Ipadayag ang Imo Pag-uswag

“Binagbinaga ining mga butang; ukuri ini, agod nga ang imo pag-uswag madayag sa tanan nga tawo.”​—⁠1 TIMOTEO 4:15.

1. Paano mo mahibaluan kon ang prutas luto na kag mahimo na kaunon?

HANDURAWA ang imo paborito nga prutas​—⁠peach, peras, paho, ukon iban pa. Mahibaluan mo bala kon luto na ini kag mahimo na kaunon? Pat-od gid. Paagi sa baho, duag, kag pag-uyat sa sini mahibaluan mo nga manamit na ini kaunon. Sa tion nga matilawan mo na ini, malipay gid ikaw. Daw ano ka duga! Daw ano ka tam-is! Nagahatag ini sa imo sing daku nga kalipay kag kaayawan.

2. Paano ginapadayag ang pagkahamtong, kag ano ang epekto sini sa personal nga mga kaangtanan?

² Ining simple lamang apang makalilipay nga eksperiensia kaangay man sa iban nga mga bahin sang kabuhi. Bilang halimbawa, kaangay sang luto nga prutas, ang espirituwal nga pagkahamtong sang isa ka tawo mapadayag man sa nanuhaytuhay nga mga paagi. Makita naton ang pagkahamtong sa isa ka tawo kon magpadayag sia sing paghantop, paghangop, kaalam, kag iban pa. (Job 32:7-9) Makalilipay gid nga makig-upod kag mangabudlay upod sa mga tawo nga nagapakita sini nga mga kinaiya sa ila mga panimuot kag mga buhat.​—⁠Hulubaton 13:20.

3. Ano ang ginapakita sang paglaragway ni Jesus sa mga tawo sang panahon niya tuhoy sa pagkahamtong?

³ Sa pihak nga bahin, ang isa ka tawo mahimo nga hamtong na sa pisikal, apang ang iya paghambal kag paggawi mahimo magpakita nga indi pa sia hamtong sa emosyon kag sa espirituwal. Halimbawa, tuhoy sa balingag nga kaliwatan sang panahon niya, si Jesucristo nagsiling: “Si Juan nagkari nga wala nagakaon ukon nagainom, apang ang mga tawo nagsiling, ‘May demonyo sia’; ang Anak sang tawo nagkari nga nagakaon kag nagainom, apang ang mga tawo nagsiling, ‘Yari karon! Ang tawo nga mahakog kag palainom sing alak.’ ” Bisan pa yadto nga mga tawo hamtong sa pisikal, si Jesus nagsiling nga nagpanghikot sila kaangay sa “kabataan”​—⁠indi sila hamtong. Busa, nagdugang sia: “Walay sapayan sini, ang kaalam ginapamatud-an  nga matarong paagi sa mga buhat sini.”​—⁠Mateo 11:16-19.

4. Sa anong mga paagi ginapadayag ang pag-uswag kag pagkahamtong?

⁴ Gikan sa ginsiling ni Jesus, mahibaluan naton kon bala ang isa ka tawo may matuod nga kaalam​—⁠isa ka nagapakilala nga tanda sang pagkahamtong​—⁠paagi sa mga ginahimo niya kag sa mga resulta sini. May kaangtanan sini, talupangda ang laygay ni apostol Pablo kay Timoteo. Sa tapos masambit ang mga butang nga dapat himud-usan ni Timoteo, si Pablo nagsiling: “Binagbinaga ining mga butang; ukuri ini, agod nga ang imo pag-uswag madayag sa tanan nga tawo.” (1 Timoteo 4:15) Huo, ang pag-uswag sang Cristiano padulong sa pagkahamtong “madayag,” ukon mahantop sing maathag. Ang Cristianong pagkahamtong, kaangay sang nagasilak nga kapawa, indi di-makita ukon natago nga kinaiya. (Mateo 5:14-16) Busa, binagbinagon naton ang duha ka panguna nga paagi nga mapadayag ang pag-uswag kag pagkahamtong: (1) pagtubo sa ihibalo, paghangop, kag kaalam; (2) pagpadayag sang mga bunga sang espiritu.

