Nagasiga Subong mga Sulo sa Siudad sang Kapawa

Fluctuat nec mergitur, ukon “Ginahampas sia sang mga balod apang indi sia malunod,” amo ang hulubaton sang siudad sang Paris.

KAANGAY sang isa ka barko, sa sulod sang nagligad nga 2,000 ka tuig, ginbatas sang Paris ang di-maisip nga bagyo sang pagsalakay sang mga dumuluong kag nasulod nga mga pagrebelde agod makalampuwas. Isa karon sang labing matahom nga mga siudad sa bug-os nga kalibutan, ginhangad ang Paris bangod sang matahom gid nga arkitektura sini, naidasan-sing-kahoy nga mga kalye, kag bantog-sa-kalibutan nga mga museo. Nagapati ang iban nga ginakadtuan ini pirme sang mga mamalaybay, mga pintor, kag mga pilosopo. Nanamitan ang iban sa mga pagkaon sini kag nagadayaw sa matahom nga mga estilo kag desinyo sini.

Sa maragtas, ang Paris isa ka pamakod sang Katolisismo. Sang nagligad nga duha ka gatos ka tuig, bangod sang importante nga papel sini sa hublag sang mga mangin-alamon sa Europa nga nakilala subong Enlightenment, gintawag ang Paris subong Siudad sang Kapawa. Sa karon, nahibaluan man nila ukon wala, mas naimpluwensiahan ang kalabanan nga taga-Paris sang pilosopiya sina nga panahon sangsa relihion.

Apang, wala mapasanagan sang kaalam sang tawo ang kabuhi sang mga tawo subong sa ginapaabot. Madamo karon ang nagapangita sing kasanagan sa tuhay nga ginhalinan. Sa sulod na sang mga 90 ka tuig, ang mga Saksi ni Jehova ‘nagasiga subong mga sulo’ sa Paris. (Filipos 2:15) Kaangay sang lantip nga mga marinero, dapat sila  magpasibu sing dalayon sa nagabag-o nga mga huyog ukon mga hitabo agod mapasakay ang “kalahamut-an nga mga butang sang tanan nga pungsod.”​—⁠Hageo 2:7.

Makahalangkat nga Siudad

Sang 1850, may 600,000 ka pumuluyo ang siudad sang Paris. Ang populasyon karon, pati na sa mga lugar malapit sa siudad, kapin sa siam ka milyon. Bangod sini nga pagdamo, ang Paris nangin ang siudad sa Pransia nga may labing nanuhaytuhay nga populasyon. Isa ini ka sentro sang mataas nga edukasyon sa bug-os nga kalibutan, yari diri ang pinakadaan nga mga unibersidad sang kalibutan, kag may 250,000 ka estudyante sa kolehiyo ukon unibersidad. Ang pila ka lugar malapit sa siudad sang Paris, nga may madamong matag-as kaayo nga mga tinukod nga bantog sa delingkwensia kag pagkawalay palamugnan, nagarepresentar sa indi maayo nga mga kinaiya sang Paris. Walay duhaduha, kinahanglan ang kalantip kag pagkamapasibusibuon sang mga Saksi ni Jehova agod mapresentar ang maayong balita sa paagi nga makagalanyat sa tanan nga sahi sang mga tawo.​—⁠1 Timoteo 4:10.

Kapin sa 20 milyones ka turista ang nagaduaw sa Paris kada tuig. Mahimo magsaka sila sing malangkagon sa Eiffel Tower, magdayandayan sa higad sang suba sang Seine, ukon magtener sa mga

 café kag bistro sa mga higad sang dalan samtang ginapamalandungan ang palibot. Apang, ang matag-adlaw nga pagkabuhi sang mga taga-Paris masako gid. “Pirme nagadalidali ang mga tawo,” paathag ni Christian, nga isa ka bug-os tion nga ministro. “Kon magpauli sila halin sa trabaho, nalapyo sila.” Indi mahapos makigsugilanon sa sining masako nga mga tawo.

