Paano Ikaw Makalampuwas sa Katapusan Sining Kalibutan?

GINALARAGWAY sang Biblia ang katapusan sining presente nga sistema sang mga butang subong “isa ka adlaw sang kasingkal, isa ka adlaw sang kasisit-an kag sang kalisang, isa ka adlaw sang bagyo kag sang pagkahapay, isa ka adlaw sang kadulom kag sang kaguom, isa ka adlaw sang mga gal-um kag sang madamol nga kaguom.” (Sofonias 1:​15) Pat-od gid nga indi ini ang sahi sang adlaw nga ginakalangkagan mo! Apang, si apostol Pedro naglaygay sa iya mga masigka-Cristiano nga ‘maghulat kag huptan sing suod sa hunahuna ang presensia sang adlaw ni Jehova, nga paagi sini ang mga langit bangod nga nasunog maupos kag ang mga elemento nga bangod sa sobra nga init matunaw! Apang nagahulat kita sing bag-ong mga langit kag bag-ong duta suno sa iya saad, kag sa sini magapuyo ang pagkamatarong.’​—2 Pedro 3:​12, 13.

Wala diri nagahambal si Pedro sa kalaglagan sang literal nga mga langit kag duta. Ang “mga langit” kag “duta” nga ginpatuhuyan ni Pedro sa sini nga konteksto nagasimbulo sang presente garok nga mga gobierno sang tawo kag sang di-diosnon nga katilingban sang tawo. “Ang adlaw ni Jehova” indi magalaglag sang duta mismo kundi “laglagon ang mga makasasala sang duta gikan sa sini.” (Isaias 13:9) Para sa mga “nagapanghayhay kag nagabakho sa tanan nga kalangil-aran” nga ginahimo sa malauton nga katilingban sang tawo karon, ang adlaw ni Jehova mangin isa ka adlaw sang kaluwasan.​—Ezequiel 9:4.

Nian, paano ang isa maluwas sa “daku kag makakulugmat nga adlaw ni Jehova”? “Ang pulong ni Jehova” nga ginpahayag sa isa sang iya mga manalagna nagahatag sing sabat sa sini nga pamangkot: “Mahanabo nga ang tanan nga nagatawag sa ngalan ni Jehova maluwas.” (Joel 1:1; 2:​31, 32) Ang mga Saksi ni Jehova malipay sa pagbulig sa imo nga matun-an kon ano ang kahulugan sang pagtawag sa ngalan ni Jehova.