Mga Gulang​—Hanasa ang Iban sa Pagpas-an sang Lulan

SA MGA kongregasyon sang mga Saksi ni Jehova sa bug-os nga kalibutan, kinahanglan gid ang mga lalaki nga sarang mag-alagad sa mga katungdanan subong mga manugdumala. May yara tatlo ka panguna nga rason para sa sining kinahanglanon.

Una, ginatuman ni Jehova ang iya saad nga himuon “ang magamay [nga] mangin isa ka gamhanan nga pungsod.” (Isaias 60:22) Bangod sang iya di-bagay nga kaayo, halos isa ka milyon ka bag-o nga disipulo ang nabawtismuhan subong mga Saksi ni Jehova sang nagligad nga tatlo ka tuig. Kinahanglan ang masaligan nga mga lalaki agod buligan ining bag-ong mga bawtismado nga mag-uswag padulong sa Cristianong pagkahamtong.​​—⁠Hebreo 6:⁠1.

Ikaduha, ang pila nga nagaalagad subong mga gulang sa sulod sang mga dekada napilitan nga buhinan ang ila hilikuton sa kongregasyon bangod sang katigulangon ukon problema sa panglawason.

Ikatlo, ang madamo sa makugi nga Cristianong mga gulang nagaalagad karon subong katapo sang mga Hospital Liaison Committee, Regional Building Committee, ukon Assembly Hall Committee. Sa pila ka kahimtangan dapat sila mangin balanse paagi sa pagtugyan sa di-magkubos sang pila sang ila mga katungdanan sa ila lokal nga kongregasyon.

Paano maaman ang kinahanglan gid nga dugang nga kalipikado nga mga lalaki? Ang paghanas amo ang sabat. Ginapalig-on sang Biblia ang Cristianong mga manugtatap nga hanason ang “matutom nga mga lalaki, nga, mangin sangkol man sa pagtudlo sa iban.” (2 Timoteo 2:2) Suno sa isa ka diksionaryo, ang berbo nga “paghanas” nagakahulugan sing “pagtudlo agod mangin nagakabagay, kalipikado, ukon sangkol.” Binagbinagon naton kon paano mahanas sang mga gulang ang iban nga kalipikado nga mga lalaki.

Iluga ang Halimbawa ni Jehova

Si Jesucristo pat-od gid nga ‘nagakabagay, kalipikado kag sangkol’ sa iya hilikuton​​—⁠kag indi ini katingalahan! Si Jehova nga Dios mismo ang naghanas sa iya. Ngaa ining programa sa paghanas tuman ka epektibo? Tatlo ka rason ang ginsambit ni Jesus, subong narekord sa Juan 5:​20: “[1] Ginahigugma sang Amay ang Anak kag [2] ginapakita sa iya ang tanan nga butang nga ginahimo niya, kag ipakita niya sa iya [3] ang mga buhat nga daku pa sa sini.” Ang pag-usisa sa tagsa sining mga rason makahatag sing paghantop tuhoy sa topiko nga paghanas.

Talupangda nga una nga nagsiling si Jesus: “Ginahigugma sang Amay ang Anak.” Gikan pa sa umpisa sang pagpanuga, may yara na mainit nga kaangtanan sa tunga ni Jehova kag sang iya Anak. Ang Hulubaton 8:​30 nagahatag sing kasanagan sa sining kaangtanan: “Sadto yara ako [si Jesus] sa tupad niya [ni Jehova nga Dios] subong batid nga manugpangabudlay, kag ako ang labi nga ginakahamut-an niya sa adlaw-adlaw, nagakalipay ako sa atubangan niya sa tanan nga tion.” Wala ginduhaduhaan ni Jesus nga “labi nga ginakahamut-an” sia ni Jehova. Kag wala gintago ni Jesus ang iya nabatyagan nga kalipay samtang nagapanghikot sa tupad sang iya Amay. Daw ano kaayo kon mainit kag bukas ang kaangtanan nga nagaluntad sa ulot sang Cristianong mga gulang kag sang ila mga ginahanas!

Ang ikaduha nga rason nga ginsambit ni Jesus amo nga “ginapakita sa iya [sang Amay] ang tanan nga butang nga ginahimo niya.” Ginapamatud-an sining mga pulong ang ginasiling sa Hulubaton 8:​30, ini amo, nga si Jesus ‘yara sa tupad’ ni Jehova samtang ginatuga ang uniberso. (Genesis 1:26) Sarang mailog sang mga gulang ining maayo gid nga halimbawa paagi sa pagpanghikot sing suod upod sa ministeryal nga mga alagad, nagapakita sa ila kon paano himuon sing maayo ang ila mga katungdanan. Apang, indi lamang ang bag-ong gintangdo nga ministeryal nga mga alagad ang nagakinahanglan sing progresibo nga paghanas. Paano naman yadtong matutom nga mga kauturan nga lalaki nga madamong tinuig na nga nagatinguha nga malab-ot ang palangakuan sang  pagkamanugtatap apang wala pa gid matangdo? (1 Timoteo 3:1) Dapat hatagan sing espesipiko nga laygay sang mga gulang ining mga lalaki agod mahibaluan nila kon ano nga bahin ang dapat nila pauswagon.

