Si Cristo Nagapanguna sa Iya Kongregasyon

“Yari karon! ako kaupod ninyo sa tanan nga adlaw tubtob sa katapusan sang sistema sang mga butang.”​—⁠MATEO 28:20.

1, 2. (a) Sang nagsugo nga maghimo sing mga disipulo, ano ang ginsaad sang ginbanhaw nga si Jesus sa iya mga sumulunod? (b) Paano ginpangunahan ni Jesus sing aktibo ang Cristianong kongregasyon sang una?

ANTES magkayab sa langit, si Jesucristo, ang aton ginbanhaw nga Lider, nagpakita sa iya mga disipulo, kag nagsiling: “Ang bug-os nga awtoridad ginhatag na sa akon sa langit kag sa duta. Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa katapusan sang sistema sang mga butang.”​—⁠Mateo 23:10; 28:18-20.

² Wala lamang ginhatag ni Jesus sa iya mga disipulo ang nagaluwas-kabuhi nga hilikuton nga maghimo sing madamo pa nga disipulo kundi nagsaad man sia nga mangin kaupod nila. Ang maragtas sang unang Cristianismo, suno sa rekord sa tulun-an nga Mga Binuhatan sa Biblia, maathag nga nagapakita nga gingamit ni Cristo ang awtoridad nga ginhatag sa iya agod pangunahan ang bag-ong natukod nga kongregasyon. Nagpadala sia sang ginsaad nga “mananabang”​—⁠ang balaan nga espiritu​—⁠agod pabakuron ang iya mga sumulunod kag ubayan ang ila mga panikasog. (Juan 16:⁠7; Binuhatan 2:​4, 33; 13:​2-4; 16:​6-​10) Ang ginbanhaw nga si Jesus naggamit sang mga anghel agod suportahan ang iya mga disipulo. (Binuhatan 5:​19; 8:​26; 10:​3-8, 22; 12:​7-​11; 27:​23, 24; 1 Pedro 3:22) Dugang pa, ang aton Lider naghatag sing panuytoy sa kongregasyon paagi sa paghimo sing kahimusan agod ang kalipikado nga mga lalaki magaalagad subong nagadumala nga hubon.​​—⁠Binuhatan 1:​20, 24-​26; 6:​1-6; 8:​5, 14-​17.

3. Anong mga pamangkot ang binagbinagon sa sining artikulo?

³ Apang, kamusta naman sa tion naton, sa “katapusan sang sistema sang mga butang”? Paano ginapangunahan ni Jesucristo ang Cristianong kongregasyon karon? Kag paano naton mapakita nga ginabaton naton ini nga pagpanguna?

Ang Agalon May Matutom nga Ulipon

4. (a) Sin-o ang nagahuman sa “matutom kag mainandamon nga ulipon”? (b) Ano ang gintangdo sang Agalon sa ulipon?

⁴ Sang naghatag sing tagna tuhoy sa tanda  sang iya presensia, si Jesus nagsiling: “Sin-o bala ang matutom kag mainandamon nga ulipon nga ginpadumala sang iya agalon sa iya panimalay, sa paghatag sa ila sing pagkaon sa nagakaigo nga tion? Malipayon ining ulipon nga kon mag-abot ang iya agalon masapwan sia nga nagahimo sing subong. Sa pagkamatuod nagasiling ako sa inyo, Tangduan niya sia sa tanan niya nga pagkabutang.” (Mateo 24:45-47) Ang “agalon” amo ang aton Lider, si Jesucristo, kag gintangdo niya sa “matutom kag mainandamon nga ulipon”​—⁠ang hubon sang hinaplas nga mga Cristiano sa duta​—⁠ang tanan niya nga dutan-on nga mga intereses.

5, 6. (a) Sa palanan-awon nga nabaton ni apostol Juan, ano ang ginalaragway sang “pito ka kandelero nga bulawan” kag sang “pito ka bituon”? (b) Ano ang ginapahangop sang katunayan nga ang “pito ka bituon” yara sa tuo nga kamot ni Jesus?

