Palambua sa Imo Tagipusuon ang Kahadlok kay Jehova

“Kon mapalambo lamang kuntani nila ang ila tagipusuon sa pagkahadlok sa akon kag sa pagtuman pirme sang tanan ko nga sugo.”​​—⁠DEUTERONOMIO 5:29.

1. Paano kita makasiguro nga sa pila ka adlaw ang mga tawo wala na sing kahadlok?

ANG katawhan siniglo na nga nahadlok. Ang minilyon ka tawo pirme nagakabalaka bangod sang kahadlok sa gutom, balatian, krimen, ukon inaway. Bangod sini maathag nga ginapabutyag sang preambulo sang Universal Declaration of Human Rights ang handum nga paluntaron ang isa ka kalibutan diin ang tanan nga katawhan wala na sing kahadlok.⁠ * Sing makalilipay, ang Dios mismo nagapasalig sa aton nga ini nga kalibutan magaabot​​—⁠apang indi sa mga panikasog sang tawo. Paagi sa iya manalagna nga si Miqueas, si Jehova nagasaad sa aton nga sa iya bag-ong kalibutan sang pagkamatarong, ‘wala sing bisan sin-o nga magapakurog sang iya katawhan.’​​—⁠Miqueas 4:4.

2. (a) Paano kita ginapalig-on sang Kasulatan nga kahadlukan ang Dios? (b) Ano nga mga pamangkot ang mahimo mag-utwas kon ginabinagbinag naton ang aton obligasyon nga kahadlukan ang Dios?

² Sa pihak nga bahin, ang kahadlok mahimo man mangin mapuslanon. Sa Kasulatan, ang mga alagad sang Dios sulit-sulit nga ginalaygayan nga kahadlukan si Jehova. Si Moises nagsiling sa mga Israelinhon: “Dapat mo kahadlukan si Jehova nga imo Dios, kag dapat mo sia alagaron.” (Deuteronomio 6:13) Mga siglo sang ulihi, si Solomon nagsulat: “Kahadluki ang matuod nga Dios kag tumana ang iya mga sugo. Kay amo ini ang bug-os nga obligasyon sang tawo.” (Manugwali 12:13) Paagi sa aton pagpanaksi nga hilikuton, nga ginadumalahan sang mga anghel, ginapalig-on man naton ang tanan nga tawo nga ‘kahadlukan ang Dios kag hatagan sia sing himaya.’ (Bugna 14:​6, 7) Luwas nga kahadlukan si Jehova, dapat sia higugmaon sang mga Cristiano sa ila bug-os nga tagipusuon. (Mateo 22:​37, 38) Paano naton higugmaon ang Dios kag sa amo man nga tion kahadlukan sia? Ngaa dapat kahadlukan ang isa ka mahigugmaon nga Dios? Ano nga mga benepisyo ang matigayon naton sa pagpalambo sing diosnon nga kahadlok? Agod masabat ining mga pamangkot, dapat anay naton mahangpan kon ano ang kahulugan sang kahadlok sa Dios kag kon paano ini nga sahi sang kahadlok isa ka panguna nga bahin sang aton kaangtanan kay Jehova.

Pagkahayanghag, Pagtahod, kag Pagkahadlok

3. Ano ang kahulugan sang kahadlok sa Dios?

³ Ang kahadlok sa Dios isa ka balatyagon nga dapat ipakita sang mga Cristiano sa ila Magbubuhat. Ang isa ka kahulugan sini nga kahadlok amo ang “pagkahayanghag kag daku nga pagtahod sa Manunuga kag nagakaigo nga kahangawa nga basi indi sia mapahamut-an.” Kon amo, ang kahadlok sa Dios nagaapektar sa duha ka importante nga bahin sang aton kabuhi: ang aton panimuot sa Dios kag ang aton panimuot sa paggawi nga ginadumtan niya. Maathag nga importante gid ini kag takus nga binagbinagon sing maayo. Subong sang ginapakita sang Vine’s Expository Dictionary of New Testament Words, para sa mga Cristiano ining matinahuron nga kahadlok amo ang ‘nagakontrol nga motibo sang kabuhi, lunsay sa espirituwal kag moral nga mga butang.’

