‘Hupti ang Maayo nga Konsiensia’

“MAGPATUYTOY sa imo konsiensia” amo ang pirme mabatian nga laygay. Apang agod ang aton konsiensia mangin isa ka masaligan nga tuytoy, kinahanglan ini hanason sing nagakaigo sa kon ano ang husto kag sayop, kag dapat kita mangin mahinantupon sa panuytoy sini.

Binagbinaga ang eksperiensia ni Zaqueo, nga narekord sa Biblia. Si Zaqueo, nga taga-Jerico, isa ka pangulo nga manugsukot sing buhis kag isa ka manggaranon nga tawo. Gin-ako mismo niya nga natigayon niya ang iya manggad paagi sa pagpangilkil​​—⁠isa ka buhat nga sa kapierdihan gid sang iban. Gintublag bala si Zaqueo sang iya konsiensia bangod sang iya di-matarong nga mga buhat? Kon natublag sia, mahimo nga ginabale-wala niya ini.​​—⁠Lucas 19:​1-7.

Apang, nag-utwas ang kahimtangan nga nangin kabangdanan agod binagbinagon ni Zaqueo ang iya dalanon. Nag-abot si Jesus sa Jerico. Luyag sang putot nga si Zaqueo nga makita si Jesus, apang indi niya sia makita bangod sang kadam-an. Sa amo nagdalagan sia sa unahan kag nagsaka sa kahoy agod makita gid si Jesus. Nagdayaw sa daku gid nga interes ni Zaqueo, ginsilingan sia ni Jesus nga duawon niya sia sa iya puluy-an. Malipayon nga gin-abiabi ni Zaqueo ang iya bantog nga bisita.

Ang mga nakita kag nabatian ni Zaqueo samtang nagapakig-upod sia kay Jesus nagtandog sang iya tagipusuon kag nagpahulag sa iya nga bag-uhon ang iya mga dalanon. Nagsiling sia: “Yari karon! Ang katunga sang akon pagkabutang, Ginuo, ihatag ko sa mga imol, kag ang bisan ano nga ginkilkil ko kay bisan sin-o nga tawo, iuli ko sing apat ka pilo.”​​—⁠Lucas 19:8.

Nasanagan ang konsiensia ni Zaqueo, kag ginpamatian kag gintuman niya ini. Ang maayo nga mga resulta may daku nga epekto. Handurawa kon ano ang nabatyagan ni Zaqueo sang si Jesus nagsiling sa iya: “Sa sini nga adlaw ang kaluwasan nag-abot sa sini nga balay!”​​—⁠Lucas 19:9.

Makapalig-on gid nga halimbawa! Ginapakita sini nga bisan ano man nga dalanon ang aton ginlaktan anay, mahimo kita magbag-o. Kaangay ni Zaqueo, mahimo naton pamatian ang mga pulong ni Jesus​​—⁠nga ginrekord sa Biblia⁠​—⁠kag palambuon ang aton igbalatyag sa kon ano ang husto kag sayop. Nian, subong sang ginlaygay ni Pedro, ‘hupti ang maayo nga konsiensia.’ Mahimo naton pamatian ang aton nahanas nga konsiensia kag himuon ang husto.​​—⁠1 Pedro 3:⁠16.