“Hupti nga Maayo ang Inyo Paggawi sa Tunga sang mga Pungsod”
“Hupti nga Maayo ang Inyo Paggawi sa Tunga sang mga Pungsod”
“Padunggi ang tanan nga sahi sang mga tawo, higugmaa ang bug-os nga katilingban sang mga kauturan.”—1 PEDRO 2:17.
1, 2. (a) Ano ang ginkomento sang isa ka manunulat sa pamantalaan tuhoy sa mga Saksi ni Jehova? (b) Ngaa nagatinguha ang mga Saksi ni Jehova sa paghupot sing mataas nga mga talaksan sang paggawi?
SANG nagligad nga pila ka tuig, ang isa ka manunulat sa pamantalaan sa Amarillo, Texas, E.U.A., nagduaw sa nanuhaytuhay nga mga simbahan didto kag ginreport niya ang iya mga natukiban. Isa ka grupo ang nakita niya nga tuhay gid. Sia nagsiling: “Sa sulod sang tatlo ka tuig, nagtambong ako sa tuigan nga mga kombension sang mga Saksi ni Jehova sa Amarillo Civic Center. Sa akon pagpakig-upod sa ila, wala gid ako sing nakita nga nagasindi sing sigarilyo, nagabukas sing lata sang serbesa, ukon nagapamuyayaw. Sila ang pinakamatinlo, pinakamaayo maggawi, pinakamaugdang mamayo, pinakamabuot nga mga tawo nga nasumalang ko.” Kaanggid man sini nga mga komento tuhoy sa mga Saksi ni Jehova ang masami ginabalhag. Ngaa pirme ginadayaw ang mga Saksi sang mga tawo nga indi nila karelihion?
2 Sa masami, ang katawhan sang Dios ginadayaw bangod sang ila maayo nga paggawi. Samtang ang mga talaksan sa kabilugan naganubo, ginatamod sang mga Saksi ni Jehova ang mataas nga mga talaksan sang paggawi subong isa ka obligasyon, isa ka bahin sang ila pagsimba. Nahibaluan nila nga ang ila mga aksion may epekto kay Jehova kag sa ila Cristianong kauturan kag nga ang ila maayo nga paggawi nagarekomendar sang kamatuoran nga ila ginabantala. (Juan 15:8; Tito 2:7, 8) Tan-awon naton, karon, kon paano naton mahuptan ang aton maayo nga paggawi kag sa amo padayon nga matib-ong naton ang maayo nga reputasyon ni Jehova kag sang iya mga Saksi kag kon paano kita makabenepisyo sa paghimo sini.
Ang Cristianong Pamilya
3. Gikan sa ano dapat amligan ang Cristiano nga mga pamilya?
3 Binagbinaga ang aton paggawi sa sulod sang pamilya. Ang libro nga Die Neuen Inquisitoren: Religionsfreiheit und Glaubensneid (The New Inquisitors: Freedom of Religion and Religious Envy), nanday Gerhard Besier kag Erwin K. Scheuch, nagasiling: “Para [sa mga Saksi ni Jehova] ang pamilya isa ka butang nga dapat gid amligan.” Matuod ini, kag sa karon ang mga pamilya kinahanglan nga amligan batok sa madamo nga katalagman. May mga kabataan nga “malalison sa mga ginikanan” kag mga hamtong nga “wala sing kinaugali nga gugma” ukon “wala sing pagpugong sa kaugalingon.” (2 Timoteo 3:2, 3) Nagakatabo sa mga pamilya ang pagpamintas sa tiayon, ginaabusuhan ukon ginapatumbayaan sang mga ginikanan ang ila mga anak, kag ang mga kabataan nagarebelde, nagakadalahig sa pag-abuso sa droga kag imoralidad, ukon nagalayas. Resulta ini tanan sang malaglagon nga impluwensia sang ‘espiritu sang kalibutan.’ (Efeso 2:1, 2) Dapat naton amligan ang aton pamilya batok sa sini nga espiritu. Paano? Paagi sa pagsunod sa laygay kag instruksion ni Jehova para sa mga katapo sang pamilya.