4. Paano naton mapalambo ang pagbatyag sing kahayanghag kag pagtahod sa aton Manunuga?

⁴ Paano naton mapalambo ang pagbatyag sing kahayanghag kag pagtahod sa aton Manunuga? Nahayanghag kita kon makakita kita sing isa ka matahom nga talan-awon, sing isa ka daku nga busay, ukon sing makahalawhaw nga pagtunod sang adlaw. Ini nga balatyagon labi nga nagabaskog kon mahantop naton, paagi sa mga mata sang pagtuo, ang kamot sang Dios sa likod sining mga buhat sa pagpanuga. Dugang pa, kaangay ni Hari David, mahantop naton kon daw ano gid kita ka  diutay kon ipaanggid sa makahalawhaw nga tinuga ni Jehova. “Kon makita ko ang imo kalangitan, ang binuhatan sang imo mga tudlo, ang bulan kag ang kabituunan nga imo ginhanda, ano bala ang mamalatyon nga tawo nga padayon mo sia nga ginadumdom?” (Salmo 8:​3, 4) Ining daku nga kahayanghag nagadul-ong sa pagtahod, nga nagapahulag sa aton nga pasalamatan kag dayawon si Jehova tungod sa tanan nga ginahimo niya sa aton. Si David nagsulat man: “Magadayaw ako sa imo bangod sa makahalangawa nga paagi ginhimo ako sing makatilingala. Ang imo mga binuhatan makatilingala, subong nahibaluan sing maayo sang akon kalag.”​​—⁠Salmo 139:14.

5. Ngaa dapat naton kahadlukan si Jehova, kag sin-o ang aton maayo nga halimbawa sa sini nga bahin?

⁵ Ang pagbatyag sing kahayanghag kag pagtahod nagapatubas sing nagakaigo kag matinahuron nga kahadlok sa gahom sang Dios subong Manunuga kag sa iya awtoridad subong makatarunganon nga Manuggahom sang uniberso. Sa isa ka palanan-awon nga nakita ni apostol Juan, “ang mga nagdaug sa sapat kag sa iya larawan”​​—⁠ang hinaplas nga mga sumulunod ni Cristo sa ila langitnon nga posisyon​​—⁠nagpahayag: “Dalagku kag kalatingalahan ang imo mga binuhatan, Jehova nga Dios, nga Labing Gamhanan. Matarong kag matuod ang imo mga dalanon, Hari nga dayon. Sin-o bala ang indi mahadlok sa imo, Jehova, kag maghimaya sa imo ngalan?” (Bugna 15:​2-4) Ang kahadlok sa Dios, nga naghalin sa daku nga pagtahod sa iya pagkahalangdon, nagatuytoy sa sining kaupod nga mga manuggahom ni Cristo sa langitnon nga Ginharian nga padunggan ang Dios subong ang pinakamataas nga awtoridad. Kon binagbinagon naton ang tanan nga ginhimo ni Jehova kag ang matarong nga paggahom niya sa uniberso, indi bala may rason gid kita nga kahadlukan sia?​​—⁠Salmo 2:​11; Jeremias 10:7.

