Mga Pamatan-on nga Nagapahalipay sa Tagipusuon ni Jehova
Mga Pamatan-on nga Nagapahalipay sa Tagipusuon ni Jehova
Ginhanda ining tulun-an nga mga artikulo para gid sa mga pamatan-on sa tunga sang mga Saksi ni Jehova. Gani, ginapalig-on namon kamo nga mga pamatan-on nga tun-an sing maayo ini nga materyal kag magkomento kon ginabinagbinag ini sa Pagtinuon sa Ang Lalantawan sang kongregasyon.
“Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.”—HULUBATON 27:11.
1, 2. (a) Ipaathag kon bala ang pagkaganyat lamang sa mga butang sang kalibutan nagakahulugan nga indi ikaw nagakabagay nga mangin Cristiano. (Roma 7:21) (b) Ano ang matun-an mo gikan sa halimbawa ni Asaf? (Tan-awa ang kahon, pahina 13.)
HANDURAWA nga nagapamalaklon ka sing mga bayo. Samtang nagabilid ka, nakita mo ang isa ka bayo nga naluyagan mo gilayon. Ang kolor kag estilo sini daw bagay gid sa imo, kag barato pa. Apang gintan-aw mo ini sing maayo. Sa imo kakibot, natalupangdan mo nga nagahigin gali ang tela, kag baraghal ang pagkatahi. Bisan pa matahom ang bayo, indi maayo ang kalidad sini. Baklon mo bala ini?
2 Ipaanggid ini sa isa ka kahimtangan nga mahimo mag-atubang sa imo subong isa ka Cristianong pamatan-on. Sa una nga pagpasiplat, ang mga butang sa sining kalibutan—kaangay gid sadto nga bayo—mahimo nga daw matahom gid. Halimbawa, ang imo mga kabutho mahimo nga nagakadto sa makakulunyag nga mga party, nagadroga, nagainom, naga-date, kag nagahulid antes sang kasal. Naganyat ka bala, kon kaisa, sa sini nga estilo sang pagkabuhi? Luyag mo bala nga matilawan man lang ang ila ginatawag nga kahilwayan? Kon amo, indi maghinakop dayon nga malain ka kag indi nagakabagay nga mangin Cristiano. Kay man, ang Biblia mismo nagakilala nga ang kalibutan makasululay gid—bisan sa isa ka tawo nga luyag magpahamuot sa Dios.—2 Timoteo 4:10.
3. (a) Ngaa walay pulos nga tinguhaan ang mga butang sang kalibutan? (b) Paano ginlaragway sang isa ka Cristiano ang pagkawalay pulos sang kalibutanon nga mga paghimud-os?
3 Tan-awa karon sing maayo, palihug, ang mga butang sa sining kalibutan, subong sang himuon mo sa isa ka bayo nga luyag mo baklon. Pamangkuta ang imo kaugalingon, ‘Ano, kon sa aton pa, ang kalidad sang tela kag ang pagkatahi sa sining sistema sang mga butang?’ Ang Biblia nagasiling nga “ang kalibutan nagataliwan.” (1 Juan 2:17) Ang bisan anong kalipay nga matigayon gikan sa sini mangin temporaryo lamang bisan sa idalom pa sang labing maayo nga kahimtangan. Dugang pa, daku ang kabayaran sang di-diosnon nga paggawi. Indi gid ini barato. Ang isa ka Cristiano, nga nagbatas sang ginatawag niya nga “kasakit bangod nagtinonto sia sa iya pagkapamatan-on,” nagsiling: “Mahimo nga matahom kag makagalanyat ang kalibutan kon tulukon. Kag luyag ka papatihon sini nga maagom mo ang sahi sang kalipay nga ginatanyag sini nga wala sing resulta nga kasakit. Apang indi gid ini mahimo. Gamiton ikaw sang kalibutan kag kon makatapos na ini sa imo, ipahurabog ka lang sini.” * Ngaa uyangan mo ang imo pagkapamatan-on sa sining indi maayo nga sahi sang pagkabuhi?