4. Ano ang mga salabton sang mga katapo sang Cristiano nga pamilya sa isa kag isa?
4 Ginakilala sang Cristiano nga mga mag-asawa nga may yara sila emosyonal, espirituwal, kag pisikal nga mga obligasyon sa isa kag isa. (1 Corinto 7:3-5; Efeso 5:21-23; 1 Pedro 3:7) Ang Cristiano nga mga ginikanan may mabug-at nga mga salabton sa ila mga anak. (Hulubaton 22:6; 2 Corinto 12:14; Efeso 6:4) Kag samtang nagadaku ang mga kabataan sa Cristiano nga mga puluy-an, nahibaluan nila nga may mga obligasyon man sila. (Hulubaton 1:8, 9; 23:22; Efeso 6:1; 1 Timoteo 5:3, 4, 8) Ang pagtuman sang mga obligasyon sa pamilya nagakinahanglan sing panikasog, determinasyon, kag sing mahigugmaon kag masinakripisyuhon nga espiritu. Apang, sa kasangkaron nga ginatuman sang tanan nga katapo sang pamilya ang ila hinatag sang Dios nga mga obligasyon, sa sina man nga kasangkaron mangin pagpakamaayo sila sa isa kag isa kag sa kongregasyon. Kapin pa ka importante, ginapadunggan nila ang Ginhalinan sang pamilya, si Jehova nga Dios.—Genesis 1:27, 28; Efeso 3:15.
Ang Cristianong Paghiliutod
5. Ano nga mga pagpakamaayo ang ginabaton naton gikan sa pagpakig-upod sa mga masigka-Cristiano?
5 Subong mga Cristiano, may mga salabton man kita sa mga masigkatumuluo sa kongregasyon kag, sa mga nagahuman sang “bug-os nga katilingban sang . . . mga utod sa kalibutan.” (1 Pedro 5:9) Ang aton kaangtanan sa kongregasyon importante gid para sa aton espirituwal nga kapagros. Kon nagapakig-upod kita sa aton mga masigka-Cristiano, mabatyagan naton ang ila makapalig-on nga pagpakig-upod subong man nagabaton kita sing makapabaskog nga espirituwal nga pagkaon gikan sa “matutom kag mainandamon nga ulipon.” (Mateo 24:45-47) Kon may mga problema kita, makapalapit kita sa aton mga kauturan agod mangayo sing maayo nga mga laygay nga napasad sa mga prinsipio gikan sa Kasulatan. (Hulubaton 17:17; Manugwali 4:9; Santiago 5:13-18) Kon nagakinahanglan kita sing bulig, wala kita ginabiyaan sang aton mga kauturan. Isa gid ka pagpakamaayo nga mangin bahin sang organisasyon sang Dios!
6. Paano ginpakita ni Pablo nga may mga salabton kita sa iban nga mga Cristiano?
6 Apang, wala kita nagapakig-upod sa kongregasyon agod lamang magbaton; dapat man kita maghatag. Sa pagkamatuod, si Jesus nagsiling: “May kapin nga kalipay sa paghatag sangsa pagbaton.” (Binuhatan 20:35) Ginpadaku ni apostol Pablo ang pagkamahinatagon sang nagsulat sia: “Huptan naton sing malig-on ang dayag nga pagpahayag sang aton paglaum nga indi mationg, kay matutom sia nga nagsaad. Kag binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang ginatan-aw ninyo nga nagapalapit ang adlaw.”—Hebreo 10:23-25.
7, 8. Paano kita nagapakita sing pagkamahinatagon sa sulod sang aton kongregasyon kag sa mga Cristiano sa iban nga kadutaan?
7 Sa sulod sang kongregasyon, ‘ginapahayag naton ang aton paglaum’ kon nagakomento kita sa tion sang miting ukon nagapakigbahin sa iban nga mga paagi sa programa. Nagapalig-on gid ini sa aton mga kauturan. Ginapalig-on man naton sila paagi sa aton pagpakighambal sa ila antes kag sa tapos sang miting. Tion ini nga mapalig-on naton ang maluya, malugpayan ang ginapung-awan, kag mapapagsik ang nagamasakit. (1 Tesalonica 5:14) Ang sinsero nga mga Cristiano maalwan sa sini nga sahi sang paghatag, amo kon ngaa madamo gid sang mga nagatambong sa aton mga miting sa una nga tion ang nagadayaw sa gugma nga ila matalupangdan sa tunga naton.—Salmo 37:21; Juan 15:12; 1 Corinto 14:25.
