“Magpakaisog kag Magpakabakod!”

“Magpakaisog! Nadaug ko ang kalibutan.”​—⁠JUAN 16:33.

1. Bangod sang gamhanan nga mga kaaway sa Canaan nga nagahulat sa mga Israelinhon, ano nga pagpalig-on ang nabaton nila?

SANG manugtabok na ang mga Israelinhon sa Suba Jordan pasulod sa Ginsaad nga Duta, si Moises nagsiling sa ila: “Magpakaisog kamo kag magpakabakod. Dili magkahadlok ukon magkalisang sa ila, kay si Jehova nga inyo Dios amo ang nagaupod sa inyo.” Nian gintawag ni Moises si Josue, nga amo ang ginpili nga manguna sa mga Israelinhon pasulod sa Canaan, kag ginsulit niya kay Josue ang laygay nga magmaisog. (Deuteronomio 31:​6, 7) Sang ulihi, si Jehova mismo ang nagpalig-on kay Josue, nga nagasiling: “Magpakaisog kag magpakabakod . . . Lamang magpakaisog kag magpakabakod gid.” (Josue 1:​6, 7, 9) Nagakaigo gid ining mga pinamulong bangod sang kahimtangan. Kinahanglan sang mga Israelinhon ang kaisog sa pag-atubang sa gamhanan nga mga kaaway nga nagahulat sa ila sa tabok sang Jordan.

2. Ano karon ang aton kahimtangan, kag ano ang aton kinahanglan?

² Sa karon, magatabok sa dili madugay ang matuod nga mga Cristiano pasulod sa ginsaad nga bag-ong kalibutan kag kaangay ni Josue, dapat sila magpakaisog. (2 Pedro 3:​13; Bugna 7:14) Apang, ang aton kahimtangan tuhay sa kahimtangan ni Josue. Nakig-away si Josue paagi sa mga espada kag mga bangkaw. Nagapakig-away kita sing isa ka espirituwal nga inaway kag wala gid kita nagagamit sing literal nga mga hinganiban. (Isaias 2:​2-4; Efeso 6:​11-​17) Dugang pa, dapat atubangon ni Josue ang madamong masandukot nga mga inaway bisan pagkatapos nga nakasulod na sia sa Ginsaad nga Duta. Apang ginaatubang naton ang aton labing masandukot nga pagpakig-away karon​—⁠antes kita magtabok sa bag-o nga kalibutan. Binagbinagon naton ang pila ka kahimtangan nga nagakinahanglan sing kaisog.

Ngaa Dapat Kita Makig-away?

3. Ano ang ginapakita sang Biblia tuhoy sa panguna nga manugpamatok sa aton?

³ Si apostol Juan nagsulat: “Nahibaluan naton nga naghalin kita sa Dios, apang ang bug-os nga kalibutan yara sa gahom sang isa nga malauton.” (1 Juan 5:19) Ining mga pinamulong nagapakita sang panguna nga rason kon ngaa ang mga Cristiano dapat makig-away agod mahuptan ang ila pagtuo. Kon ginahuptan sang isa ka Cristiano ang iya integridad, isa na ini ka kalutusan para kay Satanas nga Yawa. Busa, nagaluyong si Satanas kaangay sang “nagangurob nga leon” nga nagatinguha nga pahugon kag tukbon ang matutom nga mga Cristiano. (1 Pedro 5:⁠8) Sa pagkamatuod, nagapakig-away sia sa hinaplas nga mga Cristiano kag sa ila mga kaupod. (Bugna 12:17) Sa sining inaway, ginagamit niya ang mga tawo nga sing hungod ukon indi hungod nagahimo sang iya katuyuan. Nagakinahanglan sing kaisog agod makatindog sing malig-on batok kay Satanas kag sa tanan niya nga ahente.

