Sugilanon sang Kabuhi

Pagpatudok sang Gugma kay Jehova sa Tagipusuon sang Amon Kabataan

PANUGIRON NI WERNER MATZEN

Mga pila ka tuig ang nagligad, ginhatagan ako sing Biblia sang akon subang nga lalaki nga si Hans Werner. Ginsulatan niya ang sulod sang hapin: “Pinalangga ko nga Amay, Kabay nga padayon kita nga tuytuyan sang Pulong ni Jehova subong isa ka pamilya sa dalanon sang kabuhi. Nagapasalamat, ang imo subang nga lalaki.” Mahangpan sang mga ginikanan sa sining mga pulong ang akon daku nga pasalamat kag kalipay. Wala gid ako sadto makahibalo kon ano nga sahi sang mga hangkat ang atubangon namon subong isa ka pamilya.

NATAWO ako sang 1924 sa Halstenbek, mga 20 ka kilometro ang kalayuon sa Aleman nga pantalan sang Hamburg, kag ginpadaku ako sang akon iloy kag lolo. Bangod nakatuon sa paghimo sang mga gamit sa makinarya, gintawag ako sang 1942 sa armado nga puwersa sang Wehrmacht. Ang akon naeksperiensiahan sa Bug-os Kalibutan nga Inaway II samtang nagapakig-away sa Rusya tuman ka makakulugmat ilaragway. Nagmasakit ako sing tipos apang ginpabalik sa patag-awayan pagkatapos mabulong. Sang Enero 1945, didto ako sa Lodz, Poland, diin nasamaran ako sing malubha kag ginbulong sa isa ka ospital sang militar. Didto ako sang natapos ang inaway. Sa ospital kag sang ulihi sa prisuhan sang Neuengamme, may tion ako agod makapamalandong. Naligban ako sining mga pamangkot, May Dios gid bala? Kon may yara, ngaa ginatugutan niya ang tuman nga kapintas?

Wala madugay sa tapos ako ginpaguwa sa prisuhan, sang Septiembre 1947, ginpakaslan ko si Karla. Magkasimanwa kami, apang bisan pa  Katoliko si Karla, nagdaku ako nga wala sing relihion. Ang pari nga nagkasal sa amon nagpanugda nga mangadi kami bisan sing Amay Namon kada gab-i nga magkaupod. Ginsunod namon ang iya ginsiling, nga wala sing hinalung-ong kon ano ang amon ginapangamuyo.

Natawo si Hans Werner pagligad sang isa ka tuig. Sadto man nga tion, ginpakilala ako ni Wilhelm Ahrens, nga kaupod ko sa trabaho, sa mga Saksi ni Jehova. Ginpakita niya sa akon gikan sa Biblia nga sa pila ka adlaw madula na ang mga inaway. (Salmo 46:9) Sang tigragas sang 1950, gindedikar ko ang akon kabuhi kay Jehova kag nabawtismuhan. Daw ano ang akon kalipay nga pagligad sang isa ka tuig nabawtismuhan man ang akon pinalangga nga asawa!

Pagpadaku sa Kabataan sa mga Dalanon ni Jehova

Nabasa ko sa Biblia nga si Jehova ang ginhalinan sang pag-asawahay. (Genesis 1:​26-​28; 2:​22-​24) Bangod nasaksihan ko ang pagkabun-ag sang amon mga kabataan​​—⁠sanday Hans Werner, Karl-Heinz, Michael, Gabriele, kag Thomas​​—⁠determinado gid ako nga mangin maayo nga bana kag amay. Nakunyag gid kami ni Karla sa pagkabun-ag sang amon tagsa ka bata.

Ang 1953 nga kombension sang mga Saksi ni Jehova sa Nuremberg isa ka importante gid nga okasyon para sa amon pamilya. Sang Biernes sang hapon, sa pamulongpulong nga “Pagpadaku sa Kabataan sa Bag-ong Kalibutan nga Sosiedad,” indi gid namon malipatan ang ginsiling sang humalambal: “Ang pinakahamili nga mapasubli naton sa aton kabataan amo ang handum nga mangin mga alagad sang Dios.” Amo gid sini ang luyag namon himuon ni Karla sa bulig ni Jehova. Apang paano?