Nahiusa sa Pagtuo kag Ihibalo

5. Paano ilaragway ang pagkahamtong?

⁵ Ang kalabanan nga diksionaryo nagalaragway sang pagkahamtong subong ang kahimtangan sang bug-os nga pagtubo, lubos nga pagdaku, kag pagdangat sa katapusan nga kahimtangan ukon naluyagan nga talaksan. Ang isa ka prutas, subong sang ginsambit kaina, gulang, ukon luto na, kon matapos sini ang kinaugali nga siklo sini sa pagtubo kag ang dagway, duag, baho, kag sabor sini nakadangat sa kon ano ang ginakabig nga halandumon. Busa, ang pagkahamtong may pareho nga kahulugan sa pagkaekselente, pagkakompleto, pagkahimpit pa gani.​—⁠Isaias 18:⁠5; Mateo 5:45-48; Santiago 1:4.

6, 7. (a) Ano ang nagapakita nga si Jehova interesado gid nga ang tanan niya nga sumilimba magauswag sa espirituwal nga pagkahamtong? (b) Sa ano naangot sing suod ang espirituwal nga pagkahamtong?

⁶ Si Jehova nga Dios interesado gid nga ang tanan niya nga sumilimba magauswag padulong sa espirituwal nga pagkahamtong. Agod matigayon ina, naghimo sia sing makatilingala nga mga aman sa sulod sang Cristianong kongregasyon. Para sa mga Cristiano sa Efeso, si apostol Pablo nagsulat: “Ginhatag niya ang iban subong mga apostoles, ang iban subong mga manalagna, ang iban subong mga ebanghelisador, ang iban subong mga manugbantay kag mga manunudlo, sa tuyo nga pasibuon liwat ang mga balaan, para sa ministeryal nga hilikuton, para sa pagpalig-on sa lawas ni Cristo, tubtob makadangat kita tanan sa paghiusa sa pagtuo kag sa sibu nga ihibalo tuhoy sa Anak sang Dios, sa isa ka hamtong nga tawo, sa talaksan sang kataason sang kabug-usan ni Cristo; agod nga indi na kita mangin bata, nga ginabolabola sang mga balod kag ginapalidpalid sang tagsa ka hangin sang panudlo paagi sa pagdaya sang mga tawo, paagi sa pagkamalalangon sa pagpadihot sing sayop.”​—⁠Efeso 4:11-14.

⁷ Sa sining mga bersikulo, ginpaathag ni Pablo nga lakip sa mga rason kon ngaa ang Dios naghimo sing nagakaigo nga espirituwal nga mga aman sa kongregasyon amo nga ang tanan dapat ‘magdangat sa paghiusa sa pagtuo kag sa sibu nga ihibalo,’ mangin “isa ka hamtong nga tawo,” kag may ‘talaksan sang kataason ni Cristo.’ Paagi lamang sina nga indi kita pagpalidpaliron kaangay sang espirituwal nga mga lapsag sang butig nga mga ideya kag mga panudlo. Gani makita naton ang suod nga kaangtanan sa ulot sang pag-uswag padulong sa Cristianong pagkahamtong kag pagdangat sa “paghiusa sa pagtuo kag sa sibu nga ihibalo tuhoy sa Anak  sang Dios.” Madamo nga butang sa laygay ni Pablo ang nagakaigo nga dapat naton talupangdon.