⁵ Ang tulun-an sang Bugna sa Biblia nagapakita nga ang matutom kag mainandamon nga ulipon ginapangunahan gid ni Jesucristo. Sa isa ka palanan-awon tuhoy sa “adlaw sang Ginuo,” nakita ni apostol Juan ang “pito ka kandelero nga bulawan, kag sa tunga sang mga kandelero ang isa nga kaangay sang anak sang tawo,” nga “sa iya tuo nga kamot may pito ka bituon.” Nagapaathag sang palanan-awon kay Juan, si Jesus nagsiling: “Nahanungod sa sagrado nga sekreto sang pito ka bituon nga imo nakita sa akon tuo nga kamot, kag sang pito ka kandelero nga bulawan: Ang pito ka bituon amo ang mga anghel sang pito ka kongregasyon, kag ang pito ka kandelero amo ang pito ka kongregasyon.”​—⁠Bugna 1:​1, 10-20.

⁶ Ang “pito ka kandelero nga bulawan” nagalaragway sa tanan nga matuod nga Cristianong kongregasyon nga nagaluntad sa “adlaw sang Ginuo,” nga nagsugod sang 1914. Apang kamusta naman ang “pito ka bituon”? Una, nagasimbulo sila sa tanan nga ginpanganak-sa-espiritu kag hinaplas nga mga manugtatap nga nagaatipan sa unang-siglo nga mga kongregasyon.⁠ * Ang mga manugtatap yara sa tuo nga kamot ni Jesus​—⁠nga ginapangunahan kag ginatuytuyan niya. Huo, ginpangunahan ni Cristo Jesus ang kabilugan nga ulipon nga klase. Apang, ang hinaplas nga mga manugtatap diutay na lamang karon. Paano makalab-ot ang pagpanguna ni Cristo sa kapin sa 93,000 ka kongregasyon sang mga Saksi ni Jehova sa bug-os nga kalibutan?

7. (a) Paano ginagamit ni Jesus ang Nagadumala nga Hubon agod pangunahan ang mga kongregasyon sa bug-os nga duta? (b) Ngaa masiling nga ang Cristianong mga manugtatap ginatangdo sang balaan nga espiritu?

⁷ Kaangay sang unang siglo, ang isa ka diutay nga grupo sang kalipikado nga mga lalaki gikan sa tunga sang hinaplas nga mga manugtatap nagaalagad karon subong Nagadumala nga Hubon, nga nagarepresentar sa kabilugan nga matutom kag mainandamon nga ulipon. Ginagamit sang aton Lider ining Nagadumala nga Hubon sa pagtangdo sa kalipikado nga mga lalaki​—⁠ginhaplas man sang espiritu ukon wala​—⁠subong mga gulang sa lokal nga mga kongregasyon. Bahin sini, ang balaan nga espiritu, nga ginpagamit ni Jehova kay Jesus, may importante gid nga papel. (Binuhatan 2:​32, 33) Una sa tanan, ining mga manugtatap dapat may mga kalipikasyon nga ginbalay sa Pulong sang Dios, nga inspirado sang balaan nga espiritu. (1 Timoteo 3:​1-7; Tito 1:​5-9; 2 Pedro 1:​20, 21) Ang mga pagrekomendar kag mga pagtangdo ginahimo sa tapos sang pangamuyo kag sa panuytoy sang balaan nga espiritu. Dugang pa, ang mga indibiduwal nga gintangdo nagahatag sing pamatuod nga nagapatubas sang mga bunga sang balaan nga espiritu. (Galacia 5:​22, 23) Kon amo, ang laygay ni Pablo naaplikar man sa tanan nga gulang, hinaplas man ukon indi: “Tatapa ninyo ang inyo kaugalingon kag ang bug-os nga panong, nga sa ila gintangdo kamo sang balaan nga espiritu nga mga manugtatap.” (Binuhatan 20:28) Ining gintangdo nga mga lalaki nagabaton sing panuytoy gikan sa Nagadumala nga Hubon kag kinabubut-on nga nagabantay sa kongregasyon. Sa sining paagi, si Cristo kaupod naton karon kag aktibo nga nagapanguna sa kongregasyon.