Proteksion Gikan sa “Isa nga Malauton”
4, 5. (a) Antes sia mapatay, ano ang ginpangabay ni Jesus kay Jehova sa pangamuyo? (b) Ngaa isa ini ka nagakaigo nga pangabay?
4 Bangod narealisar nila nga ining sistema sang mga butang wala sing maayo gid nga matanyag, ang mga pamatan-on sa tunga sang mga Saksi ni Jehova nagatinguha nga likawan ang pagpakig-abyan sa sining kalibutan. (Santiago 4:4) Isa bala ikaw sa sining matutom nga mga pamatan-on? Kon amo, dapat ka hatagan sing komendasyon. Matuod, indi mahapos nga pamatukan ang pag-ipit sang mga katubotubo kag ang pagpabilin nga tuhay, apang may bulig para sa imo.
5 Antes sia mapatay, nangamuyo si Jesus kay Jehova nga “bantayan” ang iya mga disipulo “bangod sa isa nga malauton.” (Juan 17:15) May maayo nga rason ining pangabay ni Jesus. Nahibaluan niya nga indi mahapos para sa iya mga sumulunod nga huptan ang ila integridad bisan ano man ang ila edad. Ngaa? Una, subong sang ginkilala ni Jesus, ang iya mga disipulo may isa ka gamhanan kag di-kitaon nga kaaway—“ang isa nga malauton,” si Satanas nga Yawa. Ang Biblia nagasiling nga ining malaut nga espiritu “nagaluyong subong sang isa ka nagangurob nga leon, nga nagapangita sing bisan sin-o man nga matukob.”—1 Pedro 5:8.
6. Paano naton nahibaluan nga wala naluoy si Satanas sa mga bata?
6 Sa bug-os nga maragtas, nalipay gid si Satanas nga pintasan ang mga tawo. Binagbinaga ang makakulugmat nga mga kalamidad nga ginpahanabo ni Satanas kay Job kag sa iya pamilya. (Job 1:13-19; 2:7) Ayhan may madumduman ka nga mga balita nga natabo sang imo panahon nga nagaanggid sa kapintas ni Satanas. Nagapaniid ang Yawa, kag sa iya pagtinguha nga makatukob sing biktima, wala sia sing luoyluoy sa mga pamatan-on. Halimbawa, sa panugod sang una nga siglo C.E., nagplano si Herodes nga pamatyon ang tanan nga bata nga lalaki sa Betlehem nga duha ka tuig ang edad paubos. (Mateo 2:16) Mahimo gid nga si Satanas ang nagpahulag kay Herodes—sa panikasog nga patyon ang bata nga sa pila ka adlaw mangin ang ginsaad nga Mesias sang Dios kag amo ang magahikot sang paghukom sang Dios batok kay Satanas! (Genesis 3:15) Maathag nga wala ginahigugma ni Satanas ang mga bata. Ang iya lamang katuyuan amo nga tukbon ang pinakamadamo nga mga tawo nga masarangan niya. Matuod gid ini karon, kay si Satanas gintagbong gikan sa langit pakadto sa duta, “nga may daku nga kaakig, kay nahibaluan niya nga malip-ot na lamang ang iya tion.”—Bugna 12:9, 12.
7. (a) Paano si Jehova tuhay gid kay Satanas? (b) Ano ang ginabatyag ni Jehova tuhoy sa imo pagkalipay sa kabuhi?