8 Apang, ang aton gugma indi lamang sa aton kongregasyon dapat ipakita. Ginalakip sini ang bug-os nga katilingban sang aton mga kauturan sa bug-os nga kalibutan. Amo kon ngaa, halimbawa, may yara isa ka kahon alamutan para sa Kingdom Hall Fund sa tagsa ka Kingdom Hall. Mahimo nga maayo ang kahimtangan sang aton Kingdom Hall, apang nahibaluan naton nga linibo sang aton mga masigka-Cristiano sa iban nga mga pungsod ang wala sing nagakaigo nga duog nga matipunan. Kon nagaamot kita sa Kingdom Hall Fund, ginapakita naton ang aton gugma sa sini nga mga indibiduwal bisan pa indi naton sila kilala sing personal.
9. Sa anong sadsaran nga rason nga nagahigugmaanay ang mga Saksi ni Jehova?
9 Ngaa nagahigugmaanay ang mga Saksi ni Jehova? Bueno, ginsugo sila ni Jesus nga himuon ini. (Juan 15:17) Kag ang gugma nga ginapakita nila sa isa kag isa nagapamatuod nga ang espiritu sang Dios nagapanghikot sa ila subong mga indibiduwal kag subong isa ka grupo. Ang gugma isa ka bahin sang “bunga sang espiritu.” (Galacia 5:22, 23) Samtang ang mga Saksi ni Jehova nagatuon sang Biblia, nagatambong sa Cristianong mga miting, kag pirme nagapangamuyo sa Dios, ang gugma daw kinaugali na lamang sa ila walay sapayan nga nagapuyo sila sa isa ka kalibutan diin ‘ang gugma sang kalabanan nagbugnaw.’—Mateo 24:12.
Pagpakig-angot sa Sekular nga Kalibutan
10. Ano ang salabton naton sa sekular nga kalibutan?
10 Ang pagsambit ni Pablo sa “dayag nga pagpahayag sang aton paglaum” nagapahanumdom sa aton sang isa pa ka salabton. Ining dayag nga pagpahayag nagalakip sang hilikuton sa pagbantala sing maayong balita sa mga tawo nga indi pa naton Cristianong kauturan. (Mateo 24:14; 28:19, 20; Roma 10:9, 10, 13-15) Ini nga pagbantala isa ka dugang pa nga buhat sang paghatag. Agod makapakigbahin sa sini, kinahanglan ang tion, kusog, paghanda, paghanas, kag paggamit sang personal nga manggad. Apang, nagsulat man si Pablo: “May utang ako sa mga Griego kag sa mga Barbaro, sa mga maalam kag sa mga buangbuang: gani ginahandum ko gid nga iwali ang maayong balita sa inyo man nga yara sa Roma.” (Roma 1:14, 15) Kaangay ni Pablo, kabay nga indi kita mangin kuripot sa pagbayad sini nga “utang.”
11. Anong duha ka prinsipio pasad sa Kasulatan ang nagagiya sang aton kaangtanan sa kalibutan, apang ano ang ginakilala naton walay sapayan sini?
11 May iban pa bala kita nga mga salabton sa mga tawo nga indi naton mga masigkatumuluo? Huo. Sa pagkamatuod, ginakilala naton nga “ang bug-os nga kalibutan yara sa gahom sang isa nga malauton.” (1 Juan 5:19) Nahibaluan naton nga si Jesus nagsiling tuhoy sa iya mga disipulo: “Indi sila bahin sang kalibutan, subong nga ako indi bahin sang kalibutan.” Sa gihapon, nagapuyo kita sa kalibutan, nagapangabuhi diri, kag nagabaton sing mga serbisyo gikan sa sini. (Juan 17:11, 15, 16) Gani may obligasyon kita sa sekular nga kalibutan. Ano ini? Ginsabat ni apostol Pedro ini nga pamangkot. Antes malaglag ang Jerusalem, nagpadala sia sing sulat sa mga Cristiano sa Asia Minor, kag ang isa ka dinalan sa sini nga sulat nagabulig sa aton agod makatigayon kita sing balanse nga kaangtanan sa kalibutan.
12. Sa anong paagi ang mga Cristiano “mga dumuluong kag temporaryo nga mga pumuluyo,” kag subong amo sini, gikan sa ano dapat sila maglikaw?
