Magtindog sing Bug-os kag Magtuo sing Malig-on

Mga Kombension​​—⁠Makalilipay nga mga Pamatuod sang Aton Paghiliutod

ANG singkwenta-anyos nga si Joseph F. Rutherford, nga nagluya ang panglawas pagligad sang halos isa ka tuig nga pagkabilanggo sing di-makatarunganon, malipayon nga nagapangalagad subong bellhop. May kapasik nga ginabitbit niya ang mga maleta kag ginadul-ong ang mga masigka-Cristiano sa ila mga hulot sa otel. Ang duha sang iya mga kaupod anay sa bilangguan​​—⁠kaupod nga mga Estudyante Sang Biblia​​—⁠amo ang nagapang-asayn sing mga hulot sa daku nga kadam-an nga nagahulat sing mga dalayunan. Masako ang tanan tubtob magligad ang tungang-gab-i. Naglaton sa ila tanan ang espiritu sang kakunyag. Ano ang okasyon?

Ang tuig 1919, kag ang mga Estudyante Sang Biblia (nga kilala karon subong mga Saksi ni Jehova) nagapasag-uli gikan sa panahon sang mapintas nga paghingabot. Agod papagsikon liwat ang ila mga kaupod, magahiwat sila sing isa ka kombension sa Cedar Point, Ohio, E.⁠U.⁠A., sugod sa Septiembre 1 tubtob 8, 1919. Sang katapusan nga adlaw sang kombension, ang 7,000 ka nakunyag nga kadam-an madurop nga nagapamati samtang ginapalig-on ni Utod Rutherford ang tagsatagsa sang tanan nga kombensionista paagi sa mga pulong: “Kamo ang embahador sang Hari sang mga hari kag Ginuo sang mga ginuo, nga ginapahibalo sa mga tawo . . . ang mahimayaon nga ginharian sang aton Ginuo.”

Sa tunga sang katawhan ni Jehova, ang mga kombension nagsugod sang tion pa sang dumaan nga Israel. (Exodo 23:14-​17; Lucas 2:​41-​43) Makalilipay nga mga okasyon ini nga mga pagtilipon, kag nagabulig sa tanan nga nagatambong nga isentro ang ila panghunahuna sa Pulong sang Dios. Sing kaanggid, ang mga kombension sang mga Saksi ni Jehova sa modernong mga tion nasentro sa espirituwal nga mga intereses. Para sa sinsero nga mga nagapanilag, ining makalilipay nga mga pagtilipon nagahatag sing di-mapanghiwala nga ebidensia nga ang mga Saksi ginahiusa sang mabakod nga wagkos sang Cristianong paghiliutod.

Mga Panikasog sa Pagtambong

Narealisar sang modernong-adlaw nga mga Cristiano nga ang ila mga kombension mga tion sang pagpapagsik sa espirituwalidad kag pagtuon sa Pulong sang Dios. Ginakabig nila ining dalagku nga mga miting subong indi mapaiway nga paagi agod buligan sila sa ‘pagtindog sing bug-os kag may malig-on nga pagtuo sa bug-os nga kabubut-on sang Dios.’ (Colosas 4:12) Gani, bug-os tagipusuon nga ginasakdag sang mga Saksi ining mga pagtilipon, amo nga nagapanikasog gid sila nga makatambong sa sini.

Para sa iban, ang ila pagtambong sa sining mga kombension nagakinahanglan sing pagtuo kag paglandas sa tulad-bukid nga mga balagbag. Halimbawa, binagbinaga ang isa ka tigulang na nga Saksi sa Austria. Bisan pa may diabetes sia kag nagapaindyeksion sing insulin kada adlaw, ginpat-od gid niya nga matambungan ang tanan nga adlaw sang distrito nga kombension sa ila pungsod. Sa India, bangod sang daku nga kaimulon ginbatyag sang isa ka daku nga pamilya sang mga Saksi nga daw imposible gid nga makatambong sila sa isa ka kombension. Ang isa ka katapo sang pamilya nagtabang. “Bangod indi ko luyag nga mawasi namon ang okasyon,” siling niya, “ginbaligya ko ang akon bulawan nga aritos agod may gastuhon kami sa biyahe. Takus ini nga isakripisyo, kay ang pagpakig-upod sa mga utod kag ang amon mga naeksperiensiahan didto nagpabakod sang amon pagtuo.”