8. Ano ang ginakinahanglan agod makadangat sa “paghiusa” sa pagtuo kag sa sibu nga ihibalo?

⁸ Una, sanglit ang “paghiusa” dapat huptan, ang isa ka hamtong nga Cristiano dapat nga nahiusa kag nahisanto sing bug-os sa mga masigkatumuluo kon tuhoy sa pagtuo kag ihibalo. Wala niya ginasakdag ukon ginapilit ang personal nga mga opinyon ukon ginahuptan ang personal nga mga ideya may kaangtanan sa paghangop sa Biblia. Sa baylo, nagasalig sia sing bug-os sa kamatuoran subong sang ginpahayag ni Jehova nga Dios paagi sa iya Anak, nga si Jesucristo, kag sa “matutom kag mainandamon nga ulipon.” Paagi sa tayuyon nga pagkuha sing espirituwal nga pagkaon nga ginahatag sa “nagakaigo nga tion”​—⁠paagi sa Cristianong mga publikasyon, mga miting, mga asambleya, kag mga kombension​—⁠makapat-od kita nga mahuptan naton ang “paghiusa” upod sa mga masigka-Cristiano sa pagtuo kag ihibalo.​—⁠Mateo 24:45.

9. Ipaathag ang kahulugan sang ekspresyon nga “pagtuo” suno sa paggamit ni Pablo sa iya sulat sa mga taga-Efeso.

⁹ Ikaduha, ang ekspresyon nga “pagtuo” nagapatuhoy, indi sa kombiksion nga ginapangangkon sang tagsa ka indibiduwal nga Cristiano, kundi sa kabug-usan sang aton pagtuluuhan, “ang kasangkaron kag kalabaon kag kataason kag kadalumon” sini. (Efeso 3:18; 4:⁠5; Colosas 1:23; 2:7) Sa katunayan, paano mahiusa ang isa ka Cristiano sa mga masigkatumuluo kon ginapatihan ukon ginabaton lamang niya ang isa ka bahin sang “pagtuo”? Nagakahulugan ini nga indi kita dapat mangin kontento sa paghibalo lamang sang sadsaran nga mga panudlo sang Biblia ukon sa pagtigayon sing di-maathag ukon hapaw nga ihibalo sang kamatuoran. Sa baylo, dapat kita mangin interesado sa paghimulos sa tanan nga aman ni Jehova paagi sa iya organisasyon nga makapanalawsaw sing maid-id sa iya Pulong. Dapat kita manikasog sa pagtigayon sing sibu kag bug-os nga paghangop sa kabubut-on kag katuyuan sang Dios kon mahimo. Nagalakip ini sang paghinguyang sing tion sa pagbasa kag sa pagtuon sang Biblia kag sang mga publikasyon sa Biblia, sa pagpangayo sing bulig kag panuytoy sang Dios sa pangamuyo, sa pagtambong sa Cristianong mga miting sing regular, kag sa pagpakigbahin sing bug-os sa pagbantala-sing-Ginharian kag paghimo-sing-disipulo nga hilikuton.​—⁠Hulubaton 2:1-5.

10. Ano ang kahulugan sang mga tinaga nga “tubtob makadangat kita tanan,” subong sang gingamit sa Efeso 4:13?

¹⁰ Ikatlo, ginsugdan ni Pablo ang paglaragway sa tatlo ka tulumuron sa mga tinaga nga “tubtob makadangat kita tanan.” Tuhoy sa ekspresyon nga “kita tanan,” ang isa ka libro sa Biblia nagahatag sang kahulugan nga “indi tanan, isa-isa, tuhay, apang tingob tanan.” Sa iban nga hambal, ang kada isa sa aton dapat gid manikasog nga himud-usan ang tulumuron sang Cristianong pagkahamtong upod sa bug-os nga paghiliutod. Ang The Interpreter’s Bible nagakomento: “Ang kabug-usan sang espirituwal nga hinimuan indi matigayon sing isahanon, subong nga ang isa ka bahin sang lawas indi makadangat sa pagkahamtong luwas kon ang bug-os nga lawas padayon nga magtubo sing mapagros.” Ginpahanumdom ni Pablo ang mga Cristiano sa Efeso nga dapat sila manikasog nga hangpon ang bug-os nga kasangkaron sang pagtuo “kaupod sang tanan nga balaan.”​—⁠Efeso 3:18a.

11. (a) Ano ang wala ginapahangop sang espirituwal nga pag-uswag? (b) Ano ang dapat naton himuon agod mag-uswag?