Apang, ang isa sang labing daku nga mga problema nga ginaatubang sang mga Saksi ni Jehova sa Paris amo ang pagsugilanon sa mga tawo sa ila puluy-an. Ang iban nga mga tinukod may intercom. Apang, bangod sang pagdamo sang krimen, ang mga tinukod masami nga may elektroniko nga mga sistema sang seguridad sa mga ganhaan, kag imposible gid nga makasulod. Amo ini ang rason kon ngaa sa iban nga mga duog, may katumbas nga isa lamang ka Saksi sa kada 1,400 ka tawo. Gani, kapin nga ginahimo ang pagpanaksi paagi sa telepono kag sing di-pormal. Napaiwag bala sang mga Saksi ni Jehova ang ila “kapawa” sa iban nga mga paagi?​—⁠Mateo 5:16.

Madamo ang kahigayunan kag lugar para sa di-pormal nga pagpanaksi. Nakita ni Martine ang daw masinulub-on nga babayi nga nagatindog sa pulunduhan sang bus. Bag-o lang napatay ang bugtong nga anak nga babayi sini. Ginhatagan sia ni Martine sang brosyur nga nagasaysay sang makalugpay nga paglaum sang pagkabanhaw sa Biblia. Pagkatapos sini, wala na sia sing komunikasyon sa iya sa pila ka bulan. Sang nakita liwat ni Martine ang babayi, nasugdan niya ang pagtuon sa Biblia upod sa iya. Walay sapayan sang pagpamatok sang iya bana, nangin Saksi ang babayi.

Mabungahon nga Pagpanaksi Sing Di-pormal

Ang sistema sang publiko nga transportasyon sa Paris isa sang labing maayo sa bug-os nga kalibutan. Ang bantog nga Metro nagasakay sing 5,000,000 ka pasahero kada adlaw. Ang sentral nga estasyunan sang Paris sa idalom sang duta, ang Châtelet-Les-Halles, amo kuno ang pinakadaku kag pinakamasako sa bug-os nga kalibutan. Madamo sing kahigayunan nga masugilanon ang mga tawo didto. Nagasakay si Alexandra sa Metro pakadto sa trabaho kada adlaw. Isa ka adlaw nasugilanon niya ang isa ka pamatan-on nga lalaki nga may leukemia kag ilisipon na lang ang nabilin nga inadlaw. Ginhatagan sia ni Alexandra sing tract tuhoy sa paglaum sa Paraiso. Ginbinagbinag nila ang Biblia sa amo man nga oras kag duog kada adlaw sa sulod sang anom ka semana. Nian isa ka adlaw, wala na mag-abot ang lalaki. Wala madugay pagkatapos sadto, ginteleponohan si Alexandra sang asawa sang lalaki kag ginpangabay sia nga magkadto sa ospital, kay malubha ang kahimtangan sang iya bana. Sing makapasubo, ulihi na sang mag-abot si Alexandra. Sang napatay ang lalaki, nagsaylo ang iya asawa sa Bordeaux, sa bagatnan-katundan sang Pransia, diin ginduaw sia sang mga Saksi didto. Isa gid ka matahom nga balita para kay Alexandra sang mabalitaan niya nga isa ka tuig sang ulihi ang balo nga babayi nangin bawtismado nga Cristianong Saksi ni Jehova, nga may paglaum nga makita nga mabanhaw ang iya bana!​—⁠Juan 5:​28, 29.

Nasugilanon sang isa ka tigulang nga Cristianong babayi si Renata sa isa ka tren nga nagabiyahe halin sa Paris pakadto sa Limoges, sa sentro sang Pransia. Sa tumandok niya nga pungsod nga Poland, nagtuon si Renata sing teolohiya, Hebreo, kag Griego sa sulod sang lima ka tuig, apang nadula niya ang iya pagtuo sa Dios. Tatlo ka bulan antes sang paghambalanay sa tren, nangamuyo sia sa Dios. Bisan pa indi gid man interesado sa inugsiling sang tigulang nga babayi kag wala nagapaabot nga makabalita pa liwat sa iya, ginhatag ni Renata sa iya ang numero sang iya telepono. Apang, wala mangampo ang utod nga babayi kag ginsiguro niya nga may magaduaw kay Renata wala madugay pagkatapos sadto. Sang ginduaw sia sang isa ka Saksi nga mag-asawa, naghunahuna si Renata, ‘Ano ayhan ang itudlo nila sa akon?’ Walay sapayan sang iya edukasyon sa teolohiya, sing mapainubuson naganyat si Renata sa kamatuoran sang Biblia. “Nahangpan ko sa gilayon nga amo ini ang kamatuoran,” paathag niya. Karon malipayon sia nga nagapaambit sang mensahe sang Biblia sa iban.