Agod sugdan ini, nangin ugali namon nga mangamuyo sing ululupod subong isa ka pamilya kada adlaw. Nagpatudok ini sa amon kabataan sang pagkaimportante sang pangamuyo. Kutob sa pagkabata, natun-an sang tanan nga bata nga nagapangamuyo kami antes magkaon. Bisan sang lapsag pa sila, kon makita nila ang ila bibiron, ginaduko nila gilayon ang ila mga ulo kag ginatakop ang ila magamay nga mga palad. Isa ka bes, gin-agda kami sa kasal sang paryente sang akon asawa, nga indi Saksi. Pagkatapos sang seremonya, gin-agda sang mga ginikanan sang nobya ang mga bisita sa ila balay para mamahaw. Makaon na tani dayon ang tanan. Apang para sa amon singko anyos nga si Karl-Heinz, indi ini nagakaigo. “Mangamuyo ta anay,” siling niya. Nagtululok ang mga bisita sa iya, nian sa amon, kag sang ulihi sa tagbalay. Agod indi na mangin makahuluya, ako na ang nag-ayo nga pangunahan ang pagpasalamat sa pagkaon paagi sa pangamuyo, kag nagpasugot naman ang tagbalay.

Ang natabo nagpahanumdom sa akon sang  mga pinamulong ni Jesus: “Gikan sa baba sang mga lapsag kag mga nagasuso nag-aman ka sing pagdayaw.” (Mateo 21:16) Sigurado kami nga ang amon regular kag tinagipusuon nga mga pangamuyo nagbulig sa kabataan nga tamdon si Jehova subong ang ila mahigugmaon nga langitnon nga Amay.

Ang Amon Salabton kay Jehova

Ang pagtudlo sa kabataan nga higugmaon ang Dios nagakinahanglan man sing regular nga pagbasa kag pagtuon sa iya Pulong. Ginadumdom ini, may yara kami pamilya nga pagtuon kada semana, sa masami kada Lunes sang gab-⁠i. Bangod siam ka tuig ang antad sang amon subang kag sang amon kinagot, indi palareho ang mga kinahanglanon sang kabataan, gani indi namon pirme matuptupan ang pareho nga materyal upod sa ila tanan.

Halimbawa, para sa amon wala pa nagaeskwela nga kabataan, ginahuptan namon nga simple ang amon pagtudlo. Isa lang ka teksto sa Biblia ang ginabinagbinag ni Karla sa ila, ukon ginagamit niya ang mga laragway sa pasad-sa-Biblia nga mga publikasyon. Madumduman ko pa nga ginapukaw kami anay sang mga bata sing aga pa paagi sa pagtaklas sa amon katre agod ipakita sa amon ang ila paborito nga mga laragway sa libro nga The New World.⁠ *

Nangin mapasensiahon si Karla sa pagtudlo sa kabataan sang madamo nga rason kon ngaa dapat namon tanan higugmaon si Jehova. Daw simple kag kahapos lamang ini pamatian, apang, sa katunayan, sa pisikal kag emosyon halos bug-os tion ini nga trabaho para sa amon ni Karla. Apang, wala kami mangampo. Luyag namon magpatudok sa ila mahumok nga mga tagipusuon antes pa sila maimpluwensiahan sang iban nga tawo nga wala nakakilala kay Jehova. Bangod sini ginapat-od gid namon nga mag-upod na ang amon kabataan sa pagtuon sang pamilya sa gilayon nga makasarang na sila sa pagpungko.

Bilang mga ginikanan, nahibaluan namon ni Karla nga importante gid nga magpahamtang kami sing husto nga halimbawa sa amon mga kabataan may kaangtanan sa pagsimba. Kag nagakaon man kami, nagapanghardin, ukon nagadayandayan, gintinguhaan namon nga pabakuron ang relasyon sang tagsa ka kabataan kay Jehova. (Deuteronomio 6:​6, 7) Ginpat-od gid namon nga ang tagsa ka kabataan may kaugalingon nga Biblia kutob sa lamharon nga edad. Dugang pa, sa tion nga mabaton ang magasin, ginasulatan ko sing ila ngalan ang ila personal nga kopya. Busa natun-an sang kabataan nga makilala ang ila kaugalingon nga mga literatura. Gintangduan namon ang kabataan sing pila ka artikulo sa Magmata! nga basahon nila. Pagkatapos sang amon panyaga sa Domingo, ginapaathag nila sa amon kon ano ang paghangop nila sa materyal.

Paghatag sa Kabataan sang Kinahanglanon Nila nga Atension

Sa pagkamatuod, indi pirme nangin mahapos ang tanan. Samtang nagadaku ang kabataan, natukiban namon nga agod mapatudok ang gugma sa ila tagipusuon, kinahanglan nga hibaluon namon kon ano na ang yara sa ila tagipusuon. Nagakahulugan ini nga dapat namon sila pamatian. Kon kaisa daw may reklamo ang amon kabataan, amo nga nagalingkod kami ni Karla kag ginahambalan ini upod sa ila. Nagdugang kami sing pinasahi nga tunga sa oras sa tapos sang amon pamilya nga pagtuon. Ginatugutan ang tanan nga maghambal kon ano gid ang iya ginabatyag.