¹¹ Maathag gikan sa ginsiling ni Pablo nga ang espirituwal nga pag-uswag wala nagakahulugan sang pagpuno lamang sang aton hunahuna sing ihibalo kag madamo nga tinun-an. Ang hamtong nga Cristiano wala nagapadayaw sa iban sang iya kaalam. Sa baylo, ang Biblia nagasiling: “Ang banas sang mga matarong kaangay sang masanag nga kapawa nga nagasanag kag nagasanag tubtob sa himpit nga adlaw.” (Hulubaton 4:18) Huo, ang “banas,” indi ang indibiduwal, ang “nagasanag kag nagasanag.” Kon padayon kita nga manikasog nga makigdungan sa nagasanag pa nga paghangop sa Pulong sang Dios nga ginahatag ni Jehova sa iya katawhan, magauswag kita sa espirituwal. Sa sini nga bahin, ang pagdungan nagakahulugan sang pag-uswag, kag butang ina nga masarangan naton tanan nga himuon.​—⁠Salmo 97:11; 119:105.

Ipadayag ang “mga Bunga Sang Espiritu”

12. Ngaa ang pagpadayag sang mga bunga sang espiritu importante sa paghimud-os naton nga mag-uswag sa espirituwal?

¹² Samtang ang pagdangat sa “paghiusa sa pagtuo  kag sa sibu nga ihibalo” importante, ang pagpadayag sang mga bunga sang espiritu sang Dios sa tanan nga bahin sang aton kabuhi importante man sa aton. Ngaa? Bangod ang pagkahamtong, subong sang nakita na naton, indi di-makita ukon natago, kundi makita ini sa madali mahantop nga mga kinaiya nga nagabulig kag nagapabakod sa iban. Sa pagkamatuod, ang aton paghimud-os para sa espirituwal nga pag-uswag indi lamang pagpakita ukon pagpakunokuno nga may maayo nga pamatasan. Sa baylo, samtang nagatubo kita sa espirituwal, nga nagasunod sa panuytoy sang espiritu sang Dios, may yara makatilingala nga mga pagbalhin sa aton mga panimuot kag mga buhat. “Padayon sa paglakat sa espiritu kag indi gid kamo maghimo sing undanon nga kailigbon,” siling ni apostol Pablo.​—⁠Galacia 5:16.

13. Ano nga pagbag-o ang maathag nga pamatuod sang pag-uswag?

¹³ Ginlista ni Pablo ang “mga buhat sang unod,” nga madamo kag ‘nadayag.’ Antes mahangpan sang isa ka tawo ang mga ginapatuman sang Dios, ang iya kabuhi nadihon sa pagkabuhi sang kalibutan kag mahimo nga napun-an sang pila sang mga butang nga ginsambit ni Pablo: “pagkamakihilawason, pagkadi-matinlo, malaw-ay nga paggawi, idolatriya, pagbuhat sing espiritismo, mga pag-ilinaway, pagpinuyas, kaimon, mga pagsilabo sang kaakig, mga pagbaisay, mga pagbinahinbahin, mga sekta, mga pagkahisa, mga paghuboghubog, magansal nga kinalipay, kag mga butang nga kaangay sini.” (Galacia 5:19-21) Apang samtang ang isa ka tawo nagauswag sa espirituwal, amat-amat niya nga malandas ining indi maayo nga “mga buhat sang unod” kag mabuslan ini sang “mga bunga sang espiritu.” Ining naguwa nga kitaon nga pagbag-o isa ka maathag nga pamatuod nga ang isa ka tawo nagauswag padulong sa Cristiano nga pagkahamtong.​—⁠Galacia 5:22.