12 Una, si Pedro nagsiling: “Mga hinigugma, hanuot nga nagalaygay ako sa inyo subong mga dumuluong kag temporaryo nga mga pumuluyo nga magpadayon kamo sa paglikaw sa undanon nga mga kailigbon, nga amo gid ang nagapakig-away batok sa kalag.” (1 Pedro 2:11) Ang matuod nga mga Cristiano, sa espirituwal nga kahulugan, “mga dumuluong kag temporaryo nga mga pumuluyo” bangod ang ila gid ginahimulatan sa kabuhi amo ang ginalauman nga kabuhi nga walay katapusan—sa langit para sa mga hinaplas sang espiritu kag sa palaabuton nga dutan-on nga paraiso para sa “iban nga mga karnero.” (Juan 10:16; Filipos 3:20, 21; Hebreo 11:13; Bugna 7:9, 14-17) Apang, ano ang undanon nga mga kailigbon? Nagalakip ini sang mga butang subong sang handum nga magmanggaranon, handum nga mangin bantog, imoral nga seksuwal nga mga handum, kag ang mga handum nga ginlaragway subong “kahisa” kag “pagkamahamkunon.”—Colosas 3:5; 1 Timoteo 6:4, 9; 1 Juan 2:15, 16.
13. Paano ang undanon nga mga kailigbon “nagapakig-away batok sa [aton] kalag”?
13 Ini nga mga handum “nagapakig-away [gid] batok sa [aton] kalag.” Ginapaluya sini ang aton kaangtanan sa Dios kag gani ginabutang sa katalagman ang aton Cristianong paglaum (ang aton “kalag,” ukon kabuhi). Halimbawa, kon palambuon naton ang interes sa imoral nga mga butang, paano naton mapresentar ang aton kaugalingon subong “isa ka halad nga buhi, balaan, kalahamut-an sa Dios”? Kon mahulog kita sa siod sang materyalismo, paano naton ‘mapangita anay ang ginharian’? (Roma 12:1, 2; Mateo 6:33; 1 Timoteo 6:17-19) Ang mas maayo nga dalanon amo ang pagsunod sa halimbawa ni Moises, talikdan ang mga panghaylo sang kalibutan, kag unahon sa aton kabuhi ang pag-alagad kay Jehova. (Mateo 6:19, 20; Hebreo 11:24-26) Isa ini ka importante nga butang agod makatigayon kita sing isa ka balanse nga kaangtanan sa kalibutan.
‘Hupti ang Maayo nga Paggawi’
14. Ngaa, subong mga Cristiano, nagatinguha kita nga huptan ang maayong paggawi?
14 Ang isa pa ka importante nga panuytoy masapwan sa masunod nga mga pulong ni Pedro: “Hupti nga maayo ang inyo paggawi sa tunga sang mga pungsod, agod nga sa butang nga ginahambal nila batok sa inyo subong mga malauton, himayaon nila ang Dios sa adlaw sang iya pag-usisa bangod sang inyo maayong mga buhat nga ila mismo nakita.” (1 Pedro 2:12) Subong mga Cristiano, nagatinguha kita nga mangin halimbawa. Sa eskwelahan nagatuon kita sing maayo. Sa aton ginaobrahan, mapisan kita kag bunayag—bisan pa daw indi rasonable ang aton amo. Sa isa ka nabahinbahin nga panimalay, ang tumuluo nga bana ukon asawa nagahimo sing pinasahi nga panikasog sa pagsunod sa Cristianong mga prinsipio. Indi ini mahapos pirme, apang nahibaluan naton nga nahamuot si Jehova sa aton huwaran nga paggawi kag masami nga may maayo ini nga epekto sa mga indi Saksi.—1 Pedro 2:18-20; 3:1.
