‘Ang Amon Gugma Nagdalom’

SANG Biernes, Marso 31, 2000, ang Mount Usu sa Hokkaido, Japan, naglupok pagkatapos sang 23 ka tuig sini nga pagtinong. Linibo ka residente ang napilitan sa pagpalagyo gikan sa makatalagam nga duog. Madamo ang nadulaan sing puluy-an kag palamugnan, apang maayo lang kay wala sing napatay sa ila. Lakip sa mga nagpalagyo amo ang 46 ka Saksi ni Jehova, apang wala sila ginpabay-an.

Sang adlaw mismo sang paglupok, sa bulig sang isa ka nagalakbay nga Cristianong ministro nga nagaalagad sa sina nga duog ang kahimusan nahimo para sa mga hilikuton sa pagbulig. Sa gilayon, nag-abot ang bulig gikan sa kaingod nga mga kongregasyon. Sa idalom sang pagdumala sang sanga sa Japan, isa ka relief committee ang gilayon nga ginporma, kag madamo nga donasyon ang nabaton sa mga Saksi ni Jehova sa bug-os nga Japan. Agod suportahan ang espirituwal nga mga hilikuton, ang bug-os tion nga mga ministro sang mga Saksi ni Jehova ginpadala sa labing apektado nga kongregasyon, kag ang manugtatap sang sirkito nagduaw sing sulit-sulit sa sini nga duog agod maghatag sing emosyonal kag espirituwal nga bulig.

Ang mga Saksi sa apektado nga mga duog padayon nga naghiwat sing Cristianong mga miting sa sining mabudlay nga tion sa pribado nga mga puluy-an sa duog nga hilway sa katalagman. Sang ginbawi ang evacuation order sa duog nga nahamtangan sang Kingdom Hall, nagbalik ang mga kauturan kag nakita nila ang Kingdom Hall nga nagahilay, may mga litik, kag guba na. Indi malayo sa Kingdom Hall, ang bag-ong porma nga baba sang bulkan nagabuga gihapon sing madamol nga aso. Namangkot ang mga Saksi, ‘Maalamon bala nga magpadayon sa paghiwat sing mga miting sa sini nga lokasyon? Makay-o pa bala ang Kingdom Hall?’

Ang desisyon amo ang pagtukod sing isa ka bag-o nga Kingdom Hall sa mas hilway sa katalagman kag malapit nga duog. Nagbulig ang Regional Building Committee. Ang kuwarta nga gin-amot sang mga Saksi sa bug-os nga pungsod gingamit para sa sini nga pagtukod. Natigayon gilayon ang lote, kag sa bulig sang ginatos ka boluntaryo, isa ka bag-o nga Kingdom Hall ang nahuman sa malip-ot lamang nga tion. Sang Domingo, Hulyo 23, 2000, ang una nga miting nga ginhiwat sa sining bag-ong human nga Kingdom Hall gintambungan sang 75 ka tawo. Madamo sa tumalambong ang naghibi bangod sa kalipay. Sang gindedikar ang Kingdom Hall sang Oktubre sang amo man nga tuig, isa sa mga gulang sa lokal nga kongregasyon ang napahulag sa pagsiling: “Ang paglupok nagtuga sing kabudlayan kag pag-antos. Apang, ining pagtukod nagbaylo sang amon kahadlok nga mangin kalipay. Ang amon gugma kay Jehova kag sa amon Cristianong kauturan nagdalom!”

[Picture Credit Line sa pahina 19]

Paglupok sang Mount Usu: AP Photo/Koji Sasahara