4. Ano nga paandam ang ginhatag ni Jesus, apang ano nga kinaiya ang ginapakita sang matuod nga mga Cristiano?

⁴ Bangod nahibaluan ni Jesus nga pamatukan sing mabaskog ni Satanas kag sang iya mga ahente ang maayong balita, ginpaandaman Niya ang iya mga sumulunod: “Itugyan kamo sang mga tawo sa kapipit-an kag pamatyon kamo, kag mangin  sentro kamo sang pagdumot sang tanan nga pungsod tungod sa akon ngalan.” (Mateo 24:⁠9) Ini nga mga pulong nagakatuman sang unang siglo, kag natuman man ini karon. Sa pagkamatuod, ang paghingabot nga ginbatas sang pila ka modernong adlaw nga mga Saksi ni Jehova subong man kapintas sa paghingabot nga naeksperiensiahan sa bug-os nga maragtas. Apang, maisugon nga ginaatubang sang matuod nga mga Cristiano ini nga pag-ipit. Nahibaluan nila nga ang “pagkurog sa mga tawo nagadala sing siod,” kag indi nila luyag masiod.​—⁠Hulubaton 29:25.

5, 6. (a) Ano nga mga kahimtangan ang nagakinahanglan sang aton kaisog? (b) Ano ang reaksion sang matutom nga mga Cristiano kon ginatilawan ang ila kaisog?

⁵ May iban pa nga mga pagpakig-away magluwas sa paghingabot nga nagakinahanglan sang aton kaisog. Ang iban nga mga manugbantala nabudlayan nga ipaambit ang maayong balita sa mga estranghero. Ang kaisog sang mga kabataan nga nagaeskwela ginatilawan kon tawgon sila nga magpanumpa sing katutom sa pungsod ukon sa bandera. Bangod ining panumpa isa gid ka relihioso nga pagpamulong, maisog nga namat-od ang Cristianong mga kabataan nga maggawi suno sa nahamut-an sang Dios, kag ang ila maayo nga buhat makalilipay.

⁶ Kinahanglan man naton ang kaisog kon ginasulsulan sang mga nagapamatok ang media sa pagpalapnag sing malain nga mga report tuhoy sa mga alagad sang Dios ukon kon ginatinguhaan nila nga dumilian ang matuod nga pagsimba paagi sa pagpahito sing “kalainan paagi sa kasuguan.” (Salmo 94:20) Halimbawa, ano ang batyagon naton kon ang mga report sa pamantalaan, radyo, ukon telebisyon tuhoy sa mga Saksi ni Jehova mga pagpatiko ukon mga kabutigan? Dapat bala kita makibot? Indi. Ginapaabot naton ini nga mga butang. (Salmo 109:⁠2) Kag indi man kita makibot kon magpati ang iban sa ginbalhag nga mga kabutigan kag mga pagpatiko, bangod “ang bisan sin-o nga di-eksperiensiado nagatuo sa tagsa ka pulong.” (Hulubaton 14:15) Apang, ang mainunungon nga mga Cristiano wala nagapati sa tanan nga ginahambal tuhoy sa ila mga kauturan, kag pat-od nga ang binutig nga mga report wala nagapauntat sa ila sa pagtambong sa Cristianong mga miting kag sa pagpakigbahin sa ministeryo sa latagon, ukon nagapaluya sang ila pagtuo. Sa baylo, “ginarekomendar [nila ang ila kaugalingon] subong mga ministro sang Dios . . . paagi sa himaya kag kahuluy-an, paagi sa malain nga report kag maayo nga report; subong nga [suno sa mga kaaway] mga manuglimbong apang [sa pagkamatuod] maminatud-on.”​—⁠2 Corinto 6:​4, 8.

7. Ano nga mga pamangkot ang mapamangkot naton sa aton kaugalingon?

⁷ Si Pablo nagsulat kay Timoteo: “Ang Dios wala maghatag sa aton sang espiritu sang katalaw, kundi sang gahom . . . Busa dili mo ikahuya ang panaksi tuhoy sa aton Ginuo.” (2 Timoteo 1:​7, 8; Marcos 8:38) Bangod nabasa naton ining mga pinamulong, sarang naton mapamangkot ang aton kaugalingon: ‘Ginakahuya ko bala ang akon pagtuo, ukon maisog bala ako? Ginasugiran ko bala ang akon mga kaupod sa trabaho (ukon mga kabutho) nga isa ako ka Saksi ni Jehova, ukon ginahinago ko bala ini? Nahuya bala ako nga mangin tuhay sa iban, ukon nalipay bala ako nga mangin tuhay bangod sang akon kaangtanan kay Jehova?’ Kon ang isa nahadlok sa pagbantala sing maayong balita ukon manindugan sa mga pagtuluuhan nga indi naluyagan sang kadam-an, dapat dumdumon niya ang laygay ni Jehova kay Josue: “Magpakaisog kag magpakabakod.” Indi gid pagkalimti nga  indi ang opinyon sang aton mga kaupod sa trabaho ukon mga kabutho ang importante kundi ang pagtamod ni Jehova kag ni Jesucristo.​​—⁠Galacia 1:⁠10.