15. Paano naton nahibaluan nga ang mataas nga talaksan sang paggawi sang mga Saksi ni Jehova ginakilala sing lapnag?
15 Ang kadalag-an sang kalabanan sang mga Saksi ni Jehova sa paghupot sing huwaran nga mga talaksan makita sa mga komento tuhoy sa ila nga ginbalhag sa nagligad nga mga tinuig. Halimbawa, ang Il Tempo sang Italya nagreport: “Ang mga tawo nga may katrabaho nga mga Saksi ni Jehova nagalaragway sa ila subong bunayag nga mga trabahador, kumbinsido gid sa ila pagtuo amo nga daw panatiko sila tan-awon; apang, talahuron sila bangod sang ila integridad sa kon ano ang husto.” Ang Herald sang Buenos Aires, Argentina, nagsiling: “Ginapamatud-an sang mga Saksi ni Jehova sa sulod sang mga tinuig nga sila mapisan, serioso, makinuton, kag mahinadlukon sa Dios nga mga banwahanon.” Ang Ruso nga iskolar nga si Sergei Ivanenko nagsiling: “Kilala ang mga Saksi ni Jehova sa bug-os nga kalibutan subong masinulundon sa kasuguan nga mga tawo kag ilabi na bangod bunayag sila sa pagbayad sing mga buhis.” Ang manedyer sang isa ka pasilidad sa Zimbabwe nga gingamit sang mga Saksi ni Jehova para sa ila kombension nagsiling: “Nakita ko ang pila ka Saksi nga nagapamulot sing mga papel kag nagapaninlo sa mga kasilyas. Ang duog nga ginahiwatan sang mga palaguwaon ginbiyaan nga mas matinlo kay sang una. Ang inyo mga tin-edyer may prinsipio. Ginahandum ko nga kuntani ang bug-os nga kalibutan puno sing mga Saksi ni Jehova.”
Cristianong Pagpasakop
16. Ano ang aton kaangtanan sa sekular nga mga awtoridad, kag ngaa?
16 Naghambal man si Pedro tuhoy sa aton kaangtanan sa sekular nga mga awtoridad. Sia nagsiling: “Tungod sa Ginuo magpasakop kamo sa tagsa ka binuhatan sang tawo: bisan sa hari man subong amo ang labaw ukon sa mga gobernador subong amo ang ginpadala niya sa pagsilot sa mga nagahimo sing malaut apang sa pagdayaw sa mga nagahimo sing maayo. Kay ang kabubut-on sang Dios amo, nga paagi sa paghimo sing maayo pahipuson ninyo ang walay nahibal-an nga mga hambal sang di-makatarunganon nga mga tawo.” (1 Pedro 2:13-15) Ginaapresyar naton ang mga benepisyo nga ginabaton gikan sa mahim-ong nga gobierno, kag subong pagsunod sa mga pulong ni Pedro, ginatuman naton ang mga kasuguan sini kag nagabayad kita sang aton mga buhis. Samtang ginakilala naton ang hinatag sang Dios nga kinamatarong sang mga gobierno sa pagsilot sa mga nagalapas sa kasuguan, ang una nga rason nga nagapasakop kita sa sekular nga awtoridad amo nga “tungod sa Ginuo.” Kabubut-on ini sang Dios. Dugang pa, indi naton luyag nga pakahuy-an ang ngalan ni Jehova paagi sa pagsilot sa aton bangod nakahimo kita sing sala.—Roma 13:1, 4-7; Tito 3:1; 1 Pedro 3:17.
17. Kon ginapamatukan kita sang “di-makatarunganon nga mga tawo,” sa ano kita makasalig?
17 Makapasubo nga ginahingabot kita ukon ginapamatukan sa pila ka paagi sang pila ka “di-makatarunganon nga mga tawo” sa awtoridad—subong sang pagsakdag sa mga kampanya nga nagapakalain sa aton. Apang, sa ginatalana nga tion ni Jehova, ang ila mga kabutigan pirme mabuyagyag, kag ang ila “walay nahibal-an nga mga hambal” ginapahipos. Ang aton rekord sang Cristianong paggawi nagapamatuod nga matuod ang aton ginahambal. Amo kon ngaa pirme kita ginadayaw sang bunayag nga mga opisyales sang gobierno subong mga nagahimo sing maayo.—Roma 13:3; Tito 2:7, 8.
Mga Ulipon sang Dios
18. Subong mga Cristiano, sa anong mga paagi malikawan naton ang pag-abuso sa aton kahilwayan?
18 Si Pedro nagapaandam karon: “Mangin subong sang hilway nga mga tawo, apang ginagamit ang inyo kahilwayan, indi subong tabon sa kalainan, kundi subong mga ulipon sang Dios.” (1 Pedro 2:16; Galacia 5:13) Sa karon, ang aton ihibalo sa kamatuoran sang Biblia nagahilway sa aton gikan sa butig nga mga panudlo sang relihion. (Juan 8:32) Dugang pa, may kahilwayan kita sa pagdesisyon, kag makapili kita kon ano ang luyag naton. Apang, wala naton ginaabusuhan ang aton kahilwayan. Kon nagapili kita sing mga kaupod, panapton, pagpamustura, kalingawan—bisan sing pagkaon kag ilimnon—ginadumdom naton nga ang matuod nga mga Cristiano mga ulipon sang Dios, nga wala nagapahamuot sa ila kaugalingon. Ginapili naton nga mag-alagad kay Jehova sa baylo nga mangin mga ulipon sang aton undanon nga mga kailigbon ukon sang mga uso kag mga huyog sang kalibutan.—Galacia 5:24; 2 Timoteo 2:22; Tito 2:11, 12.
