Kon Paano ang Anak Nagbulig sa Iya Amay

SI James, nga taga-Inglaterra, nga treintahon, may malubha nga diperensia sa hunahuna kag indi grabe nga autism. Apang, sa madamong tinuig nagatambong sia sa mga miting sang mga Saksi ni Jehova kaupod sang iya iloy kag magulang nga babayi. Walay sapayan sini, wala gid magpakita sing interes ang iya amay sa ila pagtuluuhan. Sang isa ka gab-i sa tapos sang isa ka miting nga may pasundayag kon paano agdahon ang isa ka kakilala sa Memoryal sang kamatayon ni Cristo, dalidali nga nagsulod si James sa iya kuwarto. Nabalaka nga ginsundan sia sang iya iloy kag nakita sia nga nagasalasala nga nagabaluskay sang daan nga mga guwa sang Lalantawan kag Magmata! nga mga magasin. Napili niya ang isa nga may imbitasyon sa Memoryal sa katapusan nga pahina kag nagdalidali nga nagkadto sa iya amay. Gintudlo niya una ang laragway kag masunod ang iya amay kag nagsiling “Ikaw!” Nagtulukay ang iya iloy kag amay nga natingala sang nahangpan nila nga ginaagda ni James ang iya amay sa Memoryal. Nagsiling ang iya amay nga basi matambong sia.

Sang gab-i sang Memoryal, nagkadto si James sa aparador sang iya amay, nagkuha sing delargo, gindala ini sa iya amay, kag nagsenyas nga isuksok ini. Nagsiling ang iya amay nga indi sia magtambong. Gani, sila na lang sang iya iloy ang nagkadto sa Kingdom Hall.

Apang sang ulihi, daw nagapaganot na si James kon ginahanda sia sang iya iloy sa pagtambong sa mga miting sa kongregasyon, mas gusto pa niya nga magpabilin sa ila balay upod sa iya amay. Nian sang isa ka Domingo sang aga, nagpaganot gihapon si James sang ginahanda sia sang iya iloy para sa miting. Sa kakibot sang iya iloy, ginsugilanon si James sang iya amay, “James, kon magtambong ako sa miting subong, matambong ka man?” Nagyuhum si James. Ginhakos niya ang iya amay kag nagsiling sing “Huo!” kag nagkadto sila nga tatlo sa Kingdom Hall.

Sugod sadto nga adlaw, padayon nga nagtambong ang amay ni James sa tanan nga miting kon Domingo kag nagsiling sia sang ulihi nga agod mag-uswag, dapat man sia magtambong sa iban pa nga mga miting. (Hebreo 10:​24, 25) Ginhimo niya ini, kag pagligad sang duha ka bulan, nagtuon sia sa Biblia sing regular. Madasig sia nga nag-uswag kag nagbag-o sang iya kabuhi, kag wala madugayi nagsugod sia sa pagpakigbahin sa hilikuton nga pagbantala sang Ginharian. Pagligad sang isa ka tuig sugod sang nagtuon sia sa Biblia, gindedikar niya ang iya kabuhi kay Jehova kag ginsimbuluhan ini paagi sa pagpabawtismo sa tubig. Nagaalagad sia karon subong ministeryal nga alagad sa ila kongregasyon. Nahiusa karon nga nagaalagad kay Jehova ang bug-os nga pamilya.