Ginagamit Nila ang Ngalan sang Dios sa Sentral Aprika

ANG kalabanan nga mga tawo sa Sentral Aprika nagapati sa Dios. Wala sila nagaduhaduha nga Manunuga sia sang tanan nga butang. (Bugna 4:11) Apang, kaangay sang madamo nga tawo bisan diin, masami nga ginasikway nila ang iya personal nga ngalan​​—⁠Jehova.

Ang mga tawo sa Sentral Aprika, kag sa iban man nga bahin sang duta, nagapatuhoy sa ngalan sang Dios kon magsiling sila, “Pakabalaanon ang imo ngalan” sa Pangamuyo sang Ginuo. (Mateo 6:​9, King James Version) Apang sa malawig nga tion, diutay lamang ang nakakilala sini nga ngalan. Apang, sa sulod sang mga tinuig, bangod sang makugi nga pagbantala sang mga Saksi ni Jehova, nagbag-o ang panimuot sang mga tawo tuhoy sa paggamit sa ngalan sang Dios. Sa karon, ang ngalan sang Dios kilala na sing lapnag kag ginabaton sa madamo nga lenguahe sa Aprika, subong sang Zulu (uJehova), Yoruba (Jehofah), Xhosa (uYehova) kag Swahili (Yehova). Apang, ang kalabanan nga mga badbad sang Biblia sa sining mga lenguahe nagalikaw gihapon sa paggamit sa ngalan sang Dios.

Ang maayo nga badbad nga nagagamit sang ngalan sang Dios amo ang Biblia sa Zande, ang lenguahe nga ginahambal sa mga bahin sang Central African Republic, Sudan, kag Democratic Republic of Congo. Sa sini nga bahin sang kalibutan, ginagamit sang mga tawo ang ngalan sang Dios, kag ginatigbato ini nga Yekova sa ila tumandok nga hambal. Bisan paano man ginapresentar ang ngalan sang Dios sa isa ka tumandok nga hambal, importante nga gamiton ini. Ngaa? Bangod “ang tagsatagsa nga nagatawag sa ngalan ni Jehova maluwas.”​​—⁠Roma 10:⁠13.

[Mapa/Retrato sa pahina 32]

(Para sa aktual nga pormat, tan-awa ang publikasyon)

SUDAN

CENTRAL AFRICAN REPUBLIC

DEMOCRATIC REPUBLIC OF CONGO

[Credit Line]

The Complete Encyclopedia of Illustration/J. G. Heck