Ang Pagpakamaayo ni Jehova Nagapamanggad sa Aton

“Ang pagpakamaayo ni Jehova​—⁠amo ina ang nagapamanggad, kag wala sia nagadugang sing kasakit sa sini.”​—⁠HULUBATON 10:22.

1, 2. Ngaa ang kalipay wala naangot sa materyal nga manggad?

ANG kabuhi sang minilyon kontrolado karon sang materyalistiko nga mga paghimud-os. Apang napahalipay bala sila sang materyal nga mga butang? “Suno sa madumduman ko, mas masinulub-on karon ang mga tawo sangsa nagligad,” siling sang The Australian Women’s Weekly. Ini nagadugang: “Isa ini ka saligmato. Ginsilingan kami nga ang Australia yara sa maayo gid nga kahimtangan sa pangabuhi, nga ang kabuhi maayo gid. . . . Apang, ang pagkadimalaumon lapnag sa bug-os nga pungsod. Ang mga kalalakin-an kag mga kababayin-an nakamutik nga may kulang sa ila kabuhi apang indi nila mahibaluan kon ano ini.” Matuod gid ang ginapakita sang Kasulatan nga ang mga butang nga aton ginapanag-iyahan wala nagadul-ong sa kalipay ukon kabuhi!​—⁠Manugwali 5:10; Lucas 12:15.

² Ang Biblia nagatudlo nga ang labing daku nga kalipay nagahalin sa pagpakamaayo sang Dios. May kaangtanan sini, ang Hulubaton 10:22 nagasiling: “Ang pagpakamaayo ni Jehova​—⁠amo ina ang nagapamanggad, kag wala sia nagadugang sing kasakit sa sini.” Ang kasakit masunson nga nagaresulta gikan sa makagod nga pagtigayon sing materyal nga manggad. Sing nagakaigo, si apostol Pablo nagpaandam: “Ang mga determinado nga magmanggaranon nagakahulog sa pagsulay kag sa siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan. Kay ang  gugma sa kuwarta amo ang gamot sang tanan makahalalit nga mga butang, kag paagi sa paghingamo sini nga gugma ang iban nagtalang gikan sa pagtuo kag nagsuntok sang ila mga kaugalingon sing madamong kasakitan.”​—⁠1 Timoteo 6:​9, 10.

3. Ngaa ang mga alagad sang Dios nakaeksperiensia sing mga pagtilaw?

³ Sa pihak nga bahin, ang walay kasakit nga mga pagpakamaayo nagalambot sa tanan nga ‘padayon nga nagapamati sa tingog ni Jehova.’ (Deuteronomio 28:2) Apang, ang iban mahimo mamangkot, ‘Kon wala sing kasakit nga ginadugang sa pagpakamaayo ni Jehova, ngaa madamo sang mga alagad sang Dios ang nagaantos?’ Ang Biblia nagasugid nga ang aton mga pagtilaw ginatugot sang Dios apang sa pagkamatuod naghalin ini kay Satanas, sa iya malauton nga sistema, kag sa aton dihimpit nga kinaugali. (Genesis 6:⁠5; Deuteronomio 32:​4, 5; Juan 15:19; Santiago 1:​14, 15) Si Jehova amo ang tuburan sang “tagsa ka maayong dulot kag tagsa ka himpit nga regalo.” (Santiago 1:17) Gani, ang iya mga pagpakamaayo wala gid ginabangdan sang kasakit. Busa, binagbinagon naton ang pila sang himpit nga mga regalo sang Dios.

Ang Pulong Sang Dios—Isa ka Hamili nga Dulot

4. Anong pagpakamaayo kag hamili nga dulot ang ginaagom sang katawhan ni Jehova sa sining “tion sang katapusan”?

⁴ Tuhoy sa “tion sang katapusan,” ang tagna ni Daniel nagasiling: “Ang matuod nga ihibalo magabugana.” Apang, ginalatiran ini sang mga tinaga: “Wala sing malaut nga makahangop; apang ang mga mahinantupon makahangop.” (Daniel 12:​4, 10) Handurawa ini! Ang Pulong sang Dios​—⁠ilabi na ang tagna​—⁠ginapabutyag upod sining balaan nga kaalam amo nga indi gid ini mahangpan sang mga malauton, bisan pa nga mahangpan ini sang katawhan ni Jehova. “Dayag ko ikaw nga ginadayaw, Amay, Ginuo sang langit kag duta,” pangamuyo sang Anak sang Dios, “bangod gintago mo sing mahalungon ini nga mga butang gikan sa mga maalam kag mga utukan, kag ginpahayag ini sa mga bata.” (Lucas 10:21) Daw ano gid nga pagpakamaayo nga matigayon ang hamili nga dulot sang nasulat nga Pulong sang Dios, ang Biblia, kag malakip sa mga ginhatagan ni Jehova sing espirituwal nga paghangop!​—⁠1 Corinto 1:​21, 27, 28; 2:​14, 15.

