Ang Imo Kinamatarong sa Pagpati

Ayhan ginapakabahandi mo ang imo kinamatarong nga patihan ang bisan ano man nga luyag mo patihan. Amo man ang halos tanan. Paagi sa paggamit sini nga kinamatarong, ang anom ka bilyon ka pumuluyo sang duta nakahimo sing lainlain gid nga mga pagpati. Kaangay sang pagkananuhaytuhay sa duag, korte, kinaiya, sabor, baho, kag tunog nga makita naton sa mga tinuga, ang nagkalainlain nga mga pagpati masami nga nagadugang sing kawili, kakunyag, kag kalipay sa kabuhi. Sa pagkamatuod, ini nga pagkananuhaytuhay nagahimo sang kabuhi nga makawiwili kag makakulunyag.​—⁠Salmo 104:24.

APANG dapat maghalong. Ang iban nga mga pagpati indi lamang nga tuhay kundi makatalagam man. Halimbawa, sang maaga nga bahin sang ika-20 nga siglo, nagpati ang iban nga mga tawo nga ang mga Judiyo kag mga Freemason may plano nga “gamuhon ang Cristianong sibilisasyon kag magtukod sing isa ka bug-os kalibutan nga estado sa idalom sang ila magkaupod nga paggahom.” Ang isa ka tiliman-an sini nga pagpati amo ang kontra-Semitiko nga tract nga natig-uluhan Protocols of the Learned Elders of Zion. Ang tract nagsiling nga ang mga buko naglakip kuno sang pagsakdag sa sobra nga pagbuhis, pagpauswag sang paghimo sing armas, pagpalig-on sang daku nga mga monopolyo agod ‘ang manggad sang mga Gentil hinali kag madasig nga madula.’ Ang mga kunokuno nagalakip man sang pagmaniobra sa sistema sang edukasyon agod ‘himuon nga wala sing pensar nga mga sapat ang mga Gentil,’ kag paghimo pa gani sing mga riles sa idalom sang duta sa pagtabid sang kabisera nga mga siudad agod ‘madaug [sang Judiyong mga gulang] ang bisan sin-o nga mga nagapamatok paagi sa pagpatay sa ila.’

Siempre pa, mga kabutigan ini​—⁠nga gindesinyo agod mag-init ang kontra-Semitiko nga mga balatyagon. ‘Ining di-makatarunganon gid nga sugidsugid,’ siling ni Mark Jones sang British Museum, ‘naglapnag sa iban nga pungsod halin sa Rusya,’ diin una ini nga nagguwa sa isa ka artikulo sang pamantalaan sang 1903. Nakalab-ot ini sa The Times sang London sang Mayo 8, 1920. Kapin sa isa ka tuig sang ulihi, ginbuyagyag sang The Times ang dokumento nga palsipikado. Sini man nga tion, nahimo na ang halit. ‘Ang mga kabutigan kaangay sini,’ siling ni Jones, ‘mabudlay punggan.’ Sa tion nga nabaton na ini sang mga tawo, nagaresulta ini sa indi gid maayo, makahililo, kag makatalagam nga mga pagpati​—⁠sa masami nga may makahalalit nga mga resulta, subong sang ginpakita sang maragtas sang ika-20 nga siglo.​—⁠Hulubaton 6:16-19.

Pagpati Kontra Kamatuoran

Siempre pa, ang sayop nga mga pagpati mahimo mag-utwas bisan pa nga wala sing hungod nga mga pagbutig. Kon kaisa, wala lamang naton mahangpan ang mga butang. Pila ka tawo na bala ang napatay sing hilaw bangod sang paghimo sing isa ka butang nga ginapatihan nila nga husto? Subong man, masami naton nga ginapatihan ang isa ka butang bangod lamang nga luyag naton ini patihan. Ang isa ka propesor nagsiling nga bisan ang mga sientipiko “masami nga nagasalimuang sa ila kaugalingon  nga mga teoriya.” Bangod sang ila mga ginapatihan, wala nila ginatulutimbang ang mga butang sing nagakaigo. Nian mahimo nila ihinguyang ang ila bug-os nga kabuhi sa walay pulos sa pagtinguha nga sakdagon ang sayop nga mga pagpati.​—⁠Jeremias 17:9.

Amo man sini ang natabo sa relihioso nga mga pagtuluuhan​—⁠diin nagaluntad ang daku nga pagsumpakilay. (1 Timoteo 4:⁠1; 2 Timoteo 4:​3, 4) Ang isa ka tawo may daku nga pagtuo sa Dios. Ang isa naman nagasiling nga ang tawo wala gid sing bisan ano nga pamatuod nga magasakdag sang iya pagtuo sa Dios. Ang isa nagasiling nga may yara ikaw di-mamalatyon nga kalag nga nagalampuwas sa kamatayon. Ang isa naman nagapati nga kon ikaw mapatay wala ka na nagaluntad, sing bug-os. Sing maathag, ang nagasumpakilay nga mga pagpati kaangay sini indi mahimo nga husto tanan. Indi bala maalamon, nian, nga pat-uron nga ang imo ginapatihan matuod gid kag indi lamang kon ano ang luyag mo nga patihan? (Hulubaton 1:5) Paano mo ina himuon? Usisaon sang masunod nga artikulo ini nga topiko.

[Retrato sa pahina 3]

Ang 1921 nga artikulo nga nagabuyagyag sang “Protocols of the Learned Elders of Zion”