6. Ngaa nagakaigo nga mahangawa kita nga basi indi mahamuot si Jehova?

⁶ Apang, dugang sa kahayanghag kag pagtahod, ang kahadlok sa Dios nagalakip sang nagakaigo nga kahangawa nga basi indi sia mahamuot ukon mangin di-matinumanon kita sa iya. Ngaa? Bangod samtang si Jehova “mahinay sa pagpangakig kag bugana sa mahigugmaon nga kaayo,” dapat naton dumdumon nga “indi gid sia magahatag sing pasaylo sa silot.” (Exodo 34:​6, 7) Walay sapayan nga mahigugmaon kag maluluy-on, wala ginakunsinti ni Jehova ang pagkadimatarong kag hungod nga paghimo sing sala. (Salmo 5:​4, 5; Habacuc 1:13) Ang mga tawo nga hungod kag di-mahinulsulon nga nagabuhat sing kalautan sa mata ni Jehova kag nagapamatok sa iya indi  mahimo nga indi masilutan. Subong ginsiling ni apostol Pablo, “isa ka makahaladlok nga butang nga mahulog sa mga kamot sang Dios nga buhi.” Ang nagakaigo nga kahangawa nga basi mahulog sa sini nga kahimtangan isa gid ka pangamlig sa aton sa ulihi.​​—⁠Hebreo 10:31.

“Manguyapot Kamo sa Iya”

7. Ano ang aton mga rason agod magsalig sa gahom ni Jehova sa pagluwas?

⁷ Antes magsalig kag magkompiansa kay Jehova, dapat anay nga may matinahuron nga kahadlok sa Dios kag mahinantupon nga ihibalo sa iya makahalawhaw nga gahom. Subong nga ang isa ka bata nagabatyag nga naamligan kon ang iya amay yara sa malapit, nagabatyag man kita sing kalig-unan kag kompiansa sa idalom sang nagatuytoy nga kamot ni Jehova. Talupangda ang reaksion sang mga Israelinhon pagkatapos nga gintuytuyan sila ni Jehova paguwa sa Egipto: “Nakita man sang Israel ang daku nga kamot nga ginpahikot ni Jehova batok sa mga Egiptohanon; kag ang katawhan nagkahadlok kay Jehova kag nagtuo kay Jehova.” (Exodo 14:31) Ang eksperiensia ni Eliseo nagapamatuod man sa kamatuoran nga “ang anghel ni Jehova nagkampo sa palibot sang mga nagakahadlok sa iya, kag ginluwas niya sila.” (Salmo 34:⁠7; 2 Hari 6:​15-​17) Ang modernong-adlaw nga maragtas sang katawhan ni Jehova kag ayhan ang aton mismo personal nga eksperiensia nagapamatuod nga ginapakita sang Dios ang iya gahom para sa mga nagaalagad sa iya. (2 Cronica 16:9) Sa amo nahangpan naton nga “sa kahadlok kay Jehova yara ang mabakod nga pagsalig.”​​—⁠Hulubaton 14:26.

8. (a) Ngaa ang kahadlok sa Dios nagapahulag sa aton nga maglakat sa iya mga dalanon? (b) Ipaathag kon paano kita dapat “manguyapot” kay Jehova.

⁸ Ang nagakaigo nga kahadlok sa Dios wala lamang nagapalambo sang pagsalig kag pagkompiansa sa iya kundi nagapahulag man sa aton sa paglakat sa iya mga dalanon. Sang gin-inagurahan ni Solomon ang templo, nangamuyo sia kay Jehova: “Magkahadlok [ang Israel] sa imo paagi sa paglakat sa imo mga dalanon sa tanan nga adlaw nga nagakabuhi sila sa ibabaw sang kadaygan sang duta nga ginhatag mo sa amon mga katigulangan.” (2 Cronica 6:31) Antes sini, ginpalig-on ni Moises ang mga Israelinhon: “Maglakat kamo sunod kay Jehova nga inyo Dios, kag magkahadlok kamo sa iya, kag tumana ninyo ang iya mga sugo, kag pamatii ninyo ang iya tingog, kag mag-alagad kamo sa iya, kag manguyapot kamo sa iya.” (Deuteronomio 13:4) Subong maathag nga ginapakita sining mga bersikulo, ang handum nga maglakat sa mga dalanon ni Jehova kag “manguyapot” sa iya nagahalin sa pagsalig kag pagkompiansa sa Dios. Huo, ang diosnon nga kahadlok nagatuytoy sa aton nga tumanon si Jehova, alagaron sia, kag manguyapot sa iya, subong sang isa ka bata nga mahimo nga literal nga manguyapot sa iya amay nga bug-os niya nga ginasaligan kag ginapakitaan sing kompiansa.​​—⁠Salmo 63:⁠8; Isaias 41:13.