7 Tuhay gid kay Satanas, nga may “daku nga kaakig,” si Jehova may “malulot nga kaawa.” (Lucas 1:78) Sia gid ang larawan sang gugma. Sa katunayan, ining matahom nga kinaiya nagalaragway gid sa aton Manunuga amo kon ngaa ang Biblia nagasiling: “Ang Dios gugma.” (1 Juan 4:8) Daw ano ka daku ang pagkatuhay sang dios sining sistema sang mga butang kag sang Dios nga imo ginasimba! Samtang si Satanas nagatinguha sa pagtukob, ‘indi luyag ni Jehova nga ang bisan sin-o malaglag.’ (2 Pedro 3:9) Ginatamod niya nga hamili ang kabuhi sang tagsa ka tawo—lakip ang imo. Kon ginalaygayan ka ni Jehova paagi sa iya Pulong nga indi ka dapat mangin bahin sang kalibutan, wala niya ginalimitehan ang imo kalipay sa kabuhi ukon ang imo kahilwayan. (Juan 15:19) Sa baylo, ginabantayan ka niya bangod sang isa nga malauton. Luyag sang imo langitnon nga Amay nga matigayon mo ang butang nga mas maayo sangsa umalagi nga mga kalalipayan sining kalibutan. Handum niya nga matigayon mo ang “matuod nga kabuhi”—ang kabuhi nga walay katapusan sa paraiso nga duta. (1 Timoteo 6:17-19) Luyag ni Jehova nga magmadinalag-on ka, kag ginapalig-on ka niya nga lab-uton ini nga tulumuron. (1 Timoteo 2:4) Dugang pa, nagahatag sa imo si Jehova sing isa ka pinasahi nga pangagda. Ano ini?
“Pahalipaya ang Akon Tagipusuon”
8, 9. (a) Ano nga regalo ang mahatag mo kay Jehova? (b) Paano ginayaguta ni Satanas si Jehova, subong sang gin-ilustrar sa kaso ni Job?
8 Nakabakal ka na bala sing isa ka regalo para sa isa ka suod nga abyan kag dayon nakita mo sia nga nasorpresa sa kalipay kag nagpasalamat gid sang mabaton niya ini? Mahimo nga madugay mo ginpamensaran sing maayo kon ano nga regalo ang bagay sa sini nga tawo. Binagbinaga karon ini nga pamangkot: Ano nga sahi sang regalo ang mahatag mo sa imo Manunuga, si Jehova nga Dios? Sa primero, mahimo nga daw makahalam-ot ini nga ideya. Ano ang kinahanglan sang Labing Gamhanan gikan sa tawo lamang? Ano ang mahatag mo sa iya nga wala sa iya? Ang Biblia nagasabat sa Hulubaton 27:11: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.”
9 Subong mahimo nahibaluan mo na gikan sa imo pagtuon sa Biblia, si Satanas nga Yawa amo ang nagayaguta kay Jehova. Nagasiling sia nga ginaalagad sang tawo ang Dios, indi bangod sang gugma, kundi bangod sang makagod nga mga rason. Paantusa sila, siling ni Satanas, kag talikdan nila gilayon ang matuod nga pagsimba. Binagbinaga, halimbawa, ang ginsiling ni Satanas kay Jehova tuhoy sa matarong nga si Job: “Wala mo bala sia pagkudali kag sa iya balay kag sa tanan nga yara sa palibot niya? Ginpakamaayo mo ang kinabudlayan sang iya mga kamot, kag ang iya kasapatan nagdamo sa duta. Apang, subong pagbaylo sang kahimtangan, untaya ang imo kamot, palihug, kag tanduga ang tanan nga iya kag tan-awa kon indi ka niya pagpakamalauton sa imo nawong mismo.”—Job 1:10, 11.
10. (a) Paano naton nahibaluan nga ginduhaduhaan ni Satanas ang integridad indi lamang ni Job? (b) Paano ikaw nadalahig sa hulusayon sang pagkasoberano?