Kon Paano Mapalambo ang Kaisog

8, 9. (a) Sang isa ka okasyon, paano gintilawan ang kaisog sang unang mga Cristiano? (b) Ano ang ginhimo nanday Pedro kag Juan sang ginpahog sila, kag ano ang naeksperiensiahan nila kag sang ila mga kauturan?

⁸ Paano naton mapalambo ang sahi sang kaisog nga magabulig sa aton nga mahuptan ang aton integridad sa sining mabudlay nga mga tion? Ti, paano napalambo sang unang mga Cristiano ang ila kaisog? Binagbinaga ang natabo sang ginpauntat sang puno nga mga saserdote kag sang tigulang nga mga lalaki sang Jerusalem sanday Pedro kag Juan sa pagbantala sa ngalan ni Jesus. Ang mga disipulo wala mag-untat sa pagbantala amo kon ngaa ginpahog sila kag sang ulihi ginbuy-an. Sa gilayon pagkatapos sini, nakig-upod sila liwat sa mga kauturan, kag nagpangamuyo sila tanan, nga nagasiling: “Jehova, talupangda ang ila mga pamahog, kag itugot sa imo mga ulipon ang padayon nga pagpamulong sang imo pulong sa bug-os nga kasidla.” (Binuhatan 4:13-29) Subong sabat, ginpabakod sila ni Jehova paagi sa balaan nga espiritu, kag subong sang ginpamatud-an sang ulihi sang Judiyong mga lider, “ginpuno [nila] ang Jerusalem” sang ila panudlo.​​—⁠Binuhatan 5:⁠28.

⁹ Binagbinagon naton ang natabo sadto nga okasyon. Sang ginpahog sang Judiyong mga lider ang mga disipulo, wala nila ginhunahuna nga mag-untat sa pagbantala bangod sang pag-ipit. Sa baylo, nangamuyo sing kaisog ang mga disipulo agod makapadayon sila sa pagbantala. Nanghikot dayon sila suno sa ila ginpangamuyo, kag ginpabakod sila ni Jehova paagi sa iya espiritu. Ginapakita sang ila eksperiensia nga ang ginsulat ni Pablo mga pila ka tuig sang ulihi sa tuhay nga konteksto naaplikar sa mga Cristiano kon ginahingabot sila. Si Pablo nagsiling: “Sa tanan nga butang may kusog ako bangod sa iya nga nagahatag sing gahom sa akon.”​—⁠Filipos 4:13.

10. Paano ang eksperiensia ni Jeremias makabulig sa mga mahuluy-on?

¹⁰ Apang, ano abi kon ang isa ka tawo mahuluy-on? Maalagad bala niya si Jehova sing maisugon walay sapayan sang paghingabot? Huo! Dumduma ang reaksion ni Jeremias sang gintangdo sia ni Jehova subong manalagna. Ang lamharon nga lalaki nagsiling: “Bata lamang ako.” Maathag nga nagbatyag sia nga indi sangkol. Apang, ginpalig-on sia ni Jehova paagi sa sining mga pulong: “Indi ka magsiling, ‘Bata lamang ako.’ Kundi sa tanan nga ipadala ko ikaw, magkadto ka; kag ang tanan nga isugo ko sa imo, ipamulong mo. Indi ka mahadlok bangod sang ila mga nawong, kay ‘ako nagaupod sa imo sa pagluwas sa imo.’” (Jeremias 1:6-​10) Nagsalig si Jeremias kay Jehova, kag subong resulta, paagi sa kusog ni Jehova, nalandas niya ang iya pagpangalag-ag sa pagbantala kag nangin isa ka tumalagsahon kag maisog nga saksi sa Israel.

