Dapat Ka Bala Magpulupatawhay?

ANG kalabanan nga mga tawo mahimo magbatyag nga kadayawan sang isa nga hunahunaon sia sang iban subong isa nga nagapulupatawhay, relaks, hipuson, matinuguton nga tawo. Apang, may yara isa pa ka bahin ang pagpatawhay. Ang Biblia nagasiling: “Ang pagpulupatawhay sang mga buangbuang magalaglag sa ila.” (Hulubaton 1:32) Ano ang buot silingon sini?

Ang iban nga mga bersion sang Biblia nagbadbad sining orihinal nga Hebreo nga tinaga subong nga “wala nagapalibog” (American Standard Version), “kontento na lang sa kaugalingon” (The New American Bible), kag “kampante.” (The New English Bible) Sa sining kahulugan, ang pagpatawhay naangot sa pagkatamad kag pagpabaya kag sa amo sa pagkabalingag ukon kabuangan.

Sang unang siglo, ang mga Cristiano sa Laodicea wala sing hinalung-ong ukon kampante sa ila mga kaluyahon sa espirituwal. Nagpahambog sila nga “wala [sila] nagakinahanglan sing bisan ano.” Gintadlong sila ni Jesucristo agod ipasag-uli ang ila Cristianong kakugi.​​—⁠Bugna 3:​14-​19.

Ang pagkakampante kinaiya man sang katawhan sang adlaw ni Noe. Masako gid sila sa ila kalibutanon nga pagkabuhi, “nagakaon kag nagainom, ang mga lalaki nagapangasawa kag ang mga babayi ginahatag sa pag-asawahay . . . , kag wala sila magsapak tubtob nga nag-abot ang anaw kag nag-anod sa ila nga tanan.” Nian si Jesus nagdugang: ‘Amo man sa presensia sang Anak sang tawo.’​​—⁠Mateo 24:37-​39.

Ang natuman nga mga tagna sang Biblia nagapamatuod nga nagakabuhi kita sa tion sang “presensia sang Anak sang tawo,” nga si Jesucristo. Kabay nga dili gid kita mangin kampante, wala nagasapak, kontento na lang sa kaugalingon​​—⁠nagapulupatawhay sa sayop nga kahulugan.​​—⁠Lucas 21:29-​36.