“Kari sa Akon, . . . kag Paumpawan Ko Kamo”

“Magbuhat Kita sing Maayo sa Tanan”

ANG pagbantala kag pagtudlo sing maayong balita sang Ginharian sang Dios amo ang panguna nga hilikuton ni Jesus. (Marcos 1:14; Lucas 8:1) Sanglit luyag sang mga sumulunod ni Cristo nga ilugon sia, ginatamod nila ang hilikuton nga pagtudlo sing mensahe sang Biblia tuhoy sa Ginharian sang Dios subong ang ila pinakaimportante nga hilikuton sa kabuhi. (Lucas 6:40) Makalilipay gid para sa mga Saksi ni Jehova nga makita kon paano ang mensahe sang Ginharian nagahatag sing dayon nga kaumpawan sa mga nagabaton sini​—⁠kaangay sang si Jesus yari pa sa duta.​—⁠Mateo 11:28-30.

Magluwas sa pagtudlo sang Pulong sang Dios, si Jesus naghimo sing iban pa nga maayong mga buhat, subong sang pagpaayo sa mga masakiton kag pagpakaon sa mga gutom. (Mateo 14:14-21) Sing kaanggid, ginalakipan sang mga Saksi ni Jehova ang ila hilikuton nga pagtudlo sing Biblia sing mga buhat nga nagabulig sa mga tawo nga nagakinahanglan. Sa katunayan, ang Kasulatan nagasangkap sa mga Cristiano “para sa tagsa ka maayong buhat” kag nagalaygay sa ila nga ‘magbuhat sing maayo sa tanan.’​—⁠2 Timoteo 3:​16, 17; Galacia 6:10.

“Nag-abot ang Amon mga Kauturan”

Sang Septiembre 1999, ang Taiwan makahalapay nga ginlinog. Paglipas sang pila ka bulan, ang mabunok kaayo nga ulan kag ang pagdalusdos sang madamo nga yelo nagresulta sa isa sang pinakagrabe nga kinaugali nga mga kalamidad sa maragtas sang Venezuela. Sining karon lang, ang pungsod sang Mozambique ginlambas sang grabe nga mga baha. Sa tatlo ka hitabo, ang mga Saksi ni Jehova gilayon nga nag-abot nga may dala nga pagkaon, tubig, bulong, panapton, tolda, kag gamit sa pagluto para sa mga biktima. Ang mga boluntaryo nga may ikasarang sa pagbulong nagpatindog sing temporaryo nga mga infirmary agod bulngon ang mga nasamad, kag ang boluntaryo nga mga manugpangabudlay sa konstruksion nagpatindog sing bag-ong mga balay para sa mga nadulaan sing puluy-an.

Natandog gid ang mga biktima sa suno-sa-tion nga bulig nga nabaton nila. “Sang nadulaan na gid kami sing paglaum, nag-abot ang amon mga kauturan,” siling ni Malyori, nga ang iya puluy-an naguba sang nagdalusdos nga yelo sa Venezuela. Sa tapos mapatindog  sang mga boluntaryo ang bag-ong puluy-an para sa iya pamilya, si Malyori nagtuaw: “Nagapasalamat gid kami kay Jehova bangod sang tanan nga ginhimo niya sa amon!” Kag sang nabaton sang mga biktima sang baha sa Mozambique ang yabi sang ila bag-ong natukod nga mga puluy-an, ang bug-os nga grupo hinali nga nag-amba sing ambahanon sang Ginharian nga “Si Jehova ang Aton Dalangpan.”⁠ *

Makapapagsik man para sa mga boluntaryo nga mabuligan ang mga nagakinahanglan. “Nalipay gid ako sa pagbulig sa sining mga kauturan nga nag-antos sing daku,” komento ni Marcelo, nga nag-alagad subong nars sa isa ka kampo nga dalangpan sa Mozambique. Si Huang, nga isa ka boluntaryo sa Taiwan, nagkomento: “Nalipay gid ako nga makabulig sa pagdul-ong sing pagkaon kag mga tolda sa mga kauturan nga nagakinahanglan. Makapabakod ini sing pagtuo.”

