Kon Paano Mapalambo ang Matuod nga Gugma

“Ang gugma amo ang epektibo nga bulong sang kabuhi; ang gugma kabuhi.”​​—⁠Living to Purpose, ni Joseph Johnson, 1871.

PAANO matun-an sang isa ka tawo ang pagpakita sing gugma? Paagi bala sa pagtuon sa sikolohiya? Paagi sa pagbasa sing bulig-sa-kaugalingon nga mga libro? Paagi sa pagtan-aw sing romantiko nga mga pelikula? Indi gid. Una sa tanan, ang mga tawo makatuon nga magpakita sing gugma paagi sa ehemplo kag paghanas sang ila mga ginikanan. Mahangpan sang mga kabataan ang gugma kon, sa mapinalanggaon gid nga kahimtangan, makita nila ang ila mga ginikanan nga nagaaman sing pagkaon kag nagaamlig sa ila, nagakomunikar sa ila, kag interesado gid sa ila. Matun-an man nila nga magpakita sing gugma kon tudluan sila sang ila mga ginikanan nga tumanon ang maligdong nga mga prinsipio tuhoy sa maayo kag malain.

Ang matuod nga gugma wala lamang nagadalahig sang emosyon. Nagapanghikot ini sing dalayon para sa kaayuhan sang iban, bisan pa indi nila ini maapresyar sing bug-os sa amo nga tion, nga masami nagakatabo sa mga kabataan kon ginapadapat ang mahigugmaon nga disiplina. Ang isa ka himpit nga halimbawa nga nagapakita sing di-makagod nga gugma amo ang Manunuga mismo. Si apostol Pablo nagsulat: “Anak ko, dili pagpakadiutaya ang disiplina ni Jehova, ukon mapunaw kon tadlungon ka niya; kay ang ginahigugma ni Jehova ginadisiplina niya.”​​—⁠Hebreo 12:​5, 6.

Mga ginikanan, paano ninyo mailog si Jehova sa pagpakita sing gugma sa inyo pamilya? Kag daw ano ka importante ang inyo halimbawa sa inyo kaangtanan sa isa kag isa subong bana kag asawa?

Itudlo ang Pagpakita sing Gugma Paagi sa Halimbawa

Kon ikaw isa ka bana, ginatahod mo bala, ukon ginapabaloran, ang imo asawa kag ginapakig-angutan sia sing dungganon kag matinahuron? Kon ikaw isa ka asawa, mapinalanggaon ka bala kag masinakdagon sa imo bana? Ang Biblia nagasiling nga ang bana kag asawa dapat maghigugmaanay kag magtahuray. (Efeso 5:​28; Tito 2:⁠4) Kon ginahimo nila ini, makita mismo sang ila kabataan nga nagapanghikot gid ang Cristianong gugma. Daw ano ini ka epektibo kag mapuslanon nga leksion!

Ginapalambo man sang mga ginikanan ang gugma sa ila puluy-an kon ila ginasunod ang mataas nga mga talaksan para sa pamilya may kaangtanan sa mga kalingawan, moralidad, mga tulumuron kag mga prioridad. Sa bug-os nga kalibutan, nasapwan sang mga tawo nga ang Biblia isa ka daku nga bulig sa pagpahamtang sining mga talaksan para sa pamilya, nga nagahatag mismo sing buhi nga pamatuod nga ang Biblia “inspirado sang Dios kag mapuslanon sa pagpanudlo, sa pagsabdong,  sa pagtadlong sang mga butang, sa pagdisiplina sa pagkamatarong.” (2 Timoteo 3:16) Sa pagkamatuod, ang mga prinsipio sa moral kag panuytoy sa kabuhi nga makita lamang sa Sermon sa Bukid ginakabig sing lapnag subong indi malabawan.​​—⁠Mateo, kapitulo 5 tubtob 7.

Kon ang bug-os nga pamilya nagasalig sa Dios para sa panuytoy kag nagatuman sang iya mga talaksan, ang tagsa ka indibiduwal makabatyag pa gid sing kalig-unan kag mahimo gid nga ang mga kabataan magdaku nga nagahigugma kag nagatahod sa ila mga ginikanan. Sa pihak nga bahin, sa mga puluy-an nga may doble, di-nagakaigo, ukon lugak nga mga talaksan, ang kabataan mahimo mangin buringot, maakigon, kag palabato.​​—⁠Roma 2:​21; Colosas 3:⁠21.

