Imo Bala Hanuot nga Ginapangita si Jehova?

HANDUM gid sang isa ka Cristiano nga lalaki nga ipaambit ang maayong balita sang Biblia sa iban nga mga pasahero sang tren. (Marcos 13:10) Apang, natahap sia. Nangampo bala sia? Wala, nangamuyo sia sing hanuot tuhoy sa sini kag nagtinguha kon paano umpisahan ang isa ka paghambalanay. Ginsabat ni Jehova nga Dios ang pangabay sining lalaki kag ginhatagan sia sing kaisog agod makapanaksi.

Ini nga pagkahanuot kinahanglanon samtang ginapangita naton si Jehova kag ang iya pagpakamaayo. Si apostol Pablo nagsiling: “Sia nga nagapalapit sa Dios dapat magpati nga amo sia kag nga sia ang nangin manugpadya sadtong hanuot nga nagapangita sa iya.” (Hebreo 11:6) Indi pa tuman ang pagpangita lamang kay Jehova. Ang Griegong berbo nga ginbadbad nga “hanuot nga nagapangita” isa ka porma nga nagapahangop sang mabaskog kag bug-os gid nga panikasog. Nadalahig ang bug-os nga tagipusuon, hunahuna, kalag, kag kusog sang isa. Kon hanuot naton nga ginapangita si Jehova, indi kita mangin di-masinapakon, magpulupatawhay, ukon magtinamad. Sa baylo, ginapakita naton ang matuod nga kakugi sa pagpangita sa iya.​​—⁠Binuhatan 15:17.

Ang mga Hanuot nga Nagpangita kay Jehova

Ang Kasulatan nagaunod sing madamo nga halimbawa sadtong naghimo sing hanuot gid nga mga panikasog agod pangitaon si Jehova. Ang isa sa ila amo si Jacob, nga nagpakigdumog sing lakas sa nagmateryalisar nga anghel sang Dios tubtob sa kaagahon. Bilang resulta, ginhatagan si Jacob sing ngalan nga Israel (Nakigsumpong sa Dios) bangod sia “nakigsumpong,” ukon nagpamilit, nagpanikasog sang iya kaugalingon, nagpadayon, sa Dios. Ginpakamaayo sia sang anghel bangod sang iya hanuot nga panikasog.​​—⁠Genesis 32:24-​30.

Yara man ang isa ka wala ginhingadlan nga babayi nga taga-Galilea nga sa sulod sang 12 ka tuig ginatagasan sing dugo, sa amo naghatag ini sa iya sing “madamo nga kasakit.” Sa sini nga kahimtangan, dapat indi sia magtandog sa iban nga tawo. Apang, nangisog sia sa pagsugata kay Jesus. Nagsiling sia: “Kon matandog ko ang iya panggua nga panapton magaayo ako.” Hunahunaa sia samtang nagapanagil-ot sia sa tunga sang ‘kadam-an nga nagasunod [kay Jesus] kag nagadis-og sa iya.’ Sang natandog niya ang panggua nga panapton ni Jesus, nabatyagan niya nga ‘nagtugon ang iya tagas’​​—⁠nag-ayo ang malala niya nga balatian! Sang namangkot si Jesus, “Sin-o ang nagtandog sang akon panggua nga panapton?” hinadlukan ang babayi. Apang mahigugmaon nga ginhambalan sia ni Jesus: “Anak, ang imo pagtuo nagpaayo sa imo. Lakat ka sa paghidait, kag magaayo ang imo lawas gikan sa imo malubha nga balatian.” Ginpadyaan ang iya mga panikasog.​​—⁠Marcos 5:​24-​34; Levitico 15:25-27.

Sa isa pa ka okasyon, ang isa ka babayi nga taga-Fenicia hanuot nga nagpakitluoy kay Jesus nga ayuhon ang iya bata nga babayi. Nagsabat si Jesus nga indi nagakaigo nga ihatag ang pagkaon sang mga bata sa mga totoy. Buot niya silingon  nga indi niya puede atipanon ang mga di-Israelinhon samtang pabay-an ang mga takus nga Judiyo. Nahantop ang buot silingon sang iya ilustrasyon, nagpakitluoy gihapon ang babayi nga nagasiling: “Huo, Ginuo; apang mga totoy matuod ang nagakaon sang mga usik nga nagakahulog sa latok sang ila mga agalon.” Ang iya mabakod nga pagtuo kag pagkasinsero nagpahulag kay Jesus sa pagsiling: “O babayi, daku ang imo pagtuo; mahanabo kuntani sa imo ang suno sa luyag mo.”​​—⁠Mateo 15:22-​28.

