Mga Pamangkot Gikan sa mga Bumalasa

Ngaa ang Isaias 30:21 nagasiling tuhoy sa pulong ni Jehova nga halin sa “likod nimo,” samtang ang nauna nga bersikulo nagahambal tuhoy kay Jehova nga yara sa atubangan paagi sa pagsiling, “Ang imo mga mata mangin mga mata nga makakita sa imo Dakung Instruktor”?

Ang Isaias 30:​20, 21 mabasa: “Ang imo Dakung Instruktor indi na magpanago, kag ang imo mga mata mangin mga mata nga makakita sa imo Dakung Instruktor. Kag ang imo mga dulunggan makabati sing pulong sa likod nimo, nga nagasiling: ‘Amo ini ang dalan. Lakat kamo sa sini,’ pananglit magliso kamo sa tuo ukon pananglit magliso kamo sa wala.”

Kon hangpon ang teksto sing literal, makita sang bumalasa si Jehova, ang Dakung Instruktor, sa iya atubangan apang mabatian ang Iya tingog gikan sa likod. Apang, ang mga tinaga malaragwayon kag dapat hangpon sa sining paagi.

Ang malaragwayon nga paghambal nga ginapahanduraw sang bersikulo 20 amo ang tuhoy sa isa ka alagad nga nagaalagad sa iya agalon, kag handa pirme sa pagtuman sa mga instruksion sang iya agalon. Kaangay sang isa ka alagad nga nagapanilag sing maayo sa kamot sang iya agalon agod mahibaluan ang iya kabubut-on, ang katawhan ni Jehova karon maukod nga nagatuon sang ila igtalupangod sa progresibo nga mga instruksion pasad sa Biblia nga ginahatag ni Jehova paagi sa iya dutan-on nga organisasyon. (Salmo 123:​1, 2) Huo, ginatuman nila ang iya panuytoy, alisto sa bisan ano man nga ginapahayag ni Jehova paagi sa “matutom kag mainandamon nga ulipon.”​​—⁠Mateo 24:45-​47.

Nian, ano naman ang ginapahangop tuhoy sa pulong nga nabatian sang iya mga alagad gikan sa likod? Makatarunganon maghinakop nga ang tingog sa likod amo ang tingog sang Dios sang una, nga ginahambal paagi sa iya nasulat nga Pulong kag ginapaathag paagi sa iya “matutom nga tulugyanan.” (Lucas 12:42) Ang modernong-adlaw nga mga alagad sang Dios makabati sang iya tingog paagi sa maukod nga pagtuon sa Biblia kag sa pag-aplikar sa mga prinsipio sini sa ila kabuhi sa bulig sang mga publikasyon nga gin-aman sang “matutom kag mainandamon nga ulipon,” “ang matutom nga tulugyanan.” Paagi sa pagsalig kag pagtalupangod sa sibu-sa-tion nga panuytoy nga ginahatag sang Daku nga Instruktor kag sa pagtuon sa Pulong sang Dios, nga ginsulat mga siniglo na ang nagligad, ang iya mga alagad malaragwayon nga makakita sa iya sa ila atubangan kag makabati sang iya tingog gikan sa likod.​​—⁠Roma 15:4.