Lugpay sa mga Nagapangayo sing Bulig

ANG Biblia indi isa ka libro para sa kapagros sa hunahuna. Apang, nagahatag ini sa aton sing lugpay kag nagabulig sa aton nga maapresyar ang kabuhi walay sapayan sang mga kabudlayan nga aton ginaatubang. Sing maminatud-on, ang Kasulatan nagasiling: “Ang tawo, nga natawo sa babayi, malip-ot sing kabuhi kag puno sing kagamo.” (Job 14:1) Ang aton mismo nga pagkadihimpit amo ang ginabangdan sang aton pila ka pagtilaw. Apang sin-o gid bala ang may salabton sa pag-antos sang mga tawo?

Ginapakilala sia sang Biblia subong ang isa ka malaut nga espiritu nga ginatawag nga Yawa kag Satanas. ‘Ginapatalang niya ang bug-os napuy-an nga duta’ kag ginapahanabo ang madamo nga mga kabudlayan nga nagapapiot sa katawhan. Apang, ginasugid man sa aton sang Biblia nga malip-ot na lamang ang iya tion. (Bugna 12:​9, 12) Sa dili madugay madula na ang kapiutan nga ginhimo ni Satanas sa mga nagapuyo sa duta paagi sa pagpasilabot sang Dios. Suno sa Biblia, ang ginsaad sang Dios nga bag-ong kalibutan sang pagkamatarong magatapos sa pagkawalay paglaum kag kasubo.​​—⁠2 Pedro 3:⁠13.

Makalulugpay gid nga mahibaluan nga ang pag-antos sang mga tawo temporaryo lamang! Sa paggahom sang langitnon nga Ginharian sang Dios nga dumalahan ni Jesucristo, ang inhustisya kag pag-antos madula na. Tuhoy sa gintangdo nga Hari sang Dios, ang Kasulatan nagasiling: “Luwason niya ang imol nga nagapangayo sing bulig, subong man ang nasit-an kag ang bisan sin-o nga wala sing manugtabang. Magakaawa sia sa kubos kag imol, kag luwason niya ang mga kalag sang mga imol. Tubson niya ang ila kalag gikan sa pagpigos kag kasingki, kag ang ila dugo mangin bilidhon sa iya itululok.”​​—⁠Salmo 72:12-​14.

Ang katumanan sining matagnaon nga mga pulong malapit na gid. Maangkon naton ang kabuhi nga walay katapusan sa isa ka paraiso nga duta sa makalilipay nga mga kahimtangan. (Lucas 23:43; Juan 17:3) Ang ihibalo tuhoy sa sining makalulugpay nga mga saad sang Kasulatan nagahatag sing paglaum kag lugpay sa mga nagapangayo sing bulig.

[Credit Line sang retrato sa pahina 32]

Depressed girl: Photo ILO/J. Maillard