Agod Mahigugma ang Dios, Dapat Naton Sia Kahadlukan

9. Ano ang kaangtanan sang gugma sa Dios kag kahadlok sa Dios?

⁹ Gikan sa Makasulatanhon nga pagtamod, ang kahadlok sa Dios wala gid nagapugong nga higugmaon sia. Sa pagpatuhay, ang mga Israelinhon ginsugo nga “magkahadlok kay Jehova . . . agod maglakat sa tanan niya nga dalanon kag agod higugmaon sia.” (Deuteronomio 10:12) Kon amo, ang kahadlok sa Dios kag gugma sa Dios may suod nga kaangtanan. Ang kahadlok sa Dios nagapahulag sa aton nga maglakat sa iya mga dalanon, kag ini naman nagapamatuod sang aton gugma sa iya. (1 Juan 5:3) Makatarunganon ini bangod kon ginahigugma naton ang isa, nagakaigo nga mahadlok kita nga masaklaw sia. Ginsaklaw sang mga Israelinhon si Jehova bangod sang ila rebelyuso nga dalanon sa kahanayakan. Pat-od gid nga indi naton luyag himuon ang bisan ano nga butang nga magapahanusbo sa aton langitnon nga Amay. (Salmo 78:​40, 41) Sa pihak nga bahin, sanglit “nakakita sing kahamuot si Jehova sa mga nagakahadlok sa iya,” ang aton pagkamatinumanon kag pagkamatutom nagapahalipay sang iya tagipusuon. (Salmo 147:11; Hulubaton 27:11) Ang gugma sa Dios nagapahulag sa aton nga pahamut-an sia, kag ang kahadlok sa Dios nagapugong sa aton nga saklawon sia. Mga kinaiya ini nga nagatimbang, indi nagasumpakil.

10. Paano ginpakita ni Jesus nga nalipay sia sa pagkahadlok kay Jehova?

¹⁰ Ang pagkabuhi ni Jesucristo maathag nga nagailustrar kon paano naton higugmaon kag sa amo man nga tion kahadlukan ang Dios. Si manalagna Isaias nagsulat tuhoy kay Jesus: “Magadulog sa iya ang espiritu ni Jehova, ang espiritu sang kaalam kag sang paghangop, ang espiritu sang laygay kag sang pagkagamhanan, ang espiritu sang ihibalo kag sang kahadlok kay Jehova; kag magakalipay sia sa kahadlok kay Jehova.” (Isaias 11:​2, 3) Suno  sa sining tagna, ang espiritu sang Dios nagpahulag kay Jesus nga kahadlukan ang iya langitnon nga Amay. Dugang pa, makita naton nga ini nga kahadlok, nga indi gid makapabug-at, isa ka tuburan sang kaayawan. Nalipay si Jesus sa paghimo sang kabubut-on sang Dios kag sa pagpahamuot sa iya, bisan sa labing mabudlay nga mga kahimtangan. Sang malapit na mapatay sa usok sang pag-antos, nagsiling sia kay Jehova: “Indi suno sa kabubut-on ko, kundi suno sa kabubut-on mo.” (Mateo 26:39) Bangod sining diosnon nga kahadlok, nahamuot nga ginpamatian ni Jehova ang mga pangamuyo sang iya Anak, ginpabakod sia, kag ginluwas sia gikan sa kamatayon.​​—⁠Hebreo 5:7.

Pagtuon sa Pagkahadlok kay Jehova

11, 12. (a) Ngaa dapat kita magtuon nga mahadlok sa Dios? (b) Paano kita ginatudluan ni Jesus nga mahadlok kay Jehova?

