Ano ang Luyag Mo Ipamangkot sa Dios?

ANG mga tawo sa bug-os nga duta may serioso nga mga pamangkot tuhoy sa kabuhi. Ikaw man bala? Madamo ang nagpresentar sang ila mga pamangkot sa relihioso nga mga manunudlo apang wala sila makabaton sing makaalayaw nga mga sabat. Ang iban nagapalibog sa sini nga mga pamangkot sa ila lamang kaugalingon. Ang iban naman nagapangamuyo agod mangayo sing panuytoy. Posible gid bala nga makatigayon ka sing mga sabat gikan sa Dios tuhoy sa mga butang nga nagapalibog sa imo? Lakip sa mga pamangkot nga luyag ipamangkot sang madamo sa Dios amo ini.

Sin-o gid ikaw nga Dios?

Ang pagtamod sang mga tawo sa Dios impluwensiado sang ila kultura, sang relihion sang ila mga ginikanan, kag ayhan sang ila luyag patihan. Ang iban nga mga tawo nagahatag sing ngalan sa Dios; ang iban naman nagatawag lamang sa iya nga Dios. Importante bala ini? May isa lamang bala ka matuod nga Dios nga nagapahayag sang iya kaugalingon kag sang iya ngalan sa aton?

Ngaa may daku gid nga pag-antos?

Kon bangod sa di-mahalungon ukon imoral nga pagkabuhi sang isa ka tawo, nahalitan ang iya lawas ukon nag-imol sia, mahimo nga magreklamo sia. Apang mahimo nga nahangpan gid niya kon ngaa nagaantos sia.

Apang, madamo ang nagaantos nga indi sila ang salaon. Ang iban may grabe nga mga balatian. Ang iban naman nagapanikasog batok sa daw indi malandas nga mga problema agod may mapuy-an kag may bastante nga makaon ang ila pamilya. Minilyon ang mga biktima sang krimen, inaway, patarasak nga kasingki, kinaugali nga mga kalamidad, ukon inhustisya sa kamot sang mga tawo nga may awtoridad.

Gani, halangpunon nga madamo ang nagapamangkot: ‘Ngaa naglapnag gid ini nga mga kahimtangan? Ngaa ginatugutan sang Dios ini tanan nga pag-antos?’

 Ngaa nagaluntad ako? Ano ang katuyuan sang kabuhi?

Ini nga mga pamangkot masami nga ginapamangkot bangod sang kapaslawan nga ginabatyag sang isa ka tawo nga indi makatigayon sing matuod nga kaayawan gikan sa iya ginahimo sa adlaw-adlaw​​—⁠kag matuod ini sa madamo nga mga tawo. Minilyon ang nagapati nga ang kabuhi sang tagsa ka tawo pagbuot sang Dios. Matuod bala ini? Kon ang Dios may pila ka pinasahi nga katuyuan para sa imo, walay duhaduha nga luyag mo mahibaluan kon ano ini.

Sa tanan nga libro sa kalibutan, isa ang maathag nga nagasiling nga gin-inspirar ini sang Dios. Subong amo ang paabuton mo sa isa ka mensahe nga naghalin sa Dios para sa tanan nga katawhan, ini nga libro matigayon sa mas madamo nga mga lenguahe sangsa bisan ano nga libro nga nasulat. Amo ini ang Balaan nga Biblia. Sa sini, ginapahayag sang Manunuga sang langit kag duta, ang Dios mismo, kon sin-⁠o sia kag kon ano ang iya ngalan. Nahibaluan mo bala kon ano ang iya ngalan? Nahibaluan mo bala kon ano nga sahi sang Persona ang Dios suno sa Biblia? Nahibaluan mo bala kon ano ang ginasiling sini tuhoy sa ginapaabot sang Dios sa imo?

 [Credit Line sang retrato sa pahina 2]

COVER: Chad Ehlers/Index Stock Photography

[Credit Line sang retrato sa pahina 3]

Mountain: Chad Ehlers/Index Stock Photography