11. Ano ang nagabulig sa mga Cristiano karon nga mangin kaangay ni Jeremias?

¹¹ Ang hinaplas nga mga Cristiano karon may  hilikuton man nga kaanggid kay Jeremias, kag upod ang suporta sang “dakung kadam-an” sang “iban nga mga karnero,” padayon nila nga ginabantala ang mga katuyuan ni Jehova, walay sapayan sang di-pagsapak, pagyaoyao, kag paghingabot. (Bugna 7:⁠9; Juan 10:16) Napalig-on sila sang mga pinamulong ni Jehova kay Jeremias: “Indi ka mahadlok.” Wala gid nila ginakalimtan nga ginsugo sila sang Dios kag ginabantala nila ang iya mensahe.​—⁠2 Corinto 2:⁠17.

Mga Halimbawa sang Kaisog nga Takus Ilugon

12. Anong maayo gid nga halimbawa sang kaisog ang ginpakita ni Jesus, kag paano niya ginpalig-on ang iya mga sumulunod?

¹² Sarang kita mabuligan sa aton mga panikasog nga mapalambo ang kaisog kon magpamalandong kita sa mga halimbawa sang iban, nga kaangay ni Jeremias, nagpakaisog. (Salmo 77:12) Halimbawa, samtang ginausisa naton ang ministeryo ni Jesus, makadayaw kita sa iya kaisog sang ginsulay sia ni Satanas kag sang gin-atubang niya ang determinado nga pagpamatok sang Judiyong mga lider. (Lucas 4:​1-​13; 20:19-​47) Sa kusog ni Jehova, indi malingkang si Jesus, kag wala madugay antes sang iya kamatayon, sia nagsiling sa iya mga disipulo: “Sa kalibutan may kapipit-an kamo, apang magpakaisog! Nadaug ko ang kalibutan.” (Juan 16:33; 17:16) Kon sundon sang mga sumulunod ni Jesus ang iya halimbawa, magadaug man sila. (1 Juan 2:⁠6; Bugna 2:​7, 11, 17, 26) Apang kinahanglan nga “magpakaisog” sila.

13. Ano ang ginpalig-on ni Pablo sa mga taga-Filipos?

¹³ Pila ka tuig sa tapos mapatay si Jesus, ginbilanggo sanday Pablo kag Silas sa Filipos. Sang ulihi, ginpalig-on ni Pablo ang kongregasyon sang Filipos nga padayon nga ‘magtindog sing malig-on sa isa ka espiritu, nga may isa ka kalag nga nagapanikasog sing tingob tungod sa pagtuo sa maayong balita, kag sa bisan paano indi mapahog sang ila mga kasumpong.’ Agod pabakuron sila sa sini, si Pablo nagsiling: “Ini mismo nga butang [ang paghingabot sa mga Cristiano] isa ka pamatuod sang kalaglagan para sa [mga manughingabot], apang sang kaluwasan para sa inyo; kag ini nga panugyan gikan sa Dios, kay sa inyo ginhatag ang pribilehiyo tungod kay Cristo, indi lamang agod ipahamtang ninyo ang inyo pagtuo sa iya, kundi agod man mag-antos kamo tungod sa iya.”​—⁠Filipos 1:​27-​29.

14. Ano ang epekto sang kaisog ni Pablo sa mga kauturan sa Roma?

¹⁴ Sang nagsulat si Pablo sa kongregasyon sang Filipos, yara sia liwat sa bilangguan, sa sining tion sa Roma. Apang, padayon sia nga nagbantala sing masidla sa iban. Kag ano ang resulta? Sia nagsulat: “Ang akon mga talikala nahibaluan na sang tanan may kaangtanan kay Cristo sa tunga sang mga Guardia sang Pretorio kag sang iban pa; kag ang kalabanan sang mga kauturan sa Ginuo, nga nagabatyag sing pagsalig bangod sang akon mga gapos sang pagkabilanggo, nagapakita sing labi pa nga kaisog sa paghambal sang pulong sang Dios nga walay kahadlok.”​—⁠Filipos 1:​13, 14.