Kamusta naman ang nagasolo nga mga ginikanan? Disbentaha gid bala sila sa pagtudlo sa ila mga kabataan nga magpakita sing gugma? Indi gid man. Bisan pa wala sing mas maayo pa sa pagbuligay sang maayo nga iloy kag amay, ginapakita sang mga eksperiensia nga ang kalidad sang mga kaangtanan sa pamilya makatumbas sa pila ka kasangkaron sa isa ka nadula nga ginikanan. Kon ikaw isa ka nagasolo nga ginikanan, tinguhai nga iaplikar ang mga prinsipio sang Biblia sa inyo puluy-an. Huo, ang isa ka hulubaton nagasiling sa aton: “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop. Sa tanan mo nga dalanon talupangda sia, kag tadlungon niya ang imo mga banas”​​—⁠pati na ang banas sang pagkaginikanan.​​—⁠Hulubaton 3:​5, 6; Santiago 1:5.

Madamo sang mabuot nga mga pamatan-on ang nagdaku nga may nagasolo nga ginikanan kag masapwan sila karon nga matutom nga nagaalagad sa Dios sa linibo ka Cristianong kongregasyon sang mga Saksi ni Jehova sa bug-os nga kalibutan. Pamatuod ini nga bisan ang nagasolo nga mga ginikanan mahimo man magmadinalag-on sa pagtudlo sa ila kabataan nga magpakita sing gugma.

Kon Paano Mapalambo sang Tanan ang Gugma

Gintagna sang Biblia nga ang “katapusan nga mga adlaw” pagatandaan sang kakulang sang “kinaugali nga gugma,” buot silingon, kakulang sang kinaugali nga pagpalangga nga kinaandan nga ginabatyag sang tagsa ka katapo sang pamilya para sa isa kag isa. (2 Timoteo 3:​1, 3) Apang, bisan pa ang mga nagdaku sa isa ka kahimtangan nga wala sing pagpalangga makatuon sa pagpalambo sing gugma. Paano? Paagi sa pagtuon gikan kay Jehova, nga amo ang Tuburan mismo sang gugma kag nagapakita sing gugma kag pagpalangga sa tanan nga nagadangop sa iya sing bug-os tagipusuon. (1 Juan 4:​7, 8) “Kon magbiya sa akon ang akon amay kag akon iloy, nian si Jehova magasapopo sa akon,” siling sang isa ka salmista.​​—⁠Salmo 27:10.

Ginapakita ni Jehova ang iya gugma sa aton sa madamo nga paagi. Lakip sa sini ang amaynon nga panuytoy paagi sa Biblia, ang bulig sang balaan nga espiritu, kag ang mahigugmaon nga pagsakdag sang Cristianong paghiliutod. (Salmo 119:97-​105; Lucas 11:13; Hebreo 10:​24, 25) Binagbinaga kon paano ining tatlo ka aman makabulig sa imo sa pagpalambo sing gugma sa Dios kag sa isigkatawo.

Inspirado nga Amaynon nga Panuytoy

Agod mapalambo ang isa ka mainit nga kaangtanan sa isa, dapat makilala gid naton ina nga persona. Paagi sa pagpakilala sang iya kaugalingon sa mga pahina sang Biblia, ginaagda kita ni Jehova nga magsuod sa iya. Apang, indi bastante ang pagbasa lamang sa Biblia. Dapat naton iaplikar ang mga panudlo sini kag magbenepisyo sa resulta sini. (Salmo 19:​7-​10) “Ako, si Jehova, amo ang imo Dios, ang Isa nga nagatudlo sa imo agod makabenepisyo ka, ang Isa nga nagatuytoy sa imo sa dalanon nga dapat mo laktan,” siling sang Isaias 48:17. Huo, si Jehova, ang personipikasyon sang gugma, nagatudlo sa aton para sa aton kaayuhan​​—⁠indi bangod nga luyag niya nga latiran ang aton kahilwayan paagi sa indi kinahanglanon nga mga pagsulundan kag mga regulasyon.

