“Kari sa Akon, . . . kag Paumpawan Ko Kamo”

‘Ang Pagbantala sing Pulong’ Nagahatag sing Kaumpawan

HIMPIT sia nga tawo nga may importante nga misyon. Epektibo gid ang mga pamaagi sang iya pagpanudlo amo nga “ang mga kadam-an natingala sa iya paagi sang pagpanudlo.” (Mateo 7:28) Daw wala man sia ginakapoy nga manugbantala. Ang iya tion, kusog, kag ikasarang panguna nga gingamit sa pagbantala tuhoy sa Ginharian sang Dios. Sa pagkamatuod, naglakbay si Jesucristo sa iya bug-os nga dutang natawhan subong wala katulad nga manugbantala kag manunudlo.​—⁠Mateo 9:35.

Ang importante gid nga hilikuton ni Jesus amo ang pagbantala sing “maayong balita sang ginharian” sa iya mga kadungan anay kag sa paghanas sa iya mga disipulo sa sini man nga hilikuton sa bug-os kalibutan nga kasangkaron. (Mateo 4:​23; 24:14; 28:​19, 20) Ang mabug-at bala nga responsabilidad sa ila hilikuton nga pagbantala kag ang pagkahilingagawon sini kag subong man ang kadakuon sini nga hilikuton nagpaluya sa iya di-himpit kag may-limitasyon nga mga sumulunod?

Wala gid! Sa tapos hatagan sing instruksion ang iya mga disipulo nga mangamuyo sa “Agalon sang alanyon,” si Jehova nga Dios, sing dugang pa nga mga mamumugon, ginpadala sila ni Jesus sa pagpanudlo sa mga tawo. (Mateo 9:​38; 10:1) Nian ginpasalig niya sila nga ang responsabilidad nga mangin sumulunod niya​—⁠pati na ang sugo nga magbantala​—⁠magahatag sing tunay nga kaumpawan kag paglipay. Si Jesus nagsiling: “Kari sa akon, . . . kag paumpawan ko kamo.”​—⁠Mat. 11:28.

Isa ka Tuburan sang Kalipay

Daw ano ka mainawaon, mahigugmaon, kag mainayuhon ini nga pangagda! Ginapabutyag sini ang mahinangpanon nga kabalaka ni Jesus sa iya mga sumulunod. Nakatigayon gid sing kaumpawan ang iya mga disipulo sa pagtuman sang ila responsabilidad nga ibantala ang “maayong balita” tuhoy sa Ginharian sang Dios. Nagahatag ini sa ila sing matuod nga kalipay kag kaayawan.​—⁠Juan 4:36.

Madugay pa antes si Jesus nagkari sa duta, ginpadaku sang Kasulatan nga ang kalipay dapat mangin bahin sang sagrado nga pag-alagad sa Dios. Ginpaathag ini sang nag-amba ang salmista: “Magsinggit sa kadalag-an kay Jehova, tanan kamo nga katawhan sang duta. Alagda si Jehova nga may kasadya. Magkari sa atubangan niya nga may malipayon nga pag-amba.” (Salmo 100:​1, 2) Sa karon, ang katawhan sang tanan nga pungsod nagadayaw kay Jehova, kag ang ila mga pagdayaw kaangay sa singgit sa kadalag-an sang nagdaug nga kasuldadusan. Ang mga debotado gid sa Dios nagakari sa iya presensia “nga may malipayon nga pag-amba.” Kag nagakaigo gid ina, kay si Jehova amo ang “malipayon nga Dios,” kag luyag niya nga ang iya mga alagad malipayon nga magatuman sang ila dedikasyon sa iya.​—⁠1 Timoteo 1:11.

Napaumpawan nga mga Ministro

Ngaa ang mabudlay nga hilikuton sa ministeryo sa latagon wala nagapalapyo sa aton kundi nagapaumpaw gid sa aton? Ti, ang paghimo sa hilikuton ni Jehova kaangay sa nagapapagsik nga pagkaon para kay Jesus. Sia nagsiling: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.”​—⁠Juan 4:34.