8. Paano ginagamit si Cristo sang mga anghel agod pangunahan ang iya mga sumulunod?

⁸ Ginagamit man ni Jesus ang matuod nga mga anghel agod pangunahan ang iya mga sumulunod karon. Suno sa ilustrasyon tuhoy sa trigo kag gamhon, ang tig-alani magaabot sa “katapusan  sang sistema sang mga butang.” Sin-o ang gamiton sang Agalon sa pag-ani? “Ang mga mangangani amo ang mga anghel,” siling ni Cristo. Nagsiling pa sia: “Magapadala ang Anak sang tawo sang iya mga anghel, kag tipunon nila gikan sa iya ginharian ang tanan nga butang nga ginabangdan sang kasandaran kag ang mga tawo nga nagahimo sing pagkamalinapason.” (Mateo 13:37-41) Dugang pa, subong nga gintuytuyan sang anghel si Felipe agod makita ang Etiopianhon nga eunuco, may bugana man nga pamatuod karon nga ginagamit ni Cristo ang iya mga anghel agod tuytuyan ang hilikuton sang matuod nga mga Cristiano sa pagpangita sa mga bunayag sing tagipusuon.​—⁠Binuhatan 8:​26, 27; Bugna 14:6.

9. (a) Sa ano nga paagi nagapanguna si Cristo sa Cristianong kongregasyon karon? (b) Anong pamangkot ang dapat naton binagbinagon kon luyag naton makabenepisyo gikan sa pagpanguna ni Cristo?

⁹ Daw ano gid ka makapasalig nga ginapangunahan karon ni Jesucristo ang iya mga disipulo paagi sa Nagadumala nga Hubon, balaan nga espiritu, kag mga anghel! Bisan pa ang pila sang mga sumilimba ni Jehova mahamulag sing umalagi gikan sa Nagadumala nga Hubon bangod sang paghingabot ukon kaanggid nga mga rason, si Cristo magapanguna gihapon paagi sa balaan nga espiritu kag sa pagsakdag sang mga anghel. Apang, magabenepisyo lamang kita sa iya pagpanguna kon batunon naton ini. Paano naton mapakita nga ginabaton naton ang pagpanguna ni Cristo?

“Mangin Matinumanon . . . Mangin Mapinasakupon”

10. Paano naton mapakita ang pagtahod sa gintangdo nga mga gulang sa kongregasyon?

¹⁰ Ang aton Lider naghatag sa mga kongregasyon sang “mga dulot nga lalaki”​—⁠“ang iban subong mga ebanghelisador, ang iban subong mga manugbantay kag mga manunudlo.” (Efeso 4:​8, 11, 12) Ginapakita gid sang aton mga panimuot kag ginahimo sa ila kon bala ginabaton naton ang pagpanguna ni Cristo. Nagakaigo lamang nga ‘ipakita naton ang aton kaugalingon nga mapinasalamaton’ sa mga tawo nga kalipikado sa espirituwal nga ginhatag ni Cristo. (Colosas 3:15) Takus man sila nga tahuron naton. “Ang mga gulang nga lalaki nga nagadumala sa maayong paagi pag-isipon nga takus sa pilo nga kadungganan,” sulat ni apostol Pablo. (1 Timoteo 5:17) Paano naton mapakita ang aton pagpasalamat kag pagtahod sa mga gulang ukon mga manugtatap​—⁠sa kongregasyon? Si Pablo nagasabat: “Mangin matinumanon sa mga nagapanguna sa inyo kag mangin mapinasakupon.” (Hebreo 13:17) Huo, dapat naton sila tumanon kag dapat kita magpasakop kag magsunod sa ila.

11. Ngaa ang pagtahod sa kahimusan sang mga gulang nahisanto gid sa pagpabawtismo naton?

¹¹ Ang aton Lider himpit. Ang mga tawo nga ginhatag niya subong mga dulot indi. Gani mahimo sila makasala kon kaisa. Apang, kinahanglan gid nga magpabilin kita nga mainunungon sa mga kahimusan ni Cristo. Sa kamatuoran, ang pagpanghikot suno sa aton dedikasyon kag bawtismo nagakahulugan nga ginakilala naton ang pagkalehitimo sang hinaplas-sang-espiritu nga awtoridad sa kongregasyon kag kinabubut-on nga nagapasakop sa sini. Ang pagpabawtismo naton ‘sa ngalan sang balaan nga espiritu’ isa ka dayag nga deklarasyon nga ginakilala naton ang balaan nga espiritu kag ginabaton ang ginatungdan nga papel sini sa mga katuyuan ni Jehova. (Mateo 28:19) Ini nga bawtismo nagapahangop nga nagakooperar kita sa espiritu kag wala nagahimo sing bisan ano nga butang nga nagaupang sa pagpanghikot sini sa mga sumulunod ni Cristo. Sanglit ang balaan nga espiritu may importante  nga papel sa pagrekomendar kag sa pagtangdo sa mga gulang, mangin matutom gid bala kita sa aton dedikasyon kon wala kita nagakooperar sa kahimusan sang mga gulang sa kongregasyon?