Nagtuon anay si Michèle sa pagmaneho. Ang iban nga mga estudyante sa ila klase sa pagmaneho nagsugod sa paghambalanay tuhoy sa paghulid antes sang kasal. Ginpabutyag ni Michèle ang indi niya pag-ugyon. Pagligad sang isa ka semana, ginpamangkot sia ni Sylvie, nga nagatudlo sa ila sa pagmaneho: “Saksi ni Jehova ka bala?” Nagdayaw si Sylvie sa pasad-Biblia nga pagtamod ni Michèle. Isa ka pagtuon sa Biblia ang nasugdan, kag pagligad sang isa ka tuig si Sylvie nabawtismuhan.

Ang madamo nga parke kag hardin sa Paris nangin matahom nga danyag samtang nagapakigsugilanon sa mga tawo. Naghimulos sang tion sa  pagpahuway, nagkadto sa parke si Josette, diin nagadayandayan ang isa ka tigulang nga babayi, nga si Aline. Ginpaathag ni Josette ang matahom nga mga saad nga makita sa Biblia. Ginhimos ang isa ka pagtuon sa Biblia, kag wala madugay nag-uswag si Aline tubtob sa pagpabawtismo. Karon, sa edad nga 74 anyos, si Aline isa ka mabungahon gid nga regular payunir nga ministro, malipayon nga nagapakig-ambit sa iban sang Cristianong kamatuoran.

Kapawa Para sa Tanan nga Pungsod

Indi na kinahanglan nga maglakbay pa sa malayo nga mga kadutaan ang mga Saksi sa Paris agod maeksperiensiahan ang nanuhaytuhay nga kultura. Ang halos 20 porsiento sang populasyon mga dumuluong. May Cristianong mga kongregasyon kag mga grupo sa mga 25 ka lenguahe.

Ang kalantip kag pagkamapahituon masami nga nagapatubas sing maayong mga resulta sa sining pinasahi nga hilikuton sang pag-ebanghelyo. Isa ka Filipina nga Saksi ang naghimo sang iya kaugalingon nga pinasahi nga teritoryo. Samtang nagapamalaklon, nakasugod sia sing madamo nga pagtuon sa Biblia paagi sa pagpakigsugilanon sa iban pa nga mga Filipino sa mga balaligyaan.

Takus gid ang pagpanikasog nga magpakita sing inisyatibo sa pagbantala. Sang Disiembre 1996, sang mahibaluan nga manug-abot ang isa ka circus nga bantog sa bug-os nga kalibutan, ang mga Saksi sa isa ka kongregasyon nga nagahambal sing dumuluong nga lenguahe namat-od nga sugilanunon ang mga artista. Isa ka gab-i pagkatapos sang palaguwaon, nasugilanon nila ang mga artista nga manugpauli na sa ila otel. Ini nga inisyatibo nagresulta sa pagpahamtang sing 28 ka Biblia, 59 ka Cristianong libro, 131 ka brosyur, kag 290 ka magasin. Sa talipuspusan sang tatlo-ka-semana nga pagtener didto, namangkot ang isa sang mga acrobat: “Paano ako mangin isa sang mga Saksi ni Jehova?” Ang isa pa nagsiling: “Magabantala ako sa akon pungsod!”