Sa Papua New Guinea, determinado gid ang isa ka grupo sang wala pa mabawtismuhan nga mga interesado nga magtambong sa isa ka distrito nga kombension sa kapital. Ginpalapitan nila ang isa ka tawo sa ila minuro nga may pangpubliko nga salakyan kag nagpamangkot kon pila ang isukot niya kon magpadul-ong sila sa kombension. Bangod indi nila masarangan ang bayad, nakigsugot sila sa tawo nga kay-uhon ang kusina sang iya balay. Gani nakakadto sila sa distrito nga kombension kag nakabenepisyo gikan sa pagtambong sa bug-os nga programa.

 Ang distansia indi isa ka di-malandas nga problema para sa mga Saksi ni Jehova nga desidido gid sa pagtambong sa mga kombension. Sang 1978, agod makatambong sa isa ka kombension sa Lille, Pransia, ginbisikleta sang isa ka lamharon nga delegado nga taga-Poland ang 1,200 kilometros nga kalayuon sa sulod sang anom ka adlaw. Sang tig-ilinit sang 1997, ang duha ka Saksi nga taga-Mongolia naglakbay sing 1,200 kilometros agod makatambong sa isa ka Cristianong pagtilipon sa Irkutsk, Rusya.

Ang Matuod nga Paghiliutod nga Nagapanghikot

Ang paghiusa kag paghiliutod sang mga Saksi sa ila mga kombension maathag nga makita sang walay ginadampigan nga mga tawo nga makakita sini. Madamo ang nagdayaw nga wala sing pagpasulabihay sa tunga sang mga kombensionista kag mainit ang pag-updanay bisan sang bag-o lang magkilalahay.

Sa tion sang isa ka internasyonal nga kombension sa Australia sining karon lang, luyag sang isa ka tour guide nga nag-upod sa nagaduaw nga mga delegado sa kombension sing isa ka semana nga padugaydugayan pa ang pag-upod sa ila bangod naluyagan niya ang pag-upod-upod sa ila. Nagdayaw sia sa ila gugma kag paghiusa, kag indi sia makapati nga nagasahuay sila, kay kalabanan sa ila mga dumuluong. Sang manuglakat na sia, ginpangabay niya ang ila igtalupangod. Ginatawag sila nga “mga utod,” ginsugdan niya ang pagpasalamat sa ila apang wala sia makatapos, bangod daw mahibi na sia kag naghibi sia matuod.

Sang 1997, ginhiwat sa Sri Lanka ang una nga tatlo ka lenguahe nga distrito nga kombension sa isa ka daku nga istadyum. Ang bug-os nga programa ginpresentar sa Ingles, Sinhalese, kag Tamil. Sa isa ka kalibutan nga nagadugang ang tension sa tunga sang minoridad nga mga rasa, natalupangdan gid ining pagtilipon sang tatlo ka lenguahe. Ginpamangkot sang isa ka pulis ang isa ka utod nga lalaki: “Sin-o ang nagapalakat sini nga kombension​​—⁠ang mga Sinhalese bala, ang mga Tamil, ukon ang mga Ingles?” “Wala sing grupo-grupo nga nagapalakat sa kombension,” sabat sang utod. “Kami tanan ang nagapalakat sini.” Indi makapati ang pulis. Sang magbuylog ang tatlo ka grupo sang lenguahe para sa hingapusan nga pangamuyo kag ang dulungan nga pagsiling sing “Amen” naglanog sa bug-os nga istadyum, hinali nga nagpinalakpak ang mga kombensionista. Nagalumawlumaw ang halos tanan nga mata sang tumalambong. Huo, ang mga kombension makalilipay matuod nga mga pamatuod sang aton paghiliutod.​​—⁠Salmo 133:1.⁠ *

[Nota]