14. Ipaathag ang duha ka ekspresyon nga “mga buhat sang unod” kag “mga bunga sang espiritu.”

¹⁴ Dapat naton talupangdon ang duha ka ekspresyon nga “mga buhat sang unod” kag “mga bunga sang espiritu.” Ang “mga buhat” amo ang mga resulta sang ginahimo sang isa. Sa iban nga hambal, ang mga butang nga ginlista ni Pablo subong mga buhat sang unod amo ang mga resulta sang hungod nga pagpili sang isa ukon sang impluwensia sang makasasala nga tawhanon nga unod. (Roma 1:​24, 28; 7:21-25) Sa pihak nga bahin, ang ekspresyon nga “mga bunga sang espiritu” nagapahangop nga ang mga kinaiya nga ginlista, indi mga resulta sang mga panikasog sang ginatawag nga paglambo sang kinaiya ukon pag-uswag sang personalidad, kundi mga resulta sang pagpanghikot sang espiritu sang Dios sa isa ka tawo. Subong nga ang kahoy nagapamunga kon ginaatipan sing nagakaigo, ang isa ka tawo magapadayag man sang mga bunga sang espiritu kon ang balaan nga espiritu nagapanghikot sing hilway sa iya kabuhi.​—⁠Salmo 1:1-3.

15. Ngaa importante nga talupangdon ang tanan nga bahin sang “mga bunga sang espiritu”?

 ¹⁵ Ang isa pa ka punto nga dapat binagbinagon amo ang paggamit ni Pablo sang tinaga nga “mga bunga” sa paglakip sa tanan nga maayo nga kinaiya nga ginsambit niya.⁠ * Ang espiritu wala nagapatubas sing nanuhaytuhay nga bunga agod pilion naton ang aton paborito. Ang tanan nga kinaiya nga ginlista ni Pablo​—⁠gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, kag pagpugong sa kaugalingon​—⁠pareho man ka importante, kag sing tingob ginapaluntad sini ang bag-ong Cristianong personalidad. (Efeso 4:24; Colosas 3:10) Gani, samtang mahimo naton makita nga ang pila sini nga mga kinaiya mas maathag sa aton kabuhi bangod sang aton mismo personalidad kag mga huyog, importante nga talupangdon naton ang tanan nga bahin nga ginsambit ni Pablo. Paagi sa sini, mapabanaag naton sing bug-os ang katulad-Cristo nga personalidad sa aton kabuhi.​—⁠1 Pedro 2:​12, 21.

16. Ano ang aton tulumuron sa aton paghimud-os sang Cristianong pagkahamtong, kag paano ini matigayon?

¹⁶ Ang importante nga leksion nga matun-an naton gikan sa pagbinagbinag ni Pablo amo nga sa paghimud-os sang Cristianong pagkahamtong, indi ang pagtigayon sing daku nga ihibalo kag tinun-an ukon ang pagpalambo sing ginpauswag nga mga kinaiya sang personalidad ang aton tulumuron. Ini amo ang pagtigayon sing bugana nga suplay sang espiritu sang Dios sa aton kabuhi. Kon tubtob diin ang aton hunahuna kag mga buhat nagahulag sa pagtuytoy sang espiritu sang Dios, sa sini man nga paagi nga kita mangin hamtong sa espirituwal. Paano naton matigayon ini nga tulumuron? Dapat naton buksan ang aton tagipusuon kag hunahuna sa impluwensia sang espiritu sang Dios. Nagadalahig ini sang aton tayuyon nga pagtambong kag pagpakigbahin sa Cristianong mga miting. Dapat man naton tun-an sing tayuyon kag pamalandungan ang Pulong sang Dios, kag tugutan ang mga prinsipio sini nga mag-ubay sang aton mga pagpakig-angot sa iban kag sang mga pagpili kag mga desisyon nga ginahimo naton. Sa amo, ang aton pag-uswag maathag gid nga madayag.