Halimbawa, ibutang ta nga ang isa ka ministeryal nga alagad masaligan, wala nagapalantang, kag mapisan sa pagtatap sang iya mga katungdanan. Ayhan isa man sia ka maayo nga manunudlo. Sa madamo nga bahin mahimo nga maayo gid ang iya ginahimo sa kongregasyon. Apang, mahimo nga wala niya matalupangdan nga matigdas gali sia makig-angot sa mga masigka-Cristiano. Ang mga gulang kinahanglan magpakita sing “kalulo sang kaalam.” (Santiago 3:13) Indi bala isa ka kaayo para sa isa ka gulang nga sugilanunon ang ministeryal nga alagad, nga ginapaathag sing maayo ang problema, ginahatag ang espesipiko nga mga halimbawa, kag ginahatag ang praktikal nga mga panugda para sa pag-uswag? Kon mahalungon nga ‘ginatimplahan sing asin’ sang gulang ang iya laygay, mahimo nga mahapos batunon ang iya mga komento. (Colosas 4:6) Sa pagkamatuod, mapahapos sang ministeryal nga alagad ang trabaho sang gulang kon mangin bukas sia kag mabinatunon sa bisan ano nga laygay nga iya mabaton.​​—⁠Salmo 141:⁠5.

Sa pila ka kongregasyon, nagahatag ang mga gulang sing praktikal kag dalayon nga paghanas sa ministeryal nga mga alagad. Halimbawa, ginaupod nila ang kalipikado nga ministeryal nga mga alagad kon magduaw sila sa mga may sakit ukon sa mga tigulang. Sa sining paagi makatigayon ang ministeryal nga mga alagad sing eksperiensia sa hilikuton nga pagbantay. Sa pagkamatuod, madamo ang mahimo sang isa ka ministeryal nga alagad agod labi sia nga mag-uswag sa espirituwal.​​—⁠Tan-awa ang kahon sa ubos nga natig-uluhan “Kon Ano ang Mahimo Sang Ministeryal nga mga Alagad.”

Ang ikatlo nga rason kon ngaa epektibo gid ang paghanas kay Jesus amo nga ginhanas sia ni Jehova nga ginahunahuna ang iya palaabuton nga pag-uswag. Nagsiling si Jesus nga ipakita sang Amay sa Anak “ang mga buhat nga daku pa sa sini.” Ang eksperiensia ni Jesus sa duta nagbulig sa iya nga mapalambo ang mga kinaiya nga kinahanglanon niya sa pagtuman sang iya palaabuton nga mga asaynment. (Hebreo 4:​15; 5:​8, 9) Halimbawa, daw ano gid kabug-at nga asaynment ang batunon ni Jesus sa dili madugay​​—⁠ini amo ang pagbanhaw kag paghukom sa binilyon ka patay nga tawo karon!​​—⁠Juan 5:​21, 22.

Kon nagahanas sa ministeryal nga mga alagad, dapat hunahunaon sang mga gulang karon ang mga kinahanglanon sa ulihi. Bisan pa nga daw may bastante nga mga gulang kag ministeryal nga mga alagad nga nagatatap sa karon nga mga kinahanglanon, kamusta naman kon maporma ang isa ka bag-o nga kongregasyon? Ano abi kon madamo nga mga kongregasyon ang maporma? Sang nagligad nga tatlo ka tuig, may yara kapin sa 6,000 ka bag-o nga kongregasyon sa bug-os nga kalibutan. Daw ano gid kadamo nga mga gulang kag ministeryal nga mga alagad ang kinahanglanon agod magtatap sa sining bag-o nga mga kongregasyon!

Mga gulang, ginailog bala ninyo ang halimbawa ni Jehova paagi sa pagpalambo sing isa ka mainit nga personal nga kaangtanan sa mga lalaki nga inyo ginahanas? Ginapakita bala ninyo sa ila kon  paano dapat himuon ang ila buluhaton? Ginahunahuna bala ninyo ang mga kinahanglanon sa ulihi? Ang pag-ilog sa halimbawa ni Jehova sa iya paghanas kay Jesus magaresulta sa bugana nga mga padya para sa madamo.

Indi Mahadlok sa Pagtugyan

Ang sangkol nga mga gulang nga naanad sa pag-uyat sing madamong mabug-at nga mga asaynment mahimo nga daw nagapaganot sa pagtugyan sang awtoridad sa iban. Ayhan ginhimo na nila ini anay apang indi nangin maayo ang mga resulta. Sa amo natigayon nila ang panimuot nga, ‘Kon luyag mo nga mangin maayo ang paghimo sa isa ka buluhaton, ikaw na lang ang maghimo sini.’ Apang ini bala nga panimuot nagahisanto sa kabubut-on ni Jehova, subong ginasiling sa Kasulatan, nga ang indi tanto ka eksperiensiado nga mga lalaki dapat hanason sang mga mas eksperiensiado?​​—⁠2 Timoteo 2:⁠2.