 Ang sibu nga ihibalo sa Biblia makabulig man sa aton nga mapalambo ang gugma sa aton mga isigkatawo. Ini bangod ang kamatuoran sang Biblia nagatudlo sa aton tuhoy sa pagtamod sang Dios sa mga tawo kag nagapakita sa aton sang mga prinsipio nga dapat mag-impluwensia kon paano naton ginapakig-angutan ang isa kag isa. Bangod sini nga ihibalo, may malig-on kita nga sadsaran nga palambuon ang gugma sa aton isigkatawo. Si apostol Pablo nagsiling: “Amo ini ang padayon ko nga ginapangamuyo, nga kabay nga ang inyo gugma magbugana sing labi kag labi pa gid nga may sibu nga ihibalo kag bug-os nga paghantop.”​​—⁠Filipos 1:9.

Sa pag-ilustrar kon paano matuytuyan sing nagakaigo ang gugma paagi sa “sibu nga ihibalo,” binagbinaga ang sadsaran nga kamatuoran nga ginsiling sa Binuhatan 10:​34, 35: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” Kon ginatamod sang Dios ang katawhan paagi sa ila matarong nga mga buhat kag diosnon nga kahadlok, indi paagi sa ila nasyonalidad ukon rasa, indi bala nga dapat tamdon man naton ang aton mga isigkatawo nga wala sing pagpasulabi?​​—⁠Binuhatan 17:​26, 27; 1 Juan 4:​7-​11, 20, 21.

Gugma​​—⁠Isa ka Bunga sang Espiritu sang Dios

Subong nga ang sibu gid sa tion nga ulan sa isa ka katamnan nagabulig sa isa ka bugana nga patubas, ang espiritu sang Dios makapatubas sa mabinatunon nga mga indibiduwal sing mga kinaiya nga ginalaragway sang Biblia nga “mga bunga sang espiritu.” (Galacia 5:​22, 23) Ang panguna sa sining mga bunga amo ang gugma. (1 Corinto 13:13) Apang paano naton matigayon ang espiritu sang Dios? Ang importante nga paagi amo ang pangamuyo. Kon mangamuyo kita sing espiritu sang Dios, ihatag niya ini sa aton. (Lucas 11:​9-​13) “Padayon” ka bala nga nagapangamuyo sing balaan nga espiritu? Kon ginahimo mo ini, nian ang bilidhon nga bunga sini, lakip ang gugma, mangin hayag pa gid sa imo kabuhi.

Apang, may isa pa ka sahi sang espiritu nga nagapanghikot batok sa espiritu sang Dios. Ginatawag ini sang Biblia nga “espiritu sang kalibutan.” (1 Corinto 2:​12; Efeso 2:⁠2) Malain ini nga impluwensia, kag ang ginhalinan sini walay liwan kundi si Satanas nga Yawa, “ang gumalahom sining kalibutan” sang katawhan nga nahamulag gikan sa Dios. (Juan 12:31) Kaangay sang hangin nga nagapatap-ok sa yab-ok kag sagbot, “ang espiritu sang kalibutan” nagapukaw sang makahalalit nga mga kailigbon nga nagalaglag sang gugma kag nagabusog sang mga kaluyahon sang unod.​​—⁠Galacia 5:​19-​21.

Maangkon sang mga tawo ining malain nga espiritu kon ginapadayag nila ang ila kaugalingon sa materyalistiko, ako-​anay nga panghunahuna, masingki nga panimuot, kag sa tiko kag masami sayop nga pagtamod tuhoy sa gugma nga kinaandan na gid sa kalibutan karon. Kon luyag mo mapalambo ang matuod nga gugma, dapat pamatukan mo gid ang espiritu sang kalibutan. (Santiago 4:⁠7) Apang, indi magsalig sa imo kaugalingon nga kusog; mangayo sing bulig kay Jehova. Ang iya espiritu​​—⁠ang labing gamhanan nga puwersa sa uniberso⁠​—⁠makapabakod sa imo kag makahatag sa imo sing kadalag-an.​​—⁠Salmo 121:2.