Sing kaanggid, ang makugi nga Cristianong mga manugbantala karon nakasapo man sing kalipay samtang ‘ginabantala nila ang pulong.’ (2 Timoteo 4:2) Si Connie, isa ka medyo may edad na nga Cristianong babayi nga nagahinguyang sing kapin sa 70 ka oras kada bulan sa pagbantala nga hilikuton, nagsiling: “Sa tapos makapakigbahin sa ministeryo, nagabatyag ako sing kaayawan kag pagkakontento, bisan pa nga kapoy ako sa katapusan sang adlaw.”

Kamusta kon indi paborable ang pagbaton sa mensahe sang Ginharian? Si Connie nagpadayon: “Ano man ang reaksion sang mga tawo, wala gid sing tion nga ginhinulsulan ko ang pagpakigbahin sa ministeryo. Luwas nga nahibaluan ko nga ginahimo ko ang nagapahamuot kay Jehova, ginakalipay ko ang paghambal  tuhoy sa kamatuoran bangod samtang ginahimo ko ini, ang makalilipay nga paglaum gikan sa Biblia nagalig-on sa akon tagipusuon.”

Nasapwan sang iban nga ang pagbulig sa mga tawo nga makatigayon sing sibu nga ihibalo tuhoy sa Dios nagahatag sing kahulugan sa ila kabuhi. Si Meloney, isa ka lin-ay nga regular nga nagahinguyang sing kapin sa 50 ka oras kada bulan sa pagbantala nga hilikuton, nagsiling: “Ang ministeryo makapaumpaw bangod nagahatag ini sing direksion kag katuyuan sa akon kabuhi. Ang personal nga mga problema kag kahuol sa adlaw-adlaw daw indi na matalupangdan kon nagapakigbahin ako sa pag-alagad.”

Si Millicent, isa pa ka makugi nga ministro sang mga Saksi ni Jehova, nagsiling: “Ang ministeryo nagahatag sing balor sa tagsa ka adlaw nga ginahinguyang ko sa paghambal sa iban tuhoy sa katuyuan sang Dios para sa katawhan kag sa pagpaathag kon paano ipasag-uli ang Paraiso sa duta. Bangod sini, nangin matuod si Jehova sa akon sa adlaw-adlaw kag nagahatag sa akon sing kalinong kag sing nasulod nga kalipay nga indi matigayon sa bisan anong iban pa nga mga paagi.”

Napaumpawan nga mga Nagabaton

Ang mga manugbantala sang Ginharian pat-od gid nga napaumpawan sang Cristianong ministeryo, kag ang mga nagabaton sing nagahatag-kabuhi nga mensahe ginalipay sini. Bisan pa ang isa ka maestra sa Portugal ginhanas sang mga madre kag mga pari, nagbatyag sia nga wala mapaayawan sang iya simbahan ang iya espirituwal nga mga kinahanglanon. Ang iya mga pamangkot tuhoy sa Biblia wala masabat. Paagi sa regular nga pagtuon sa Biblia nga gindumalahan sang isa sang mga Saksi ni Jehova, amat-amat nga nahangpan niya ang Kasulatan. Nakunyag gid ang maestra. “Malangkagon ko nga ginahulat ang akon pagtuon kada Mierkoles,” siling niya, “kay isa-isa nga nasabat ang akon mga pamangkot upod ang makapakumbinsi nga pamatuod sa Biblia.” Sa karon, ining babayi isa na ka dedikado nga alagad ni Jehova, kag sia man nagahatag sing kaumpawan sa iban paagi sa kamatuoran sang Biblia.

Kon amo, maathag nga ang mga Saksi ni Jehova wala nabug-atan sa pagkaserioso sang ila pagbantala nga hilikuton ukon sang kasangkaron sang ila bug-os kalibutan nga teritoryo. Ang di-pagsapak ukon pagpamatok wala man nagpaluya sang ila buot. Mapagsik nga ginahugod nila ang ila kaugalingon sa pagtuman sang ila pagbantala sing Ginharian nga hilikuton. Ginapaambit nila ang maayong balita sa mga tawo bisan diin man sila masapwan​—⁠sa paradahan sang trak sa Estados Unidos (1), sa erport sa Korea (2), sa Andes (3), ukon sa tiendahan sa London (4). Ang mga sumulunod ni Jesus karon malipayon nga nagatuman sang ila makapaladya nga hilikuton sa bug-os kalibutan. Kag suno gid sa ginsaad niya, ginahatagan niya sila sing kaumpawan kag gingamit sila sa paghatag sing kaumpawan sa madamo nga iban pa.​—⁠Bugna 22:17.