10 Subong sang ginpakita sa rekord sang Biblia, ginduhaduhaan ni Satanas indi lamang ang katutom ni Job kundi ang katutom man sang tanan nga iban pa nga nagaalagad sa Dios—lakip ikaw. Sa katunayan, nagapatuhoy sa katawhan sa kabilugan, si Satanas nagsiling kay Jehova: “Ang tanan nga iya sang tawo [indi lamang si Job kundi ang bisan sin-o] ihatag niya tungod sa iya kalag.” (Job 2:4) Makita mo bala ang imo papel sa sining importante nga hulusayon? Subong sang ginapakita sa Hulubaton 27:11, si Jehova nagasiling nga may mahatag ka sa iya—isa ka sadsaran nga magamit niya agod sabton ang nagayaguta sa iya, si Satanas. Hamak mo—ang Bug-os Uniberso nga Soberano nagapangabay sa imo nga sabton ang pinakadaku nga hulusayon. Daw ano ini ka daku nga responsabilidad kag pribilehiyo para sa imo! Mahimo mo bala ang ginapangabay sa imo ni Jehova? Nahimo ini ni Job. (Job 2:9, 10) Nahimo man ini ni Jesus kag sang di-maisip nga iban pa sa bug-os nga maragtas, lakip ang madamo nga mga pamatan-on. (Filipos 2:8; Bugna 6:9) Mahimo mo man ini. Apang, tandai, wala sing neutral nga bahin sa sini nga hulusayon. Paagi sa imo himuon, mapakita mo nga ginasakdag mo ang pagyaguta ni Satanas ukon ang sabat ni Jehova. Sin-o ang sakdagon mo?
May Pag-ulikid si Jehova sa Imo!
11, 12. Importante bala kay Jehova kon pilion mo nga mag-alagad sa iya ukon indi? Ipaathag.
11 Importante gid bala kay Jehova kon ano ang pilion mo? Indi bala bastante na ang mga tawo nga nagpabilin nga matutom agod makahatag sia sing nagakaigo nga sabat kay Satanas? Matuod, nagsiling ang Yawa nga wala sing bisan sin-o ang nagaalagad kay Jehova bangod sa gugma, isa ka panumbungon nga napamatud-an na nga butig. Sa gihapon, luyag ni Jehova nga magdampig ka sa iya sa hulusayon sang pagkasoberano bangod may pag-ulikid sia sa imo subong isa ka indibiduwal. Si Jesus nagsiling: “Indi halandumon nga butang sa akon Amay nga yara sa langit nga ang isa sining mga magamay mawala.”—Mateo 18:14.
12 Maathag nga interesado si Jehova sa dalanon nga imo pilion. Mas importante sa sini, apektado sia sini. Maathag nga ginapakita sang Biblia nga si Jehova may tudok nga balatyagon nga maapektuhan sang maayo ukon malain nga mga buhat sang mga tawo. Halimbawa, sang ang mga Israelinhon sulit-sulit nga nagrebelde, nagbatyag si Jehova sing ‘kasakit.’ (Salmo 78:40, 41) Antes sang Anaw sang panahon ni Noe, sang “ang kalainan sang tawo bugana,” ‘nasaklaw ang tagipusuon ni Jehova.’ (Genesis 6:5, 6) Hunahunaa kon ano ang buot silingon sini. Kon maghimo ka sing malain, mahimo nga masaklaw mo ang imo Manunuga. Wala ini nagakahulugan nga maluya ukon emosyonal ang Dios. Sa baylo, ginahigugma ka niya kag nagaulikid sa imo kaayuhan. Sa pihak nga bahin, kon himuon mo ang maayo, nagakalipay ang tagipusuon ni Jehova. Malipayon sia indi lamang bangod may dugang sia nga isabat kay Satanas kundi bangod mapadyaan ka man niya. Kag butang ini nga luyag niya himuon. (Hebreo 11:6) Daw ano gid ka mahigugmaon nga Amay si Jehova nga Dios!
Bugana nga mga Pagpakamaayo Karon
13. Paano ang pag-alagad kay Jehova nagadala sing mga pagpakamaayo karon mismo?
13 Ang mga pagpakamaayo nga matigayon gikan sa pag-alagad kay Jehova indi sa palaabuton lamang. Madamo nga mga pamatan-on sa tunga sang mga Saksi ni Jehova ang ginapakamaayo sing kalipay kag kaayawan karon mismo, kag may maayo nga rason. “Ang mga sugo gikan kay Jehova matadlong, nga nagapasadya sang tagipusuon,” sulat sang salmista. (Salmo 19:8) Labaw sa bisan sin-o nga tawo, nahibaluan ni Jehova kon ano ang maayo para sa aton. Paagi kay manalagna Isaias, si Jehova nagsiling: “Ako, si Jehova, amo ang imo Dios, ang Isa nga nagatudlo sa imo agod makabenepisyo ka, ang Isa nga nagatuytoy sa imo sa dalanon nga dapat mo laktan. O kon talupangdon mo lamang ang akon mga sugo! Nian ang imo paghidait mangin subong sang suba, kag ang imo pagkamatarong subong sang mga balod sang dagat.”—Isaias 48:17, 18.