12. Anong mga halimbawa bahin sa di-pagtahod sa awtoridad ang ginsambit ni Judas, kag ano ang ginatudlo sini sa aton?

¹² Ang Kasulatan may yara mga halimbawa nga nagatudlo sa aton sang kabilihanan sang pagtuman kag pagpasakop. Tuhoy sa mga nagapamulong sing matinamayon sa gintangdo nga mga lalaki sa kongregasyon, si disipulo Judas nagpatalupangod sang tatlo ka nagapaandam nga mga halimbawa, nga nagasiling: “Kailo sila, bangod naglakat sila sa banas ni Cain, kag nagdinaguso sila sa sayop nga dalanon ni Balaam tungod sa padya, kag napapas sa rebelyuso nga mga hambal ni Kora!” (Judas 11) Wala ginsapak ni Cain ang mahigugmaon nga laygay ni Jehova kag hungod nga naglakat sa dalanon sang mahimo makapatay nga pagdumot. (Genesis 4:4-8) Walay sapayan nga ginpaandaman sing sulitsulit sang Dios, si Balaam nagtinguha nga pakamalauton ang katawhan sang Dios tungod sa padya nga kuwarta. (Numeros 22:​5-28, 32-​34; Deuteronomio 23:5) Si Kora may dungganon nga katungdanan sa tunga sang Israel, apang indi sia kontento sa sini. Ginsugyot niya ang pagrebelde batok sa alagad sang Dios nga si Moises, ang pinakamahagop nga tawo sa duta. (Numeros 12:⁠3; 16:​1-3, 32, 33) Sanday Cain, Balaam, kag Kora ginlaglag. Daw ano gid kaathag nga ginatudlo sa aton sining mga halimbawa nga pamatian naton ang laygay sang mga ginagamit ni Jehova sa masaligan nga mga katungdanan kag tahuron sila!

13. Anong mga pagpakamaayo ang gintagna ni manalagna Isaias para sa mga nagapasakop sa kahimusan sang mga gulang?

¹³ Sin-o ang indi luyag nga makabenepisyo gikan sa daku nga kahimusan sang pagdumala nga ginsugdan sang aton Lider sa Cristianong kongregasyon? Si manalagna Isaias nagtagna sang mga pagpakamaayo sini, nga nagasiling: “Yari karon! Ang isa ka hari magahari sa pagkamatarong; kag tuhoy sa mga prinsipe, magagahom sila subong mga prinsipe para sa katarungan. Kag ang tagsa mangin subong sang palalipdan sa hangin kag palanaguan  sa unos, subong sang mga ilig sang tubig sa duog nga kigas, subong sang landong sang daku nga igang sa duta nga lamgod.” (Isaias 32:​1, 2) Ang kada isa sang mga gulang mangin amo sini nga “duog” sang pangamlig kag kaluwasan. Bisan pa nabudlayan kita sa pagpasakop sa awtoridad, mapangamuyuon kita nga magtuman kag magpasakop sa gintangdo-sang-Dios nga awtoridad sa sulod sang kongregasyon.

Kon Paano ang mga Gulang Nagapasakop sa Pagpanguna ni Cristo

14, 15. Paano ang mga nagapanguna sa kongregasyon nagapakita nga nagapasakop sila sa pagpanguna ni Cristo?

¹⁴ Dapat sundon sang tagsa ka Cristiano ang pagpanguna ni Cristo​—⁠ilabi na ang mga gulang. Ang mga manugtatap, ukon mga gulang, may awtoridad sa kongregasyon. Apang wala sila nagatinguha nga mangin ‘mga agalon sa pagtuo sang ila mga masigkatumuluo’ paagi sa pagtinguha nga kontrolon ang ila kabuhi. (2 Corinto 1:24) Ginatuman sang mga gulang ang mga pulong ni Jesus: “Nahibaluan ninyo nga ang mga manuggahom sang mga pungsod nagapakaginuo sa ila kag ang bantog nga mga tawo nagagamit sing awtoridad sa ila. Indi amo sini ang paagi sa inyo.” (Mateo 20:25-27) Samtang ginatuman sang mga gulang ang ila responsabilidad, hanuot sila nga nagapanikasog sa pag-alagad sa iban.