5. Ano ang kaalam, kag paano naton ini matigayon?

⁵ Kuntani wala gid kita sing espirituwal nga paghangop kon wala kita makabaton sing “kaalam nga gikan sa hitaas.” (Santiago 3:17) Ang kaalam amo ang ikasarang sa paggamit sing ihibalo kag paghangop sa paglubad sang mga problema, paglikaw ukon pagtapna sa mga katalagman, pagtigayon sang mga tulumuron, ukon paghatag sing husto nga laygay. Paano naton matigayon ang diosnon nga kaalam? Ang Hulubaton 2:6 nagasiling: “Si Jehova nagahatag sing kaalam; gikan sa iya baba nagaguwa ang ihibalo kag paghantop.” Huo, si Jehova magahatag sa aton sing kaalam kon padayon naton ini nga ipangamuyo, subong nga ginhatagan niya si Hari Solomon sing “maalamon kag mahinangpunon nga tagipusuon.” (1 Hari 3:​11, 12; Santiago 1:5-8) Agod matigayon ang kaalam, dapat man kita padayon nga magpamati kay Jehova paagi sa tayuyon nga pagtuon kag pag-aplikar sang iya Pulong.

6. Ngaa dalanon sang kaalam nga iaplikar ang mga kasuguan kag mga prinsipio sang Dios sa aton kabuhi?

⁶ Ang panguna nga mga halimbawa sang diosnon nga kaalam masapwan sa mga kasuguan kag mga prinsipio sang Biblia. Nagabulig ini sa aton sa tanan nga paagi​—⁠sa pisikal, mental, emosyonal, kag espirituwal. Ang salmista nagakaigo nga nag-amba: “Ang kasuguan ni Jehova himpit, nga nagapahauli sang kalag. Ang pahanumdom ni Jehova  masaligan, nga nagapaalam sa isa nga indi eksperiensiado. Ang mga sugo gikan kay Jehova matadlong, nga nagapasadya sang tagipusuon; ang kasuguan ni Jehova matinlo, nga nagapasanag sang mga mata. Ang kahadlok kay Jehova putli, nga nagapabilin sa walay katubtuban. Ang mga paghukom ni Jehova matuod; ini tanan matarong sing bug-os. Halandumon sila sing labi pa sa bulawan, huo, sangsa madamo pa nga bulawan nga bus-og.”​—⁠Salmo 19:7-10; 119:72.

7. Ano ang resulta sang indi pagsapak sa matarong nga mga talaksan sang Dios?

⁷ Sa pihak nga bahin, ang mga wala nagasapak sang matarong nga mga talaksan sang Dios wala makasapo sing kalipay kag kahilwayan nga ginapangita nila. Sa ulihi, matukiban nila nga ang Dios indi tiliawtiawan, kay anihon sang tawo kon ano ang iya ginasab-ug. (Galacia 6:7) Ang minilyon nga wala nagasapak sang mga prinsipio sang Biblia nagaani sang masubo nga mga resulta subong sang pagmabdos batok sa kabubut-on, makangilil-ad nga mga balatian, ukon makapaluya nga mga pagkagiyan. Kon indi sila mahinulsulon nga magbag-o sang ila dalanon sang kabuhi, ang ila banas magadul-ong sa ila sa ulihi sa kamatayon kag ayhan sa kalaglagan sa kamot sang Dios.​—⁠Mateo 7:​13, 14.

