Bulig Agod Mahangpan ang Biblia

ANG Biblia isa ka pinasahi nga libro. Ang mga manunulat sini nagapangangkon nga inspirado sang Dios, kag ang kaundan sini nagahatag sing madamo nga pamatuod nga ang pangangkon matuod. (2 Timoteo 3:16) Lakip sa iban pa nga mga butang, ginapakita sang Biblia kon diin kita naghalin, kon ngaa yari kita diri, kag kon diin kita nagapadulong. Pat-od gid nga isa ini ka libro nga takus nga binagbinagon naton!

Ayhan natilawan mo na nga basahon ang Biblia apang nabudlayan ka nga mahangpan ini. Ayhan indi mo mahibaluan kon diin pangitaon ang mga sabat sa imo mga pamangkot. Kon amo, wala ka nagaisahanon. Ang imo kahimtangan kaangay anay sa kahimtangan sang isa ka tawo nga nagkabuhi sang unang siglo. Nagalakbay sia sakay sa kangga, halin sa Jerusalem pakadto sa iya tumandok nga pungsod, ang Etiopia. Ginabasa sing mabaskog sining Etiopianhon nga opisyal ang matagnaon nga tulun-an sang Isaias sa Biblia, nga ginsulat sang nagligad nga kapin sa pito ka gatos ka tuig.

Hingalagan lamang, gintamyaw sia sang isa ka lalaki nga nagadalagan sa tupad sang kangga. Ang lalaki amo si Felipe, nga isa ka disipulo ni Jesus, kag ginpamangkot niya ang Etiopianhon: “Nahangpan mo gid bala ang imo ginabasa?” Ang Etiopianhon nagsabat: “Tunay, paano ko bala ini mahangpan, luwas kon may isa nga magtuytoy sa akon?” Nian ginpasakay niya si Felipe sa kangga. Ginpaathag ni Felipe ang kahulugan sang dinalan nga ginabasa niya kag nagpadayon sa pagbantala sa iya sing “maayong balita nahanungod kay Jesus.”​—⁠Binuhatan 8:30-35.

Subong nga ginbuligan ni Felipe  yadto nga Etiopianhon nga mahangpan ang Pulong sang Dios sang nagligad, ginabuligan karon sang mga Saksi ni Jehova ang mga tawo nga mahangpan ang Biblia. Nalipay man sila nga buligan ka. Sa masami, labing maayo nga tun-an ang Biblia sing sistematiko, nagasugod sa sadsaran nga mga panudlo sang Kasulatan. (Hebreo 6:1) Samtang nagauswag ka, sarang mo na mahangpan ang ginatawag ni apostol Pablo nga “pagkaon nga matig-a”​—⁠nga amo, ang mas madalom nga mga kamatuoran. (Hebreo 5:14) Walay sapayan nga ang Biblia amo ang imo ginatun-an, ang iban nga mga publikasyon​—⁠mga bulig sa pagtuon sa Biblia​—⁠makabulig sa imo nga makita kag mahangpan ang mga teksto sa Biblia tuhoy sa nagkalainlain nga topiko.

Ang pagtuon masami nga ginahimo sa oras kag lugar nga kombeniente sa imo. Ang iban nagatuon pa gani paagi sa telepono. Ang pagtuon wala ginahiwat sa hulot-klasehan; isa ini ka pribado nga kahimusan nga ginabagay sa imo personal nga mga sirkunstansia, pati na sa imo kahimtangan kag edukasyon. Wala ka sing balayran sa sining pagtuon sa Biblia. (Mateo 10:8) Wala sing mga eksaminasyon, kag indi ka mahuya. Ang imo mga pamangkot pagasabton, kag matun-an mo kon paano magpalapit sa Dios. Apang, ngaa dapat mo tun-an ang Biblia? Binagbinaga ang pila ka rason kon ngaa ang pagtuon sa Biblia makahatag sing dugang nga kalipay sa imo kabuhi.