Mga Pamangkot Gikan sa mga Bumalasa

Dapat bala kita maghinakop gikan sa Bugna 20:8 nga madamo gid katama nga mga tawo ang mapatalang ni Satanas sa katapusan nga pagtilaw?

Ginalaragway sang Bugna 20:8 ang katapusan nga pagsalakay ni Satanas sa mga tawo nga nagakabuhi sa duta sa katapusan sang isa ka libo ka tuig nga paggahom sang Mesianikong Ginharian. Nagahambal tuhoy kay Satanas, ang bersikulo nagasiling: “Magaguwa sia sa paglimbong sa mga pungsod sa apat ka pamusod sang duta, ang Gog kag Magog, sa pagtipon sa ila sing tingob para sa inaway. Ang ila kadamuon subong sang balas sang dagat.”

Walay sapayan sang pag-uswag sa sientipiko nga mga metodo kag kagamitan, indi gihapon mahibaluan ang kadamuon sang “balas sang dagat” ukon maisip ini. Sa amo, masiling nga ang ekspresyon nagalaragway sang indi mahibaluan ukon indi mapat-od nga kadamuon. Apang nagapahangop bala ini sang tuman gid kadamo, nga sobra gid kag makahalawhaw pa gani nga kadamuon, ukon isa lamang bala ini ka wala mahibaluan nga kadamuon apang madamo?

Sa Biblia, ang ekspresyon nga “subong sang balas sang dagat” ginagamit sa pila ka paagi. Halimbawa, sa Genesis 41:​49, aton mabasa: “Si Jose nagpadayon sa pagtipon sing mga uyas nga tuman gid kadamo, kaangay sang balas sang dagat, tubtob nga sang ulihi nag-untat sila sa pag-isip sa sini, bangod indi na ini maisip.” Ginapadaku diri nga indi ini maisip. Subong man, si Jehova nagsiling: “Subong nga ang kasuldadusan sang langit indi maisip, ni masukob ang balas sa dagat, subong sini pabuaron ko ang binhi ni David nga akon alagad.” Subong nga ang mga bituon sa langit kag ang balas sa dagat pat-od nga indi maisip, pat-od man nga tumanon gid ni Jehova ang iya saad kay David.​—⁠Jeremias 33:22.

Sa masami ang ekspresyon nga “balas sang dagat” nagapatuhoy sa madamo kag talalupangdon nga kadamuon ukon kadakuon. Ang mga Israelinhon sa Gilgal nahangawa gid bangod sang Filistinhon nga mga hangaway nga nagtipon sa Micmash, nga “kaangay sang mga binilog sang balas sa baybayon ang kadamuon.” (1 Samuel 13:​5, 6; Hukom 7:12) “Kag ang Dios padayon nga naghatag kay Solomon sing daku gid nga kaalam kag paghangop kag pagkadaku sing tagipusuon, kaangay sang balas sa baybayon.” (1 Hari 4:29) Bisan pa ang ginahambalan sa tagsa ka kaso madakudaku, mahibaluan ini.

Ang “balas sang dagat” mahimo man magpatuhoy sa indi mahibaluan nga kadamuon, nga wala nagapahangop nga tuman gid ini kadamo. Si Jehova nagsiling kay Abraham: “Pabuaron ko ang imo binhi subong sang kabituunan sa mga langit kag subong sang balas nga yara sa baybayon.” (Genesis 22:17) Sang ginsulit ini nga saad sa apo ni Abraham nga si Jacob, gingamit ni Jehova ang ekspresyon nga “mga yab-ok sang duta,” nga ginsambit liwat ni Jacob subong “sang balas sang dagat.” (Genesis 28:14; 32:12) Subong nahibaluan na, magluwas kay Jesucristo, ang “binhi” ni Abraham nagadamo sing 144,000, nga gintawag ni Jesus nga “diutay nga panong.”​—⁠Lucas 12:32; Galacia 3:​16, 29; Bugna 7:⁠4; 14:​1, 3.

Ano ang matun-an naton sa sining mga halimbawa? Nga ang ekspresyon nga “subong sang balas sang dagat” wala pirme nagakahulugan sing di-maisip kag makahalawhaw nga kadamuon; wala man ini pirme ginagamit sa paglaragway sa isa ka butang nga tuman gid kadaku ukon may makahalawhaw nga kadakuon. Masami ini nagalaragway sa di-mahibaluan nga kadamuon apang madamo. Sa amo, makatarunganon ang pagpati nga ang rebelyuso nga kadam-an nga magasakdag kay Satanas sa iya katapusan nga pagsalakay sa katawhan sang Dios, indi tuman gid kadamo, apang madamodamo ini amo nga mangin peligruso sila. Apang, ang kadamuon wala pa mahibaluan karon.