“Ano ang Nagakatabo sa Pransia?”

“Kahilwayan, hinigugma nga kahilwayan,” amo ang mga pulong gikan sa “La Marseillaise,” ang pungsudnon nga ambahanon sang Pransia. Sa pagkamatuod, dapat gid pakabahandion ang kahilwayan. Apang, ang mga hitabo sining karon lang sa Pransia nangin kabangdanan sang kabalaka nga ginapaluya ang sadsaran nga mga kahilwayan. Amo sini kon ngaa, sang Biernes, Nobiembre 3, 2000, linibo ka Saksi ni Jehova ang nagpanagtag sang kabug-usan nga 12 milyones ka kopya sang pinasahi nga tract nga gintig-uluhan “Ano ang Nagakatabo sa Pransia? Magausmod Ayhan ang Kahilwayan?”

PILA ka tuig na nga ginaatake sang mga nagkalainlain nga mga politiko kag batok-sa-sekta nga mga grupo ang mga Saksi ni Jehova sa Pransia. Nangin kabudlayan ini sa mga Saksi sa indibiduwal, kongregasyonal, kag nasyonal nga kahimtangan. Apang sang Hunyo 23, 2000, ang Conseil d’État, ang pinakamataas nga administratibo nga hukmanan sang Pransia, naghimo sing isa ka talalupangdon nga desisyon sa pagkompirma sang nagdaug nga opinyon sang 31 ka naidalom nga hukmanan sa kapin sa 1,100 ka kaso. Ginkompirma sang mataas nga hukmanan nga ang pagsimba sang mga Saksi ni Jehova bug-os nga nahisanto sa kasuguan sang Pransia kag ang ila mga Kingdom Hall nagakabagay sang kahilwayan sa buhis kaangay sang ginapatungod sa iban nga mga relihion.

Apang, subong bug-os nga pagsikway sa sina nga desisyon, ang French Ministry of Finance padayon nga nagdumili sa mga Saksi ni Jehova sang kahilwayan sa buhis nga gin-aman sang kasuguan para sa relihioso nga mga organisasyon. Ginpadapat sang Ministry ang 60-porsiento nga buhis sa mga kontribusyon nga ginahatag sang mga Saksi kag mga abyan nga nagapakig-angot sa 1,500 ka lokal nga kongregasyon sa Pransia. Ginahusay pa ini nga kaso karon.

Ang tulumuron sang nasambit nga kampanya amo ang pagbuyagyag sa sining pagsumpakilay  kag ang pagpatalupangod sa mga katalagman nga posible bangod sang napasad lamang sa kaugalingon nga pagpadapat sang buhis kag sa ginpanugda nga mga layi nga magapaluya sa relihioso nga kahilwayan sang tanan.⁠ *

Isa ka Malawig nga Adlaw

Alas dos sang kaagahon sang ginsugdan sang mga Saksi sa pila ka kongregasyon ang pagpanagtag sa guwa sang mga estasyunan sang tren kag sa mga pabrika kag nian sa mga erport. Pag-alas seis, nagbugtaw na ang Paris. Nagpuwesto ang mga 6,000 ka boluntaryo sa maayo nga mga lokasyon agod sugataon ang mga nagabiyahe pakadto sa ila ulubrahan. Ang isa ka pamatan-on nga babayi nagkomento: “Dalayawon ang inyo ginahimo para sa relihioso nga kahilwayan. Indi lamang mga Saksi ni Jehova ang nadalahig.” Sa Marseilles, kapin sa 350 ka Saksi ang nagpanagtag sang tract sa mga metro station kag sa mga dalan. Wala pa maorasi, ginbalita na sa mga radyo ang kampanya, nagapahibalo sa mga tagpalamati nga indi sila dapat makibot kon palapitan sila sang mga Saksi ni Jehova. Sa Strasbourg, diin nahamtang ang European Court of Human Rights, ang mga nagalakbay sa sentral nga estasyunan nagalinya pa agod makatigayon sing kopya. Nagkomento ang isa ka abogado nga, bisan indi sia Saksi, interesado sia sa amon kaso, kay ang amon paghimud-os importante kag makatarunganon.

Sang alas otso, bisan nagabundak ang ulan, 507 ka Saksi sa siudad sang Grenoble sa Alps ang nagpamalaybalay ukon nagpamutang sing mga tract sa mga bulutangan sing sulat. Sang nakita sang mga drayber sang awto kag trak nga may pinasahi nga nagakatabo, nagdululog sila kag nangayo sing tract. Sa nakatundan nga siudad sang Poitiers, ang mga nagalakbay sa tren nga nag-abot sang alas nuebe nakabaton na sing tract didto pa sa ila duog nga ginhalinan. Sa Mulhouse, malapit sa dulunan sang Alemanya, 40,000 ka kopya na ang napanagtag.

Sang alas dies, madamo na nga kongregasyon ang nakapanagtag sing kapin sa katunga sang ila mga tract. Sina nga aga, diutay lamang ang wala nagbaton, kag nagresulta ini sa pila ka maayo nga pagsugilanunay. Sa Besançon, mga kapin sa 80 kilometros gikan sa dulunan sang Switzerland, isa ka pamatan-on nga lalaki ang nagpakita sing interes sa Biblia kag namangkot kon ngaa ginatugutan sang Dios ang pag-antos. Gin-agda sia sang Saksi nga padayunon ang ila pagsugilanunay sa malapit nga Kingdom Hall, diin gilayon nga ginsugdan ang pagtuon sing Biblia sa brosyur nga Ano ang Ginapatuman Sang Dios sa Aton?