8. Ngaa ang mga nagahigugma sang Pulong sang Dios malipayon?

⁸ Apang, ang bugana nga mga pagpakamaayo magalambot karon kag sa palaabuton sa mga nagahigugma sang Pulong sang Dios kag nagaaplikar sini. May rason sila sa pagbatyag nga ginhilway sang kasuguan sang Dios, nga mangin tunay nga malipayon, kag malangkagon nga magahulat sang tion nga mahilway sila gikan sa sala kag sa makamamatay nga mga epekto sini. (Roma 8:​20, 21; Santiago 1:25) Ini nga paglaum sigurado bangod nasandig ini sa labing mahigugmaon nga dulot sang Dios sa katawhan​—⁠ang halad nga gawad sang iya bugtong nga Anak, si Jesucristo. (Mateo 20:28; Juan 3:16; Roma 6:23) Ining labaw gid kaayo nga dulot nagapamatuod kon daw ano gid ka tudok ang gugma sang Dios sa katawhan kag nagagarantiya sang walay katapusan nga mga pagpakamaayo sa tanan nga padayon nga nagapamati kay Jehova.​—⁠Roma 8:32.

Nagapasalamat sa Dulot nga Balaan nga Espiritu

9, 10. Paano kita makabenepisyo gikan sa dulot ni Jehova nga balaan nga espiritu? Maghatag sing halimbawa.

⁹ Ang isa pa ka mahigugmaon nga dulot sang Dios nga dapat naton pasalamatan amo ang iya balaan nga espiritu. Sang adlaw sang Pentecostes 33 C.⁠E., ginlaygayan ni apostol Pedro ang kadam-an nga nagtambong sa Jerusalem: “Hinulsol kamo, kag magpabawtismo ang tagsatagsa sa inyo sa ngalan ni Jesucristo para sa kapatawaran sang inyo mga sala, kag mabaton ninyo ang walay bayad nga dulot sang balaan nga espiritu.” (Binuhatan 2:38) Karon, si Jehova nagahatag sang balaan nga espiritu sa iya dedikado nga mga alagad nga nagapangamuyo para sa sini kag maluyag sa paghimo sang iya kabubut-on. (Lucas 11:9-13) Sadto anay, ining labing mabaskog nga puwersa sa uniberso​—⁠ang balaan nga espiritu, ukon aktibo nga puwersa, sang Dios​—⁠naghatag sing gahom sa mga kalalakin-an kag mga kababayin-an nga may pagtuo, pati na sa unang mga Cristiano. (Zacarias 4:⁠6; Binuhatan 4:31) Amo man ang mahimo sini sa aton, bisan pa nagaatubang kita sing makapaluya nga mga balagbag ukon mga hangkat subong katawhan ni Jehova.​—⁠Joel 2:​28, 29.

¹⁰ Binagbinaga ang halimbawa ni Laurel, nga nagmasakit sing polio kag nabuhi sa iron lung sa sulod sang 37 ka tuig.⁠ * Walay sapayan sang iya tuman gid kabudlay nga kahimtangan, nag-alagad sia sing makugi sa Dios tubtob sa iya kamatayon. Sa sulod sang mga tinuig, ang bugana nga pagpakamaayo ni Jehova naglambot kay Laurel. Halimbawa, nabuligan niya ang 17 ka indibiduwal nga makakuha sing sibu nga ihibalo sang kamatuoran sang Biblia, bisan pa yara sia sa iya aparato sa sulod sang 24 ka oras sa isa ka adlaw! Ang iya kahimtangan nagapahanumdom sa ginsiling ni apostol Pablo: “Kon maluya ako, nian gamhanan ako.” (2 Corinto 12:10) Huo, ang bisan ano man nga kadalag-an  naton sa pagbantala sing maayong balita nagahalin, indi sa aton kaugalingon nga ikasarang kag gahom, kundi sa bulig sang Dios paagi sa balaan nga espiritu, nga ginahatag niya sa mga padayon nga nagapamati sa iya tingog.​—⁠Isaias 40:29-31.

11. Ano nga mga kinaiya ang ginapatubas sang espiritu sang Dios sa mga nagasul-ob sang “bag-o nga personalidad”?

¹¹ Kon kita matinumanon nga nagapamati sa Dios, ang iya espiritu magapatubas sa aton sang mga kinaiya nga gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, kag pagpugong sa kaugalingon. (Galacia 5:​22, 23) Ini nga “bunga sang espiritu” bahin sang “bag-o nga personalidad” nga ginasul-ob sang mga Cristiano bilang tal-us sa mahamkunon kag sapatsapaton nga mga kinaiya nga mahimo ginpakita nila anay. (Efeso 4:20-24; Isaias 11:6-9) Ang pinakaimportante sa sini nga bunga amo ang gugma, “ang himpit nga higot sang paghiusa.”​—⁠Colosas 3:14.