15. Diin kita makasapo sing maayong mga halimbawa sang pagtuo nga makapabakod sang aton determinasyon nga magpakaisog?

¹⁵ Ang halimbawa ni Pablo nagapalig-on sa aton. Amo man ang maayong mga halimbawa sang modernong-adlaw nga mga Cristiano nga nagbatas sing paghingabot sa mga pungsod nga ginagamhan sang diktador ukon klero. Ang mga sugilanon sang pila sa ila ginsugid sa Lalantawan kag Magmata! nga mga magasin kag sa mga Yearbook of Jehovah’s Witnesses. Samtang ginabasa mo ini nga mga sugilanon, dumduma nga ang mga indibiduwal nga ginasugid ordinaryo nga mga tawo kaangay naton; apang sang yara sila sa tuman kabudlay nga mga kahimtangan, ginhatagan sila ni Jehova sing kusog nga labaw sa kinaugali kag nakabatas sila. Makasalig kita nga himuon man niya ini sa aton kon ginakinahanglan.

 Ang Aton Maisog nga Panindugan Nagapahamuot kag Nagapadungog kay Jehova

16, 17. Paano naton karon mapalambo ang maisugon nga panimuot?

¹⁶ Kon manindugan sing malig-on ang isa ka Cristiano sa kamatuoran kag pagkamatarong, maisog sia. Kon ginahimo niya ini walay sapayan nga nahadlok sia, labi pa nga mas maisog sia. Sa pagkamatuod, ang bisan sin-o nga Cristiano mahimo mangin maisog, kon luyag gid niya himuon ang kabubut-on ni Jehova, kon determinado sia nga magpabilin nga matutom, kon padayon sia nga magsandig sa Dios, kag kon pirme niya dumdumon nga ginpabakod anay ni Jehova ang madamo nga indibiduwal kaangay niya. Dugang pa, kon mahibaluan naton nga ang aton maisugon nga panindugan nagapahamuot kag nagapadungog kay Jehova, mas determinado pa gid kita nga indi magluya. Handa kita sa pagbatas sang pagyaoyao ukon sang mas malain pa bangod ginahigugma gid naton sia.​​—⁠1 Juan 2:⁠5; 4:⁠18.

¹⁷ Indi pagkalimti nga kon nagaantos kita bangod sang aton pagtuo, wala ini nagakahulugan nga nakahimo kita sing sala. (1 Pedro 3:17) Nagaantos kita bangod ginasakdag naton ang pagkasoberano ni Jehova, bangod ginahimo naton ang maayo, kag bangod indi kita bahin sang kalibutan. Tuhoy sini, si apostol Pedro nagsiling: “Kon, sa nagahimo kamo sing maayo kag nagaantos kamo, ginabatas ninyo ini, isa ini ka butang nga kalahamut-an sa Dios.” Si Pedro nagsiling man: “Padayon nga itugyan sang mga nagaantos nahisanto sa kabubut-on sang Dios ang ila kalag sa isa ka matutom nga Manunuga samtang nagahimo sila sing maayo.” (1 Pedro 2:​20; 4:19) Huo, ang aton pagtuo nagapahamuot sa aton mahigugmaon nga Dios nga si Jehova kag nagapadungog sa iya. Daw ano ka daku nga rason nga magpakaisog!

Pagpakighambal sa mga Awtoridad

18, 19. Kon maisog kita nga manindugan sa atubangan sang isa ka hukom, ano nga mensahe ang aton ginpaalinton?