Ang Isa ka Programa sa Pagboluntaryo nga May mga Resulta

Ang boluntaryo nga hilikuton naghatag man sing espirituwal nga kaumpawan sa linibo ka bilanggo sa bug-os nga kalibutan. Paano? Sining ulihi nga mga tinuig, ang mga Saksi ni Jehova nag-aman sing mga literatura pasad sa Biblia sa kapin sa 30,000 ka indibiduwal nga nabilanggo sa mga 4,000 ka bilangguan sa Estados Unidos lamang. Dugang pa, kon mahimo, ang mga Saksi nagaduaw sa mga bilangguan agod magtuon sing Biblia upod sa mga bilanggo kag magdumala sing Cristianong mga miting. Nakabenepisyo bala ang mga bilanggo?

Ginpaambit sang pila ka bilanggo nga nagtuon sa Biblia ang makapaumpaw nga mga panudlo sang Pulong sang Dios sa ila kaupod nga mga bilanggo. Subong resulta, sa pila ka bilangguan sa bug-os nga kalibutan may mga grupo na karon sang mga bilanggo nga nagasimba kay Jehova. “Ang amon grupo nagadamo,” report sang isa ka bilanggo sa Oregon, E.⁠U.⁠A., sang 2001. “May yara kami 7 ka manugbantala sang Ginharian kag 38 ka pagtuon sa Biblia. Kapin sa 25 ka tawo ang nagatambong sa pamulongpulong publiko kag Pagtinuon sa Lalantawan, kag 39 ang nagtambong sa Memoryal [sang kamatayon ni Cristo]. Tatlo pa ka tawo ang bawtismuhan sa indi madugay!”

Mga Benepisyo kag mga Kalipay

Nakita sang mga opisyales sang bilangguan nga ining programa sang mga boluntaryo may mga resulta. Nagadayaw gid ang mga opisyales sa nagadugay nga benepisyo sining programa sang mga boluntaryo. Ang isa ka report nagasiling: “Sa sulod sang napulo ka tuig nga pagpanghikot sining programa, wala sing isa ka ginpaguwa nga bilanggo nga ginbawtismuhan sa bilangguan subong isa sang mga Saksi ni Jehova ang nagbalik sa bilangguan​—⁠kon ipaanggid sa 50-60 porsiento nga kataason sang nagbalik sa iban nga mga grupo.” Bangod napahulag sang mga resulta nga natigayon sang Saksi nga mga boluntaryo, ang isa ka pari sang bilangguan sa Idaho nagsulat sa bug-os kalibutan nga ulong-talatapan sang mga Saksi ni Jehova, nga nagasiling: “Bisan pa wala ako nagaugyon sa inyo panudlo, nagadayaw gid ako sa inyo organisasyon.”

Ang pagbulig sa mga bilanggo makapaladya man para sa mga boluntaryo. Sa tapos magdumala sing miting upod sa isa ka grupo sang mga bilanggo nga nag-amba sing ambahanon sang Ginharian sa nahauna nga tion, ang isa ka boluntaryo nagsulat: “Makapalig-on gid nga makita ang 28 ka tawo nga nagabuylog sa pag-amba sing pagdayaw kay Jehova. Kag nag-amba sila sing mabaskog! Isa gid ka pribilehiyo nga makatambong sa sini nga okasyon!” Ang isa ka boluntaryo nga nagaduaw sa mga bilangguan sa Arizona nagsiling: “Isa gid ka pagpakamaayo nga makapakigbahin sa sining pinasahi nga hilikuton!”

Ang Saksi nga mga boluntaryo sa bug-os nga kalibutan nagaugyon gilayon kay Jesus, nga nagsiling: “May kapin nga kalipay sa paghatag sangsa pagbaton.” (Binuhatan 20:35) Ginapamatud-an man nila nga ang pagsunod sa laygay sang Biblia nga maghimo sing maayo sa tanan makapaumpaw gid.​—⁠Hulubaton 11:25.

[Nota]

[Retrato sa pahina 8]

Venezuela

[Retrato sa pahina 8]

Taiwan

[Retrato sa pahina 8]

Mozambique