Cristianong Gugma​—⁠Ang Dulot nga Dapat Pakabahandion

12. Paano ginpakita ni Tabita kag sang iban pa nga unang-siglo nga mga Cristiano ang gugma?

¹² Ang Cristianong gugma isa pa ka ginpakamaayo nga dulot gikan kay Jehova​—⁠isa nga nagakaigo gid nga pakabahandion naton. Ginagamhan ini sang prinsipio, apang bugana gid ini sa pagpalangga amo nga ginapasuod sini sing labi ang mga tumuluo sangsa mahimo sang undanon nga mga relasyon. (Juan 15:​12, 13; 1 Pedro 1:22) Halimbawa, binagbinaga si Tabita, ang isa ka maayo nga Cristianong babayi sang unang siglo. “Bugana sia sa maayo nga mga buhat kag mga dulot sang kaluoy,” ilabi na sa mga balo nga babayi sa kongregasyon. (Binuhatan 9:36) Ining mga kababayin-an mahimo may undanon nga mga himata, apang luyag ni Tabita nga himuon ang masarangan niya agod buligan kag palig-unon sila. (1 Juan 3:18) Daw ano gid kaayo nga halimbawa ang ginpahamtang ni Tabita! Ang utudnon nga gugma nagpahulag kanday Prisca kag Aquila nga ‘ibutang sa katalagman ang ila liog’ tungod kay Pablo. Ang gugma amo man ang nagpahulag kanday Epafras, Lucas, Onesiforo, kag iban pa nga buligan ang apostol samtang nabilanggo sia sa Roma. (Roma 16:​3, 4; 2 Timoteo 1:16; 4:11; Filemon 23, 24) Huo, ang amo sini nga sahi sang mga Cristiano karon ‘nagahigugmaanay,’ isa ka ginpakamaayo nga dulot gikan sa Dios nga nagapakilala sa ila subong matuod nga mga disipulo ni Jesus.​—⁠Juan 13:​34, 35.

13. Paano naton mapakita nga ginaapresyar gid naton ang aton Cristianong paghiliutod?

¹³ Ginapakabahandi mo bala ang gugma nga ginapadayag  sa Cristianong kongregasyon? Nagapasalamat ka bala sa espirituwal nga paghiliutod, nga nagasangkad sa bug-os nga kalibutan? Ini man mga dulot gikan kay Jehova nga nagapahalipay kag nagapamanggad sa aton. Paano naton mapakita nga ginapabaloran naton ini? Paagi sa paghimo sing sagrado nga pag-alagad sa Dios, paagi sa pagpakigbahin sa Cristianong mga miting, kag paagi sa pagpakita sing gugma kag sing iban pa nga mga bunga sang espiritu sang Dios.​—⁠Filipos 1:⁠9; Hebreo 10:​24, 25.

“Mga Dulot nga mga Lalaki”

14. Ano ang ginapatuman sa isa ka Cristiano agod makaalagad sia subong gulang ukon ministeryal nga alagad?

¹⁴ Ang Cristianong mga lalaki nga nagahandum sa pag-alagad sa ila mga masigkatumuluo subong mga gulang ukon mga ministeryal nga alagad may maayo nga tulumuron. (1 Timoteo 3:​1, 8) Agod mangin kalipikado sa sining mga pribilehiyo, ang isa ka utod nga lalaki dapat nga isa ka espirituwal nga tawo, sampaton sa Kasulatan kag makugi sa ministeryo sa latagon. (Binuhatan 18:24; 1 Timoteo 4:15; 2 Timoteo 4:5) Dapat sia magpakita sing pagkamapainubuson, pagkaugdang, kag pagpailob, kay ang mga pagpakamaayo sang Dios wala nagalambot sa mga tawo nga matinaastaason, bugalon, kag ambisyuso. (Hulubaton 11:⁠2; Hebreo 6:15; 3 Juan 9, 10) Kon minyo, dapat nga isa sia ka mahigugmaon nga ulo sang pamilya nga makasarang sa pagdumala sing maayo sang iya bug-os nga panimalay. (1 Timoteo 3:​4, 5, 12) Bangod ginapabaloran niya ang espirituwal nga mga manggad, ang subong sini nga tawo magabaton sang pagpakamaayo ni Jehova.​—⁠Mateo 6:19-21.

15, 16. Sin-o ang napamatud-an nga “mga dulot nga mga lalaki”? Maghatag sing mga halimbawa.

