita sia mga duha ka libo ka tuig na ang nagligad isa na karon ka Mesianikong Hari sa langitnon nga Ginharian  sang Dios. Ini nga panguluhan magadula sa dili madugay sang tanan nga kabangdanan sang kasubo, lakip ang kamatayon. Sa sining bahin, ang Bugna 21:​3, 4 nagasiling: “Yari karon! Ang kayangkayang sang Dios upod sa mga tawo . . . Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” Natalupangdan mo bala nga ini nga dinalan nagapatuhoy sa “mga tawo”? Huo, hilwayon ang katawhan gikan sa kamatayon kag sa tanan nga kalisod kag paghibi nga resulta sini.

Apang may yara pa gid maayo nga mga balita! Ang Biblia nagasaad man sang pagkabanhaw sang mga patay. “Ang oras magaabot nga ang tanan nga yara sa handumanan nga lulubngan makabati sang iya [ni Jesus] tingog kag magaguwa.” (Juan 5:​28, 29) Katulad ni Lazaro nga ginbanhaw ni Jesus gikan sa minatay, sila magaguwa subong mga tawo, indi espiritu nga mga tinuga. (Juan 11:​43, 44) Ang mga “nakahimo sing maayong mga butang” sa tapos mabanhaw mangin himpit nga mga tawo kag makaeksperiensia mismo sang amaynon nga pag-atipan ni Jehova samtang iya ‘ginahumlad ang iya kamot kag ginabusog ang handum sang tagsa ka butang nga buhi.’​​—⁠Salmo 145:16.

Ang mga namatyan sing hinigugma kag nagatuo sa sining pat-od nga paglaum makasapo sing daku nga lugpay sa sini. (1 Tesalonica 4:13) Gani kon ikaw isa ka balo, indi gid pagkalimti nga “magpangamuyo sa walay langan” nga lugpayan ka kag buligan sa pagdala sang imo nagakalainlain nga lulan. (1 Tesalonica 5:​17; 1 Pedro 5:7) Kag hatagi sing tion kada adlaw nga basahon ang Pulong sang Dios agod nga ang hunahuna sang Dios magalugpay sa imo. Kon himuon mo ini, maeksperiensiahan mo sing personal kon paano si Jehova magabulig gid sa imo nga masapwan ang paghidait walay sapayan sang tanan nga pagtilaw kag mga hangkat nga imo ginaatubang subong isa ka balo.

[Blurb sa pahina 5]

Ang pagkamabinuligon nagakahulugan sing pagkabalanse nga ginatahod ang pribado nga kabuhi sang isa kag handa sa pagbulig kon kinahanglanon

[Retrato sa pahina 7]

Si Ana nga isa ka tigulang nga balo ginpakamaayo sang Dios