¹⁸ Sang ginsilingan ni Jesus ang iya mga sumulunod nga hingabuton sila, sia man nagsiling: “Dalhon [kamo sang mga tawo] sa lokal nga mga hukmanan, kag bunalon nila kamo sa ila mga sinagoga. Aba, dalhon kamo sa atubangan sang mga gobernador kag mga hari bangod sa akon, subong panaksi sa ila kag sa mga pungsod.” (Mateo 10:​17, 18) Nagakinahanglan sing kaisog ang mag-atubang sa isa ka hukom ukon sa isa ka manuggahom bangod sang sayop nga mga panumbungon. Apang, kon masidla nga himuslan naton ining mga okasyon agod mapanaksihan ini nga mga tawo, ginahimuslan naton ang mabudlay nga kahimtangan subong isa ka kahigayunan nga makahimo sing butang nga importante. Mapaalinton naton sa mga nagahukom sa aton ang mga pulong ni Jehova, nga narekord sa ikaduha nga Salmo: “Karon, O mga hari, magpakita sing madalom nga paghangop; tuguti nga tadlungon kamo, O mga hukom sang duta. Alagda si Jehova nga may kahadlok.” (Salmo 2:​10, 11) Masami nga kon ang mga Saksi ni Jehova sayop nga ginsumbong sa korte, ginsakdag sang mga hukom ang kahilwayan sa pagsimba, kag ginaapresyar naton ini. Apang, ang pila ka hukom nagpaimpluwensia sa mga manugpamatok. Tuhoy sa ila, ang Kasulatan nagasiling: “Tuguti nga tadlungon kamo.”

¹⁹ Dapat mahibaluan sang mga hukom nga ang labing mataas nga kasuguan amo ang iya ni Jehova  nga Dios. Dapat dumdumon nila nga ang tanan nga tawo, lakip ang mga hukom, may salabton kay Jehova nga Dios kag kay Jesucristo. (Roma 14:10) Kon tuhoy sa aton, bisan pa ang tawhanon nga hukom maghukom pabor sa aton ukon indi, may rason gid kita nga magpakaisog bangod ginasakdag kita ni Jehova. Ang Biblia nagasiling: “Malipayon ang tanan nga nagadangop sa iya.”​​—⁠Salmo 2:⁠12.

20. Ngaa dapat kita malipay kon ginahingabot kag ginapasipalahan kita?

²⁰ Sa Sermon sa Bukid, si Jesus nagsiling: “Malipayon kamo kon ang mga tawo magpasipala sa inyo kag maghingabot sa inyo kag binutig nga maghambal sing tanan nga sahi sang malaut nga butang batok sa inyo tungod sa akon. Magkasadya kamo kag magtumbo sa kalipay, kay daku ang inyo padya sa mga langit; kay sa sina nga paagi ginhingabot nila ang mga manalagna nga nauna sa inyo.” (Mateo 5:​11, 12) Sa pagkamatuod, ang paghingabot mismo indi makalilipay, apang ang pagtindog naton sing malig-on bisan ginahingabot, lakip na ang mapasipalahon nga mga report sa media, isa ka rason agod magkasadya. Ginapakita sini nga ginapahamut-an naton si Jehova kag makabaton kita sing padya. Ang aton maisog nga panindugan nagapakita nga may matuod kita nga pagtuo kag nagapasalig sa aton nga ginakahamut-an kita sang Dios. Sa pagkamatuod, nagapakita ini nga nagasalig kita sing bug-os kay Jehova. Ini nga pagsalig importante sa isa ka Cristiano, subong sang ipakita sang masunod nga artikulo.

Ano ang Imo Natun-an?

• Ano nga mga kahimtangan karon ang nagakinahanglan sing kaisog?

• Paano naton mapalambo ang kaisog?

• Sin-o ang pila ka maayo nga mga halimbawa sang kaisog?

• Ngaa luyag naton magpakaisog?

[Mga Pamangkot sa Pagtinuon]

[Mga retrato sa pahina 9]

Si Simone Arnold (Liebster na karon) sa Alemanya, si Widdas Madona sa Malawi, kag sanday Lydia kag Oleksii Kurdas sa Ukraine nagpakita sing kaisog kag nagsumpong sa isa nga malauton

[Mga retrato sa pahina 10]

Wala naton ginakahuya ang maayong balita

[Retrato sa pahina 11]

Ang kaisog ni Pablo sa bilangguan nakabulig agod mabantala ang maayong balita

[etrato sa pahina 12]

Kon maisog nga ipaathag naton ang aton Makasulatanhon nga panindugan sa isa ka hukom, nagapaalinton kita sing isa ka importante nga mensahe