¹⁵ Kon ang nagaalagad nga mga gulang sa kongregasyon nagapanikasog subong mga ebanghelisador, mga manugbantay, kag mga manunudlo, nagahatag sila sa aton sing maayong mga rason agod pabaloran sing daku ining “dulot nga mga lalaki.” (Efeso 4:​8, 11) Ang mga nakabenepisyo gikan sa ila mahigugmaon nga pag-alagad mahimo nga indi pirme magpabutyag sang ila apresasyon, apang makita ni Jehova ang tanan nga ginahimo sining matutom nga mga gulang. Indi niya pagkalimtan ang gugma nga ginapakita nila para sa iya ngalan paagi sa pag-alagad sa iya katawhan.​—⁠1 Timoteo 5:17; Hebreo 6:10.

¹⁶ Binagbinaga ang halimbawa sang isa ka mapisan nga gulang nga nagduaw sa isa ka Cristianong bata nga babayi nga buot operahan sa utok. “Mainayuhon, masinakdagon, kag mainulikdon gid sia,” sulat sang isa ka abyan sang pamilya. “Nangayo sia sing pahanugot nga mangamuyo kay Jehova upod sa amon. Samtang nagapangamuyo sia, ang amay [nga indi isa sang mga Saksi ni Jehova] naghibubun-ot, kag nagtulo ang mga luha sa mga mata sang tanan sa hulot sang ospital. Daw ano gid ka mapinalanggaon ang pangamuyo sang gulang, kag daw ano gid ka mahigugmaon si Jehova sa pagpadala sa iya sa subong sini nga tion!” Ang isa pa ka pasyente nga Saksi nagsiling tuhoy sa mga gulang nga nagduaw sa iya: “Sang nagpalapit sila sa akon katre sa intensive care unit, nahibaluan ko nga bisan ano man ang matabo sugod sadto, masarangan ko ini. Nagbaskog ako kag nakatigayon sing kalinungan.” Mahimo bala mabakal sang bisan sin-o ining mahigugmaon nga kabalaka? Indi gid! Isa ini ka dulot gikan sa Dios, nga matigayon paagi sa Cristianong kongregasyon.​—⁠Isaias 32:​1, 2.

 Ang Dulot nga Pag-alagad sa Latagon

17, 18. (a) Ano nga dulot sang pag-alagad ang ginahatag ni Jehova sa tanan niya nga katawhan? (b) Ano nga bulig ang gin-aman sang Dios agod matuman naton ang aton ministeryo?

¹⁷ Ang pag-alagad kay Jehova, ang Labing Mataas, amo ang pinakadaku nga kadungganan nga mahatag kay bisan sin-o. (Isaias 43:10; 2 Corinto 4:⁠7; 1 Pedro 2:9) Walay sapayan sina, ang pribilehiyo nga makapakigbahin sa pag-alagad sing dayag bukas sa tanan​—⁠bata kag tigulang, lalaki kag babayi​—⁠nga may hanuot gid nga handum sa pag-alagad sa Dios. Ginagamit mo bala ining hamili nga dulot? Ang iban mahimo magpangalag-ag bangod nagabatyag sila nga indi sangkol, apang dumduma nga ginahatag ni Jehova ang balaan nga espiritu sa mga nagaalagad sa iya, kag ginapun-an sini ang bisan ano nga kakulangan naton.​—⁠Jeremias 1:6-8; 20:11.

¹⁸ Gintulin ni Jehova ang hilikuton nga pagbantala sing Ginharian sa iya mapainubuson nga mga alagad, indi sa mga indibiduwal nga may huyog nga mangin bugalon kag magsalig sa ila kaugalingon nga mga ikasarang. (1 Corinto 1:​20, 26-29) Ang mapainubuson kag maugdang nga mga tawo nagabaton sang ila mga limitasyon kag nagasandig sa bulig sang Dios samtang nagapakigbahin sila sa pag-alagad sa latagon. Ginaapresyar man nila ang espirituwal nga bulig nga ginaaman niya paagi sa “matutom nga tulugyanan.”​—⁠Lucas 12:42-44; Hulubaton 22:4.