Halimbawa, nagbatyag sanday Thomas kag Gabriele, nga amon duha ka manghod nga kabataan, nga paborito namon ang ila magulang nga lalaki. Sa isa ka paghambalanay, ginpabutyag nila ang ila ginabatyag kag nagsiling: “Dad, daw pirme lang ninyo ni Mommy ginapagustuhan si Hans Werner.” Sang primero, daw indi ako makapati sa akon nabatian. Apang, sang ginbinagbinag namon sing maayo ang mga butang, dapat namon batunon ni Karla nga may rason ang mga bata. Gani nagpanikasog pa kami nga pakig-angutan sing alalangay ang kabataan.

Kon kaisa, padasudaso ukon di-makatarunganon ang akon pagsilot sa kabataan. Sa sina nga mga tion dapat naton tun-an nga mga ginikanan ang mangayo sing pasaylo. Pagkatapos sini, nagapangamuyo kami kay Jehova. Importante nga mahibaluan sang kabataan nga ang ila amay handa sa pagpangayo sing pasaylo kay Jehova kag sa  ila, nga amon kabataan. Subong resulta, may yara kami mainit kag mainabyanon nga kaangtanan sa ila. Masami nila ginasiling sa amon, “Kamo ang amon pinakamahirop nga mga abyan.” Nagapahalipay gid ini sa amon.

Ang pagbinuligay subong isa ka pamilya nagapahiusa. Sa sining katuyuan, ang tagsa-tagsa may kaugalingon nga buluhaton sa balay. Si Hans Werner amo ang nagapanindahan sing makaisa sa isa ka semana, kag nagakahulugan ini nga ginahatagan sia sing kuwarta upod ang listahan sang mga balaklon. Sang isa ka semana, wala namon sia mahatagan sing listahan ukon sing kuwarta. Ginpamangkot niya ang iya iloy tuhoy sini, kag ginsugiran sia sang iya iloy nga wala pa kami sing kuwarta. Ti, ang mga kabataan naghinutikay, kag dayon masigkuha sila sang ila alkansiya kag ginhaw-as ini sa lamesa. “Mommy, manindahan na kita!” tuaw nila. Huo, natun-an sang kabataan nga magbulig sa tion sang emerhensia, kag labi ini nga nagpasuod sa amon pamilya.

Samtang nagadaku, ang mga kabataan nagsugod na nga maluyag sa mga babayi. Halimbawa, si Thomas naluyag gid sa isa ka 16-anyos nga Saksi. Ginpaathag ko sa iya nga kon serioso sia sa babayi, dapat nga handa na sia nga pakaslan sia kag mangin responsable sa isa ka asawa kag mga kabataan. Narealisar ni Thomas nga indi pa sia handa mangasawa, kay 18 anyos lamang sia.

Pag-uswag Subong Isa ka Pamilya

Sang lamharon pa sila, sunodsunod sila nga nagpalista sa Teokratikong Eskwelahan Para sa Ministeryo. Ginpamatian namon sing maayo ang ila mga bahin, kag napalig-on kami bangod nakita namon ang tinagipusuon nga gugma sang amon kabataan sa Dios. Ang mga manugtatap sa sirkito kag distrito nga nagadayon kon kaisa sa amon nagasaysay sa amon sang ila mismo mga inagihan ukon ginabasahan kami sing Biblia. Ining mga utod kag ang ila mga asawa nagbulig sa amon pamilya nga mapalambo ang gugma sa bug-os tion nga pag-alagad.

Ginakalangkagan namon ang mga kombension. Nakabulig ini sa amon mga panikasog nga mapatudok sa amon mga kabataan ang handum nga mangin mga alagad sang Dios. Para sa kabataan, isa ini ka pinasahi nga tion samtang ginatakod nila ang ila mga lapel card antes maglakbay pakadto sa duog nga ginahiwatan sang kombension. Natandog gid kami sang nagpabawtismo si Hans Werner sa edad nga napulo. Madamo ang nagsiling nga bata pa sia para magdedikar kay Jehova, apang sa edad nga 50, ginsugiran niya ako nga nagapasalamat gid sia nga nakaalagad na sia kay Jehova sa sulod sang 40 ka tuig.

Ginpakita namon sa amon kabataan nga importante gid ang isa ka personal nga kaangtanan kay Jehova, apang wala namon sila ginpilit nga magdedikar. Walay sapayan sini, nalipay kami sang nag-uswag man ang iban kag nangin handa sila sa bawtismo.

Pagtuon sa Paghaboy sang Amon mga Lulan kay Jehova

Nalipay gid kami sang naggradwar si Hans Werner sang 1971 sa ika-51 nga klase sang Watchtower Bible School of Gilead kag naasayn subong isa ka misyonero sa Espanya. Sing isa-isa, ang iban pa nga kabataan naghinguyang man sing pila ka tion sa bug-os  tion nga ministeryo, nga nagpahalipay gid sa amon subong mga ginikanan. Kag sini nga tion nga ginhatagan ako ni Hans Werner sing Biblia nga ginsambit sa panugod sining artikulo. Daw kompleto na ang amon kalipay subong isa ka pamilya.