¹¹ Indi kaangay sa duna nga pagkahayanghag nga mabatyagan naton kon nagaatubang sang gahom kag pagkamakahalawhaw sang kinaugali, ang kahadlok sa Dios indi mabatyagan sing kinaugali. Amo kon ngaa matagnaon nga ginaagda kita sang Daku Pa nga David, si Jesucristo: “Kari kamo, mga anak ko, pamatii ninyo ako; ang pagkahadlok kay Jehova amo ang itudlo ko sa inyo.” (Salmo 34:11) Paano kita makatuon kay Jesus nga mahadlok kay Jehova?

¹² Ginatudluan kita ni Jesus nga mahadlok kay Jehova paagi sa pagbulig sa aton nga mahangpan ang dalayawon nga personalidad sang aton langitnon nga Amay. (Juan 1:18) Ginapakita mismo sang halimbawa ni Jesus kon paano nagahunahuna ang Dios kag kon paano sia nagapakig-angot sa iban, kay ginapabanaag ni Jesus sing himpit ang personalidad sang iya Amay. (Juan 14:​9, 10) Dugang pa, paagi sa halad ni Jesus, makapalapit kita kay Jehova kon mangayo kita sing kapatawaran sa aton mga kasal-anan sa pangamuyo. Ining talalupangdon nga pagpakita sang Dios sing kaluoy isa mismo ka nagapahulag nga rason agod kahadlukan sia. Ang salmista nagsulat: “May matuod nga pagpatawad sa imo, agod nga ikaw kahadlukan.”​​—⁠Salmo 130:4.

13. Anong mga tikang nga ginbalay sa tulun-an sang Hulubaton ang nagabulig sa aton agod mahadlok kay Jehova?

¹³ Ginabalay sang tulun-an sang Hulubaton ang alagisod nga mga tikang nga nagabulig sa aton sa pagpalambo sing diosnon nga kahadlok. “Anak ko, kon batunon mo ang akon mga pulong kag pakabahandion ang akon mga sugo sa imo, agod talupangdon sang imo igdulungog ang kaalam, agod nga ihuyog mo ang imo tagipusuon sa paghantop; dugang pa, kon magtuaw ka para sa paghangop kag magbayaw sang imo tingog para sa paghantop, . . . kon amo mahangpan mo ang kahadlok kay Jehova, kag makita mo ang ihibalo mismo sa Dios.” (Hulubaton 2:​1-5) Busa, agod mahadlok sa Dios, dapat naton tun-an ang iya Pulong, hanuot nga panikasugan nga hangpon ang panudlo sini, kag nian talupangdon sing maayo ang laygay sini.

14. Paano naton masunod ang laygay nga ginhatag sa mga hari sang Israel?

¹⁴ Ang tanan nga hari sang dumaan nga Israel ginsugo sa paghimo sing isa ka kopya sang Kasuguan kag ‘basahon ini sa tanan nga adlaw sang iya kabuhi, agod makatuon sia sa pagkahadlok kay Jehova nga iya Dios agod matuman niya ang tanan nga pinamulong sa kasuguan.’ (Deuteronomio 17:​18, 19) Ang pagbasa kag pagtuon sa Biblia importante man sa aton agod matun-an naton nga kahadlukan si Jehova. Samtang ginaaplikar naton ang mga prinsipio sang Biblia sa aton kabuhi, amat-amat naton nga matigayon ang kaalam kag ihibalo sang Dios. ‘Mahangpan naton ang kahadlok kay Jehova’ bangod makita naton ang maayo nga mga resulta nga ginapatubas sini sa aton kabuhi, kag ginapakabahandi  naton ang aton kaangtanan sa Dios. Dugang pa, paagi sa pagtipon sing tayuyon upod sa mga masigkatumuluo, ang mga bata kag mga tigulang makapamati sa panudlo sang Dios, makatuon sa pagkahadlok sa Dios, kag makalakat sa iya mga dalanon.​​—⁠Deuteronomio 31:12.

