“Magpalapit Kamo sa Dios, kag Magapalapit Sia sa Inyo”

Sang Una kag Karon—Nakakita Sia sing Kusog sa Pagbag-o

GINLARAGWAY ni Sandra, nga taga-Mexico, ang iya kaugalingon subong black sheep sa iya pamilya. Ginsikway sia kag wala ginpalangga sang tin-edyer pa sia. Nagsiling sia: “Pirme ako nagbatyag nga walay pulos sang tin-edyer pa ako kag madamo sing duhaduha kon ngaa nabuhi pa ako kag sa kabuhi mismo.”

Nagsugod si Sandra sa pag-inom sang alak sang iya amay sa ila balay sang naghayskul sia. Sang ulihi, sia na ang nagbakal sang iya kaugalingon nga alak kag nangin alkoholiko. “Wala sing rason nga mabuhi pa ako,” baton niya. Bangod nadulaan sing paglaum, nagdangop si Sandra sa droga. “Ang nakabulig lang sa akon agod malimtan ko ang akon mga problema,” siling niya, “amo ang unod sang akon handbag: isa ka botelya sang makahulubog nga ilimnon, pila ka pildoras, ukon diutay nga marijuana.”

Sang makatapos si Sandra sing medisina, labi pa gid nga nangin alkoholiko sia. Gintilawan niya nga maghikog. Apang nabuhi sia.

Nangita si Sandra sing espirituwal nga bulig kag emosyonal nga suportar sa madamo nga relihion apang napaslawan sia. Bangod nadulaan sing paglaum kag desperado, pirme sia nagatuaw sa Dios: “Diin ka na? Ngaa wala mo ako ginabuligan?” Manubo gid ang pagtamod niya sa iya kaugalingon sang masugilanon sia sang isa sang mga Saksi ni Jehova. Nagdul-ong ini sa isa ka personal nga pagtuon sa Biblia. Natandog gid si Sandra sang mahibaluan niya nga “si Jehova malapit sa mga buong sing tagipusuon.”​—⁠Salmo 34:18.

Ginpahangop kay Sandra sang nagadumala sing pagtuon sa Biblia upod sa iya nga nahibaluan ni Jehova nga Dios nga maluya kita bangod sa sala kag pagkadihimpit nga napanubli naton kay Adan. Nahisayran ni Sandra nga nahangpan sang Dios nga indi kita makapahisanto sing himpit sa matarong nga mga talaksan. (Salmo 51:⁠5; Roma 3:23; 5:​12, 18) Nalipay sia nga mahibaluan nga wala ginatan-aw ni Jehova ang aton lamang mga kaluyahon, kag wala sia nagapaabot sing labaw sa masarangan naton. Ang salmista namangkot: “Kon ang mga sayop amo ang imo ginabantayan, O Jah, O Jehova, sin-o bala ang makatindog?”​—⁠Salmo 130:3.

Ang isa ka importante nga kamatuoran sa Biblia nga nagpahalipay sa tagipusuon ni Sandra amo ang halad nga gawad ni Jesucristo. Paagi sa sini, si Jehova maluluy-on nga nagahatag sa matinumanon nga katawhan sing matadlong nga tindog walay sapayan sang ila mga di-kahimpitan. (1 Juan 2:⁠2; 4:​9, 10) Huo, matigayon naton “ang kapatawaran sang aton kalapasan” kag sa amo mabuligan nga malandas ang bisan ano nga pagbatyag sing pagkawalay kapuslanan.​—⁠Efeso 1:7.

Natun-an ni Sandra ang hamili nga mga leksion gikan sa halimbawa ni apostol Pablo. Naapresyar gid ni Pablo ang kaayo sang Dios sa mainayuhon nga pagpatawad sa iya nagligad nga mga kasal-anan kag pagsuportar sa iya lakas nga pagpakig-away agod malandas ang nagalukmat nga mga kaluyahon. (Roma 7:15-25; 1 Corinto 15:​9, 10) Gintadlong ni Pablo ang iya kabuhi, ‘ginsakit ang iya lawas kag ginhimo ini nga ulipon’ agod makapabilin sa banas nga ginakahamut-an sang Dios. (1 Corinto 9:27) Wala niya  gintugutan nga ulipunon sia sang iya makasasala nga mga huyog.

Nabudlayan si Sandra sa paglandas sa iya mga kaluyahon, apang padayon niya nga ginbatuan ini. Paagi sa pangamuyo, hanuot sia nga nangayo sing bulig kag kaluoy kay Jehova nga malandas niya ini. (Salmo 55:22; Santiago 4:8) Sang mabatyagan ni Sandra ang personal nga interes sang Dios sa iya, ginbag-o niya ang iya kabuhi. “Nalipay ako sa pagtudlo sing Biblia sa iban sing bug-os tion,” siling niya. Pribilehiyo ni Sandra nga mabuligan ang iya magulang kag ang iya manghod nga babayi nga makilala si Jehova. Samtang ‘nagabuhat sia sing maayo,’ ginaboluntaryo man niya ang iya ikasarang sa medisina sa mga kombension sang mga Saksi ni Jehova.​—⁠Galacia 6:10.

Ano na ang natabo sa pagkagiyan ni Sandra? Masinaligon sia nga nagsiling: “Matawhay na ang akon hunahuna. Wala na ako nagainom, nagapanigarilyo, ukon nagagamit sing droga. Indi ko na ini kinahanglan. Nakita ko na ang akon ginapangita.”

[Blurb sa pahina 9]

“Nakita ko na ang akon ginapangita”

[Kahon sa pahina 9]

Epektibo nga mga Prinsipio sa Biblia

Ang masunod amo ang pila ka prinsipio sa Biblia nga nagbulig sa madamo nga malandas ang nagadagta nga pagkagiyan:

“Tinluan naton ang aton kaugalingon sang tanan nga kadagtaan sang lawas kag espiritu, nga ginahimpit ang pagkabalaan nga may kahadlok sa Dios.” (2 Corinto 7:1) Ang mga nagatinlo sang ila kaugalingon gikan sa kadagtaan kag nagalikaw sa di-matinlo nga mga buhat ginapakamaayo sang Dios.

“Ang kahadlok kay Jehova nagakahulugan sang pagdumot sa malain.” (Hulubaton 8:13) Ang matinahuron nga kahadlok sa Dios nagabulig sa isa ka tawo nga malandas ang malain nga mga bisyo, lakip na ang pag-abuso sa droga. Luwas nga nagapahamuot kay Jehova, ang nagbag-o nga tawo ginaamligan gikan sa makangilil-ad nga mga balatian.

“Magpasakop kag mangin matinumanon sa mga panguluhan kag sa mga awtoridad subong mga gumalahom.” (Tito 3:1) Sa madamo nga mga duog, ang pagpanag-iya ukon paggamit sing droga isa ka paglapas sa layi. Ang matuod nga mga Cristiano wala nagapanag-iya ukon nagagamit sing ilegal nga mga droga.