Mangin Mapinasalamaton kag Mangin Malipayon

“ANG pagpasalamat isa ka kinaandan nga balatyagon sang tawo,” siling sang Calgary Herald, isa ka pamantalaan sa Canada. Ginkutlo sang Herald ang pila ka nuebe-anyos nga mga estudyante sa elementarya nga ginpangabay sang ila manunudlo sa pagsulat nahanungod sa tanan nga butang nga ila pasalamatan. Ang isa ka pamatan-on nagsiling nga iya ginapasalamatan ang iya pamilya ‘bangod gintatap gid nila sia.’ Ang isa ka bata nga babayi nagpasalamat man sa iya pamilya, nga nagasiling: “Ginbantayan nila ako, ginpapagros, gintatap ako, ginpalangga ako, ginpakaon ako, kag kon indi bangod sa akon mga ginikanan, wala ako sa sini nga kalibutan.”

Ang pagkadimapinasalamaton nagadul-ong sa dalayon nga pagkadikontento. Suno sa isa ka pilosopo-teologo nga si J. I. Packer, “gintuga kita sa pagkabuhi nga nagasandig sa Dios kag nagasandig sa isa kag isa.” Ginapahanumdom sini sa aton ang maalamon nga laygay sang Biblia sang nagligad nga mga siglo, nga nagasiling: “Ipakita ang inyo kaugalingon nga mapinasalamaton.” (Colosas 3:15) Ang mga pagpabutyag sang pagkamapinasalamaton kag tinagipusuon nga pagpasalamat sa iban makabulig agod mapalambo ang mahigugmaon nga mga kaangtanan.

Dugang pa, paagi sa pagpakita sing pagpasalamat kag pagpabalor sa tagsatagsa, nagapakita man kita sing pagpasalamat kay Jehova, kag makita niya ini. Ang Biblia nagsiling: “Ang iya [ni Jehova] mga mata nagapanuloktulok sa bug-os nga duta agod ipakita ang iya kusog tungod sa ila nga ang tagipusuon himpit ayon sa iya.” (2 Cronica 16:⁠9) Ginapasalig kita sang Dios nga ginadumdom kag ginapabaloran niya ang gugma nga ginapakita sang mga tawo sa iya ngalan. (Hebreo 6:10) Huo, may maayo gid kita nga rason sa pagpakita sing pagkamapinasalamaton bangod ining diosnon nga kinaiya, kon ipabutyag adlaw-adlaw, nagapahamuot kay Jehova kag nagadugang sang aton kalipay. Subong ini sa ginasiling sang Hulubaton 15:13: “Ang malipayon nga tagipusuon may maayo nga epekto sa pangguyahon.”