¹⁵ Ang mga Cristiano ginalaygayan: “Dumduma ang mga nagapanguna sa inyo, . . . kag samtang ginapamalandungan ninyo ang resulta sang ila paggawi iluga ang ila pagtuo.” (Hebreo 13:7) Ang kamatuoran nga ang mga gulang amo ang nagapanguna indi amo ang rason kon ngaa ginalaygayan ang mga Cristiano nga ilugon sila. Si Jesus nagsiling: “Isa lamang ang inyo Lider, ang Cristo.” (Mateo 23:10) Ang pagtuo sang mga gulang amo ang dapat ilugon bangod ginailog nila ang aton dakung Lider, si Cristo. (1 Corinto 11:1) Binagbinaga ang pila ka paagi nga nagapanikasog ang mga gulang nga mangin tulad-Cristo sa ila kaangtanan sa iban sa kongregasyon.

16. Walay sapayan sang iya awtoridad, paano ginapakig-angutan ni Jesus ang iya mga sumulunod?

¹⁶ Bisan pa si Jesus labaw gid sa di-himpit nga mga tawo sa tanan nga paagi kag nagapanag-iya sing di-matupungan nga awtoridad halin sa iya Amay, maugdang sia sa iya pagpakig-angot sa iya mga disipulo. Wala niya ginapabug-atan ang iya mga tagpalamati sing pakitakita nga ihibalo. Si Jesus nagpakita sing pagkasensitibo kag kaawa sa iya mga sumulunod, ginabinagbinag ang ila tawhanon nga mga kinahanglanon. (Mateo 15:32; 26:​40, 41; Marcos 6:31) Wala gid sia nangabay sa iya mga disipulo sing labaw sa ila masarangan, kag wala sia nagsugo sa ila sing labaw sa mahimo nila. (Juan 16:12) Si Jesus “malulo kag mapainubuson sing tagipusuon.” Busa, indi makapakibot nga nangin kaumpawan sia para sa madamo.​—⁠Mateo 11:28-30.

17. Paano dapat magpakita ang mga gulang sing tulad-Cristo nga kaugdang sa ila kaangtanan sa iban sa kongregasyon?

¹⁷ Kon si Cristo nga Lider nagpakita sing kaugdang, ang mga nagapanguna sa kongregasyon labi na gid nga dapat man magpakita sing kaugdang! Huo, nagahalong sila nga indi pag-abusuhan ang awtoridad nga gintugyan sa ila. Kag ‘indi sila dapat magkadto nga may pagkasampaton sang pulong,’ nagatinguha nga magpadayaw sa iban. (1 Corinto 2:​1, 2) Sa baylo, nagapanikasog sila nga ipamulong ang mga Makasulatanhon nga kamatuoran sing simple kag sinsero. Dugang pa, ang mga gulang nagapanikasog nga mangin rasonable sa ila ginapaabot sa iban kag mangin mapatugsilingon sa ila mga kinahanglanon. (Filipos 4:5) Bangod nakahibalo nga ang tanan may mga limitasyon, mahigugmaon nila nga ginabinagbinag ining mga limitasyon kon nagapakig-angot sa ila mga kauturan. (1 Pedro 4:8) Kag indi bala nga makapaumpaw gid ang mga gulang nga mapainubuson kag malulo? Amo gid.

18. Ano ang matun-an sang mga gulang sa kon paano ginpakig-angutan ni Jesus ang mga bata?

¹⁸ Si Jesus madali palapitan, bisan sa mga kubos.  Binagbinaga ang iya sabat sang ginsaway sang iya mga disipulo ang mga tawo bangod sang ‘pagdala sa iya sang mga bata.’ “Pabay-i ninyo ang magagmay nga bata nga magpalapit sa akon,” siling ni Jesus, “dili ninyo tinguhaan nga punggan sila.” Nian “ginkugos niya ang mga bata kag ginpakamaayo sila, nga nagapandong sang iya mga kamot sa ila.” (Marcos 10:13-16) Si Jesus mahigugmaon kag mainayuhon, kag ang iban nabuyok sa iya. Ang mga tawo wala mahadlok kay Jesus. Bisan ang mga bata komportable sa iya. Ang mga gulang madali man palapitan, kag samtang nagapakita sila sing mainit nga pagpalangga kag pagkaayo, ang iban​—⁠bisan ang mga bata​—⁠komportable sa ila.