Malipayon nga Pagkabuhi Sang Pamilya —⁠Isa ka Maayo nga Dulot

19. Ano nga mga butang ang nagadul-ong sa kadalag-an sa pagpadaku sa mga kabataan?

¹⁹ Ang pag-asawahay kag ang malipayon nga pagkabuhi sang pamilya mga dulot gikan sa Dios. (Rut 1:⁠9; Efeso 3:​14, 15) Ang mga kabataan man hamili nga “palanublion gikan kay Jehova,” nga nagahatag sing kalipay sa mga ginikanan nga madinalag-on nga nagpatudok sang diosnon nga mga kinaiya sa ila. (Salmo 127:3) Kon ikaw isa ka ginikanan, padayon nga magpamati sa tingog ni Jehova paagi sa paghanas sa imo mga kabataan suno sa iya Pulong. Ang mga nagahimo sini pat-od nga makaagom sang pagsakdag kag bugana nga pagpakamaayo ni Jehova.​—⁠Hulubaton 3:​5, 6; 22:⁠6; Efeso 6:1-4.

20. Ano ang makabulig sa mga ginikanan nga ang mga kabataan nagtalikod sa matuod nga pagsimba?

²⁰ Walay sapayan sang mahalungon nga mga panikasog sang diosnon nga mga ginikanan, ayhan ang pila sang ila mga kabataan magapamat-od sa pagtalikod sa matuod nga pagsimba sa pagdaku nila. (Genesis 26:​34, 35) Masakit gid ini sa mga ginikanan. (Hulubaton 17:​21, 25) Apang, sa baylo nga madulaan sing paglaum, makabulig para sa ila nga dumdumon ang ilustrasyon ni Jesus tuhoy sa buhaha nga anak. Bisan pa nagbiya sa puluy-an yadto nga anak kag naglakat sa balingag nga dalanon, nagpauli sia sang ulihi sa balay sang iya amay, nga nagbaton sa iya sing malipayon kag sing mahigugmaon. (Lucas 15:11-32) Ano man ang matabo, makasalig ang matutom nga Cristianong mga ginikanan sang paghangop ni Jehova, sang iya mahigugmaon nga pag-ulikid, kag sang iya dalayon nga pagsakdag.​—⁠Salmo 145:14.

21. Kay sin-o kita dapat mamati, kag ngaa?

²¹ Kon amo, pat-uron naton kon ano gid ang importante sa aton kabuhi. Ginahimud-usan gid bala naton ang materyal nga kabuganaan, nga mahimo maghatag sing kasakit sa aton kag sa aton pamilya? Ukon ginahimud-usan bala naton ang ‘maayong mga dulot kag himpit nga mga regalo’ gikan sa “Amay sang langitnon nga mga kapawa”? (Santiago 1:17) Luyag ni Satanas, ang “amay sang kabutigan,” nga himud-usan naton ang materyal nga manggad kag indi mabaton ang kalipay kag kabuhi. (Juan 8:44; Lucas 12:15) Apang, si Jehova nagaulikid gid sa aton kag luyag niya ang pinakamaayo para sa aton. (Isaias 48:​17, 18) Gani, nian, padayon kita nga magpamati sa aton mahigugmaon nga langitnon nga Amay kag pirme ‘magkalipay sing daku’ sa iya. (Salmo 37:4) Kon ginahimud-usan naton ini nga dalanon, ang hamili nga mga dulot kag bugana nga pagpakamaayo ni Jehova magapamanggad sa aton​—⁠kag ini wala sing bisan ano nga kasakit.

[Nota]

Madumduman Mo Bala?

• Diin masapwan ang labing daku nga kalipay?

• Ano ang pila sang mga dulot nga ginahatag ni Jehova sa iya katawhan?

• Ngaa ang pag-alagad sa latagon isa ka dulot?

• Ano ang mahimo sang mga ginikanan agod matigayon ang pagpakamaayo sang Dios samtang ginapadaku nila ang ila mga kabataan?

[Mga Pamangkot sa Pagtinuon]

[Retrato sa pahina 16]

Nagapakita ka bala sing apresasyon sa dulot sang Dios nga nasulat niya nga Pulong?

[Retrato sa pahina 17]

Walay sapayan sang mabudlay gid nga mga kahimtangan, si Laurel Nisbet nag-alagad sa Dios sing makugi

[Mga retrato sa pahina 18]

Kaangay ni Tabita, ang karon nga mga Cristiano nakilal-an tungod sa ila mga buhat sang gugma

[Retrato sa pahina 19]

Ang Cristianong mga gulang may mahigugmaon nga pag-ulikid sa mga masigkatumuluo