“Magpalapit Kamo sa Dios, kag Magapalapit Sia sa Inyo”

Sang Una kag Karon—Nagbag-o Gid ang Iya Kabuhi

MAKANGILIL-AD gid kag walay katuyuan ang nangin kabuhi ni Matsepang! Dalagita pa lang sia sadto sa Lesotho, isa ka pungsod sa sentral nga bahin sang Bagatnan nga Aprika. Ginpadaku si Matsepang nga isa ka Katoliko. Apang, sa baylo nga mabuligan sa pagpalapit sa Dios, sa sulod sang mga tinuig ginhimuslan sia sang mga madre nga naghiphip sa iya agod hayluhon sia nga himuon ang imoral nga mga buhat.

Subong resulta, nadula ang gana ni Matsepang sa relihion kag indi sia magpati nga may isa ka mahigugmaon nga Manunuga nga nagaulikid sing matuod sa iya tawhanon nga mga tinuga. Ang pagpatumbaya kag pag-abuso nga gin-antos ni Matsepang nagbilin sing madalom nga pilas sa iya emosyon kag nagpabatyag sa iya nga walay pulos. Nagdaku sia nga tuman kasingki kag agresibo. Bangod sini nangin isa sia ka kriminal.

Si Matsepang nangin miembro sang ulihi sang isa ka gang nga nagapangawat sa mga tawo nga nagasakay sa tren. Nadakpan sia kag ginbilanggo sa Bagatnan nga Aprika. Sang ulihi, gintapok sia sa iya dutang natawhan, ang Lesotho, diin padayon sia nga nangin kriminal, palahubog, masingki, kag imoral.

Sang masubo gid sia, nangamuyo si Matsepang sa Dios kag nangayo sing bulig. Nanaad sia, “Dios ko, kon maluwas ako, himuon ko ang tanan nga masarangan ko agod alagdon ka.”

Wala madugay, ginpalapitan si Matsepang sang mga misyonero nga mga Saksi ni Jehova. Nagtanyag sila sing pagtuon sa Biblia upod sa iya. Gikan sa iya pagtuon, narealisar niya nga indi gali matuod nga ang Dios wala nagasapak kag wala nagaulikid. Ang matuod, nahangpan na niya nga si Satanas, ‘ang amay sang kabutigan,’ nagagamit sing malalangon kag malimbungon nga mga taktika agod batyagon sang iban nga walay pulos sila kag magpati nga indi gid mahamuot si Jehova sa ila.​​—⁠Juan 8:​44; Efeso 6:⁠11.

Sa kabaliskaran, nalipay gid si Matsepang sang matun-an niya nga matigayon naton ang respeto sa kaugalingon kon hinulsulan naton ang aton makasasala nga kabuhi sang una, mangayo sing kapatawaran sa Dios, kag magtinguha nga pahamut-an sia! Nabuligan sia sa paghangop nga “ang Dios daku pa sa aton tagipusuon” kag tuhay ang pagtamod niya sa aton sangsa pagtamod naton sa aton kaugalingon.​​—⁠1 Juan 3:​19, 20.

Nakunyag si Matsepang sang mabasa niya ining mga pulong ni salmista David: “Si Jehova malapit sa mga buong sing tagipusuon; kag ginaluwas niya ang mga nadugmok sa espiritu.” (Salmo 34:18) Subong isa nga “nadugmok sa espiritu,” narealisar niya nga wala ginabiyaan ni Jehova ang iya mga alagad, bisan pa kon ang iban sa ila nagbatyag sing daku nga kasubo ukon nadulaan  sing pag-apresyar sa kaugalingon. Nalipay sia sang mahibaluan niya nga ginaulikdan sang Dios ang iya tanan nga mga karnero kag ginasakdag sila sa panahon sang kabudlayan. (Salmo 55:22; 1 Pedro 5:​6, 7) Natandog gid sia sang mga pulong: “Magpalapit kamo sa Dios, kag magapalapit sia sa inyo.”​​—⁠Santiago 4:8.

Wala madugay, nakita sa kabuhi ni Matsepang ang gahom sang Pulong sang Dios, ang Biblia. Regular na sia nga nagatambong sa Cristianong mga miting kag gintalikdan na niya ang iya di-makasulatanhon nga mga buhat. Ang resulta? Wala na sia nagabatyag nga indi takus sa gugma kag pabor sang Dios. Sugod sang mabawtismuhan sia subong isa sa mga Saksi ni Jehova, nakahinguyang na sia sing linibo ka oras sa Cristianong ministeryo subong isa ka manugbantala sing maayong balita sang Ginharian. Walay sapayan sang halit sa emosyon bangod sang iya nagligad, ang kabuhi karon ni Matsepang malipayon kag may katuyuan. Daw ano ini nga pasundayag sang gahom sang Biblia sa pagpauswag sang mga kabuhi!​​—⁠Hebreo 4:⁠12.

[Blurb sa pahina 9]

“Dios ko, kon maluwas ako, himuon ko ang tanan nga masarangan ko agod alagdon ka”

[Kahon pahina 9]

Epektibo nga mga Prinsipio Sang Biblia

Ang mga prinsipio sang Biblia nga nakahatag sing lugpay sa mga biktima sang pag-abuso nagalakip sang masunod:

“Sang ang akon nagakabalaka nga mga panghunahuna nagdamo sa sulod nakon, ang imo [ang iya sang Dios] mga paglipay naghapuhap sa akon kalag.” (Salmo 94:19) Ang “mga paglipay” ni Jehova nga masapwan sa iya Pulong isa ka tuburan sang daku nga lugpay. Ang pagbinagbinag sini sa tion sang pagpamalandong kag pagpangamuyo nagabulig sa pagpakalma sang mga kabalaka kag nagapalambo sang pagsalig sa Dios subong isa ka mahinangpanon nga Abyan.

“Ginaayo niya [Jehova] ang mga may buong nga tagipusuon, kag ginabugkusan niya ang ila masakit nga mga bahin.” (Salmo 147:⁠3) Kon ginapasalamatan naton ang kaluoy ni Jehova kag ang iya gin-aman agod tabunan ang aton mga sala paagi sa halad nga gawad ni Jesus, may pagsalig nga makapalapit kita sa Dios nga wala nagabatyag nga ginakondenar kita sang aton tagipusuon. Makahatag ini sing indi matupungan nga lugpay kag malinong nga panghunahuna.

“Wala sing tawo nga makakari sa akon [Jesucristo] luwas kon buyukon sia sang Amay, nga nagpadala sa akon; kag banhawon ko sia sa katapusan nga adlaw.” (Juan 6:44) Paagi sa iya balaan nga espiritu kag paagi sa pagbantala sing Ginharian nga hilikuton, personal nga ginabuyok kita ni Jehova sa iya Anak kag ginahatagan kita sing paglaum nga mabuhi sing walay katapusan.