Nian natukiban namon nga kinahanglan pa namon nga magsuod gid kay Jehova. Ngaa? Bangod nasaksihan namon ang pila sang amon nagdalagku na nga kabataan nga nakasumalang sing mga problema nga nagtilaw gid sang ila pagtuo. Halimbawa, ang amon pinalangga nga bata nga babayi nga si Gabriele wala maluwas sa mga kapipit-an. Napamana niya si Lothar sing 1976. Nagmasakit si Lothar wala pa lang madugay nga nakasal sila. Samtang nagaluya sia, gin-atipan sia ni Gabriele tubtob mapatay sia. Ang pagtan-aw sa isa ka katapo sang pamilya nga nagamasakit kag mapatay nagpahanumdom sa amon nga kinahanglan gid namon ang mahigugmaon nga kamot ni Jehova.​​—⁠Isaias 33:⁠2.

Mga Pribilehiyo sa Organisasyon ni Jehova

Sang gintangdo ako nga isa ka congregation servant (ginatawag karon nga nagadumala nga manugtatap) sang 1955, nagbatyag ako nga indi pa handa para sa sini nga katungdanan. Madamo sing dapat himuon, kag ang lamang nga paagi agod mahimo ko ang mga hilikuton sa kongregasyon amo ang pagbugtaw sing alas kuwatro sa pila ka kaagahon. Daku gid nga bulig ang akon asawa kag kabataan, kag ginsiguro nila nga indi ako pagdisturbuhon sa gab-i kon may mga dapat pa nga himuon.

Walay sapayan, subong isa ka pamilya, pirme kami nagalingawlingaw nga magkaupod. Kon kaisa ginapahulam ako sang akon amo sang iya salakyan agod malagaw ko ang akon pamilya. Naluyagan gid sang kabataan ang mga tion nga ginatun-an namon Ang Lalantawan sa kagulangan. Naga-hiking man kami, kon kaisa nagakinanta sila samtang nagasilindron ako sa amon pagdayandayan sa kakahuyan.

Sang 1978, gintangdo ako subong salili nga manugtatap sa sirkito (nagalakbay nga ministro). Bangod nahangawa, nangamuyo ako: “Jehova, sa banta ko indi ko ini masarangan. Apang kon luyag mo nga tilawan ko, nian himuon ko ang akon pinakamaayo.” Duha ka tuig sang ulihi, sang 54 anyos ako, gintugyan ko ang akon diutay nga negosyo sa akon kinagot nga lalaki, kay Thomas.

Dalagku na ang amon kabataan, sa amo naghatag ini sa amon ni Karla sing kahigayunan nga manghikot sing kapin pa para kay Jehova. Sadto man nga tuig, gintangdo ako subong manugtatap sa sirkito kag gin-asayn sa isa ka bahin sang Hamburg kag sa bug-os nga Schleswig-Holstein. Bangod sang amon eksperiensia sa pagtatap sa pamilya, nahangpan namon ang kahimtangan sang mga ginikanan kag sang ila kabataan.

Pagkatapos sang napulo ka tuig nga pag-upod sa akon sa hilikuton sa sirkito, nagkinahanglan si Karla sing operasyon. Kag sadto man nga tuig, natukiban sang mga doktor nga may tumor ako sa utok. Busa, nag-untat ako sa akon pag-alagad subong manugtatap sa sirkito kag nagpaopera sa utok. Mga tatlo ka tuig ang nagligad sang gintangdo ako liwat subong salili nga manugtatap sa sirkito. Setentahon na karon kami ni Karla, kag wala na kami sa nagalakbay nga hilikuton. Ginbuligan kami ni Jehova nga mahangpan nga indi maalamon ang magpabilin sa isa ka pribilehiyo nga indi ko na masarangan nga himuon.

Sa paghinumdom, nagapasalamat kami ni Karla kay Jehova sa iya bulig nga napatudok namon ang gugma sa kamatuoran sa mga tagipusuon sang amon kabataan. (Hulubaton 22:6) Sa sulod sang mga tinuig, gintuytuyan kag ginhanas kami ni Jehova, ginbuligan kami sa pagtuman sang amon mga katungdanan. Bisan pa tigulang na kami kag may kasablagan, ang amon gugma kay Jehova mapagsik sa gihapon.​​—⁠Roma 12:​10, 11.

[Nota]

[Retrato sa pahina 26]

Ang amon pamilya, nga nagadayandayan sa higad sang Elbe River, Hamburg, sang 1965

[Retrato sa pahina 28]

Ang pila ka katapo sang pamilya sa internasyonal nga kombension sa Berlin sang 1998

[Retrato sa pahina 29]

Upod sa akon asawa nga si Karla