Mag-uswag Agod Mahimaya ang Dios

17. Paano ang pag-uswag may yara kaangtanan sa paghimaya sa aton langitnon nga Amay?

¹⁷ Sa katapusan, ang pagpadayag sang aton pag-uswag nagahatag sing himaya kag pagdayaw, indi sa aton, kundi sa aton langitnon nga Amay, si Jehova, nga nagahimo nga posible nga matigayon naton ang espirituwal nga pagkahamtong. Sang gab-i antes ginpatay si Jesus, nagsiling sia sa iya mga disipulo: “Ang akon Amay mahimaya sa sini, nga padayon kamo nga nagapamunga sing madamo kag ginapamatud-an ninyo nga kamo mga disipulo ko.” (Juan 15:8) Paagi sa mga bunga sang espiritu kag sa mga bunga sang Ginharian sa ila ministeryo, ang mga disipulo nagahimaya kay Jehova.​—⁠Binuhatan 11:​4, 18; 13:48.

18. (a) Anong makalilipay nga pag-ani ang ginahimo karon? (b) Ano nga hangkat ang ginapresentar sini nga pag-ani?

¹⁸ Karon, ginapakamaayo ni Jehova ang iya katawhan samtang nagapakigbahin sila sa bug-os kalibutan nga espirituwal nga pag-ani. Sa sulod sang madamo na nga tinuig, mga 300,000 ka bag-uhan kada tuig ang nagdedikar kay Jehova kag nagsimbulo sang ila dedikasyon paagi sa bawtismo sa tubig. Nagapahalipay ini sa aton kag pat-od man nga nagapahalipay sang tagipusuon ni Jehova. (Hulubaton 27:11) Apang, agod mangin dalayon nga tuburan ini sang kalipay kag  pagdayaw kay Jehova, ining tanan nga bag-uhan kinahanglan nga ‘magpadayon sa paglakat nga nahiusa [kay Cristo], nga nakapanggamot kag natukod sa iya kag napalig-on sa pagtuo.’ (Colosas 2:​6, 7) Nagahatag ini sing duha ka hangkat sa katawhan sang Dios. Sa isa ka bahin, kon ikaw bag-ong bawtismado, batunon mo bala ang hangkat nga mangabudlay sing lakas agod ang “imo pag-uswag madayag sa tanan nga tawo”? Sa pihak nga bahin, kon ikaw madugaydugay na sa kamatuoran, batunon mo bala ang hangkat sa pag-abaga sang responsabilidad nga atipanon ang espirituwal nga kaayuhan sang mga bag-uhan? Sa duha ka kahimtangan, ang kinahanglanon nga mag-uswag padulong sa pagkahamtong maathag.​—⁠Filipos 3:16; Hebreo 6:1.

19. Ano nga pribilehiyo kag mga pagpakamaayo ang mangin imo kon ginapadayag mo ang imo pag-uswag?

¹⁹ Ang makalilipay nga mga pagpakamaayo nagahulat sa tanan nga nagahimakas nga mapadayag ang ila pag-uswag. Dumduma ang makapalig-on nga mga pulong ni Pablo sa tapos niya ginlaygayan si Timoteo nga mag-uswag: “Hatagi sing dalayon nga igtalupangod ang imo kaugalingon kag ang imo panudlo. Magpadayon ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.” (1 Timoteo 4:16) Paagi sa imo kaukod nga mapadayag ang pag-uswag, makapakigbahin man ikaw sa pribilehiyo nga mahimaya ang ngalan sang Dios kag maagom ang iya mga pagpakamaayo.

[Nota]

Madumduman Mo Bala?

• Sa anong mga paagi mapadayag ang espirituwal nga pagkahamtong?

• Ano nga sahi sang ihibalo kag paghangop ang nagapadayag sing pagkahamtong?

• Paano ang pagpadayag sang “mga bunga sang espiritu” nagapakita sang espirituwal nga pag-uswag?

• Ano nga hangkat ang dapat naton batunon samtang nagauswag kita sa pagkahamtong?

[Mga Pamangkot sa Pagtinuon]

[Retrato sa pahina 13]

Ang kahimtangan nga luto na, ukon gulang, madali mahantop

[Retrato sa pahina 15]

Nagauswag kita sa espirituwal paagi sa pagpakigdungan sa ginpahayag nga kamatuoran

[Retrato sa pahina 17]

Ang pangamuyo nagabulig sa aton sa pagpadayag sang “mga bunga sang espiritu”