19-21. (a) Paano naton ginatamod ang mga may katungdanan sa sekular nga awtoridad? (b) Paano ang iban nagpakita sing ‘gugma sa bug-os nga katilingban sang mga kauturan’? (c) Ano ang aton labing importante nga salabton?
19 Nagpadayon si Pedro sa pagsiling: “Padunggi ang tanan nga sahi sang mga tawo, higugmaa ang bug-os nga katilingban sang mga kauturan, kahadluki ang Dios, padunggi ang hari.” (1 Pedro 2:17) Sanglit ginatugutan ni Jehova nga Dios ang mga tawo nga magpungko sa nanuhaytuhay nga mga posisyon sang awtoridad, nagapakita kita sa sini nga mga tawo sing nagakaigo nga dungog. Nagapangamuyo pa gani kita tuhoy sa ila, sa katuyuan nga tugutan nila kita nga mapadayon naton ang aton ministeryo nga may paghidait kag diosnon nga debosyon. (1 Timoteo 2:1-4) Apang, sa amo man nga tion, may ‘gugma kita sa bug-os nga katilingban sang mga kauturan.’ Pirme kita nagapanghikot para sa kaayuhan, indi sa kahalitan, sang aton Cristianong kauturan.
20 Halimbawa, sang matunga ang isa ka pungsod sa Aprika bangod sang pagpamintas sa tunga sang magkatuhay nga mga tribo, talalupangdon gid ang Cristianong paggawi sang mga Saksi ni Jehova. Ang pamantalaan nga Reformierte Presse sang Switzerland nagreport: ‘Sang 1995, napamatud-an sang isa ka organisasyon para sa mga kinamatarong sang tawo sa Aprika nga nakigbahin ang tanan nga relihion sa inaway luwas sa mga Saksi ni Jehova.’ Sang mabalitaan ining malain nga natabo, ang mga Saksi ni Jehova sa Europa maabtik nga nagpadala sing mga pagkaon kag medikal nga bulig sa ila mga kauturan kag sa iban pa sa sining naapektuhan nga pungsod. (Galacia 6:10) Ginsunod nila ang ginasiling sang Hulubaton 3:27: “Indi pagpunggi ang maayo gikan sa ila nga nagakadapat sa sini, kon ini yara sa gahom sang imo kamot nga himuon ini.”
21 Apang, may yara mas importante pa nga salabton sangsa pagpadungog nga dapat naton ipakita sa bisan ano nga sekular nga awtoridad kag bisan sa gugma nga dapat naton ipakita sa aton kauturan. Ano ini? Si Pedro nagsiling: “Kahadluki ang Dios.” Mas daku ang obligasyon naton kay Jehova sangsa bisan sin-o nga tawo. Paano ini matuod? Kag paano naton mabalanse ang aton mga obligasyon sa Dios sa mga obligasyon naton sa sekular nga mga awtoridad? Ini nga mga pamangkot pagasabton sa masunod nga artikulo.
Madumduman Mo Bala?
• Ano ang mga salabton sang mga Cristiano sa sulod sang pamilya?
• Paano naton mapakita ang pagkamahinatagon sa sulod sang kongregasyon?
• Ano ang aton mga salabton sa sekular nga kalibutan?
• Ano ang pila ka benepisyo bangod sang aton paghupot sing mataas nga talaksan sang paggawi?
[Mga Pamangkot sa Pagtinuon]
[Retrato sa pahina 9]
Paano ang Cristianong pamilya makahatag sing daku nga kalipay?
[Mga retrato sa pahina 10]
Ngaa nagahigugmaanay ang mga Saksi ni Jehova?
[Mga retrato sa pahina 10]
Makapakita bala kita sing gugma sa aton kauturan bisan pa indi naton sila kilala sing personal?