Nahanusbo si apostol Pablo sang ang isa sang iya kaupod sa paglakbay, nga si Juan Marcos, nagbiya sang iya asaynment sa Pamfilia kag nagpauli. (Binuhatan 15:​38, 39) Apang, ini nga hitabo wala nagpalas-ay kay Pablo nga hanason ang iban. Nagpili sia sing isa pa ka lamharon nga utod nga lalaki, si Timoteo, kag ginhanas sia sa misyonero nga hilikuton.⁠ * (Binuhatan 16:​1-3) Sa Berea, ang mga misyonero nakasumalang sing daku nga pagpamatok amo nga nangin di-praktikal para kay Pablo nga magpabilin didto. Gani gintugyan niya kay Silas ang pagtatap sa bag-o nga kongregasyon, nga isa ka hamtong nga tigulang nga utod, kag kay Timoteo. (Binuhatan 17:​13-​15) Walay duhaduha nga madamo ang natun-an ni Timoteo kay Silas. Sang ulihi, sang handa na si Timoteo sa pag-abaga sing dugang nga responsabilidad, ginpadala sia ni Pablo sa Tesalonica agod palig-unon ang kongregasyon didto.​​—⁠1 Tesalonica 3:​1-​3.

Ang kaangtanan ni Pablo kay Timoteo indi pormalistiko ukon pakulahaw lamang. May yara sila mainit nga kaangtanan sa isa kag isa. Sang nagsulat sa kongregasyon sa Corinto, ginpatuhuyan ni Pablo si Timoteo, nga iya ginplano nga ipadala didto, subong iya “hinigugma kag matutom nga anak sa Ginuo.” Nagsiling pa sia: “Ipahanumdom [ni Timoteo] sa inyo ang akon mga pamaagi may kaangtanan kay Cristo Jesus.” (1 Corinto 4:17) Gin-aplikar ni Timoteo ang paghanas nga ginbaton niya kay Pablo, sa amo nangin kalipikado sa pagtuman sang iya mga asaynment. Madamong lamharon nga mga kauturan nga lalaki ang nangin sangkol nga ministeryal nga alagad, gulang, ukon nagalakbay nga manugtatap pa gani bangod nakabenepisyo sila gikan sa paghanas sang isa ka mainulikdon nga gulang nga nagpakita sing matuod nga interes sa ila, kaangay sang ginhimo ni Pablo kay Timoteo.

Mga Gulang, Hanasa ang Iban!

Maathag nga ang tagna sa Isaias 60:​22 nagakatuman karon. Ginahimo ni Jehova “ang magamay [nga] mangin isa ka gamhanan nga pungsod.” Agod ini nga pungsod magapabilin nga “gamhanan,” dapat ini maorganisar sing maayo. Mga gulang, ngaa indi kamo maghunahuna sing mga paagi nga mahatagan sing dugang nga paghanas ang dedikado nga mga lalaki nga kalipikado sa pagbaton sini? Pat-ura nga nahibaluan sang tagsa ka ministeryal nga alagad kon ano ang dapat pauswagon. Kag kamo nga bawtismado nga mga kauturan nga lalaki, himusli ninyo ang bisan anong personal nga pagtatap nga inyo ginabaton. Himusli ang mga kahigayunan nga mapauswag ang inyo ikasarang, ihibalo, kag eksperiensia. Pat-od nga pakamaayuhon ni Jehova ining programa sang mahigugmaon nga pagbulig.​​—⁠Isaias 61:⁠5.

[Nota]

[Kahon sa pahina 30]

Kon Ano ang Mahimo sang Ministeryal nga mga Alagad

Bisan pa mga gulang ang dapat nga maghanas sa ministeryal nga mga alagad, madamo ang mahimo sang ministeryal nga mga alagad agod labi sila nga mag-uswag sa espirituwal.

—Ang ministeryal nga mga alagad dapat mangin mapisan kag masaligan sa pagtatap sang ila mga asaynment. Dapat man nga may yara sila maayo nga batasan sa pagtuon. Sa daku nga kasangkaron, ang pag-uswag nagadepende sa pagtuon kag sa pag-aplikar sang mga butang nga natun-an.

—Kon ang isa ka ministeryal nga alagad nagahanda sa paghatag sing pamulongpulong sa isa ka Cristianong miting, indi sia dapat mangalag-ag sa pagpangayo sing mga panugda sa isa ka sangkol nga gulang sa kon paano niya ipresentar ang materyal.

—Mahimo man pangabayon sang ministeryal nga alagad ang isa ka gulang sa pagpanilag sing maayo kon paano sia nagapamulongpulong sa Biblia kag hatagan sia sing laygay para sa pag-uswag.

Ang ministeryal nga mga alagad dapat mangabay, magbaton, kag mag-aplikar sang laygay gikan sa mga gulang. Sa sining paagi, ang ila pag-uswag “madayag sa tanan nga tawo.”​​—⁠1 Timoteo 4:⁠15.