19. Ano ang nalakip sa pagtigayon sing “hunahuna ni Cristo,” kag ano nga panikasog ang ginakinahanglan sini?

1⁹ Kon tubtob sa ano nga kasangkaron mailog sang mga gulang si Cristo Jesus nagadepende kon daw ano nila sia ka kilala. “Sin-o bala ang nakahibalo sang hunahuna ni Jehova, agod nga matudluan niya sia?” pamangkot ni Pablo. Nian nagsiling pa sia: “Apang may yara kita sang hunahuna ni Cristo.” (1 Corinto 2:16) Ang pagtigayon sing hunahuna ni Cristo nagalakip sang paghibalo sa iya panghunahuna kag sa tanan nga aspeto sang iya personalidad amo nga nahibaluan naton kon ano ang himuon niya sa isa ka partikular nga sitwasyon. Hunahunaa nga makilala sing maayo ang aton Lider! Huo, nagakinahanglan ini sang pagtalupangod sing maayo sa mga rekord sang Ebanghelyo kag sang tayuyon nga pagpuno sa aton hunahuna sing paghangop sa kabuhi kag halimbawa ni Jesus. Kon ang mga gulang manikasog sa pag-ilog sa pagpanguna ni Cristo tubtob sa sina nga kasangkaron, ang kongregasyon mas mahuyog sa pag-ilog sa ila pagtuo. Kag ang mga gulang malipay nga makita ang iban nga nagailog sing malipayon sa mga tikang sang Lider.

Padayon nga Magpasakop sa Pagpanguna ni Cristo

20, 21. Samtang ginahulat naton ang ginsaad nga bag-ong kalibutan, ano dapat ang mangin determinasyon naton?

²⁰ Kinahanglan gid nga magpasakop kita tanan sa pagpanguna ni Cristo. Samtang nagahinampot kita sa katapusan sining sistema sang mga butang, ang aton kahimtangan mapaanggid sa kahimtangan sang mga Israelinhon sa Patag sang Moab sang 1473 B.⁠C.⁠E. Yara na anay sila sa atangan sang Ginsaad nga Duta, kag paagi kay manalagna Moises, ang Dios nagpahayag: “Ikaw [Josue] magadala sa sining katawhan sa duta nga ginsumpa ni Jehova sa ila mga katigulangan nga ihatag sa ila.” (Deuteronomio 31:​7, 8) Si Josue amo anay ang gintangdo nga lider. Agod makasulod sa Ginsaad nga Duta, ang mga Israelinhon dapat magpasakop sa pagpanguna ni Josue.

²¹ Ang Biblia nagasiling sa aton: “Ang inyo lider isa, si Cristo.” Si Cristo lamang ang magapanguna sa aton pasulod sa ginsaad nga bag-ong kalibutan nga sa sini nagapuyo ang pagkamatarong. (2 Pedro 3:13) Busa mangin determinado kita nga magpasakop sa pagpanguna niya sa tanan nga bahin sang kabuhi.

[Nota]

Madumduman Mo Bala?

• Paano ginpangunahan ni Cristo ang unang kongregasyon?

• Paano ginapangunahan ni Cristo ang iya kongregasyon karon?

• Ngaa dapat kita magpasakop sa mga nagapanguna sa kongregasyon?

• Sa anong mga paagi mapakita sang mga gulang nga si Cristo angila Lider?

[Mga Pamangkot sa Pagtinuon]

[Retrato sa pahina 15]

Si Cristo nagapanguna sa iya kongregasyon kag nagauyat sa mga manugtatap sa iya tuo nga kamot

[Mga retrato sa pahina 16]

“Mangin matinumanon sa mga nagapanguna sa tunga ninyo kag mangin mapinasakupon”

[Retrato sa pahina 18]

Si Jesus mahigugmaon kag madali palapitan. Ang Cristianong mga gulang nagapanikasog nga mangin kaangay niya