Natago nga mga Bahandi nga Dapat Masalapuan

Diin man sila magtulok, matukiban sang mga dumuluaw sa Paris ang matahom nga mga bahandi sa arkitektura sang una nga panahon. Apang, nagahulat pa nga masalapuan ang mas bilidhon nga mga butang. Nagkadto si Aniza sa Pransia kaupod sang iya tiyo, nga isa ka diplomat. Regular niya nga ginabasa ang Biblia sa puluy-an. Isa ka adlaw samtang nagadalidali sia sa paghalin sa balay, gindahuan sia sang isa ka payunir sing tract nga Kon Ngaa Imo Masaligan ang Biblia. Ginhimos ang paghambalanay sa masunod nga semana, kag ginsugdan ang pagtuon sa Biblia. Ginpamatukan gid si Aniza sang iya pamilya. Nag-uswag sia sa iya pagtuon tubtob sa pagpabawtismo. Paano niya ginatamod ang iya pribilehiyo nga ipaambit ang kamatuoran sa iban? “Sang primero nabudlayan ako sa pagbantala bangod mahuluy-on ako. Apang, kon mabasa ko ang Biblia, ginapapagsik ako sini. Indi ako mahim-os, kon indi ako makabantala.” Amo sina ang panimuot sang madamo nga Saksi sa Paris, nga “madamo pirme sing ginahimo sa hilikuton sang Ginuo.”​—⁠1 Corinto 15:58.

Nagasiga man ang kamatuoran sang Biblia sa mga proyekto nga pagpabalay sa mga dulunan sang Paris, nga nagpakita sang iban pa nga mga “hiyas.” Sa tuyo nga manghulam sing pila ka plaka, ginduaw ni Bruce ang iya abyan, nga bag-o lang mangin Saksi ni Jehova. Naabtan ni Bruce ang iya abyan nga nagahinun-anon sang Biblia upod sa pila sang iya mga kakilala, gani namati sia sa hambalanay. Ginbaton niya ang gintanyag sa iya nga pagtuon sa Biblia apang may pila ka problema. “Kilala gid ako sa amon lugar. Ang akon magulang nga lalaki palaaway, kag nagaorganisar ako sang magansal nga mga binayle. Paano mabaton sang iban ang katunayan nga mangin Saksi na ako?” Walay sapayan sang padayon nga pangabay nga mag-organisar sang mga binayle, gin-untat ni Bruce ina nga hilikuton. Pagligad sang isa ka bulan nagsugod sia sa pagbantala: “Ang tanan sa amon lugar luyag makahibalo kon ngaa nangin isa ako ka Saksi.” Wala madugay pagkatapos sina nagpabawtismo sia. Sang ulihi, natigayon niya ang pribilehiyo nga makaeskwela sa Ministerial Training School.

Ang pagpangita sing mga bahandi nagakinahanglan sing daku nga panikasog. Apang, daw ano nga kalipay kon magbunga ang pagpangabudlay! Mga panadero sa Paris sanday Jacky, Bruno, kag Damien. “Imposible nga masugilanon kami bangod nagatrabaho kami pirme kag wala gid nagapauli,” paathag ni Jacky. Nakita ni Patrick, isa ka regular payunir, nga may diutay nga mga hulot sa ibabaw sang isa ka tinukod, kag nagdahumdahom nga basi ang isa sini may tawo. Ang padayon niya nga pagpanikasog nga masugilanon ang mga nagaistar didto nagresulta sa maayo bangod sang isa ka hapon nasugilanon gid man niya si Jacky, nga temporaryo nga nagaistar didto. Ang resulta? Ang tatlo  ka mag-abyan nangin mga Saksi kag nakakita sing lain nga trabaho nga nagtugot sa ila nga makapakigbahin sing bug-os sa teokratiko nga hilikuton.

Pagpakanay sa Bagyo

Sining ulihi lang, ginlaragway sang pila ka media sa Pransia ang mga Saksi ni Jehova subong isa ka makatalagam nga relihioso nga kulto. Sang 1996, bug-os tagipusuon nga nakigbahin ang mga Saksi sa pagpanagtag sang kapin sa siam ka milyon ka kopya sang tract nga may yara pinasahi nga impormasyon nga natig-uluhan Jehovah’s Witnesses​​—⁠What You Need to Know. Maayo gid ang mga resulta.

