Mga Pamangkot Gikan sa mga Bumalasa

Paano naplastar ang mga yayungan para sa pagdala sa kaban sang katipan, kay ginapakita sang 1 Hari 8:⁠8 nga makita ini gikan sa Balaan?

Sang ginhatag ni Jehova kay Moises ang desinyo para sa tabernakulo sa kahanayakan, ang panguna nga bahin sini amo ang kaban sang katipan. Yari sa sulod sining rektanggulo sing korte, nataklapan sing bulawan nga kaban ang mga tapitapi sang Kasuguan kag ang iban pa nga mga butang. Ginatago ini sa pinakasulod nga hulot, ang Labing Balaan. Sa ibabaw sang tabon sang Kaban amo ang duha ka bulawan nga larawan sang mga kerubin nga nahumlad ang mga pakpak. Sa tagsa ka kilid sang Kaban, may mga argolya agod madala ini paagi sa duha ka yayungan, nga human sa kahoy nga akasya kag nataklapan sing bulawan. Makatarunganon nga ang mga yayungan nagulo sa mga argolya kag ayon sa kalabaon sang Kaban. Sa amo, kon ang Kaban yara sa Labing Balaan sang tabernakulo, nga nagaatubang sa sidlangan, ang direksion sang mga yayungan didto sa aminhan kag bagatnan. Matuod man ini sang ulihi sang ang Kaban yara sa templo nga ginpatindog ni Solomon.​—⁠Exodo 25:10-22; 37:​4-9; 40:17-21.⁠ *

Isa ka kumbong ang nagabulag sa Labing Balaan gikan sa Balaan (ang hulot sa guwa). Ang mga saserdote sa Balaan indi makatulok sa Labing Balaan kag makatan-aw sang Kaban, nga sa ibabaw sini ginapresentar sang Dios ang iya kaugalingon. (Hebreo 9:​1-7) Sa amo, ang 1 Hari 8:⁠8 daw makalilibog: “Ang mga yayungan malaba, amo nga makita ang mga punta sang mga yayungan gikan sa Balaan sa atubangan sang nasulod gid nga hulot, apang indi ini makita sa guwa.” Amo man sini ang ginasiling sang 2 Cronica 5:⁠9. Paano makita sang bisan sin-o sa Balaan sang templo ang mga yayungan?

Ang iban nagahunahuna nga ang mga yayungan nagaduot sa kumbong, amo nga nagabukol ini. Apang indi ini magbukol kon ang direksion sang mga yayungan didto sa aminhan kag bagatnan, kag ang kumbong paayon sa mga yayungan. (Numeros 3:38) May mas makatarunganon nga paathag. Mahimo nga kit-anon ang mga yayungan kon may diutay nga giha sa ulot sang kumbong kag sang dingding sang templo ukon kon ang mataas nga saserdote nagasulod sa Labing Balaan. Ginalipdan sang kumbong ang Kaban mismo, apang ang malaba nga mga yayungan sa tagsa ka bahin mahimo nga kit-anon sa giha. Bisan pa daw makatarunganon ini nga paathag, indi naton ini dapat ipilit.

Maathag nga madamo nga detalye ang mahimo nga mahibaluan pa naton. Ginsambit ni apostol Pablo ang pila ka bahin sa iya sulat sa mga Hebreo. Nian nagsiling sia: “Indi karon ang tion sa paghambal sing talaid nahanungod sining mga butang.” (Hebreo 9:⁠5) Ang nagahilapit nga pagbanhaw sa mga matutom magabukas sang makapapagsik nga mga kahigayunan nga makatuon gikan sa mga tawo subong nanday Moises, Aaron, Bezalel, kag iban pa nga personal nga nakahibalo sang desinyo kag katuyuan sang tabernakulo.​—⁠Exodo 36:1.

[Nota]