Magtuon sa Pagpakita sing Gugma Gikan sa Cristianong Paghiliutod

Subong nga ang kabataan nagatuon sa pagpakita sing gugma kon ginahigugma sila sa ila puluy-an, kita tanan​​—⁠bata kag tigulang⁠​—⁠makapalambo  sing gugma paagi sa pagpakig-upod sa iban nga mga Cristiano. (Juan 13:​34, 35) Sa pagkamatuod, ang isa sang panguna nga mga hilikuton sang Cristianong kongregasyon amo ang pag-aman sing isa ka kahimtangan nga ang mga indibiduwal “makapalig-on sa isa kag isa sa gugma kag maayong mga buhat.”​​—⁠Hebreo 10:​24, New International Version.

Ini nga gugma ilabi na nga ginaapresyar sang mga “ginpanitan kag nag-aplaag” sa wala sing gugma nga kalibutan sa palibot naton. (Mateo 9:36) Ginapakita sang eksperiensia nga ang mahigugmaon nga mga kaangtanan sa mga adulto makalandas sang madamo nga malain nga epekto sa isa nga gindingutan sang gugma sang bata pa. Busa, daw ano ka importante nga ang tanan nga dedikado nga Cristiano hanuot nga mag-abiabi sa mga bag-uhan nga nagapakig-upod sa ila!

“Ang Gugma Wala Nagakapaslawi”

Nagasiling ang Biblia nga ang “gugma wala nagakapaslawi.” (1 Corinto 13:⁠8) Ngaa? Si apostol Pablo nagasiling sa aton: “Ang gugma mapinasensiahon kag mainayuhon. Ang gugma indi maimon, wala ini nagapahambog, wala nagapahabok, wala nagagawi sing di-nagakaigo, wala nagapangita sang kaugalingon nga kaayuhan, indi maakigon. Wala ini nagaisip sang kahalitan.” (1 Corinto 13:​4, 5) Maathag nga ini nga gugma indi isa ka gindahumdahom nga ideya ukon pakulahaw nga balatyagon. Sa kabaliskaran​​—⁠ang mga nagapakita sini nakahibalo kag nagabaton sang mga kapaslawan kag kasakit sa kabuhi, apang wala nila gintugutan nga gub-on sini ang ila gugma sa isigkatawo. Ini nga gugma “himpit [gid] nga higot sang paghiusa.”​​—⁠Colosas 3:​12-​14.

Binagbinaga ang halimbawa sang isa ka 17-anyos nga Cristianong dalagita sa Korea. Sang mag-alagad sia kay Jehova nga Dios, wala mahamuot ang iya pamilya kag ginpalayas sia sa ila balay. Apang, sa baylo nga maakig, nagpangamuyo sia tuhoy sa sini, kag gintugutan niya nga dihunon sang Pulong kag espiritu sang Dios ang iya panghunahuna. Pagkatapos sini, pirme sia nagasulat sa iya pamilya, kag ginapabutyag niya sa iya mga sulat ang iya matuod nga pagpalangga sa ila. Bilang resulta, ang iya duha ka magulang nga lalaki nagtuon sa Biblia kag dedikado na nga mga Cristiano karon. Ang iya iloy kag manghod nga lalaki nagbaton man sang kamatuoran sang Biblia. Kag, ang iya amay, nga nagapamatok gid anay, nagbag-o ang panimuot. Ang Saksi nga dalagita nagsulat: “Minyo kami tanan sa mga masigka-Cristiano, kag ang amon pamilya sang nahiusa nga mga sumilimba nagadamo na karon sing 23.” Daw ano nga kadalag-an bangod sang gugma!

Luyag mo bala mapalambo ang matuod nga gugma kag buligan ang iban nga himuon man ini? Kon amo magdangop kay Jehova, ang Tuburan sining bilidhon nga kinaiya. Huo, tumana ang iya Pulong, magpangamuyo sing balaan nga espiritu, kag tayuyon nga magpakig-upod sa Cristianong paghiliutod. (Isaias 11:⁠9; Mateo 5:⁠5) Makalilipay gid mahibaluan nga sa indi madugay ang tanan nga malaut wala na, kag magapabilin lamang ang mga nagapakita sing matuod nga Cristianong gugma! Sa pagkamatuod, ang gugma amo gid ang yabi sang kalipay kag kabuhi.​​—⁠Salmo 37:​10, 11; 1 Juan 3:⁠14.

[Mga retrato sa pahina 6]

Ang pangamuyo kag ang pagtuon sa Pulong sang Dios makabulig sa aton nga mapalambo ang matuod nga gugma