Sang udtong adlaw, madamo nga Saksi ang wala na nagpahuway sa tion sang tigpalanyaga agod magbantala sing isa ukon duha ka oras. Nagpadayon ang pagpanagtag sa bug-os nga hapon, kag madamo nga kongregasyon ang nakatapos sa alas tres ukon alas kuatro sina nga hapon. Sa siudad sang Reims, ang pila ka tawo nga nakatuon ukon nakapakig-upod sa mga Saksi ni Jehova sang una nagpahayag sang ila handum nga makig-angot liwat sa kongregasyon. Sa Bordeaux tatlo ka pagtuon sa Biblia ang nasugdan. Sa amo gihapon nga siudad, ang isa ka Saksi nga nagsulod sa isa ka balaligyaan agod magbakal sing periodiko nakatalupangod sang nagatumpok nga mga tract sa estante. Ang tag-iya sang balaligyaan, nga isa anay ka Saksi, nakabaton sing tract kag nakita niya nga importante ini, sa amo ginkopya niya ini sing madamo agod ipanagtag.

Sa Le Havre, Normandy, natublag gid ang isa ka Protestante nga babayi sang nabatian niya sa radyo nga ginapangayuan sing buhis ang mga kontribusyon sang mga Saksi ni Jehova. Malangkagon niya  nga ginbaton ang tract kag gindayaw ang mga Saksi sa ila maisugon nga pagpahayag batok sa sini nga inhustisya. Sa alas 7:20 s.g., ang balita sa telebisyon sa rehiyon sang Lyons nagkomento tuhoy sa pagpanagtag, nga nagasiling: “Kaina sang aga, mas mahapos pa maglikaw sa tulo sang ulan sangsa maglikaw sa mga tract sang mga Saksi ni Jehova.” Duha ka Saksi ang gin-interbyu kag ginpaathag nila ang mga rason sang kampanya.

Ang mga Saksi nga luyag makigbahin pagkatapos sang ila sekular nga trabaho nagpanagtag sing pila ka tract sa mga nagabiyahe pauli kag nagbutang sang iban sini sa mga bulutangan sing sulat. Sa mga banwa sang Brest kag Limoges​​—⁠nga bantog sa porselana sini⁠​—⁠ang mga tawo nga nagguwa sa mga sinehan sang alas 11:00 s.g. amo ang pinakaulihi nga nakabaton sing tract sa amo nga adlaw. Ang nabilin nga mga tract ginpanipon kag ginpanagtag sa masunod nga adlaw.

Mga Resulta

Ang isa ka Saksi nagsulat: “Abi sang amon mga kaaway napaluya nila kami. Sa katunayan, tuhay ang nagakatabo.” Sa kalabanan nga mga kongregasyon, kapin sa 75 porsiento sang mga Saksi ang nakapakigbahin sa amo nga adlaw, ang pila naghinguyang sang 10, 12, ukon 14 ka oras sa sini nga hilikuton. Sa Hem, nga naaminhan sang Pransia, isa ka Saksi nga panggab-i ang trabaho ang nagpanagtag sing tract halin sang alas singko sang kaagahon tubtob sa alas tres sang hapon. Sa malapit nga Denain, diin may kongregasyon kutob pa sang 1906, naghinguyang sing 200 ka oras ang 75 ka Saksi sa pagpanagtag sing tract sang Biernes. Ang iban determinado man nga nakigbahin bisan tigulang na, may kasablagan, kag malain pa ang tiempo. Halimbawa, sa Le Mans, tatlo ka 80 anyos ang naghinguyang sing duha ka oras sa pagbutang sing mga tract sa mga bulutangan sing sulat, kag isa ka Saksi nga naga-wheelchair ang nagpanagtag sing tract sa atubangan sang estasyunan sang tren. Kag daw ano ka makapalig-on nga makita ang madamong di-aktibo anay nga mga Saksi nga nakigbahin sa sining pinasahi nga hilikuton!

Sa pagkamatuod, ini nga pagpanagtag nagresulta sa daku nga pagpanaksi. Ang tanan nga sahi sang tawo, nga ang kalabanan malaka gid lang masalapuan sa ila mga puluy-an, nakatigayon sing kopya sang tract. Madamo nga indibiduwal ang nagbatyag nga indi lamang para sa kaayuhan sang mga Saksi ang nahimo sini nga hilikuton. Madamo ang nagtamod sini subong isa ka pagpangapin sa kahilwayan sang konsiensia kag pagsimba para sa tanan nga Pranses. Bilang pamatuod sini, nangabay ang mga tawo sing dugang pa nga kopya sini nga tract para ihatag sa ila mga abyan, katrabaho, ukon paryente.

Huo, ginapabugal sang mga Saksi ni Jehova sa Pransia ang pagpakilala sa ngalan ni Jehova kag ang pag-amlig sa mga intereses sang Ginharian. (1 Pedro 3:15) Ginalauman gid nila nga “makapadayon [sila] sa pagkabuhi sing matawhay kag malinong nga kabuhi nga may bug-os nga diosnon nga debosyon kag pagkaserioso” kag linibo pa ang magaupod sa ila sa pagdayaw sa ila langitnon nga Amay, si Jehova.​​—⁠1 Timoteo 2:2.

[Nota]