Pila ang Bili sang Matinlo nga Konsiensia?

“GINMANDUAN ang Gobierno nga Batunon ang R$20,000.” Amo ini ang tumalagsahon nga ulong-dinalan sining karon lang sa pamantalaan nga Correio do Povo sa Brazil. Ginsaysay sang artikulo ang sugilanon ni Luiz Alvo de Araújo, isa ka lokal nga kartero, nga nagbaligya sing isa ka lote sa gobierno. Sa tapos masaylo sa gobierno ang pagpanag-iya sa titulo, nakibot si Luiz sang matukiban niya nga sobra sing R$20,000 (mga $8,000, U.⁠S.) ang ginbayad sa iya suno sa ginkasugtan nga presyo!

Ang pag-uli sa sobra nga bayad indi mahapos himuon. Pagkatapos sang pila ka beses nga wala sing resulta nga pagkadto sa mga departamento sang gobierno, ginlaygayan si Luiz nga magkuha sing abogado kag husayon ang problema sa korte. “Daw may isa nga nagsayop, kag bangod sang sistema sang gobierno, wala sing nakahibalo kon paano lubaron ang problema,” komento sang huwes nga nagsentensia sa gobierno nga batunon ang kuwarta kag bayaran ang mga gasto sa legal nga proseso. “Amo pa lang ako makakita sang subong sini nga kaso.”

Si Luiz, nga isa ka Saksi ni Jehova, nagpaathag: “Bangod sang akon nahanas-sa-Biblia nga konsiensia, indi ko mabaton ang indi para sa akon. Dapat ko iuli ang kuwarta.”

Para sa madamo, ini nga panimuot tumalagsahon gid ukon daw indi pa gani mahangpan. Apang ginapakita sang Pulong sang Dios nga ginapabaloran gid sang matuod nga mga Cristiano ang paghupot sing matinlo nga konsiensia sa ila pagpakig-angot sa sekular nga mga awtoridad. (Roma 13:5) Determinado ang mga Saksi ni Jehova nga huptan ang ‘bunayag nga konsiensia kag maggawi sing bunayag sa tanan nga butang.’​—⁠Hebreo 13:18.