Ginpanikasugan gid nga malab-ot ang tanan. Madamong opisyal ang nagpabutyag sang ila pagpasalamat sa mga Saksi. Ang konsehal sang isa ka banwa nagsulat: “Nagakaigo gid nga ginpanagtag sang mga Saksi ni Jehova ini nga tract. Gintadlong sini ang mga kabutigan.” Ang isa ka doktor nagkomento: “Madugay ko na ginahulat ini nga impormasyon!” Ang isa ka tawo sa Paris nagsulat: “Natabuan lang nga nabasa ko ang Jehovah’s Witnesses​​—⁠What You Need to Know. Luyag ko nga makahibalo sing dugang pa kag makatigayon sing walay bayad nga pagtuon sa Biblia sa puluy-an.” Ang isa pa ka babayi nagsulat: “Salamat sa inyo pagkabunayag.” Ang isa ka Katoliko nga babayi nagsiling sa mga Saksi: “Aba! Ginsabat gid man ninyo ini nga mga kabutigan!”

Pinasahi gid nga kalipay para sa madamong pamatan-on nga mga Saksi sa Paris ang pag-organisar sing pagbantala nga hilikuton para sa Catholic World Youth Days sang 1997. Bisan pa ang temperatura naglampas sa 35 degrees Celsius, mga 2,500 ka Saksi ang nakigbahin. Sa sulod lamang sang pila ka adlaw, nakapahamtang sila sing 18,000 ka kopya sang brosyur nga Isa ka Libro Para sa Tanan nga Tawo sa mga pamatan-on halin sa tanan nga bahin sang kalibutan. Luwas nga nakapanaksi sa ngalan ni Jehova kag nagsab-ug sang mga binhi sang kamatuoran, ginpapagsik sang pagbantala ang pamatan-on nga mga Saksi. Ang isa ka utod nga dalagita, nga nagpalip-ot sang iya bakasyon agod makapakigbahin sing bug-os sa sining pinasahi nga panikasog, nagsulat: “May malipayon nga katawhan si Jehova sa duta nga nagagamit sang ila kusog sa pagdayaw sa iya ngalan. Ining duha ka adlaw, nga tuman ka makaalayaw kag makapaladya, takus gid sang tanan nga bakasyon sa bug-os nga kabuhi! (Salmo 84:10)”

Ang Pebrero 28, 1998, amo ang ika-65 nga anibersaryo sang sugo anay ni Hitler nga nagresulta sa pagdumili sa mga Saksi ni Jehova sa Alemanya. Gingamit sang mga Saksi sa Pransia yadto nga petsa agod ipasalida sa publiko sa gin-arkilahan nga mga tilipunan ang video nga Jehovah’s Witnesses Stand Firm Against Nazi Assault, nga nagasaysay sang paghingabot sa katawhan ni Jehova. Kapin sa pito ka milyon nga imbitasyon ang ginpanagtag. Ang mga istoryador kag mga priso anay sa kampo konsentrasyon naghatag sing makatalandog nga mga pamatuod. Sa Paris, halos 5,000 ang nagtambong, lakip ang tumalagsahon nga kadamuon sang mga indi Saksi.

Ginaapresyar gid sang madamo sa Paris ang espirituwal nga kapawa, kag nalipay sila nga ang mga manugbantala sang Ginharian nagasiga sing masanag subong mga sulo. Suno ini sa ginsiling ni Jesus: “Ang alanyon bugana, apang pila lamang ang mga mamumugon.” (Mateo 9:37) Bangod sang determinado nga espiritu sang mga Saksi ni Jehova sa paglandas sa mga hangkat sa pagbantala sa sini nga siudad, nangin isa ka Siudad sang Kapawa ang Paris sa isa ka pinasahi nga kahulugan, sa kadayawan ni Jehova.

[Retrato sa pahina 9]

City Hall

[Retrato sa pahina 9]

Opera Garnier

[Retrato sa pahina 9]

Louvre Museum

[Retrato sa pahina 10]

Pagpaambit sang mensahe sang Biblia sa masako nga mga tawo diin man sila makita