Ano ayhan ang natabo kon ining mga indibiduwal wala nagpadayon sa ila mga panikasog? Naangkon ayhan nila ang mga pagpakamaayo kon nag-untat sila sang ginbalibaran sila ukon wala ginsapak sang primero? Wala! Ining mga halimbawa nagapakita nga ang gintudlo ni Jesus, nga amo ang “maisog nga pagpamilit” nagakaigo, importante pa gani, sa pagpangita kay Jehova.​​—⁠Lucas 11:​5-​13.

Nahisuno sa Iya Kabubut-on

Sa ginhinambitan nga mga rekord sang mga ginpang-ayo paagi sa milagro, ang pagkahanuot amo lamang bala ang ginakinahanglan agod mag-ayo? Indi, ang ila mga pangabay dapat nahisuno sa kabubut-on sang Dios. Ginhatagan si Jesus sing gahom nga makahimo sing milagro sa pagpamatuod nga sia ang Anak sang Dios, ang ginsaad nga Mesias. (Juan 6:​14; 9:​33; Binuhatan 2:22) Dugang pa, ang mga milagro nga ginhimo ni Jesus nagalaragway sang daku nga mga pagpakamaayo sa duta nga ihatag ni Jehova sa mga tawo sa Milenyo nga Paggahom ni Cristo.​​—⁠Bugna 21:⁠4; 22:2.

Indi na kabubut-on sang Dios nga ang mga nagahimo sing matuod nga relihion makaangkon sing gahom sa paghimo sing mga milagro, subong sang ikasarang sa pagpang-ayo kag sa paghambal sang iban nga hambal. (1 Corinto 13:​8, 13) Ang kabubut-on niya para sa aton karon nagalakip sa pagbantala sing maayong balita sang Ginharian sa bug-os nga duta agod ang ‘tanan nga sahi sang tawo mahimo maluwas kag makadangat sa sibu nga ihibalo sang kamatuoran.’ (1 Timoteo 2:⁠4; Mateo 24:14; 28:​19, 20) Makapaabot gid ang mga alagad sang Dios nga pamatian ang ila hanuot nga mga pangamuyo kon hanuot sila nga manikasog nahisuno sa iya kabubut-on.

Mahimo mamangkot ang iban, ‘Ngaa abi manikasog pa gid kita kay matuman man sa ulihi ang kabubut-on sang Dios?’ Bisan pa matuod nga tumanon ni Jehova ang iya kabubut-on bisan wala ang mga panikasog sang tawo, nahamuot sia nga may mga indibiduwal nga nagahimo sang iya kabubut-on. Si Jehova mahimo ipaanggid sa isa ka tawo nga nagapatindog sang balay. Ang manunukod may isa ka kompleto nga plano para sa iya proyekto, apang namat-od sia sa paggamit sing lokal nga mga materyales. Sing kaanggid, si Jehova may yara man isa ka proyekto nga ginahimo sa karon kag nalipay sia nga gamiton ang iya mga alagad, nga kinabubut-on nga nagatanyag sang ila kaugalingon.​​—⁠Salmo 110:⁠3; 1 Corinto 9:​16, 17.

 Binagbinaga ang eksperiensia sang isa ka pamatan-on nga si Toshio. Sang maghayskul sia, luyag niya makapanaksi gid sing masangkad sa iya tumalagsahon nga teritoryo. Pirme niya ginadala ang iya Biblia kag ginatinguhaan nga mangin huwaran nga Cristiano. Sang malapit na lang magsira-klase sa iya una nga tuig sa hayskul, may isa ka kahigayunan nga makapamulongpulong sia sa klase. Nagpangamuyo si Toshio sing bulig kay Jehova kag nalipay sia nga nagpamati gid sing maayo ang bug-os nga klase sa iya pamulongpulong nga natig-uluhan, “Ang Akon Tulumuron nga Himuon nga Karera ang Pagpayunir.” Ginpaathag niya nga luyag niya mangin bug-os tion nga ministro sang mga Saksi ni Jehova. Isa ka estudyante ang nagbaton sing pagtuon sa Biblia upod sa iya kag nag-uswag tubtob nabawtismuhan. Ang hanuot nga mga panikasog ni Toshio suno sa iya mga pangamuyo ginpadyaan sing bugana.