14. Paano ang mga prinsipio sang Biblia makabulig sa imo agod malikawan ang kasakit sang pagbayad sa mga utang?
14 Ang pagsunod sa mga prinsipio sang Biblia magabulig sa imo agod malikawan ang daku nga kasakit kag pagbakho. Halimbawa, ang Biblia nagasiling nga yadtong nagpalambo sing gugma sa kuwarta “nagbuno sang ila kaugalingon sing madamong kasakitan.” (1 Timoteo 6:9, 10) Naeksperiensiahan bala sang imo mga katubotubo ang masakit nga kamatuoran sini nga kasulatan? Ang iban nga pamatan-on nga mga lalaki kag mga babayi nalubong sa utang bangod naghunahuna sila nga ang ila mga panapton dapat may popular nga ngalan kag pinakabag-o kag ang ila teknolohiko nga mga gamit dapat amo ang pinakauso. Ang pagbayad sa malawig kag mataas sing interes nga mga utang bangod sa mga butang nga indi mo gid masarangan isa ka masakit nga porma sang pag-ulipon!—Hulubaton 22:7.
15. Sa anong mga paagi ginaamligan ka sang mga prinsipio sang Biblia gikan sa kasakit nga resulta sang seksuwal nga imoralidad?
15 Binagbinaga man ang tuhoy sa seksuwal nga imoralidad. Sa bug-os nga kalibutan kada tuig, di-maisip nga wala makasal nga mga tin-edyer ang nagabusong. Ang iban nagabun-ag sing bata nga wala nila ginahandum ukon wala sila sing ikasarang nga padakuon. Ang iban nagapaaborsion kag subong resulta, ginatormento ang ila konsiensia. Ang iban pa gid nga mga pamatan-on gintapikan sing balatian nga ginapaliton sang seksuwal nga paghulid, subong sang AIDS. Sa pagkamatuod, para sa isa nga nakakilala kay Jehova, ang pinakadaku nga resulta amo ang nahalitan nga kaangtanan kay Jehova. * (Galacia 5:19-21) Bangod sa maayo nga rason, ang Biblia nagasiling: “Palagyo kamo sa pagkamakihilawason.”—1 Corinto 6:18.
Pag-alagad sa “Malipayon nga Dios”
16. (a) Paano naton nahibaluan nga luyag ni Jehova nga magkalipay ka sa imo pagkapamatan-on? (b) Ngaa nagahatag si Jehova sing mga panuytoy nga dapat mo sundon?
16 Ginalaragway sang Biblia si Jehova subong ang “malipayon nga Dios.” (1 Timoteo 1:11) Luyag niya nga magmalipayon ka man. Sa kamatuoran, ang iya mismo Pulong nagasiling: “Magkalipay ka sa imo pagkapamatan-on. Magkalipay ka samtang bata pa ikaw.” (Manugwali 11:9, Today’s English Version) Apang may ikasarang si Jehova nga makita ang palaabuton kag mahibaluan niya ang resulta sa ulihi sang maayo kag malain nga batasan. Amo kon ngaa nagalaygay sia sa imo: “Dumduma, karon, ang imo Dakung Manunuga sa mga adlaw sang imo pagkapamatan-on, sa wala pa magkari ang malaut nga mga adlaw, ukon mag-abot ang mga tuig nga magasiling ka: ‘Wala ako sing kalipay sa ila.’”—Manugwali 12:1.
17, 18. Paano ginpabutyag sang isa ka pamatan-on nga Cristiano ang iya kalipay sa pag-alagad kay Jehova, kag paano ikaw makasapo sing amo man nga kalipay?
