Ginhigugma Niya ang Kaayo

NATAPOS ni Milton G. Henschel, isa ka madugay na nga miembro sang Nagadumala nga Hubon sang mga Saksi ni Jehova, ang iya pagkabuhi sa duta subong isa ka hinaplas nga Cristiano sang Sabado, Marso 22, 2003. Nagapanuigon sia sing 82 anyos.

Lamharon pa si Milton Henschel sang nangin katapo sia sang talapuanan sa ulong-talatapan sang mga Saksi ni Jehova kag nagpangalagad sing matutom sa sulod sang kapin sa 60 ka tuig. Nakilala sia gilayon bangod sang iya maligdong nga mga desisyon kag sinsero nga interes sa hilikuton nga pagbantala sing Ginharian. Sang 1939, nangin sekretaryo sia ni N. H. Knorr, nga amo sadto ang manugtatap sang imprintahan sang mga Saksi ni Jehova sa Brooklyn. Sang ginpangunahan ni Utod Knorr ang mga Saksi sa bug-os nga kalibutan sang 1942, si Utod Henschel gihapon ang nangin kabulig niya. Napangasawa ni Utod Henschel si Lucille Bennett sang 1956, kag magkaupod nga gin-agom nila ang mga kalipay kag gin-atubang ang mga hangkat sang kabuhi.

Si Utod Henschel suod nga nangabudlay upod kay Utod Knorr tubtob napatay si Knorr sang 1977. Masami nga kaupod ni Utod Knorr, naglakbay si Utod Henschel sa kapin sa 150 ka pungsod, nga nagaduaw kag nagapalig-on sa mga Saksi ni Jehova sa bug-os nga kalibutan, labi na sa mga misyonero kag yadtong sa mga sanga talatapan. Mabudlay kon kaisa ini nga mga paglakbay, peligruso pa gani. Sang nagduaw sia sang 1963 sa isa ka kombension sa Liberia, nabiktima si Utod Henschel sang mapintas nga paghingabot bangod nangindi sia nga makigbahin sa isa ka patriotiko nga seremonya.⁠ * Walay kahadlok nga nagbalik si Utod Henschel sa Liberia pila lamang ka bulan sang ulihi agod makigkita sa presidente sang pungsod kag mangabay sang mas daku nga kahilwayan sa pagsimba para sa mga Saksi ni Jehova didto.

Kon nagasolbar sang mabudlay nga mga problema kag mga hangkat, si Utod Henschel kilala nga praktikal, mapasibusibuon, kag makatarunganon. Ginapabaloran gid sang iya mga kaupod sa trabaho ang iya pagkaorganisado, ang iya kaugdang, kag ang iya pagkapalalahog. Matinandaon gid sia, kag napahalipay niya ang mga misyonero sa nagkalainlain nga bahin sang kalibutan kay madumduman niya dayon ang ila mga ngalan, ang isa ukon duha ka prase sa lokal nga lenguahe, kag ang makahalam-ot nga mga tinaga​​—⁠nga ginahambal niya nga nagayuhumyuhum.

Ang Miqueas 6:8 nagapahanumdom sa aton nga luyag ni Jehova nga Dios nga ‘higugmaon naton ang kaayo.’ Dumdumon si Milton Henschel sa pagpahamtang sing halimbawa sa sini. Bisan pa may mabug-at sia nga mga responsibilidad, sa gihapon mahapos sia palapitan, malulo, kag mabuot. Paborito niya ini nga isiling, “Kon nagadesisyon tuhoy sa kon ano ang himuon sa isa ka sitwasyon, dumduma nga ang desisyon nga maluluy-on amo ang husto nga desisyon.” Bisan nasubuan kita sa pagtaliwan sining pinalangga nga utod, nalipay kita nga matutom sia nga nagbatas tubtob sa katapusan, kag pat-od sa pagbaton sang iya padya, “ang korona sang kabuhi.”​​—⁠Bugna 2:⁠10.

[Nota]

[Retrato sa pahina 31]

Si M. G. Henschel upod si N. H. Knorr

[Retrato sa pahina 31]

Upod sa iya asawa, si Lucille