Daw Ano Ikaw Kahanuot?

Mapakita mo sa nagkalainlain nga paagi nga hanuot mo nga ginapangita si Jehova kag ang iya mga pagpakamaayo. Una, may importante nga mga butang nga dapat ka himuon, subong sang paghanda sing maayo sa Cristianong mga miting. Paagi sa nahandaan sing maayo nga mga komento, makapahulag nga mga pamulongpulong, kag epektibo nga mga pasundayag, ginapakita mo kon daw ano ikaw kahanuot sa imo pagpangita kay Jehova. Mapakita mo man ang imo pagkahanuot paagi sa pagpauswag sang kalidad sang imo ministeryo. Ngaa indi mo pagtinguhaan nga mangin mas mainabyanon pa sa imo pagpakigsugilanon sa tagbalay kag gamiton ang epektibo nga mga introduksion nga nagakabagay sa inyo teritoryo? (Colosas 3:23) Paagi sa tinagipusuon nga panikasog, ang isa ka Cristiano nga lalaki mahimo makabaton sing mga asaynment sa kongregasyon, subong sang pag-alagad bilang isa ka ministeryal nga alagad ukon isa ka gulang. (1 Timoteo 3:​1, 2, 12, 13) Paagi sa imo kahanda nga gamiton, mabatyagan mo ang kalipay sa paghatag. Mahimo ka mag-aplay sa pag-alagad sa isa ka proyekto sang pagtukod sa sanga ukon sa sanga talatapan sang mga Saksi ni Jehova. Kon ikaw kalipikado kag di-minyo nga lalaki, mahimo luyag mo mag-eskwela sa Ministerial Training School, nga nagahanas sa espirituwal nga mga lalaki nga mangin maayo nga mga manugbantay. Kon minyo ka, ang pag-alagad subong isa ka misyonero mahimo mangin isa ka paagi agod mapakita ang imo hanuot nga handum sa pag-alagad kay Jehova sing kapin pa. Ang pagsaylo kon diin daku ang kinahanglanon nga mga manugbantala sang Ginharian mahimo posible sa imo.​​—⁠1 Corinto 16:9.

Ang pinakaimportante amo ang espiritu nga imo ginapakita sa pagtuman sang imo asaynment. Ano man ang responsabilidad nga ginhatag sa imo, panikasugi nga tumanon ini sing hanuot, sing mapagsik, kag may “sinsero nga tagipusuon.”  (Binuhatan 2:​46; Roma 12:8) Dapat mo tamdon ang tagsa ka asaynment subong isa ka kahigayunan agod mapakita ang imo kalangkag sa pagdayaw kay Jehova. Mangayo pirme sing bulig kay Jehova sa pangamuyo, kag himua ang imo bug-os nga masarangan. Nian maani mo ang isa ka bugana nga pagpakamaayo.

Ginapadyaan ang Hanuot nga mga Panikasog

Nadumduman mo bala ang Cristianong lalaki nga nangamuyo nga malandas niya ang katahap agod mabantalaan niya ang iban nga mga pasahero? Ginpakamaayo ni Jehova ang iya hanuot nga pangabay. Gingamit sang utod ang isa ka mainabyanon nga pagpalapit, ginhandaan ang pila ka topiko agod makasugod sing mga paghambalanay. Gingamit man niya sing epektibo ang Biblia agod mapanaksihan ang isa ka lalaki nga nabalaka tuhoy sa mahuol nga kaangtanan sang mga tawo. Ang pila ka pagduaw liwat sa tren nagresulta sa isa ka pagtuon sa Biblia sa puluy-an. Ginpakamaayo gid ni Jehova ang iya hanuot nga mga panikasog!

Mahimo matigayon mo ang kaanggid nga mga resulta kon padayon mo nga ginapangita sing hanuot si Jehova. Kon mapainubuson nga nagapadayon ka kag tinagipusuon nga ginahimo ang imo teokratiko nga hilikuton, gamiton ka ni Jehova nahisuno sa iya mga katuyuan kag pakamaayuhon ka sing bugana.

[Retrato sa pahina 26]

Ano ayhan ang natabo sa sining babayi kon wala sia nagpamilit?

[Retrato sa pahina 27]

Padayon ka bala nga nagapakitluoy sing pagpakamaayo ni Jehova?

[Mga retrato sa pahina 28]

Paano mo mapakita nga hanuot mo nga ginapangita si Jehova?