Mga Pamangkot Gikan sa mga Bumalasa

May mga kahimusan bala nga dapat himuon kon ang isa ka nagamasakit nga hinaplas nga Cristiano indi makatambong sa pagsaulog sang kongregasyon sa Panihapon sang Ginuo?

Huo. Posible kag importante nga hatagan sing konsiderasyon ang isa ka nagamasakit kag ayhan indi makabangon nga hinaplas nga Cristiano kag busa indi makatambong kon hiwaton sang kongregasyon ang Memoryal sang kamatayon ni Cristo. Sa sini nga kaso, mahimo patigayunon sang hubon sang mga gulang nga dalhon sang isa ka gulang ukon isa ka hamtong nga utod nga lalaki ang iban nga bahin sang emblema nga tinapay kag bino sa sini nga masigkatumuluo sa amo man nga gab-i antes magbutlak ang adlaw.

Depende sa mga kahimtangan, ang nagaduaw nga gulang ukon iban pa nga utod nga lalaki mahimo magkomento sing malip-ot kag magbasa sing nagakaigo nga mga teksto. Mahimo niya sundon ang ginpahamtang nga sulundan ni Jesus sang gin-umpisahan Niya ang Panihapon sang Ginuo. Halimbawa, mahimo niya basahon ang Mateo 26:26 kag itanyag ang tinapay nga wala sing tapay pagkatapos sang isa ka pangamuyo. Masunod, mahimo basahon sang nagaduaw nga utod nga lalaki ang Mateo kapitulo 26, mga bersikulo 27 kag 28, kag itanyag ang bino pagkatapos sang isa pa ka pangamuyo. Mahimo sia magkomento sing malip-ot nga komento tuhoy sa kahulugan sang tagsa ka emblema, kag nagakaigo nga takpan ini sing pangamuyo.

Siempre, dapat himuon ang tanan nga masarangan agod makatambong sa pagsaulog sang kongregasyon sa Panihapon sang Ginuo. Apang ano ang himuon sa isa ka sitwasyon diin ang hinaplas nga Cristiano malubha nga nagabalatian, naospital, ukon indi gid makasaulog sang Memoryal pagkatapos magtunod ang adlaw sa Nisan 14? Mahimo sundon sini nga hinaplas ang sulundan sa Mosaikong Kasuguan kag pribado nga saulugon ini pagligad sang 30 ka adlaw.​​—⁠Numeros 9:​9-​14.