Malipayon ang Tagsatagsa nga Nagakahadlok kay Jehova

15. Sa anong mga paagi nga ang kahadlok sa Dios may yara kaangtanan sa aton pagsimba sa iya?

¹⁵ Gikan sa nasambit na, makita naton nga ang kahadlok sa Dios isa ka nagakaigo nga panimuot nga dapat palambuon naton tanan, kay amo ini ang panguna nga bahin sang aton pagsimba kay Jehova. Nagatuytoy ini sa aton nga magsalig sa iya sing bug-os, maglakat sa iya mga dalanon, kag manguyapot sa iya. Kaangay ni Jesucristo, ang kahadlok sa Dios makapahulag man sa aton sa pagtuman sang aton sumpa sa dedikasyon sa karon kag sa walay katubtuban.

16. Ngaa ginapalig-on kita ni Jehova nga magkahadlok sa iya?

¹⁶ Ang diosnon nga kahadlok indi gid makakulugmat ukon di-nagakaigo nga madumilion. “Malipayon ang tagsatagsa nga nagakahadlok kay Jehova, nga nagalakat sa iya mga dalanon,” pasalig sang Biblia sa aton. (Salmo 128:1) Ginapalig-on kita ni Jehova nga magkahadlok sa iya bangod nahibaluan niya nga ini nga kinaiya magaamlig sa aton. Makita naton ang iya mahigugmaon nga pag-ulikid sa iya mga pulong kay Moises: “Kon mapalambo lamang kuntani nila [ang mga Israelinhon] ang ila tagipusuon sa pagkahadlok sa akon kag sa pagtuman pirme sang tanan ko nga sugo, agod nga magmaayo sa ila kag sa ila mga anak tubtob sa tion nga walay latid!”​​—⁠Deuteronomio 5:⁠29.

17. (a) Ano nga mga benepisyo ang matigayon naton gikan sa pagkahadlok sa Dios? (b) Ano nga mga bahin sang diosnon nga kahadlok ang binagbinagon sa masunod nga artikulo?

¹⁷ Sing kaanggid, kon ginapalambo naton ang aton tagipusuon nga magkahadlok sa Dios, mangin maayo ini sa aton. Sa anong mga paagi? Una sa tanan, ini nga panimuot magapahamuot sa Dios kag magapasuod sa aton sa iya. Nahibaluan ni David sa iya mismo eksperiensia nga “tumanon niya ang handum sang mga nagakahadlok sa iya, kag pamatian niya ang ila pagpangayo sing bulig, kag luwason niya sila.” (Salmo 145:19) Ikaduha, ang diosnon nga kahadlok magabenepisyo sa aton bangod magaapektar ini sang aton panimuot sa kon ano ang malain. (Hulubaton 3:7) Usisaon sang masunod nga artikulo kon paano ini nga kahadlok magaamlig sa aton batok sa espirituwal nga katalagman, kag repasuhon sini ang pila ka Makasulatanhon nga mga halimbawa sang mga tawo nga nagkahadlok sa Dios kag nagtalikod sa malain.

[Nota]

Masabat Mo Bala ang Masunod?

• Ano ang kahulugan sang pagkahadlok sa Dios, kag paano ini nagaapektar sa aton?

• Ano ang kaangtanan sang pagkahadlok sa Dios kag sang paglakat upod sa Dios?

• Paano ginapakita sang halimbawa ni Jesus nga ang kahadlok sa Dios may yara kaangtanan sa gugma sa Dios?

• Sa anong mga paagi mapalambo naton ang kahadlok kay Jehova sa aton tagipusuon?

[Mga Pamangkot sa Pagtinuon]

[Retrato sa pahina 17]

Ang mga hari sang Israel ginsugo sa paghimo sing personal nga kopya sang Kasuguan kag basahon ini adlaw-adlaw

[Retrato sa pahina 18]

Ang kahadlok kay Jehova nagatuytoy sa aton nga magsalig sa iya subong sang pagsalig sang isa ka anak sa iya amay

[Picture Credit Line sa pahina 15]

Stars: Photo by Malin, © IAC/RGO 1991