Mga Pamangkot Gikan sa mga Bumalasa

Sayop bala ang pagpanahor bisan sinentimos lang ang pusta?

Indi detalyado ang pagpaathag sang Pulong sang Dios tuhoy sa pagpanahor, apang bastante na ang ginasiling sini agod ipakita nga ang tanan nga sahi sang pagpanahor supak sa mga prinsipio sang Biblia.⁠ * Halimbawa, nahibaluan na gid nga ang pagpanahor nagapukaw sang kakagod. Ini mismo nga katunayan importante nga binagbinagon sang mga Cristiano, bangod ang Biblia nagasiling nga ang “mga tawo nga sakon” indi makapanubli sang Ginharian sang Dios kag nag-angot sang pagkamahamkunon sa idolatriya.​—⁠1 Corinto 6:​9, 10; Colosas 3:5.

Ginapukaw man sang pagpanahor ang egotismo kag di-maayo nga espiritu sang pagpaindis-indis, ang isa ka mabaskog nga handum nga magdaug. Si apostol Pablo nagpaandam batok sa sining mga butang sang sia nagsulat: “Indi kita magmangin bugalon, nga nagasulsol sang pagpaindisanay, nga nagahinisaay.” (Galacia 5:26) Dugang pa, ang pagpanahor nagapalig-on sa pila nga magsalig sa disparatis tuhoy sa swerte. Ginagamit sang mga tahor ang tanan nga sahi sang disparatis, nagalaum nga mangin dibuenas sila. Ginapahanumdom nila sa aton ang di-matutom nga mga Israelinhon nga “nagaaman sing lamesa para sa dios sang Suwerte kag nagabubo sing nasimbugan nga alak para sa dios sang Kapalaran.”​​—⁠Isaias 65:11.

Ang pila mahimo mangatarungan nga ang pagpusta sing sinentimos samtang nagahampang sang baraha ukon mga board game upod sa mga paryente ukon suod nga mga abyan isa lamang ka di-makahalalit nga kalingawan. Matuod, ang isa nga nagapusta sing sinentimos mahimo indi magtamod sang iya kaugalingon subong makagod, bugalon, agresibo, ukon mapinatihon sa disparatis. Apang, ano ang epekto sang iya pagpanahor sa mga kaupod niya nga nagahampang? Madamo sang mga nagiyan nga mga tahor ang nagsugod sa sinentimos lang nga pustahanay ‘agod lamang malingaw.’ (Lucas 16:10) Ang daw indi makahalalit nga kalingawan nangin malain gid sang ulihi sa ila bahin.

Matuod ini ilabi na kon ang nadalahig amo ang mga kabataan. Madamo nga kabataan ang nakabatyag sing kalipay nga makadaug sa sinentimos nga pusta kag nasulay nga magpusta sing daku. (1 Timoteo 6:10) Ginpamatud-an sang isa ka malawig nga pagtuon nga ginbalhag sa Estados Unidos sang Arizona Council on Compulsive Gambling nga madamo sang mga tahor ang nagsugod sa lanubo nga pangidaron “paagi sa pagpusta sing sinentimos sa mga hampang ukon paghampang sing baraha upod sa mga abyan ukon mga paryente.” Ang isa naman ka report nagsiling nga “ang kabataan nagasugod sa pagpanahor sa puluy-an, sa masami sa paghampang sing baraha kaupod sang ila pamilya kag mga abyan.” Ang report nagadugang nga “treinta porsiento sang kabataan nga nagapanahor ang nagsugod antes sang ika-onse nila nga kaadlawan.” Madamo nga tin-edyer ang nagasakdag sang ila pagpanahor paagi sa krimen ukon imoralidad, suno sa isa ka pagtuon nga Why Do People Gamble Too Much​​—⁠Pathological and Problem Gambling. Daw ano ka makapasubo nga resulta sang daw indi man makahalalit nga butang sa umpisa!

Sanglit nagakabuhi kita sa kalibutan nga may madamo na nga mga siod kag mga pagsulay, ngaa ipadayag pa naton ang aton kaugalingon sa isa pa? (Hulubaton 27:12) Ang pagpanahor​​—⁠may nagaentra man nga bata ukon wala, sinentimos man ukon dalagku ang pusta⁠—⁠nagabutang sa katalagman sang aton espirituwalidad kag dapat gid likawan. Ang mga Cristiano nga nagahampang sing mga board game ukon baraha subong kalingawan maayo pa nga maghimo na lang sing talalian sang puntos ukon maghampang na lang para sa kalingawan nga wala ginaisip ang puntos. Ang maalam nga mga Cristiano nga nagaulikid sang ila espirituwalidad kag subong man sang ila mga abyan kag pamilya nagalikaw sa pagpanahor​​—⁠bisan sa sinentimos lamang nga pusta.

[Nota]