17 Madamo karon nga mga pamatan-on ang nakasapo sing daku nga kalipay sa pag-alagad kay Jehova. Halimbawa, ang 15-anyos nga si Lina nagsiling: “May respeto ako sa akon kaugalingon. Mapagros ang akon lawas bangod wala ako nagapanigarilyo ukon nagadroga. Nagabaton ako sing mapuslanon nga panuytoy paagi sa kongregasyon nga nagabulig sa akon sa pagpakigbato sa daku nga pag-ipit ni Satanas. Malipayon ako bangod sang makapalig-on nga pagpakig-upod nga matigayon ko sa Kingdom Hall. Labaw sa tanan, may paglaum ako nga mabuhi sing dayon sa duta.”
18 Kaangay ni Lina, madamo nga Cristianong mga pamatan-on ang nagapakig-away sing lakas para sa pagtuo, kag nagapahalipay ini sa ila. Nahangpan nila nga ang ila kabuhi—bisan pa mabudlay kon kaisa—may matuod nga katuyuan kag matuod nga palaabuton. Busa, padayon nga alagda ang Dios nga nagaulikid sa imo labing maayo nga mga kaayuhan. Pahalipaya ang iya tagipusuon, kag pahalipayon ka niya karon kag tubtob sa walay katubtuban!—Salmo 5:11.
[Mga nota]
^ par. 3 Tan-awa ang artikulo nga “Ginbalik sang Kamatuoran ang Akon Kabuhi,” nga nagguwa sa Nobiembre 8, 1996, nga guwa sang Magmata!
^ par. 15 Makapalugpay ang mahibaluan nga kon ang isa ka tawo maghinulsol, mag-untat sa paghimo sing malain, kag magtu-ad sang iya mga sala, si Jehova “magapatawad sing bugana.”—Isaias 55:7.
Madumduman Mo Bala?
• Ano nga katalagman ang ginaatubang mo gikan sa “isa nga malauton,” si Satanas?
• Paano mo mapahalipay ang tagipusuon ni Jehova?
• Paano ginapakita sang Biblia nga ginaulikdan ka ni Jehova?
• Ano ang pila ka pagpakamaayo sang pag-alagad kay Jehova?
[Mga Pamangkot sa Pagtinuon]
[Kahon/Retrato sa pahina 13]
Isa ka Matarong nga Tawo nga Diutayan Lang Masandad
Si Asaf isa anay ka prominente nga Levinhon nga manuglanton sa templo ni Jehova sa dumaan nga Israel. Nagkomposo pa gani sia sing mga ambahanon nga gingamit sa dayag nga pagsimba. Apang, walay sapayan sang iya tumalagsahon nga mga pribilehiyo, naganyat si Asaf sa di-diosnon nga paggawi sang iya mga kadungan, nga nagalapas sa kasuguan sang Dios apang daw wala ginasilutan. “Ang akon mga tiil diutayan lang makadanlog, ang akon mga tikang diutayan lang makadalin-as,” baton sang ulihi ni Asaf. “Nangin mahisaon ako sa mga matinaastaason, sang nakita ko ang kalinong sang mga malauton.”—Salmo 73:2, 3.
Sang ulihi, nagkadto si Asaf sa santuaryo sang Dios kag nangamuyo tuhoy sa iya problema. Sa tapos matimbangtimbang liwat ang mga butang sa espirituwal nga paagi, nahangpan na niya nga ginadumtan ni Jehova ang kalainan kag nga, sa ulihi, pagaanihon sang mga malaut kag sang mga matarong ang ila ginasab-ug. (Salmo 73:17-20; Galacia 6:7, 8) Sa pagkamatuod, ang mga malaut yara sa madanlog nga duta. Sa ulihi, mapukan sila kon laglagon na ni Jehova ining di-diosnon nga sistema.—Bugna 21:8.
[Retrato sa pahina 15]
Ginaulikdan ni Jehova ang imo labing maayo nga mga kaayuhan, apang nagatinguha si Satanas nga tukbon ka
[Retrato sa pahina 16]
Madamo nga mga pamatan-on ang nakasapo sing daku gid nga kalipay paagi sa pag-alagad kay Jehova upod sa mga masigka-Cristiano
